نئی دہلی:21اکتوبر،2021۔اُمور داخلہ اور امداد باہمی کے مرکزی وزیر جناب امت شاہ نے آج اتراکھنڈ کے گورنر لیفٹیننٹ جنرل گرمیت سنگھ ، وزیراعلیٰ جناب پشکر سنگھ دھامی، اتراکھنڈ کے آفات کے بندوبست کے وزیر جناب ڈی ایس راوت اور رکن پارلیمنٹ جناب انیل بلونی کے ساتھ دیوپریاگ ، رام نگر، رام گڑھ، گولاپر اور رُدرپریاگ کے بارش، سیلاب اور زمین کے تودے کھسکنے سے متاثرہ علاقوں کا فضائی معائنہ کیا اور اس قدرتی آفت سے ہوئے نقصان کا جائزہ لیا۔ فضائی معائنے کے بعد مرکزی وزیر داخلہ نے مرکزی اور ریاستی سرکار کے افسران کے ساتھ میٹنگ کرکے تازہ ترین صورتحال کا جائزہ لیا۔

جناب امت شاہ نے کہا کہ مرکزی سرکار کے ذریعے وقت پر ملی وارننگ کے سبب جانی اتلاف کو کم کرنے میں مدد ملی۔ انہوں نے کہا کہ حکومت ہند  کے ذریعے 24 گھنٹے پہلے 16 اکتوبر کو ہی وارننگ مل جانے کے بعد اتراکھنڈ سرکار اور مقامی انتظامیہ کے ذریعے ایس ڈی آر ایف، این ڈی آر ایف، آئی ٹی بی پی، برّی فوج، فضائیہ وغیرہ سبھی کو الرٹ بھیجنے کے سبب کافی نقصان کو روکا جاسکا ہے۔ سبھی موبائل صارفین کو موبائل پر ہی قبل از وقت الرٹ بھیج دیا گیا تاکہ غیرضروری آمدورفت کو روکا جاسکے۔ چاردھام کے عقیدتمندوں کو بھی بارش ہونے سے پہلے ہی وہ جہاں تھے وہی روک دیا گیا اور اس کی وجہ سے ہی چاردھام کے عقیدتمندوں میں سے کسی کے متاثر ہونے کی کوئی اطلاع نہیں ہے اور سفر شروع بھی کردیا گیا ہے۔ این ڈی آر ایف ، برّی فوج، آئی ٹی بی پی، ایس ڈی آر ایف، اسٹیٹ رسپانس ٹیمیں، فائربریگیڈ بارش آنے سے پہلے ہی الرٹ کے سبب موقع پر موجود تھے۔ ہیلی کاپٹر بھی یہاں دستیاب تھے اور انہیں بھی بارش آنے سے پہلے ہی الرٹ کردیا گیا تھا۔

جناب امت شاہ نے کہا کہ وزیراعظم جناب نریندر مودی نے بھی  فوج اور این ڈی آر ایف کے موبیلائزیشن کے بارے میں سب کو اطلاع دی تھی۔ مرکزی آبی کمیشن اور محکمہ آبپاشی کا باہمی اشتراک وتعاون کافی اچھا رہا، اس کے سبب آبی سطح کو مینج کرنے میں آسانی ہوئی۔ انہوں نے کہاکہ تین سڑکوں کو چھوڑکر زیادہ تر سڑکوں پر ٹریفک شروع ہوگیا ہے اور جہاں بھی ضرورت ہو وہاں راحت پہنچنی شروع ہوگئی ہے، نینی تال، ہلدوانی اور الموڑہ کی سڑکوں کو بھی کھول دیا گیا ہے، ایک جگہ پر ریلوے ٹریک کو بھاری نقصان ہوا ہے اور اس کی مرمت کا کام بھی شروع ہوگیا ہے۔ بجلی کی دستیابی 60فیصد سے زیادہ بحال کردی گئی ہے، لوگوں کو صاف پینے کا پانی ملنے لگا ہے اور صحت سہولیات میں بھی رکاوٹ نہیں آئی۔

مرکزی وزیر داخلہ نے کہا کہ ریاستی سرکار نے بچاؤ مہم بہت اچھے اور کامیاب طریقے سے چلایا۔ تقریباً 80 فیصد ٹیلی فون نیٹ ورک کو بحال کردیا گیا ہے۔ 3500 سے زیادہ افراد کو بچایا گیا ہے اور 16ہزار سے زیادہ لوگوں کو احتیاطی اقدام کے طور پر محفوظ مقامات پر پہنچایا گیا ہے اور اب تک کسی بھی سیاح کی جان جانے کی خبر نہیں ہے۔ این ڈی آر ایف کی 17 ٹیمیں ، ایس ڈی آر ایف کی 60 ٹیمیں، پی اے سی کی 15 کمپنیاں، فائر بریگیڈ اور پولیس کے 5000 سے زیادہ جوان پوری مہم میں اب بھی مصروف ہیں اور لوگوں کی مدد کررہے ہیں۔ ریاستی سرکار کے ذریعے راحتی کیمپوں میں صحت سہولتیں اور کھانے پینے کا اچھا انتظام کیا گیا ہے اور جلد ہی حالات معمول پر آجائیں گے۔ جناب شاہ نے کہا کہ بحران کی اس گھڑی میں پہلے دن سے ہی وزیراعظم جناب نریندر مودی نے ریاست کے وزیر اعلیٰ سے کئی بار بات کی ہے اور حکومت ہند نے اپنی پوری طاقت اس دیوبھومی کی مدد میں لگائی ہے۔ انہوں نے کہا کہ ایک دو دن میں حالات کے معمول پر آتے ہی وزارت داخلہ کی جائزہ ٹیمیں یہاں ہوئے نقصان کا جائزہ لینے آئیں گی اور اس کے  مطابق مدد بھی کی جائے گی۔ جناب شاہ نے کہا، چونکہ یہاں قدرتی آفات آتی رہتی ہیں اس لئے مرکز کے ذریعے ریاست کو کچھ ماہ پہلے ہی 250 کروڑ روپئے کی رقم آفات کے بندوبست کے محکمے کے ذریعے بھیجی جاچکی ہیں جس سے یہاں راحتی کام شروع کیا جاچکا ہے۔ انہوں نے کہا کہ مرکزی حکومت نے قدرتی آفات سے نمٹنے سے متعلق ریاستی فنڈ(ایس ڈی آر ایف) کے تحت مرکز کے حصے کے طور پر 749.60 کروڑ روپئے کی امداد پہلے ہی جاری کردیے ہیں۔

مرکزی وزیر داخلہ نے اتراکھنڈ کے عوام کو یقین دلایا کہ بحران کی اس گھڑی میں حکومت ہند پوری طرح سے آپ کے ساتھ کھڑی ہے اور ریاست کے وزیراعلیٰ نے بہت اچھے طریقے سے اس مصیبت کا سامنا کیا ہے اور بہت کم جانی اتلاف کے ساتھ ہم اس سے باہر آئے ہیں۔

اتراکھنڈ کے وزیر اعلیٰ جناب پُشکر سنگھ دھامی نے بہت ہی کم اطلاع پر تلاش ، بچاؤ اور متاثرہ لوگوں کو راحتی سامان فراہم کرنے میں ریاستی انتظامیہ کی مدد کرنے کیلئے قدرتی آفات سے نمٹنے والی قومی فورس  (این ڈی آر ایف) کی 17 ماہر ٹیمیں، بھارتی فضائیہ کے تین ہیلی کاپٹروں اور فوج اور دیگر مرکزی ایجنسیاں تعینات کرنے کیلئے مرکزی حکومت کا شکریہ ادا کیا۔

---------------------

ش ح۔م ع۔ ع ن

U NO: 12083