نئی دہلی، 19 اپریل 2022:

وزیراعظم جناب نریندر مودی نے آج گجرات کے جام نگر میں عالمی ادارہ صحت گلوبل سینٹر فار ٹریڈیشنل میڈیسن (جی سی ٹی ایم) کا سنگ بنیاد رکھا۔ اس اہم تقریب میں ماریشس کے وزیر اعظم جناب پرویند کمار جگناتھ اور عالمی ادارہ صحت (ڈبلیو ایچ او) کے ڈائریکٹر جنرل ڈاکٹر ٹیڈروس گیبریسس نے شرکت کی۔ آیوش کی وزارت اور عالمی ادارہ صحت گجرات کے جام نگر میں دنیا کا پہلا اور واحد عالمی مرکز برائے روایتی طب (ڈبلیو ایچ او جی سی ٹی ایم) قائم کر رہے ہیں۔

اس موقع پر خطاب کرتے ہوئے وزیراعظم نے کہا، ''عالمی ادارہ صحت گلوبل سینٹر فار ٹریڈیشنل میڈیسن اس شعبے میں بھارت کے تعاون اور صلاحیت کا اعتراف ہے۔ بھارت کا روایتی طب کا نظام صرف علاج تک محدود نہیں ہے۔ یہ زندگی کی ایک جامع سائنس ہے۔ بھارت اس شراکت داری کو پوری انسانیت کی خدمت کی ایک بہت بڑی ذمہ داری کے طور پر لیتا ہے۔ "

وزیر اعظم نے یہ بھی کہا کہ دنیا آج صحت کی دیکھ بھال کی فراہمی کی نئی جہت کی تلاش میں ہے۔ انہوں نے کہا کہ مجھے خوشی ہے کہ 'ایک سیارہ ایک صحت' کا نعرہ دے کر عالمی ادارہ صحت نے 'ایک زمین، ایک صحت' کے بھارتی تصور کو فروغ دیا ہے۔ انہوں نے مزید کہا کہ بھارت کے لیے یہ بے حد فخر کی بات ہے کہ 2023 کو اقوام متحدہ نے باجرے (ملیٹس) کے بین الاقوامی سال کے طور پر منتخب کیا ہے۔ "

تقریب میں گجرات کے وزیر اعلی جناب بھوپیندر پٹیل، آیوش کے مرکزی وزیر جناب سربانند سونووال، صحت اور خاندانی بہبود اور کیمیکلز اور کھادوں کے وزیر ڈاکٹر منسکھ منڈاویا، آیوش کے وزیر مملکت ڈاکٹر منجپارہ مہندر بھائی کالوبھائی اور آیوش اور حکومت گجرات کی وزارت کے دیگر سینئر عہدیداروں نے شرکت کی۔

جی سی ٹی ایم پورے جنوب مشرقی ایشیائی ممالک کے لیے ایک اہم سنگ میل ہے۔ اس بات کا اعتراف بنگلہ دیش، نیپال اور بھوٹان کے وزیر اعظم نے تقریب میں نشر کردہ ریکارڈ شدہ ویڈیو پیغام کے ذریعے کیا۔

اس موقع پر ڈاکٹر ٹیڈروس گھبریسس نے کہا کہ "روایتی ادویات کی مصنوعات عالمی سطح پر بہت مقبول ہو رہی ہیں اور یہ مرکز روایتی ادویات کے وعدے کو عملی جامہ پہنانے میں بہت آگے بڑھے گا۔ نیا مرکز ڈیٹا، اختراع اور پائیداری پر توجہ مرکوز کرے گا اور روایتی ادویات کے استعمال کو بہتر بنائے گا۔ انہوں نے کہا کہ روایتی طب کے لیے عالمی ادارہ صحت کا عالمی مرکز واقعی ایک عالمی منصوبہ ہے۔ اس مرکز کے ذریعے بھارت روایتی طب کے اپنے علم کو دنیا تک لے جا سکے گا اور اسی طرح دنیا بھارت کے در تک آئے گی۔ انہوں نے بھارت میں اس مرکز کے قیام میں وزیر اعظم نریندر مودی کے تعاون پر ان کا شکریہ ادا کیا۔

آیوش کے مرکزی وزیر جناب سربانند سونووال نے حاضرین سے خطاب کرتے ہوئے کہا، "بھارت ازل سے روایتی طب کے شعبے میں پیش پیش رہا ہے۔ علم کے اشتراک اور تعاون کو تاریخ میں دستاویزی شکل دی گئی ہے اور اسی کے تسلسل میں حکومت ہند کی وزارت آیوش کی جانب سے مسلسل توجہ مرکوز کی گئی ہے۔ گلوبل سینٹر کا قیام اس میدان میں ہم آہنگی اور تعاون لانے کی ایک کوشش ہے جس سے تمام رکن ممالک کو فائدہ ہوگا۔

وزیر موصوف نے مزید کہا کہ آیوش کی وزارت نے گجرات کے جام نگر میں عالمی ادارہ صحت گلوبل سینٹر آف ٹریڈیشنل میڈیسن کو حقیقت روپ دینے کے لیے شاندار پہل اور مسلسل رہنمائی پر وزیر اعظم ہند جناب نریندر مودی کا شکریہ ادا کیا۔

گجرات کے وزیر اعلی جناب بھوپیندر پٹیل نے کہا، ''ہمارے وزیر اعظم نریندر مودی کی رہنمائی میں یوگ، آیوروید اور دیگر روایتی ادویات کا علم دنیا کے ساتھ شیئر کیا جارہا ہے اور یہ عالمی شہریوں کی مجموعی صحت اور بہبود کے لیے مفید ثابت ہوا ہے۔ 'بہوجن ہیتے، بہوجن سکھے' کا سنسکرت سوتر پر یعنی "سب کی فلاح و سب کی بہبود" اس کلی طریقہ علاج سے عمل کیا جائے گا۔"

عالمی ادارہ صحت جی سی ٹی ایم کا بنیادی مقصد جدید سائنس اور ٹیکنالوجی کے ذریعے دنیا بھر سے روایتی ادویات کی صلاحیت کو بروئے کار لانا اور دنیا بھر میں کمیونٹیز کی مجموعی صحت کو بہتر بنانا ہے۔ مرکز روایتی ادویات کی صلاحیت کو اجاگر کرے گا اور اس کے محفوظ اور موثر استعمال کو فروغ دینے کے لیے تکنیکی ترقی کو استعمال کرے گا۔

گجرات کے جام نگر میں بھارت میں عالمی ادارہ صحت گلوبل سینٹر فار ٹریڈیشنل میڈیسن کا عبوری دفتر گجرات کے انسٹی ٹیوٹ آف ٹریننگ اینڈ ریسرچ ان آیوروید (آئی ٹی آر اے) میں ہوگا۔ اس مرکز کو حکومت ہند کی طرف سے تقریبا 250 ملین امریکی ڈالر کی سرمایہ کاری سے مدد ملے گی۔

روایتی طب صحت کی دیکھ بھال کے نظام کا ایک اہم ستون ہے اور نہ صرف بھارت بلکہ دنیا بھر میں اچھی صحت اور بہبود کو برقرار رکھنے میں اہم کردار ادا کرتی ہے۔ حالیہ سال میں روایتی ادویات کے علاج میں بھی مصنوعی ذہانت کے استعمال سے ایک بڑی تبدیلی دیکھی گئی ہے، تکنیکی اختراعات نے اسے عوام کے لیے زیادہ قابل رسائی بنا دیا ہے۔ جی سی ٹی ایم کا مقصد روایتی طب کے فوائد کو جدید سائنس کی کامیابیوں کے ساتھ مربوط کرنا اور صحت کی جامع حکمت عملی تشکیل دینا ہوگا۔

***

U. No. 4449

(ش ح - ع ا- ع ر)

(Release ID: 1818228) Visitor Counter : 130