ভারত সরকার অমসুং এসিয়ন দিভেলপমেন্ত বেঙ্কনা অৱাং-নোংপোক রাজ্য, মিজোরমগী কোনুং আইজোলগী অর্বান মোবিলিতী ফগৎহন্নবগীদমক্তা শেম-শাবা অমসুং মওং-মতৌ শেম্বগী প্রোজেক্ততা তেংবাংনবগীদমক্তা ঙসি মিলিয়ন দোল্লর ৪.৫গী প্রোজেক্ত রেদিনেস ফাইনেন্সিং (পি.আর.এফ.) লোনগী খুৎয়েক পীনখ্রে।

আইজোলগীদমক্তা ৱাহৌদোক লৈরবা সস্তেনেবল অর্বান ত্রান্সপোর্ত প্রোজেক্ত অসিগীদমক্তা শেল-থুম মন্ত্রালয়গী ইকোনোমিক এফিয়র্স বিভাগকী এদিস্নেল সেক্রেতরী, শ্রী রজৎ কুমার মিশ্রানা ভারত সরকারগী মাইকৈদগী অমসুং এ.দি.বি.গী ইন্দিয়া রেসিদেন্ত মিসনগী কন্ত্রী দাইরেক্তর,  শ্রী তাকেও কোনিশীনা এ.দি.বি.গী মাইকৈদগী খুৎয়েক পীগনি।

শ্রী মিশ্রানা য়ানচে অসিগী খুৎয়েক পীনরবা তুংদা হায়খিবদা পায়খৎকদবা প্রোজেক্ত অসিগীদমক্তা অহানবদা মিৎয়েং চঙগদবা ত্রান্সপোর্ত ইনভেস্তমেন্ত মশক খঙদোকপা অমসুং তঙাই ফদনা পাংথোক্কদবা থৌওংশিংদা শৌগত্তুনা শেম-শাবগী ফীভম ফগৎহন্দুনা আইজোলগী অর্বান মোবিলিতী ফগৎহন্নবা মতম শাংনা চৎকদবা ৱারোইশিনশিংদা পি.আর.এফ.না শৌগৎলি হায়না ফোংদোকখি।

 “পি.আর.এফ.না অর্বান ত্রান্সপোর্ত চাউখৎহন্নবা থৌরাং তাকপা আইজোলগী কম্প্রিহেন্সিব দিভেলপমেন্ত মোবিলিতী প্লান (সি.এম.পি.) পুথোক্কনি অমসুং রাজ্যা অসিদা পাংথোক্কদৌরিবা অর্বান দিভেলপমেন্তকী থৌরাং য়াৎপগী খোঙথাংগা চান্নহন্নবা হোৎনবগা লোয়ননা মখোয়গী থবকশিংদা ক্লাইমেৎ অমসুং দিজাজতর রেজিলিএন্স অমসুং জেন্দর খুদিংবু মনুং চলহনবগী থবকশিং খুমাং চাউশিলহনগনি”, হায়না শ্রী কোনিশীনা ফোংদোকখি।

মিজোরম লৈঙাক অমসুং সর্ভিস ইন্দস্ত্রীগী খ্বাইদগী মরু ওইরিবা মফম, আইজোলগী অর্বান মোবিলিতী অসি য়াম্না য়াঙনা অমসুং থৌরাং য়াত্তনা খুন্দারকপনা মরম ওইদুনা য়াম্না খুদোংচাদ্রে। মসিনা খুরবা শোরোকশিংদা ত্রাফিক চিনবা থোকহনবগা লোয়ননা শোরোক্তা তেক্তা কায়দবা থোকপগী থৌওংদা চৈথেং য়াম্না পীবগা লোয়ননা মীওই অমসুং পোত্থোক পুবদা খুদোংচাদবা থোকহল্লি অমসুং অকোয়বগী ফিভম্না তুং কোইনা চৎপদসু নুংনাংবা লৈরে।

পি.আর.এফ.কী খুত্থাংদগী পায়খৎকদৌরিবা থৌরাং লৈরবা প্রোজেক্ত অসিনা তুং কোইনা চৎকদবা মোবিলিতীগী ৱারোইশিন শিজিন্নদুনা শহর অসিনা থেংনরিবা ত্রান্সপোর্তকী শিংনবা লোইশিন্নবা পান্দম থম্লি। পি.আর.এফ.না সি.এম.পি.দা মশক খঙদোক্লবা অহানবা মিৎয়েং চঙগদৌরিবা প্রোজেক্তশিংগী ফিসিবিলিতী স্তদী অমা য়াম্না কুপথনা পাংথোক্কনি অমসুং প্রোজেক্ত অসিগীদমক্তা কুপথবা প্রোজেক্ত রিপোর্ত অমসুং দিজাইন শেম-শাগনি। প্রোজেক্ত অসি পাংথোক্ত্রিঙৈ মমাং অমসুং শেম-শাবগী থবকশিংদা রাজ্যসিগী অর্বান দিভেলপমেন্ত অমসুং পোভর্তী এলেভিএসন দিপার্তমেন্তশিংগী ইন্সতিত্যুসন অমা ওইনা তৌবা ঙম্বগী মতিক লৈহনবদসু তেংবাংগনি।

এ.দি.বি.না খম-থেংনা লাইরবা মুত্থৎপগী থবক পাংথোকপগা লোয়ননা য়াইফবা, পুম্নমক মনুং চনবা, নিঙ্ঘন্নদবা অমসুং তুং কোইনা চৎপা এসিয়া অমসুং পেসিফিক অমা পুরক্নবা খোঙফম চেৎলি। ইং ১৯৬৬তা হৌদোক্তুনা লমদম ৪৯গী মেম্বর ৬৮না মসিগী মপু ওইরি।

****