ਉਪ ਰਾਸ਼ਟਰਪਤੀ ਸ਼੍ਰੀ ਐੱਮ. ਵੈਂਕਈਆ ਨਾਇਡੂ ਨੇ ਅੱਜ ਆਮ ਲੋਕਾਂ ’ਚ ਵਿੱਤੀ ਸਾਖਰਤਾ ਸੁਧਾਰਨ ਦੀ ਲੋੜ ’ਤੇ ਜ਼ੋਰ ਦਿੰਦਿਆਂ ਚਾਰਟਰਡ ਅਕਾਊਂਟੈਂਟਸ ਜਿਹੇ ਪੇਸ਼ੇਵਰਾਂ (ਪ੍ਰੋਫ਼ੈਸ਼ਨਲਸ) ਨੂੰ ਬੇਨਤੀ ਕੀਤੀ ਕਿ ਉਹ ਜਨਤਾ ਦੇ ਵਡੇਰੇ ਫ਼ਾਇਦੇ ਲਈ ਸਰਲ ਤੇ ਆਸਾਨ ਭਾਸ਼ਾ ਵਿੱਚ ਵਿੱਤੀ ਨਿਯਮਾਂ ਤੇ ਵਿਨਿਯਮਾਂ ਦੀ ਵਿਆਖਿਆ ਕਰਨ ਦੀ ਦਿਸ਼ਾ ’ਚ ਕੰਮ ਕਰਨ।

ਅੱਜ ਕੇਰਲ ਦੇ ਏਰਨਾਕੁਲਮ ਵਿਖੇ ਆਈਸੀਏਆਈ (ICAI) ਭਵਨ ਦਾ ਨੀਂਹ–ਪੱਥਰ ਰੱਖੇ ਜਾਣ ਦੀ ਰਸਮ ਮੌਕੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਉਪ ਰਾਸ਼ਟਰਪਤੀ ਨੇ ਕਿਹਾ ਕਿ ਰੋਜ਼ਮੱਰਾ ਦੇ ਜੀਵਨ ਵਿੱਚ ਅਕਾਊਂਟੈਂਸੀ ਤੇ ਫ਼ਾਈਨਾਂਸ ਜਿਹੇ ਵਿਸ਼ਿਆਂ ਨਾਲ ਸਿੱਝਦੇ ਸਮੇਂ ਹਰੇਕ ਵਿਅਕਤੀ ਨੂੰ ਬਹੁਤ ਸਾਰੇ ਗੁੰਝਲਦਾਰ ਨਿਯਮਾਂ ਤੇ ਵਿਨਿਯਮਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਸਬੰਧੀ ਉਨ੍ਹਾਂ ਜੀਐੱਸਟੀ ਜਿਹੇ ਸੁਧਾਰਾਂ ਰਾਹੀਂ ਕਾਰੋਬਾਰ ਕਰਨ ਦਾ ਮਾਹੌਲ ਸੁਖਾਲ਼ਾ ਬਣਾਉਣ ਦੀਆਂ ਸਰਕਾਰ ਦੀਆਂ ਕੋਸ਼ਿਸ਼ਾਂ ਦੀ ਸ਼ਲਾਘਾ ਕੀਤੀ ਅਤੇ ਸੀਏ ਪ੍ਰੋਫ਼ੈਸ਼ਨਲਜ਼ ਨੂੰ ਬੇਨਤੀ ਕੀਤੀ ਕਿ ਉਹ ਨੀਤੀਆਂ ਉਲੀਕਣ ਦੀ ਪ੍ਰਕਿਰਿਆ ਤੋਂ ਲੈ ਕੇ ਬੁਨਿਆਦੀ ਪੱਧਰ ’ਤੇ ਉਨ੍ਹਾਂ ਨੂੰ ਲਾਗੂ ਕਰਨ ਤੱਕ ਰੈਗੂਲੇਟਰੀ ਕਾਇਆਕਲਪ ਵਿੱਚ ਸਰਗਰਮ ਭੂਮਿਕਾ ਨਿਭਾਉਣ।

ਉਪ ਰਾਸ਼ਟਰਪਤੀ ਨੇ ਕਿਹਾ ਕਿ ਇਹ ਚਾਰਟਰਡ ਅਕਾਊਂਟੈਂਟਸ ਦੀ ਵੱਡੀ ਜ਼ਿੰਮੇਵਾਰੀ ਹੈ ਕਿ ਉਹ ਨਿਯਮਾਂ ਤੇ ਵਿਨਿਯਮਾਂ ਦੀ ਪਾਲਣਾ ਕਰਨ ਵਿੱਚ ਵਪਾਰਕ ਭਾਈਚਾਰੇ ਦਾ ਮਾਰਗ–ਦਰਸ਼ਨ ਕਰਨ। ਕੁਝ ਗ਼ਲਤ ਕਿਸਮ ਦੇ ਲੋਕਾਂ ਵੱਲੋਂ ਸਮੁੱਚੇ ਵਪਾਰਕ ਭਾਈਚਾਰੇ ਨੂੰ ਬਦਨਾਮ ਕਰਨ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਵਿਦਿਆਰਥੀਆਂ ਨੂੰ ਸਖ਼ਤ ਮਿਹਨਤ ਕਰਨ, ਅਨੁਸ਼ਾਸਨ ਤੇ ਨਿਯਮਾਂ ਦੀ ਪਾਲਣਾ ਕਰਨ ਦੀ ਸਲਾਹ ਦਿੱਤੀ। ਸ਼੍ਰੀ ਨਾਇਡੂ ਨੇ ਕੇਰਲ ਦੀਆਂ ਉਨ੍ਹਾਂ ਨਰਸਾਂ, ਜਿਨ੍ਹਾਂ ਨੇ ਆਪਣਾ ਸਖ਼ਤ ਮਿਹਨਤ ਸਦਕਾ ਪੂਰੀ ਦੁਨੀਆ ’ਚ ਨਾਮਣਾ ਖੱਟਿਆ ਹੈ, ਦੀ ਮਿਸਾਲ ਦਿੰਦਿਆਂ ਕਿਹਾ,‘ਜੇ ਤੁਹਾਡੇ ’ਚ ਸੂਝਬੂਝ ਤੇ ਸਮਰੱਥਾ ਹੈ, ਤਾਂ ਉਸ ਵਿੱਚ ਚਰਿੱਤਰ ਜੋੜ ਦੇਵੋ, ਤਦ ਤੁਸੀਂ ਕਿਸੇ ਵੀ ਖੇਤਰ ’ਚ ਹੋਰਨਾਂ ਨੂੰ ਪਛਾੜ ਸਕਦੇ ਹੋ।’

ਰਾਸ਼ਟਰ ਦੀ ਆਰਥਿਕ ਤਰੱਕੀ ਵਿੱਚ ਚਾਰਟਰਡ ਅਕਾਊਂਟੈਂਟਸ ਦੀ ਭੂਮਿਕਾ ਦੀ ਸ਼ਲਾਘਾ ਕਰਦਿਆਂ ਸ਼੍ਰੀ ਨਾਇਡੂ ਨੇ ਉਨ੍ਹਾਂ ਨੂੰ 'ਰਾਸ਼ਟਰ ਨਿਰਮਾਣ ਵਿੱਚ ਮਾਣਮੱਤੇ ਭਾਈਵਾਲ' ਕਿਹਾ। ਇਹ ਨੋਟ ਕਰਦਿਆਂ ਕਿ ਬਦਲਦੇ ਸਮੇਂ ਦੇ ਨਾਲ, ਆਪਣੇ ਪੇਸ਼ੇ ਲਈ ਨਵੀਆਂ ਦੁਬਿਧਾਵਾਂ ਆਉਂਦੀਆਂ ਹਨ, ਉਨ੍ਹਾਂ ਨੇ ਉਹਨਾਂ ਨੂੰ ਫੈਸਲਾ ਲੈਣ ਵਿੱਚ ਨੈਤਿਕ ਵਿਕਲਪਾਂ, ਕਦਰਾਂ-ਕੀਮਤਾਂ ਅਤੇ ਅਭਿਆਸਾਂ ਦਾ ਪ੍ਰਦਰਸ਼ਨ ਕਰਨ ਲਈ ਕਿਹਾ।

ਉਨ੍ਹਾਂ ਕਿਹਾ ਕਿ ਆਪਣੇ ਸਟਾਫ਼ ਅਤੇ ਮੈਂਬਰਾਂ ਦੀ ਸਖ਼ਤ ਮਿਹਨਤ ਅਤੇ ਸਮਰਪਣ ਨਾਲ, ICAI ਸਿੱਖਿਆ ਅਤੇ ਪੇਸ਼ੇਵਰ ਉੱਤਮਤਾ ਦੇ ਖੇਤਰ ਵਿੱਚ ਸਭ ਤੋਂ ਸਤਿਕਾਰਤ ਸੰਸਥਾਵਾਂ ਵਿੱਚੋਂ ਇੱਕ ਵਜੋਂ ਉਭਰਿਆ ਹੈ। ਵਿਸ਼ਵ ਦੀ ਦੂਜੀ ਸਭ ਤੋਂ ਵੱਡੀ ਲੇਖਾ (ਅਕਾਊਂਟਿੰਗ) ਸੰਸਥਾ ਬਣਨ ਲਈ ICAI ਦੀ ਪ੍ਰਸ਼ੰਸਾ ਕਰਦਿਆਂ ਸ਼੍ਰੀ ਨਾਇਡੂ ਨੇ ਇਸ ਤੱਥ 'ਤੇ ਖੁਸ਼ੀ ਪ੍ਰਗਟ ਕੀਤੀ ਕਿ ਇਸ ਦੀਆਂ ਲਗਭਗ 27.85% ਮੈਂਬਰ ਔਰਤਾਂ ਹਨ ਅਤੇ 42.30% ਵਿਦਿਆਰਥਣਾਂ ਹਨ। ਉਨ੍ਹਾਂ ਅੱਗੇ ਕਿਹਾ,“ਇਹ ਇੱਕ ਸਿਹਤਮੰਦ ਰੁਝਾਨ ਹੈ ਅਤੇ ਇਸਨੂੰ ਕਾਇਮ ਰੱਖਣਾ ਚਾਹੀਦਾ ਹੈ।”

ਪਿਛਲੇ 54 ਸਾਲਾਂ ਵਿੱਚ ਆਈਸੀਏਆਈ ਦੀ ਏਰਨਾਕੁਲਮ ਸ਼ਾਖਾ ਦੀ ਇਸ ਦੀ ਵਡੇਰੀ ਸੇਵਾ ਲਈ ਸ਼ਲਾਘਾ ਕਰਦਿਆਂ, ਉਪ ਰਾਸ਼ਟਰਪਤੀ ਨੇ ਆਸ ਪ੍ਰਗਟਾਈ ਕਿ ਪ੍ਰਸਤਾਵਿਤ ਇਮਾਰਤ ਇਸ ਖੇਤਰ ਦੇ ਵਿਦਿਆਰਥੀਆਂ ਦੀਆਂ ਅਕਾਦਮਿਕ ਤੇ ਪੇਸ਼ੇਵਰ ਜ਼ਰੂਰਤਾਂ ਪੂਰੀਆਂ ਕਰੇਗੀ।

ਚਾਰਟਰਡ ਅਕਾਊਂਟੈਂਟਸ ਨੂੰ ਵਿੱਤ, ਲੇਖਾਕਾਰੀ ਅਤੇ ਆਡਿਟਿੰਗ ਦੇ ਖੇਤਰ ਵਿੱਚ ਸਭ ਤੋਂ ਵੱਧ ਲੋੜੀਂਦੇ ਪੇਸ਼ੇਵਰਾਂ ਵਿੱਚੋਂ ਇੱਕ ਕਰਾਰ ਦਿੰਦਿਆਂ ਸ਼੍ਰੀ ਨਾਇਡੂ ਨੇ ਆਸ ਪ੍ਰਗਟਾਈ ਕਿ ਉਹ ਨਵੀਂਆਂ ਤਕਨੀਕਾਂ ਸਮੇਤ ਆਪਣੇ ਖੇਤਰ ਵਿੱਚ ਨਵੀਨਤਮ ਵਿਕਾਸ ਤੋਂ ਜਾਣੂ ਰਹਿਣ। ਉਨ੍ਹਾਂ ਕਿਹਾ,“ਨਵੀਂ ਪੀੜ੍ਹੀ ਦੇ ਚਾਰਟਰਡ ਅਕਾਊਂਟੈਂਟਸ ਨੂੰ ਬਹੁਤ ਹੀ ਤਕਨੀਕੀ-ਸਮਝਦਾਰ, ਅਨੁਕੂਲ ਅਤੇ ਗ੍ਰਹਿਣਸ਼ੀਲ ਹੋਣਾ ਚਾਹੀਦਾ ਹੈ।”

ਇਹ ਦੁਹਰਾਉਂਦਿਆਂ ਕਿ ਸਾਰੀਆਂ ਟੈਕਨੋਲੋਜੀਆਂ ਅਤੇ ਸਾਰੇ ਪੇਸ਼ਿਆਂ ਦਾ ਅੰਤਮ ਉਦੇਸ਼ ਲੋਕਾਂ ਦੇ ਜੀਵਨ ਨੂੰ ਖੁਸ਼ਹਾਲ ਅਤੇ ਵਧੇਰੇ ਆਰਾਮਦਾਇਕ ਬਣਾਉਣਾ ਹੈ, ਉਪ ਰਾਸ਼ਟਰਪਤੀ ਨੇ ਇਸ ਉਦਾਹਰਣ ਦਾ ਜ਼ਿਕਰ ਕੀਤਾ ਕਿ ਕਿਵੇਂ ਜੇਏਐੱਮ (JAM) ਦੀ ਤਿਕੜੀ ਅਤੇ ਡੀਬੀਟੀ ਨੇ ਸਾਡੇ ਦੇਸ਼ ਦੇ ਲੱਖਾਂ ਗਰੀਬਾਂ ਦੇ ਜੀਵਨ ਨੂੰ ਬਦਲ ਦਿੱਤਾ ਹੈ। ਉਨ੍ਹਾਂ ਕਿਹਾ,“ਇਸ ਨੇ ਵੱਖ-ਵੱਖ ਸਰਕਾਰੀ ਸਕੀਮਾਂ ਵਿੱਚ ਲੀਕੇਜ ਨੂੰ ਦੂਰ ਕੀਤਾ ਹੈ ਅਤੇ ਲੋਕਾਂ ਲਈ ਸੇਵਾ ਪ੍ਰਦਾਨ ਕਰਨ ਨੂੰ ਕੁਸ਼ਲ ਅਤੇ ਮੁਸ਼ਕਿਲ ਰਹਿਤ ਬਣਾਇਆ ਹੈ।”

ਇਸ ਗੱਲ ਦੀ ਪੁਸ਼ਟੀ ਕਰਦਿਆਂ ਕਿ ਭਾਰਤੀ ਅਰਥਵਿਵਸਥਾ ਕੋਵਿਡ-19 ਕਾਰਨ ਲੱਗੀ ਅਣਕਿਆਸੀ ਢਾਹ ਤੋਂ ਤੇਜ਼ੀ ਨਾਲ ਬਾਹਰ ਨਿੱਕਲ ਰਹੀ ਹੈ, ਸ਼੍ਰੀ ਨਾਇਡੂ ਨੇ ਰਾਏ ਦਿੱਤੀ ਕਿ ਕੋਵਿਡ ਤੋਂ ਬਾਅਦ ਦੀ ਸਥਿਤੀ ਵਿੱਚ, ਦੇਸ਼ ਬਹੁਤ ਸਾਰੀਆਂ ਸ਼ਕਤੀਆਂ ਨਾਲ ਪੂਰੀ ਦੁਨੀਆ ਨੂੰ ਆਕਰਸ਼ਿਤ ਕਰਨ ਵਾਲੀ ਉੱਦਮ ਦੀ ਨਵੀਂ ਗਾਥਾ ਦਾ ਪ੍ਰਦਰਸ਼ਨ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ,"ਜਦੋਂ ਕਿ ਸਰਕਾਰ ਲੰਬੇ ਸਮੇਂ ਦੇ ਦ੍ਰਿਸ਼ਟੀਕੋਣ ਅਤੇ ਪੂਰੀ ਵਚਨਬੱਧਤਾ ਨਾਲ ਕੰਮ ਕਰਦੀ ਹੈ ਤਾਂ ਇਹ ਜ਼ਰੂਰੀ ਹੈ ਕਿ ICAI ਜਿਹੀਆਂ ਸੰਸਥਾਵਾਂ ਇਸ ਸੋਚ ਨਾਲ ਇਕਸਾਰ ਹੋਣ।" 

ਭਾਰਤ ਦੀ ਆਜ਼ਾਦੀ ਦੇ 75ਵੇਂ ਵਰ੍ਹੇ ਦੀ ਯਾਦ ਵਿੱਚ ਚਲ ਰਹੇ 'ਆਜ਼ਾਦੀ ਕਾ ਅੰਮ੍ਰਿਤ ਮਹੋਤਸਵ' ਦਾ ਜ਼ਿਕਰ ਕਰਦਿਆਂ ਉਪ ਰਾਸ਼ਟਰਪਤੀ ਨੇ ਸਾਰਿਆਂ ਨੂੰ ਇਸ ਰਾਸ਼ਟਰੀ ਮੁਹਿੰਮ ਵਿੱਚ ਸ਼ਾਮਲ ਹੋਣ ਅਤੇ ਇਸ ਨੂੰ ਆਤਮਨਿਰਭਰ ਭਾਰਤ ਦੀ ਭਾਵਨਾ ਨਾਲ ਚਲਣ ਵਾਲੀ ਲੋਕ ਲਹਿਰ ਬਣਾਉਣ ਦਾ ਸੱਦਾ ਦਿੱਤਾ।

ਸ਼੍ਰੀ ਵੀ. ਮੁਰਲੀਧਰਨ, ਕੇਂਦਰੀ ਵਿਦੇਸ਼ ਅਤੇ ਸੰਸਦੀ ਮਾਮਲੇ ਰਾਜ ਮੰਤਰੀ, ਸ਼੍ਰੀ ਪੀ. ਰਾਜੀਵ, ਉਦਯੋਗ ਮੰਤਰੀ, ਕੇਰਲ ਸਰਕਾਰ, ਸੀ.ਏ. ਥਾਮਸ ਚਾਜ਼ੀਕਦਨ, ਸੰਸਦ ਮੈਂਬਰ, ਲੋਕ ਸਭਾ, ਸ਼੍ਰੀ ਹਿਬੀ ਈਡਨ, ਸੰਸਦ ਮੈਂਬਰ, ਲੋਕ ਸਭਾ , ਸ਼੍ਰੀ ਐੱਮ. ਅਨਿਲ ਕੁਮਾਰ, ਮੇਅਰ, ਕੋਚੀ ਨਗਰ ਨਿਗਮ, ਸੀਏ ਨਿਹਾਰ ਐੱਨ ਜੰਬੂਸਾਰੀਆ, ਪ੍ਰਧਾਨ, ਆਈਸੀਏਆਈ, ਸੀ.ਏ ਡਾ. ਦੇਬਾਸ਼ੀਸ਼ ਮਿਤਰਾ, ਵਾਈਸ-ਪ੍ਰੈਜ਼ੀਡੈਂਟ, ICAI, CA Renjit R. Warrier, ICAI ਦੀ Ernakulam Branch SIRC, ਆਈਸੀਏਆਈ ਦੀ ਪੀਡੀਸੀ ਕਮੇਟੀ ਦੇ ਕੇਂਦਰੀ ਕੌਂਸਲ ਮੈਂਬਰ ਅਤੇ ਚੇਅਰਮੈਨ ਬਾਬੂ ਅਬਰਾਹਿਮ ਕਾਲੀਵਿਆਲੀ, ਵਿਦਿਆਰਥੀ ਅਤੇ ਹੋਰ ਸ਼ਖ਼ਸੀਅਤਾਂ ਹਾਜ਼ਰ ਸਨ।

******

ਐੱਮਐੱਸ/ਆਰਕੇ/ਡੀਪੀ