نائب صدرجمہوریہ ہند جناب ایم وینکیا نائیڈو نے رامائن کو اب تک کی سب سے عظیم کتاب بتاتے ہوئے کہا کہ یہ ہمیں سکھاتی ہے کہ فرض کی ادائیگی اتنی ہی اہم ہے جتنی کہ اپنے حقوق کا دعویٰ کرنا۔ جناب نائیڈو نے کہا کہ بھگوان رام خاندان، لوگوں اور سلطنت کے تئیں اپنی ذمہ داریوں کو نبھانے میں پوری نسل انسانی کے لیے ایک رول ماڈل ہیں۔

حیدرآباد میں ششی کرن کی تحریر کردہ کتاب 'شریماد رامائنم' کا اجرا کرتے ہوئے، سری نائیڈو نے بھگوان رام کی زندگی کے بارے میں روشنی ڈالی اور کہا کہ ایک حکمران کے طور پر انہوں نے قیادت، اچھی حکمرانی اور قانون کی حکمرانی میں اعلیٰ ترین معیار کی مثال پیش کی۔ یہ کہتے ہوئے کہ بھگوان رام نے سماج کے مفاد اورفائدے کے لئے بے لوث زندگی گزاری ، جناب نائیڈو نے ملک کے نوجوانوں سے کہا کہ وہ شری رام کی زندگی کے پیغام سے تحریک لیں۔ رامائن کے ایک واقعہ کا حوالہ دیتے ہوئے، جناب نائیڈو نے بھگوان رام کے اپنے مادر وطن سے لگاؤ ​​کو اجاگر کیا اور نوجوانوں پر زور دیا کہ وہ اسے ہمیشہ یاد رکھیں اور اپنے ملک کی بہتری کے لیے کام کریں، چاہے وہ روزگار کے مواقع تلاش میں کہیں بھی جائیں۔

اس موقع پر جناب نائیڈو نے مصنف ششی کرن اور پبلشرز کو کتاب کے لیے مبارکباد دی۔ انہوں نے مختلف ہندوستانی زبانوں کے ادبی، کلاسیکل اور شاعری سے متعلق کام کاج کو بالخصوص نوجوانوں میں مقبول بنانے کی ضرورت پر بھی زور دیا۔ انہوں نے سبھی پراس بات کے لئے بھی زور دیا کہ وہ ہندوستانی زبانوں کے تحفظ اور فروغ کو یقینی بنائیں۔

اس تقریب میں کتاب کے مصنف ششی کرن، ناشر ایمسکو وجے کمار اور دیگر معززین نے شرکت کی۔

****************

(ش ح۔ح ا ۔ ف ر)

U. NO. 13176