সাইন্স অমসুং তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ); আর্থ সাইন্সকী কেন্দ্রগী রাজ্য মন্ত্রী (ইন্দিপেন্দেন্ত চার্জ); এম.ও.এস., পি.এম.ও., পর্সোন্নেল, পব্লিক গ্রাইভেন্স, পেন্সন, এতোমিক ইনর্জী অমসুং স্পেস, দাঃ জিতেন্দ্র সিংহ অমসুং খুঙ্গং চাউখৎ-থৌরাং অমসুং পঞ্চায়তী রাজ মন্ত্রী শ্রী গিরিরাজ সিংহনা এপ্রিল ২৪, ২০২২গী লৈবাক শিনবা থুংবগী ‘পঞ্চায়তী রাজ দিবস’কী থৌরমদা প্রধান মন্ত্রীনা জম্মুদা চত্তুনা য়াওগদবা অসিগা মাংওইননা মরী লৈনবা ৱাফম অমসুং শিংনবা কয়াগী মতাংদা খন্ন-নৈনদুনা ফজহন্নবা শেমদোকখ্রে।

কেন্দ্রগী মন্ত্রী দাঃ জিতেন্দ্র সিংহ অমসুং শ্রী গিরিরাজ সিংহনা থা অসিগী ২৪গী প্রধান মন্ত্রীগী জম্মুগী থৌরমগী একজিবিসনগী থীমশিং হেন্না ফজহন্নবা শেমদোক-শেমজিন তৌখ্রে।

প্রধান মন্ত্রীনা লৈবাক্কী ‘পঞ্চায়তী রাজ দিবস’ থৌরমগী খোঙচৎকা মাংওইননা পাংথোকখিবা শেম-শাবগী মীফমদা, ভারত সরকার তোঙানবা মন্ত্রালয়/বিভাগশিংনা শরুক য়াখি অমসুং মসিদা খুঙ্গংগী চাউখৎ-থৌরাং অমসুং পঞ্চায়তী রাজ মন্ত্রী শ্রী গিরিরাজ সিংহ য়াওনা সাইন্স অমসুং তেক্নোলোজী সাইন্স বিভাগ ৬, কাউন্সিল ওফ সাইন্তিফিক অমসুং ইন্দস্ত্রীএল রিসর্চ, বাইওতেক্নোলোজী, স্পেস, এতোমিক ইনর্জী অমসুং আর্থ সাইন্সসু শরুক য়াখি।

থৌরম অসিগা মরী লৈনবা থৌওং অমা ওইনা, প্রধান মন্ত্রীগী থৌরমগী একজিবিসন পাংথোকফমদা হৌজিক ফাওবগী ওইনা, সাইন্স অমসুং তেক্নোলোজীগী কেন্দ্রগী মন্ত্রালয়গী তোঙানবা বিভাগ অমসুং মশাশিংনা স্তোল ২৫দগী ৩০ ফাওবা থম্লে অমসুং মখোয়না খুঙ্গংগী মফমশিং অমসুং লৌউবদা কান্নগদবা খ্বাইদগী নৌবা তেক্নোলোজী অমসুং থৌওং কয়া উৎকনি।

খুঙ্গংশিংদা লাইরবা লৈতবা অমসুং পুন্সি মহিং হেন্না ফগৎহনবা, হকশেল ফবা খুঙ্গং, অঙাংশিংগা চুনবা খুঙ্গং, ঈশিং মতিক চানা ফংবা খুঙ্গং, লু-নানবা অমসুং গ্রীন খুঙ্গং, খুঙ্গংশিংদা মরোমদোম লেপচবা ঙম্বা ইনফ্রাস্ত্রকচর লৈবা, অচেৎপা খুন্নাই লৈবা খুঙ্গং, অফবা লৈঙাক লৈবা খুঙ্গং অমসুং খুঙ্গংশিংদা চাউখৎপা লৈহনবা হায়না শকখঙলবা অমসুং সাইন্স মন্ত্রালয়গী তোঙানবা বিভাগশিংনা থবক ওইনা পাংথোক্কদৌরিবা থীম অসিনা খুঙ্গংগী মীয়ামগী ইমুং-মনুংগী চাগা হেনগৎহন্দুনা অচৌবা অহোংবা অমা পুরক্কনি হায়না দাঃ জিতেন্দ্র সিংহনা পাউদমখি।

স্তোলশিং অসি “থীম সিক্বেন্স”কী মতুং ইন্না থমগনি অমসুং স্তোলশিং অসিগী মরক্তগী ২৫দগী ৩০দি সাইন্স মন্ত্রালয়/বিভাগ ৬কীনি, মখোয়শিংবু খুঙ্গং চাউখৎ-থৌরাং মন্ত্রালয় অমসুং জম্মু অমসুং কশ্মির য়ু.তি. সরকারনা থম্বা স্তোলশিংগা মথং মনাও নাইনা থম্বনি। মতমগা চুনবা তেক্নোলোজীগী অনৌবা খুৎলায় কয়াগী খুত্থাংদা লৌউ-শিংউবা অমসুং রিজেনেরেসন তৌবনা একজিবিসন অসিগী মরু ওইবা থৌওং ওইগনি হায়না মন্ত্রীনা পাউদমখি।

দি.বি.তি.গী বাইও-তেক কিসান স্কিম ওইরো, লৌউ-শিংউগী মতাংদা খ্বাইদগী ফবা থৌওং উৎপা স্তোল, দ্রোন ফার্মিংবু লৌমীশিংগী য়াইফ য়ুম্বালগীদমক্তা কেন্দ্র অমসুং য়ু.তি. সরকারনা পায়খৎলিবা খোঙথাংশিংনা শৌগৎকনি হায়না দাঃ জিতেন্দ্র সিংহনা হায়খি। এরোমা মিসন অমসুং পর্পল রিভোল্যুসন, ফ্লোরিকলচর মিসন, ৱাবু মতমগা চুননা শিজিন্নবা, ৱেস্তৱাতর মেনেজমেন্ত উৎপা স্তোলশিংসু লৈগনি হায়না মহাক্না মখা তানা হায়খি।

সাইন্স অমসুং তেক্নোলোজীগা খুঙ্গং চাউখৎ-থৌরাং অমসুং পঞ্চায়তী রাজকী থীমগা পুন্সিনবা থৌওং উৎপা স্তোলশিংসু মীচম মীয়ামগী কান্ননবগীদমক্তা থমগনি হায়না মন্ত্রীনা হায়খি। থৌরম অসিদা অতৈ মতমদা উৎপা স্তোল থম্বগী মহুত্তা, লৌমীগী চাগাদা অহেনবা কান্নবা পীবা ঙমগদবা অমসুং পঞ্চায়তী রাজকী মওং-মতৌগা লোয়ননা সাইন্সতা য়ুম্ফম ওইবা থৌওং উৎনবগীদমক্তা খ্বাইদগী নৌবা তেক্নোলোজী উৎনবা হোৎনরি হায়না মহাক্না মখা তাখি।

দাঃ জিতেন্দ্র সিংহনা লুচিংবা কাঙবু অমনা নিংথৌকাবা নুমিত্তা জমু অমসুং কশ্মিরগী সাম্বা জিলাদা লৈবা পাল্লি পঞ্চায়তকী প্রধান মন্ত্রী নরেন্দ্র মোদীগী রেলী পাংথোক্কদবা মফম য়েংশিনখ্রবনি হায়বা নীংশিংবা য়াই। থৌরম অসিনা জম্মুদা পাংথোকচরবসু, লৈবাক শিনবা থুংবগী গ্রাম পঞ্চায়ত লাখ কয়ানা থৌরম অসিবু ভর্চুএলগী খুত্থাংদা য়েংবা য়াগনি হায়না মহাক্না হায়খি।

কেন্দ্র মন্ত্রীগা লোয়ননা পাল্লি পঞ্চায়ত্তা চৎখিবা শক্নাইরবা মীওইশিংগী মরক্তা কেন্দ্রগী সাইন্স অমসুং তেক্নোলোজী মন্ত্রালয়গী সাইন্তিফিক অমসুং ইন্দস্ত্রীএল রিসর্চকী মখাদা লৈবা পি.এস.ই., সেন্ত্রেল ইলেক্ত্রোনিক্স লিমিতেদকী সি.এম.দি., প্রকাশ জেনসু য়াওরি। হায়রিবা পি.এস.ই. অসিনা পাল্লি পঞ্চায়ত্তা রেকোর্দ ওইরবা নুমিৎ ২০নিগী মনুংদা সোলার প্লান্ত অমা লিংখৎপগী হৌজিক থবক পায়খৎলিবনি। কে.ভি. ৫০০গী সোলর প্লান্ত অসি পুন্না স্ক্বার মীতর ৬৪০৮ পাক-চাউবা লম অমদা খিনবনি অমসুং মসিনা পঞ্চায়ত অসিগী য়ুম্থোং ৩৪০দা ক্লীন ইলেক্ত্রিসিতী অমসুং মৈ পীদুনা পঞ্চায়ত অসিবু ভারত সরকারগী ‘গ্রাম উর্জা স্বরাজ প্রোগ্রাম’গী মখাদা লৈবা খ্বাইদগী অহানবা কার্বন ন্যুত্রেল পঞ্চায়ত ওইহল্লগনি।

জম্মুগী পঞ্চায়ত পাল্লিবু চহি অসিগী পঞ্চায়তী রাজ দিবস থৌরমগী মফম অমা ওইনা খল্লকখি অমসুং লৌমী, সর্পঞ্চ অমসুং খুঙ্গংগী মকোকশিংবু মখোয়গী চাগা হেনগৎহন্নবা তেংবাংবা ওইনা খ্বাইদগী অনৌবা থৌওং কয়া উৎপা একজিবিসন অমসু উৎকনি। উৎনবা থৌরাং য়াৎলিবশিংগী মরক্তগী মরু ওইবা থৌওংশিংদি খুঙ্গং চাউখৎনবা অমসুং লৌমীশিংগী জিওস্পেসিএল তেক্নোলোজী, নুমিৎ মঙানিগী অইং-অশা তাকপা ঙম্বা লৌমীশিংনা শিজিন্নবা য়াবা এপ, পর্পল রিভোল্যুসন হায়না মমিং চৎলবা লেভেন্দর থাবা, লৌমীশিংগী চাগা হেনগৎহনবদা তেংবাংগদবা চপ মান্নবা লমদা শেমগী পোত্থোক হেনগৎহনবা ঙম্বা বাইওতেক্নোলোজীগী ওইবা অনৌবা থৌওং, তিলহাক হিদাক কাপ্পদা অমসুং ফত্ত-হৌদি ত্রিতমেন্ত তৌবদা শিজিন্নবা য়াবা দ্রোন এপ্লিকেসন, এতোমিক রেদিএসনগী খুত্থাংদা উহৈশিংগী শেল্ফ লাইফ হেনগৎহনবা য়াবা থৌওং কয়ানি।

ঙসিগী মীফম অসিদা অতোপ্পশিংগা লোয়ননা খুঙ্গংগী চাউখৎ-থৌরাংগী কেন্দ্রগী সেক্রেতরী, নাগেন্দ্র নাথ সিনহা, পঞ্চায়তী রাজকী কেন্দ্রগী সেক্রেতরী সুনিল কুমার অমসুং অতোপ্পা বিভাগশিংগী সেনিয়র ওফিসরশিংনি।

<><><><><>