প্রধান মন্ত্রী, শ্রী নরেন্দ্র মোদীনা ঙসি নই দিল্লীদা প্রধানমন্ত্রী শংগ্রালয়া শঙ্গাখ্রে।

কেন্দ্রগী কলচর, তুরিজম অমসুং দোনরগী মন্ত্রী, শ্রী জি.কে. রেদ্দী; কলচর অমসুং এক্সতর্নেল এফিয়র্সকী মন্ত্রী, শ্রীমতি মীনাক্সি লেখি, কেন্দ্রগী কলচর অমসুং পার্লিয়ামেন্তরী এফিয়র্সকী মন্ত্রী, শ্রী অর্জুন রাম মেঘৱাল; নেহরু মেমোরিয়েল ম্যুজিয়ম এন্দ লাইব্ররী (এন.এম.এম.এল.)গী এক্জিক্যুতিব কাউন্সিলগী চেয়রপার্সন, শ্রী ন্রিপেন্দ্র মিশ্রা; হান্নগী প্রধান মন্ত্রীশিংগী ঈমুং-মনুংশিং অমসুং মশীং য়াম্লবা অতোপ্পা দিগ্নিতরীশিংনা থৌরম অদুদা শরুক য়াখি।

থৌরম অসিদা ৱা ঙাংবদা, প্রধান মন্ত্রীনা ঙসি পাংথোক্লিবা কুমহৈ কয়াগী মতাংদা পনখি। মহাক্না বাবাসাহেব অম্বেদকরগী মফমদা ইকায় খুম্নবা উৎলদুনা অসুম্না হায়খি, “বাবাসাহেবনা মরু ওইবা আর্কিতেক্ত ওইরিবা ভারতকী সংবিধান অসিনা ঐখোয়দা পার্লিয়ামেন্তকী পথাপ অমা পীবিরি। মসিগী পথাপ অসিগী খ্বাইদগী মরু ওইবা থৌদাংদি লৈবাক্কী প্রধান মন্ত্রীগী লোইশঙদা লৈ। ঐহাক্না ঙসি লৈবাক্কী মফমদা প্রধান মন্ত্রীশিংগী ম্যুজিয়ম অমা কত্থোকপা ফংবা অসি ঐহাক্কী ওইনা য়াম্না লাইবক ফবনি”। থৌরম অসিদা শরুক য়ারিবা মমাংগী প্রধান মন্ত্রীশিংগী ইমুং মনুংগী মীওইশিংবু মহাক্না শকখঙবগা লোয়ননা মখোয়গী মফমদা য়াইফ পাউজেল পীখি।

প্রধান মন্ত্রীনা অসুম্না মিৎয়েং চঙখি, “লৈবাক অসিনা নীংতম্বগী অমৃত মহোৎসব পাংথোক্লিবা মতমসিদা মসিগী ম্যুজিয়ম অসিনা অচৌবা ইথিল পীবা থৌওং অমা ওইরি। মসিগী চহি ৭৫ অসিদা, লৈবাক অসিনা চাউথোকচনীংঙাই ওইরবা মিৎকুপ কয়া উবা ফংখ্রে। মিৎকুপশিং অসিনা পুৱারীদা মরু ওইবা ফম অমা কল্লিবা অসিগা চাংদম্ননীংঙাই ওইবা অমত্তা লৈত্রি”।

নীংতম্বা হেক ফংলবা মতুংদগী পাল্লকখিবা সরকারশিংনা পাংথোক্লম্বা থবকশিংবু প্রধান মন্ত্রীনা থাগৎখি। মহাক্না হায়খি, “নীংতম্বা ভারত্তা শেমখিবা সরকার খুদিংনা লৈবাক অসিনা ঙসি লৈরিবা থাক অসিদা য়ৌনবা শরুক তম্লমখি। ৱাফম অসি ঐহাক্না লাল কিলাদা কয়ারক হন্না হায়খ্রবনি”। প্রধান মন্ত্রীনা “ম্যুজিয়ম অসি সরকার অমমমগী অপুনবা হেরিতেজকী অহিংবা মমি অমনি” হায়খি। লৈবাক্কী প্রধান মন্ত্রী খুদিংনা গনতন্ত্রা চৎপা লৈবাক অমগী পান্দম খুদিং ফংনবা মশক থোক্না তেংবাংলমখি হায়না প্রধান মন্ত্রীনা মখা তাখি। “মখোয়বু নীংশিংবা হায়বসিনা নীংতম্বা ভারতকী খোঙচৎ খঙবা হায়বনি। মফমসিদা লাকপা মীওই খুদিংনা লৈবাক্কী মমাংগী প্রধান মন্ত্রীশিংনা লৈবাক্কীদমক্তা শরুক তম্লম্বা খুদিংমক খঙবা ঙমগনি, মখোয়গী হৌরকফম, মখোয়না থেংনখিবা অৱাবশিং অমসুং মখোয়না শেম্লম্বা খুদিংমক খঙবা ঙমগনি”, হায়না মহাক্না হায়খি।

প্রধান মন্ত্রী কয়া অমদি ইচম চম্বা ইমুংদগী থোক্লকখিবনি হায়বা ৱাফম অসিদা প্রধান মন্ত্রীনা চাউথোকচবা ফোংদোকখি। অসিগুম্বা লুচিংবশিং অসিনা য়াম্না লাইরবা, লৌমীগী ইমুংদগী থোক্লক্তুনা প্রধান মন্ত্রীগী ফম য়ৌখি হায়বা ৱাফম অসিনা ভারতকী গনতন্ত্রগী পথাপ অমসুং মসিগী চৎনবীদা থম্বা থাজবা হেনগৎহল্লি হায়না মহাক্না হায়খি। “অচম্বা ইমুংদা পোকপা মীওই অমসু ভারতকী গনতন্ত্রগী পথাপকী খ্বাইদগী ৱাংবা থাক্তা য়ৌবা ঙম্মি হায়বসিনা লৈবাক্কী নহাশিংদা মশাদা থাজহল্লি”, হায়না শ্রী মোদীনা ফোংদোকখি। ম্যুজিয়ম অসিনা তুংগী চারোন-শুরোনগী এক্সপেরিএন্স হেনগৎহনগনি হায়বগী থাজবা থমখি। ঐখোয়গী নহারোলশিংনা নীংতম্বা ভারতকী মরু ওইবা থৌদোক কয়া খঙলিবমখৈ, মখোয়গী ৱারেপ্না লৈবাক্কা চুনবা হেনগনি, হায়না মহাক্না হায়খি।

ভারতকী ইনাক খুল্লবা পুৱারী অমসুং য়াইফরবা মতম্বু নীংশিংলদুনা, প্রধান মন্ত্রীনা ভারতকী হেরিতেজ অমসুং খুদোল কয়াগী মতাংদা তসেংবা ৱারোল খঙহনবগী তঙাই ফদবা লৈ হায়খি। ভারত্তগী হুরানখিবা পোৎলমশিংবু মীরমদগী পুরক্নবা হোৎনরিবা, মশক থোকপা হেরিতেজকী মফমশিংবু ইকায় খুম্নরিবা, জালিয়ানৱালা বাঘকুম্বা মফমশিংদা নীংতম লান্মীশিংগী পুন্সিবু নীংশিংদুনা থম্লিবা, পাঞ্চ তীর্থনা বাবাসাহেবপু ইকায় খুম্নদুনা নীংশিংলিবা, নীংতম লান্মীশিংগী ম্যুজিয়ম, ত্রাইবেলশিংগী পুৱারীগী ম্যুজিয়ম অসি মাইকৈ অসিদা পায়খৎপা খোঙথাং অমনি হায়না মহাক্না পনখি।

মপুং ওইবা প্রেস রিলীজগীদমক্তা অসিদা ক্লিক তৌবীয়ু

 

থৌরম অদুদা, কেন্দ্রগী মন্ত্রী, শ্রী জি. কে. রেদ্দীনা হায়খি “ঙসি অসি ফাদর ওফ ইন্দিয়ন কন্সতিত্যুশন, শ্রী বি.আর. অম্বেদকরগী মপোক কুমওন্নি। বাবাসাহেবনা পীরম্বা কন্সতিত্যুশন অদু ১৯৫০গী জনুৱারী ২৬তা এদোপ্ত তৌখি, অদুবু মসিগী অশেংবা ইসেন্সতা ইমপ্লিমেন্ত তৌখিবা অসি ২০১৯দা আর্তিকল ৩৭০ লৌথোক্লবা মতুংদতা ওইরক্লিবনি”। “ঙসি ম্যুজিয়ম শঙ্গাবা অসিনা ভারতকী ফজবা অমসুং ভারতকী ফজরবা গনতন্ত্রগী চৎনবীশিং অদুবু সেলেব্রেত তৌরিবনি”। কলচর মন্ত্রীনসু মখা তারকখি “ভারতকী অশেংবা অমসুং ভাব্রেন্ত ওইবা গনতন্ত্র অমা ওইবনা, ঙসিদি অচম্বা ইমুং অমদগী মীওই অমনা লৈবাক অসিগী প্রধান মন্ত্রী ওইরে অমসুং মহাক্না ফীদম্নিংঙাই ওইবা লুচিংবা অমা ওইনা মশক তাক্লে। মসিনি লৈবাক অসিগী গনতন্ত্রগী শক্তি, মরু ওইবা অমসুং চাউরবা মপাঙ্গল”।

এন.এম.এ.এল.গী একজিক্যুতিব কাউন্সিলগী চেবরপার্সন, শ্রী ন্রিপেন্দ্র মিশ্রানা মহাক্কী ৱেলকম এদ্রেসতা হায়খি মদুদি মসিগী শংগ্রালয়া অসিনা লাক্কদবা মতমশিংদা হাউস ওফ দেমোক্রেসী হায়না মশক খঙনরগনি। এন.এম.এম.এল.গী একজিক্যুতিব কাউন্সিলগী চেয়রমেন, শ্রী এ. সুর‍্যা প্রকাশনা ভোত ওফ থেঙক্স পীখি।

প্রধান মন্ত্রী শংগ্রালয়া অসি নীংতম্লবা মতুংদগী ভারতকী প্রধান মন্ত্রী খুদিমক্তা স্রধাঞ্জলি কৎপনি অমসুং মখোয় খুদিংমক্না লৈবাক অসিগী চাউখৎ-থৌরাংদা করম্না থৌদাং লৌরম্বগে হায়বগী মতাংদা লীরিবা রেকোর্দ অমনি। পএধানমন্ত্রী শংগ্রালয়া অসিনা কন্তেন্ততা হেতরোজেনিতী লৈহন্নবা অমসুং দিসপ্লে অদুবু তোইনা রোতেশণ তৌনবা তেক্নোলোজীদা য়ুমফম ওইবা ইন্তরফেস শিজিন্নখি।

ম্যুজিয়মগী অকুপ্পা মরোল পুম্নমক্কীদমক্তা অসিদা ক্লিক তৌবীয়ু

*****

(Release ID: 1817006) Visitor Counter : 154