প্রধান মন্ত্রী, শ্রী নরেন্দ্র মোদীনা হকশেল অমসুং য়াইফ য়ুম্বাল মন্ত্রালয়গী বজেৎ মতুংগী ৱেবিনার হৌদোকখ্রে। য়ুনিভর্সেল প্রাইমরী হেল্থকেয়রদা লৈরিবা ভারতকী মপাঙ্গল, মান্নবা হেল্থকেয়র পীনবগীদমক্তা তেক্নোলোজী শিজিন্নবা, হেল্থকেয়রগী অনৌবা মখলগী ৱারোইশিন পুরক্নবগীদমক্তা মতিক লৈবা পব্লিক প্রাইভেৎ পার্ত্নরশিপকী মথৌ তাবা অমসুং মীয়াম খুদিংনা এফোর্দেবল ওইবা, লায়না ফংবা য়াবা হেল্থকেয়র ফংনবগীদমক্তা স্মার্ত প্লেৎফোর্মশিংগী খুত্থাংদা হেল্থকেয়র পীবশিং অমসুং কঞ্জ্যুমরশিংগা পুন্সিন্নবগী মতাংবু মশক থোক্না পুথোকখি। থৌরম অসিদা কায়নবগী ৱারোলনা অয়ূশ মন্ত্রী, শ্রী সর্বানন্দা সোনোৱাল, এম.ও.এস. (ঐচ.এফ.দবল্যু.), দাঃ ভারতী প্রবিন পৱার, নিতি আয়োগকী দাঃ ভি.কে. পাউল অমসুং অয়ূশকী এম.ও.এস., দাঃ মহেন্দ্র মুঞ্জাপারাগী মমাংদা হকশেল অমসুং য়াইফ য়ুম্বালগী কেন্দ্র মন্ত্রী, দাঃ মনশুখ মন্দাবিয়ানা পীখি।

মসিগী ৱেবিনার অসিনা প্রধান মন্ত্রীনা ৱারোল থম্বা বজেৎ মতুংগী ৱেবিনার পরিংগী মঙাশুবনি। কেন্দ্র মন্ত্রী, পব্লিক অমসুং প্রাইভেৎ সেক্তরগী হেল্থকেয়র প্রোফেস্নেল অমদি পেরা-মেদিক্স, নর্সিং, হেল্থ মেনেজমেন্ত, তেক্নোলোজী অমসুং রিসর্চকী প্রোফেস্নেলশিংনা ৱেবিনার অসিদা শরুক য়াখি। ৱেবিনার অসিগী পান্দমদি হেল্থ সেক্তরদা সরকারনা পায়খৎলিবা খোঙথাংশিংবু মাং থানা পুশিনবদা স্তেকহোলদরশিংবুসু শরুক য়াহনবনি।

কেন্দ্রগী হকশেল মন্ত্রীনা মহাক্কী কায়নবগী ৱারোলদা, প্রধান মন্ত্রীনা পুম্নমকপু মনুং চনবা হেল্থকেয়রগীদমক্তা মঙলিবা মঙলান অসিনা হেল্থকেয়রগী তোঙান-তোঙানবা প্লেৎফোর্মশিং পুন্সিন্নবদা লমজিংলি হায়না ফোংদোকখি। “ঙসি, স্তেকহোলদর পুম্নমক্কা কোক চুংশিন্নবনা নাগ্রিকশিংদা মরু ওইবা পীবা হেল্থ কেয়র পোলিসী অমসুং আউতপুত্তা য়ুম্ফম ওইবা প্রোগ্রামশিংবু মতম চানা পাংথোক্নবা নীংথিজনা তাক্লবা ব্লুপ্রিন্ত অমা শেমগনি”, হায়না মহাক্না ফোংদোকখি। প্রাইভেৎ সেক্তর, অখঙ-অহৈ অমসুং হেল্থ সেক্তরগী স্তেকহোলদর য়াওনা নন-গবর্নমেন্ত ওর্গনাইজেসনশিংগা কুপ্না খন্ন-নৈনবগী খুত্থাংদা মখোয়দগী পাউতাক লৌরিবা অসি মন্ত্রালয়গী পোলিসী অমসুং খোঙথাংশিংবু হেন্না মগুন লৈহন্নবা হোৎনবগী খোংথাং অমনি হায়না মহাক্না ফোংদোকখি। “ভারতনা ‘তোতেল হেল্থ অমসুং ৱান হেল্থ’কী ফ্রেমৱর্কপু মসিগী মিৎয়েং চঙলবা, পুন্সিল্লবা অমসুং পুম্নমকপু মনুং চনবগী পোলিসীগী খুত্থাংদা থবক্তা পাংথোক্নবা নীংথিনা শেম শাদুনা লৈরে”, হায়না মহাক্না মখা তাখি। অয়ুর্বেদ অমসুং মেন্তেল হেল্থনা তোতেল হেল্থকী মরু ওইবা পোৎলম অমা শেম্লি অমসুং মসিবু তেলিমেদিসিন সর্ভিসকী খুত্থাংদা হেন্না চাউথোকহনগদবনি।

কেন্দ্রগী বজেৎপু ঙন্না পুথোকখিবা অসিদা অনৌবা মওংদা থেংনবা ওইনা, শেল কায়থবা অমসুং প্রোগ্রাম্বু থবক ওইনা মতম চানা পাংথোক্তুনা অমসুং শেল মতম চানা শিজিন্নদুনা নীংথিনা থৌরাং য়াৎহৌদবদগী ফন্দ শিজিন্নবা য়াদবগী থৌওং অমুক হন্না লৈররোই হায়না মহাক্না মরু ওইবা মিৎয়েং চঙখি। মতমগী পরিংগী মখা পোন্না শেমদোকপগী থৌওং লৈবদগী ভারত অসি মালেমগী প্লেৎফোর্মশিংগা য়েংনবদা মনিঙদা লৈহন্দ্রে। “ঐখোয়গী ভেক্সিন রিসর্চ তৌবা অমসুং পুথোকপগী নীংথিনা থৌরাং য়াৎপগী থৌশিল থৌরাংশিং অসি মালেমগী ওইনা ওইরক্লিবা থৌওংশিং অসিগা চুননা পাংথোকপনি”, হায়না মহাক্না পনখি।

দাঃ মনশুখ মন্দাবিয়ানা তেক্নোলোজীগা লোয়ননা রিসর্চ অমসুং দিভেলপমেন্তকী থৌদাংবু মরু ওইনা পল্লদুনা হায়খিবদা, ঙসিদি ভারতনা লমদম অসিদা পোত্থোক শাজবদা অহেনবা মিৎয়েং চঙখিবনা ভেক্সিন রিসর্চকী মতাংদা মালেমগী মকোক থোংবশিংগী থাক মান্নরে হায়না ফোংদোকখি। তেলিমেদিসিন অমসুং অয়ুশমান ভারত দিজিতেল মিসন্না ভারতপু হকশেল সেক্তরদা অওনবা অমা পুরকপদা অচুম্বা মাইকৈদা থম্লগনি হায়না মহাক্না মখা তানা ফোংদোকখি। তেলিকন্সলতেসন অসি অনৌবা অওনবা অমনি অমসুং মসিনা খ্বাইদগী মনুং হঞ্জিনবা মফমদা ফাওবা হকশেলগী সেবা কয়া য়ৌহল্লি। ঙসিদি, ভারত অসি মালেমগী খ্বাইদগী য়াম্বা ওইনা, হেল্থ আই.দি. করোর ১৭ হেন্না শাদুনা মালেমগী খ্বাইদগী মকোক্তা লৈবা লৈবাক অমা ওইরে হায়না দাঃ মন্দাবিয়ানা ফোংদোকখি।

ৱেবিনার অসিদা মখাগী থীম অহুম অসিগীদমক্তা ব্রেকআউত সেসন লৈখিঃ

1. নিতি আয়োগকী মেম্বর, দাঃ ভি.কে.পাউলনা মোদরেত তৌখিবা অয়ুশমান ভারত দিজিতেল মসিন (এ.বি.দি.এম.)

কেন্দ্রগী হকশেল সেক্রেতরী, শ্রী রাজেশ ভুশন্না এ.বি.দি.এম. অসি মরোমদোম ওইবা দিজিতেল প্লেৎফোর্ম অমা নত্তে, মসিদি ইকোসীস্তেম অমা শেমগদবা থৌওং অমনি অমসুং মসিনা মগুন লৈবা হকশেলগী সেবা পীবগী পান্দমগা লোয়ননা হৌজিক লৈরিবা তোঙানবা মথৌ পাংথোকপা দিজিতেল প্লেৎফোর্মশিংবু অমত্তা ওইনা মথৌ পাংথোকপা ঙমহন্নবা মরী লৈনহনগনি হায়বা ৱাফমদা অহেনবা মিৎয়েং চঙখি।

ৱেবিনার অসিদা শরুক য়ারিবা মীওইশিংনা দিজিতেল হেল্থ কেয়রগী খুত্থাংদা পুন্সিল্লবা, মগুন লৈবা, লায়না ফংবা ঙমগদবা হকশেলগী ৱারোইশিন অমগী মরু ওইবদা মিৎয়েং চঙনখি। এ.বি.দি.এম. অসিনা হকশেলগী কঞ্জ্যুমরশিংদা মখোয়না অপাম্বা হেল্থকেয়র খনবা য়াবা অমসুং হেল্থকেয়রবু পুম্নমক্কী ওইনা মান্নবা কান্নবা ফংহনবা য়াহন্দুনা য়াম্না মরু ওইবনি হায়বা ৱাফম্বু শকখঙখি। ৱাঙাংলোই খরনা এ.বি.দি.এম.বু “গেম চেঞ্জর” অমনি হায়না ফোংদোক্নখি। মসিনা লৈবাক অমগী তোঙান-তোঙানবা হেল্থকেয়র লেন্দস্কেপ অমগী তঙাই ফদবা খ্বাইদগী নেম্বা স্তেন্দর্দ অমা লৈহনবদা মরু ওইরিবা অসি য়াম্না অচৌবা ৱাফম অমনি অমসুং মসিনা সর্ভিস পীরিবা অমসুং সর্ভিসশিংগী নোংদম নাইদবগী চাংবু হন্থহনগনি।

শক্নাইরবা ৱাঙাংলোইশিংনা এ.বি.দি.এম. অসিনা লাইচৎ মতুংদা ওইগদবা ভারতকী হেল্থকেয়রগী ফিভম্বু শেমদোকপা ঙম্বগী মতিক লৈ হায়বা ৱাফম ফোংদোকখি। মসিনা পব্লিক-প্রাইভেৎ দিভাইদ শিনবা থুংবগী দাইগ্নোস্তিক্স লেব, ফার্মাসিস্ত, হোস্পিতালনচিংবগী মরক্তা লৈবা পার্ত্নরশিপশিংবু নীংথিবা মরী লৈহনবা অমসুং মথৌ খায়দোকপগী খুত্থাংদা য়ুনিভর্সেল হেল্থকেয়র পীবগী থৌওংসু হেন্না চাউথোকহনবা য়াগনি। এ.বি.দি.এম.না স্মার্ত স্তার্ত-অপ অমসুং হেল্থকেয়র ইনক্যুবেতরশিংগী খুত্থাংদা ইনোভেসন অমসুং রিসর্চপু পুক্নিং থৌগৎপসু ঙমগনি হায়বা ৱাফমসু অমত্তা ওইনা য়ানখি। দিজিতেল প্লেৎফোর্মশিংনা তোঙানবা মথৌ লৈবা পার্ত্নর কয়াবু শম্নহন্দুনা ঐখোয়না মালেমগী ওইনা হেল্থকেয়র পীরিবশিং অমসুং হেল্থকেয়র কঞ্জ্যুমরশিংদা য়ৌবা ঙম্বগী চাংসু মশক থোক্না হেনগৎহনগনি অমসুং মেদিকেল ভেল্যু তুরিজমদা অহেনবা শাফু পীবসু ঙমগনি। ৱাঙাংলোই খরনা প্লেৎফোর্ম অমদা লৈবা কঞ্জ্যুমর অমগী ওতোমেতেদ ওইনা শীন্দোক্লগা থম্লবা চে-চাংগী খুত্থাংদা মেদিকেল অমসুং হেল্থকেয়রগী রেকোর্দ খুদিংবু খুদক্তা য়েংবা য়াবগী কান্নবগী মরু ওইবসু শকখঙখি।

এন.ঐচ.এ.গী সি.ই.ও., দাঃ আর.এস. শর্মনা হেল্থকেয়র দেতাগী তেক্ত-কায়দবা অমসুং প্রাইভেসীগী হীরমদা মীপাইবা অমসুং অকীবা লৈরিবা অসিবু কোকহনখি অমসুং কঞ্জ্যুমর দেতা অমসুং আইদেন্তিতী অসি নীংথিনা কাঙলোন ইল্লবা প্রোতোকোলগী মখাদা ঙাক-শেন্দুনা থম্মি হায়না ফোংদোকখি। এ.বি.দি.এম.বু হেল্থকেয়র পীরিবা অমসুং কঞ্জ্যুমর অনিগী কান্নবা অমসুং মায় পাকপা প্লেৎফোর্ম অমনি হায়রদুনা তোঙান-তোঙানবা লোলদা শিজিন্নবা য়াহনবা নীংথিনা শেম্লবা এ.পি.আই.গী খুত্থাংদা মখল-মখলগী হেল্থকেয়র সোল্যুসনশিংবু মরী লৈনহন্নবা য়ুনিফাইদ হেল্থ ইন্তর্ফেসকী ফীচর য়াওরি হায়না মহাক্না মীয়ামদা শন্দোক্না তাকখি।

2. পি.ঐচ.এফ.আই.গী প্রসিদেন্ত, প্রোফঃ কে. স্রিনাথ রেদ্দীনা মোদরেত তৌবা নেস্নেল তেলি-মেদিসিন ইনিসিএতিব অমসুং ই-সঞ্জীবনি

“পুম্নমক্না শিজিন্নবা ফংবা, শেল চঙদবা অমসুং পুম্নমক্না কান্নবা ফংবা হেল্থকেয়র’ অমা শোইদনা ফংহনবগী পান্দমগা লোয়নবা ই-সঞ্জীবনিগী তেক্নোলোজী শিজিন্নবগী ত্রজেন্তেসন অমা হকশেল মন্ত্রালয়গী জোইন্ত সেক্রেতরী, শ্রী লব অগর্ৱালনা লান্থোকখি অমসুং মসিদা মহাক্না ই-সঞ্জীবনিবু নেস্নেল তেলিমেদিসিন প্লেৎফোর্ম অমা ওইনা শিজিন্নবগী পাম্বৈগী মতাংদা স্তেকহোলদরশিংগী মফমদা খঙহনখি। মহাক্না ৱেবিনার অসিদা শরুক য়ারিবা মীওইশিংদা হৌজিক ফাওবগী ওইনা ই-সঞ্জীবনি প্লেৎফোর্মদা কনসলতেসন করোর ২.৬৮ হেন্না পাংথোকখ্রে অমসুং অতোপ্পা লৈবাকশিংগা চাংদম্নবা মতমদা হায়রিবা থৌওং অসি মালেমগী থাক্তা মায় পাকপনি হায়না ফোংদোকখি।

মীয়াম খুদিংদা হেল্থকেয়র লায়না, মান্ননা অমসুং শেল চঙদনা ফংহন্নবা সরকারনা পায়খৎলিবা ই-সঞ্জীবনি অমসুং তেলিমেদিসিনগী কান্নবা অমসুং মরু ওইবশিংবু ৱেবিনার অসিদা শরুক য়ারিবা মীওইশিংনা মিৎয়েং চঙখি। ই-সঞ্জীবনিনা হকশেলগী সেক্তরদা অওনবা অমা পুরক্লে অমসুং প্রধান মন্ত্রীগী মঙলানগী মখা পোন্না দিজিতেল দিভাইদকী অহাঙবা লৈরিবা অসিবু য়াম্না থুনা মেনশিল্লি হায়বা ৱাফম য়ানখি। ই-সঞ্জীবনিনা অখন্নবা হকশেলগী সেবাশিং ফংবগী থৌওংদা, মরু ওইনা, খুঙ্গং অমসুং মনুং হঞ্জিনবা মফমশিংদা, মশক থোক্না ফগৎপগী ফিভম অমা পুরকপবু ৱাঙাংলোই খুদিংমক্না থাগৎনখি। মসিগী সেবা অসিনা অর্বানগী মফমদা লৈবা মীওইশিংদসু, মরু ওইনা, লৈবাক অসিদা হেল্থকেয়র ফংহনবদা অচৌবা অয়েৎপা পীখিবা হৌজিক চত্থরিবা কোবিদ-১৯ লাইচৎকী অনিশুবা ৱেবকী মতমদা কান্নবা য়াম্না পীরি। কোবিদ-১৯না লৈবাক অসিদা তেলিমেদিসিনগী থৌওং শিজিন্নবদা মশক থোক্না তেংবাংখি অমসুং দিজিতেল হেল্থ সর্বিসকী ফুৎপ্রিন্তসু হেনগৎহনখি হায়না ৱাঙাংলোই খরনা ফোংদোকখি। হকশেলগী সেক্তরদা অনৌবা মখলগী তেক্নোলোজী শিজিন্নবগী থৌওংনা হেল্থকেয়র পেরাদাইম শেমদোকপগী মতিক লৈ অমসুং ই-সঞ্জীবনিনা সেক্তর অসিগী শাহৌ লৌবসু য়াম্না হেনগৎহনবা ঙমগনি হায়না পুম্নমক্না য়ানবা অমা পুরকখি।

ই-সঞ্জীবনি অসিবু খুন্নাইগী মরক্তা শিজিন্নবা হেনগৎহন্নবা অতোপ্পা অখন্নবা হীরম খরগা পুন্সিন্না য়াগনি হায়বা ৱাফমসু ৱাঙাংলোই খরনা ফোংদোকখি। মসিগী সেবাশিং অসি জেলদা লৈবা ফাদোক তারবা মীওই, ওল্দ এজ হোমদা লৈবা মীওইনচিংবা লৈবাক্কী মীশিংগী তোখাইনা তারবা মীওইশিংদসু শিজিন্নহনবা য়াগনি। ই-আই.সি.য়ু. অমসুং রীমোত হেল্থকেয়র মোনিতরিং তৌবগী অনৌবা মখলগী ৱারোইশিন কয়াসু প্লেৎফোর্ম অসিগী খুত্থাংদগী পীবা য়াগনি। প্লেৎফোর্ম অসিবু সি.এম.ই.গী দাক্তর, পেরামেদিক্স অমসুং অতোপ্পা স্তাফশিংগীদমক্তা কন্তেন্ত মেনেজমেন্ত সীস্তেম (সি.এম.এস.) অমগী খুত্থাংদগী তেলি-মেন্তরিং প্লেৎফোর্ম অমা ওইনা শিজিন্নবসু য়াগনি। ই-সঞ্জীবনি অসিদা খ্বাইদগী তোঙানবা তেক্নোলোজী অমসুং এ.আই.না মথৌ তৌহনবা চেৎবোত শিজিন্নদুনা দিজিতেল প্লেৎফোর্ম খুদিংগী গেতৱে ওইবসু য়াগনি হায়না অখঙ-অহৈশিংনা হায়খি। মসিনা তেলি-ফোলো-অপ অমসুং রিফরেল তৌবগা লোয়ননা ভেতেরিনারী সর্ভিসপুসু ঙাক্লৌ পীবা য়াগনি। ঐখোয়গী নাগ্রিকশিংদা মগুন লৈবা সেবা শোইদনা ফংহন্নবগীদমক্তা পব্লিক প্রাইভেৎ পার্ত্নরশিপ (পি.পি.পিপ.) মোদেলগী খুত্থাংদা মনুং হঞ্জিনবা লমদমশিংদা থেংনবা কন্নেক্তিবিতীগী খুদোংচাদবশিং অসিবুসু খন্নদুনা মরী লৈনবা ৱারোইশিন পুরকপগী তঙাই ফদবা লৈ হায়না অখঙ-অহৈশিংনা খন্নখি। মপুং ওইবা থৌওং অমগীদমক্তা খন্নবা ওইনা, লেবর অমসুং রেলৱেগুম্বা অতোপ্পা মন্ত্রালয়শিংগী তোঙান-তোঙানবা প্লেৎফোর্মশিংসু অমত্তা ওইনা পুন্সিন্নবা য়াগনি। ঐখোয়গী ৱারোইশিন অসিবু অতোপ্পা লৈবাক্কী লান্ননবগীদমক্তা করম্বা থৌরাং য়াৎপা য়াবগে হায়বগী খন্নবগী মতাংদসু ৱেবিনার অসিদা মিৎয়েং চঙখি।

শক্নাইরবা ৱাঙাংলোইশিংনা মখোয় মশানা মখোয়গী নেতৱর্ক্কী খুত্থাংদা তেলিকন্সলতিংবু খুমাং চাউশিলহন্নবা হোৎনখিবশিংগী মতাংদা অমসুং য়ুনিভর্সেল হেল্থকেয়র পীবা ঙম্নবগীদমক্তা সরকারগা তেংবাংনদুনা ই-সঞ্জীবনি প্লেৎফোর্ম অসিদা থবক তৌমিন্নবা পাম্বগী ৱাফমসু ফোংদোক্নখি। ই-সঞ্জীবনি প্লেৎফোর্ম অসিদা য়াওইরিবা খুদোংচাবশিংবু অহেনবা মীয়ামদা ফংহনবা ঙম্নবগীদমক্তা তেলি-আই.সি.য়ু., তেলি-ইমর্জেন্সী, অয়ুর্বেদ অমসুং তেলি-ওপরেসনবু ই-সঞ্জীবনি এপ্তা হৌদোকপগী মতাংদসু মখোয়না খন্ন-নৈনখি। সেসন অসিদা শরুক য়ারিবশিংনা করিগুম্বা ৱান ইন্দিয়া, ৱান হেল্থকী পান্দম অসি ফংগে হায়রবদি, তেলিমেদিসিন অসিনা শোইদ্রবা পাম্বৈ অমনি হায়না য়ানখি।

3. নিমহান্সকী দাইরেক্তর, দাঃ প্রতিমা মুর্তীনা মোদরেত তৌবা তেলি মেন্তেল হেল্থ প্রোগ্রাম

এন.ঐচ.এম.কী এ.এস. অমসুং এম.দি., শ্রী বিকাস শীলনা হৌদোকপগী প্রজেন্তেসন লান্থোকখি। ৱাঙাংলোইশিংনা খোঙথাং অসিবু তরাম্না ওক্নরদুনা থম্লিবা ৱাহৌদোক অসি মতমগা চুনবা খোঙথাং অমনি, মরু ওইনা, হৌজিক্কী লাইচৎ অসি য়েংলুরগা, হায়বা ৱাফম য়ানখি। অসিগুম্বা মতম চানা থবক পায়খৎপগী থৌওং অসিনা থৱাই য়াওবা লৈঙাকপগী মশক তাক্লি।

তেলি-মেন্তেল হেল্থকী প্রোগ্রাম অমগী ৱাহৌদোক থম্লিবা অসিনা প্রাইভেৎ সেক্তর অমসুং অয়ুশ প্রোভাইদর য়াওনা, মান্নবা প্লেৎফোর্ম অমদা স্তেকহোলদর অমসুং সর্বিস পুম্নমকপু পুরক্তুনা য়েংশিনবীবা হায়বগী ৱাহন্থোক্কী (প্রাইমরী, সেকন্দরী অমসুং তর্সিএরী) মনুংদা মেন্তেল হেল্থকা মরী লৈনবা হীরম খুদিংমক কোনবগী তঙাই ফদবা লৈরে হায়বা ৱাফম অসিবু ৱাঙাংলোইশিংনা পুথোক্নখি। তেলি-মেতেল হেল্থকী মোদেল অসি নাগ্রিকশিংদা মরু ওইনা য়ুম্ফম ওইগদবনি অমসুং অখন্নবা সেবাগী মথৌ তাবা নাগ্রিকশিংনা মশাগী অপাম্বা সেবা শিজিন্নবা য়াহনগদবনি হায়না ৱাঙাংলোইশিংনা য়ানখি। রাজ্য সরকারনা থৌওং অসিবু কোন্দুনা থৱাই য়াওনা শরুক য়াবা হায়বসিনা খোঙথাং অসিবু থবক ওইনা পাংথোকপগী মরু ওইবা তঙাই ফদবা অমা ওইগনি।

লৈবাক অসিদা সাইকিয়াত্রিক প্রোফেসনগী মশক থোক্না অৱাৎপা লৈরিবা অসি য়েংলুরগা, প্রোগ্রাম অসিদা ই-লর্নিং অমসুং ত্রেনিং পীবগী খোঙথাংশিং অসিদি চঙদবা য়াদ্রবা থৌওং ওইরে হায়বা ৱাফমসু খন্নখি।

মেন্তেল হেল্থকী অঙনবা লাইওং মশক খঙদোক্নবা অমসুং মশক খঙদোক্লবা তুংদা প্রাইমরী হেল্থ কেয়র লেভেলদা মেন্তেল হেল্থ কেয়র সর্বিস পীনবগীদমক্তা মেদিকেল ওফিসর, কম্ম্যুনিতী হেল্থ ওফিসর, এ.এন.এম. অমসুং অশাগুম্বা ফ্রন্ত-লাইন হেল্থ ৱর্করশিংগী মতিক হেনগৎহনবা হায়বসি য়াম্না মরু ওইবনি। মসিনা তাথোক তাশিন তৌবগী খুদোংচাবা পীবগী খুত্থাংদা দিজিতেল কন্সলতেসন তৌবদা লৈরিবা অপনবা অয়েৎপশিংবুসু খঙহনগনি।

মেন্তেল হেল্থকেয়র পীনবা হোৎনরিবা অসিগী মনুংদা অয়ুশ সর্ভিস প্রোভাইদর অমসুং অয়ুশ প্রেক্তিস অনিমকপু য়াওহন্নবা হোৎনবী মথৌ তাই হায়না ৱাঙাংলোইশিংনা য়ানবা পুরকখি। নেস্নেল মেন্তেল হেল্থ প্রোগ্রামগী মনুংদা চুনবা খুদোংচাবা অমসুং কাংলোনশিং হাপচিনগদবনি। মসিগী মথক্তা, হান্ননা লৈরবা তেলিমেদিসিন গাইদলাইনশিং অসিসু মেন্তেল হেল্থ কেয়র এক্ত ২০১৭তা য়াওরিবা কাংলোনশিংগা চুননা চৎহনগদবনি। খুদোংচাদবা লৈবা অমসুং আইনগী ওইবা শিংনবা লৈবশিংবু লৌথোক্নবগীদমক্তা এক্ত অসিগী মখাদা শেমখিবা কাঙলোনশিংদা এমেন্দ তৌবগী থৌওং পাংথোকপসু য়াই। অয়ূশমান ভারত দিজিতেল মিসন (এ.বি.দি.এম.) অমসুং ই-সঞ্জীবনি প্লেৎফোর্মগী মপাঙ্গলশিং অসি ঐখোয়না শিজিন্নগদবনি হায়বা ৱাফমসু সেসন অসিদা ফোংদোক্নখি।

শ্রী রাজেশ ভুশন, সেক্রেতরী, এম.ও.ঐচ.এফ.দবল্যু.; শ্রী বাইদ্যা রাজেশ কোতেচা, সেক্রেতরী, অয়ুশ; দাঃ আর.এস. শর্মা, সি.ই.ও.; শ্রী বিকাস শীল, এ.এস. অমসুং এম.দি., এন.ঐচ.এম., এম.ও.ঐচ.এফ.দবল্যু.; শ্রী লব অগর্ৱাল, জোইন্ত সেক্রেতরী, এম.ও.ঐচ.এফ.দবল্যু., এন.ঐচ.এ.; দাঃ প্রবীন গেদম, এদিস্নেল সি.ই.ও., এন.ঐচ.এ.; দাঃ প্রতিমা মুর্তী, দাইরেক্তর, নিমহান্স; প্রোফঃ বি.এন. গঙ্গাধর, পদ্মশ্রী মনা ফংলবা মীওই অমসুং নিমহান্সকী হান্নগী দাইরেক্তর; প্রোফঃ কে. স্রিনাথ রেদ্দী, প্রসিদেন্ত, পি.ঐচ.এফ.আই.; দাঃ মোহন আইজাক, য়ুনিভর্সিতী ওফ ৱেস্তর্ন ওস্ত্রেলিয়াগী সাইকিয়াত্রীগী ক্লিনিকেল প্রোফ.; দাঃ অনন্ত ভান, সঙ্গত – য়ু.এস.এ./গোৱাগী গ্লোবেল হেল্থকী রিসর্চর; পি.ঐচ.এফ.আই.গী ভাইস প্রসিদেন্ত, দাঃ প্রীতি কুমার অমসুং হকশেল অমসুং য়াইফ য়ুম্বাল মন্ত্রালয়, অয়ুশ মন্ত্রালয়, নিমহান্স, এন.ঐচ.এম. অমদি পব্লিক-প্রাইভেৎ ওর্গনাইজেসনশিংগী সেনিয়র ওফিসিএলশিংসু মীফম অসিদা শরুক য়াখি।

*****