উপ-রাস্ত্রপতিগী লোইশঙ
azadi ka amrit mahotsav

অৱাং-নোংপোক লমদম্না হৌখ্রবা মতমদগী লাপথোক্লকই; নৌনা য়াকাইরকপগী য়ুগ অমদা খোঙদারক্লি হায়না ভারতকী উপ রাস্ত্রপতিনা থমখ্রে

শ্রী নাইদুনা শেন্মিৎলোন অমসুং হ্যুমেন দিভেলপমেন্ত ইন্দাইসশিংদা হোংলকপগী ফিভম পনখ্রে, হৌখিবা চহি ৭তা ইনফ্রা গ্রোথ লাকপগা লোয়ননা লালহৌবগী ইরাং হন্থখি

অচৌবা খোঙথাং থাংবগী হীরম-১৫গী পাম্বৈ হৌদোকখ্রে; প্রাইভেৎ ইনভেস্তমেন্ত অমসুং মরোমদোম লেপচবা ঙম্নহন্নবা পুক্নিং থৌগৎপা, রাজ্য মশেলগী ঙমখৈগী উংখৎনবা লোইশিনবা অমসুং নীংথিনা লৈঙাকপা

শ্রী নাইদুনা এন.ই.গী শ্যারিং পাৱর্দা নেস্নেল পার্তীগা লোয়ননা রাজ্য ১২না পুনবসি লৈবাক্কী অপাম্বগা লোকেলগী অপাম্বশিংগা মান্ননা চৎপনি হায়খ্রে

এন.ই.গী লেজিসলেচরশিংদা নুপীগী চাংনা ৪% খক ওইবা অমসুং লেজিসলেচর তোয়না ফমদবদা পেন্দবা ফোংদোকখ্রে

উপ রাস্ত্রপতিনা অরুনাচল প্রদেশ এসেমব্লীগী অখন্নবা সেসন্দা ৱা ঙাংখ্রে

ভি.পি.না অরুনাচল এসেমব্লীবু ই-বিধান সীস্তেম হৌদোকপগীদমক্তা থাগৎপা ফোংদোকখ্রে

Posted On: 09 OCT 2021 3:44PM by PIB Imphal

ভারতকী উপ-রাস্ত্রপতি অমসুং রাজ্য সভাগী চেয়র্মেন, শ্রী এম. ভেঙ্কয়া নাইদুনা ঙসি অৱাং-নোংপক লমদম্না (এন.ই.আর.) ঙসিদি মমাংগী খুদোংচারমদ্রবা ফিভমদগী নান্থোরকপা অমসুং নৌনা য়াকাইরকপগী য়ুগতা চঙশিল্লকপা অসি শেন্মিৎলোন অসুং হ্যুমেন দিভেলপমেন্ত ইন্দাইশিংদা ফগৎলকপা, ইনফ্রাস্ত্রকচর চাউখৎপা হেনগৎপা অমসুং মমাংগী চহি ৭ হেন্নদা লালহৌবগী ইরাং হন্থরকপনা তাক্লে হায়খ্রে।

শ্রী নাইদুনা লমদমসিগী চাউখৎপা হেনগৎহল্লক্লিবা নীংশিংহৌরগদবা ৱারীশিং, দিমোক্রেতিক দেফিসিৎ, চহি খরসিদা অহোংবা কয়া লাক্তুনা অনৌবা মাইকৈ লৈহল্লক্তুনা চাউখৎপগী খোঙজেল য়াঙখৎলকপা অমসুং তুংলমচত্তা চঙশিনবগী পাম্বৈশিংগী মতাংদা অরুনাচল প্রদেশ লেজিস্লেতিব এসেমব্লীগী অখন্নবা সেনন্দা ৱা ঙাংবদা ময়েক শেংবা ৱারোল থমখ্রে।

লমদমসিগী লালহৌবগী ইরাং অমসুং মতিক চাদবা ইনফ্রাস্ত্রকচরনা মরম ওইদুনা প্রাইভেৎ ইনভেস্তমেন্ত লাকপদা থিন্থহল্লিবা অমসুং মসিনা মরম ওইদুনা চাউখৎপদা অমুক থিন্থহল্লিবশিংগী মতাংদা পল্লদুনা, শ্রী নাইদুনা হায়খি, “অৱাং-নোংপোক লমদম্না চাউখৎপগী অনৌবা ৱারী অমা ইদুনা তুংলমচৎপু মাইকৈ অসিদা পুবা ঙম্নবগীদমক্তা অসিগুম্বা তুংগী মতমদগী নাথোক্নবা ৱারেপ লৌরে হায়বসিদা ঐহাক্না য়াম্না নুংঙাইবা ফাওই। ইনফ্রাস্ত্রকচর প্রোজেক্ত কয়া অমা লোইশিনবা ঙম্লিবা অমসুং হৌজিক পায়খৎলিবা অমসুং সোসিও ইকোনোমিক্কী ফিভমদা চাউখৎপা উরিবা অসিনা ৱাফম অসিবু ময়েক শেংনা তাকপনি”।

মতিক চাদবা অমসুং মরম চাদবা চাউখৎপগী খেন্নবা লৈবনা তোঙান-তোঙানবা চৎনবী লৈবা মীওই কয়াগী লমদমসিগী মীয়াম মরক্তা খেন্নবা কয়া লৈহল্লি অমসুং গনতন্ত্রিক ওইবা থৌওংদা তেংবাংমিন্নবগী থৌওংদা অকায়বা পী, মসিগী মরমদি মখোয়না চাউখৎপগী পাম্বৈশিংদা মমাংদগী হৌনা চিংনবা মিৎয়েং য়েঙই অমসুং মখোয়গী মশাগী শক্তম অমসুং নাৎকী মরমদা হেন্না খল্লি হায়না মহাক্না মখা তানা হায়খি।

মতম কয়াদগী হৌনা মফম অসিদা চাউখৎপা পুরকপদা অপাম্বা লৈবা অমসুং থবক ওইনা পাংথোকপদা চাউনা খেন্নবা লৈবদগী অনৌবা ইনর্জী অমসুং মিৎয়েংগা লোয়ননা হৌজিক পায়খৎলিবা ‘এক্ত ইস্ত পোলিসীবু’ প্রধান মন্ত্রীনা ইং ২০১৪দা পুরকখিবনি হায়না শ্রী নাইদুনা পনখি।

এন.ই.আর.দা অনৌবা অহোংবা অমা লাক্লিবা অসিবু শৌগৎলদুনা, লৈবাক্কী পর কেপিতা নেৎ নেস্নেল ইনকম্না ইং ২০১৩-১৪দা লৈরম্বা অদুদগী হৌজিক ৬০% হেনগৎলবসু, অৱাং-নোংপোক রাজ্য ৮গী মনুংদগী ৬কী পর কেপিতা নেৎ স্তেত দোমেস্তিক প্রদক্ত হেনগৎপনা মসিদগী অমুক হেল্লিবনি হায়না শ্রী নাইদুনা কুপ্না তাকখি। লমদম অসিগী রাজ্য ৮গী রাজ্য ৫গী পর কেপিতা নেৎ স্তেত দোমেস্তিক প্রদক্তনা ইং ২০১৮-২০দা পর কেপিতা এন.এন.আই.দগী হেন্না নত্ত্রগা মান্ননা লৈরম্মি অদুগা ইং ২০১৩-১৪দনা হায়রিবা ফিভম অসি রাজ্য ২ খক্তা ওইরম্মিবনি।

হ্যুমেন দিভেলপমেন্ত ইন্দেক্স (ঐচ.দি.আই.)তা মখা পোল্লগা ওনবা সোসিএল দিভেলপমেন্তকী মতুং ইন্না লমদমসিগী রাজ্য ৮গী মনুংদগী ৭না ইং ২০১৯দা লৈবাক্কী ইন্দেক্সতগী হেনখি হায়না মহাক্না পাউদমখি। লিতরেসী রেত ৭৮.৫০% লৈদুনা এন.ই.আর.না লৈবাক্কী ৭৪%দগী হেনখি।

মমাংগী চহি ৭তগী কেন্দ্র সরকারনা লমদম অসি চাউখৎনবা হোৎনরিবশিংগী মতাংদা কুপ্না তাক্লদুনা শ্রী নাইদুনা ইং ২০১৪-১৫দা ওইরম্বদগী ইং ২০২১-২২দা গ্রোস বদজেতরী স্পপোর্ত, স্তার্ত-অপ ইন্দিয়া স্কিম, প্রধান মন্ত্রী মুদ্র য়োজনা, প্রধান মন্ত্রী ইমপ্লোয়মেন্ত জেনেরেসন প্রোগ্রামগুম্বা স্কিমগী মখাদা কায়থবা শেনফম, মাইক্রোফাইনান্স ইন্দস্ত্রী, স্মোল অমসুং মেদিয়ম ইন্তর্প্রাইসতা শৌগৎপা, মশিং য়াম্লবা শোরোক অমসুং এয়র কন্নেকচতিবিতী প্রোজেক্তনচিংবা অমসুং মখোয়বু লোইশিন্নবা মতমগী শরুক অনিগী চাংদা হেনগৎখিবগী অকুপ্পা মরোল খঙহনখি।

কেন্দ্র সরকারনা কন্না হোৎনবদগী লমদমসিদা অমুক্কা হন্না শান্তি লৈরক্লিবা অসিগী মতাংদা পল্লদুনা, শ্রী নাইদুনা ইং ২০১৩গা চাংদম্নবদা লালহৌবগা মরী লৈনবা ইরাংনা ৭০%, মীচম শিবগী চাংনা ৮০% অমসুং ইং ২০১৯দা সেক্যুরিতী ফোর্স্তা অশোক-অপন নঙবগী চাংনা ৭৮%গী চাংদা হন্থরক্লে হায়না পাউদমখি। হন্দক্তা বোরো অমসুং কার্বি আংলোং এগ্রীমেন্ত খুৎয়েক পীনখিবনা লমদম অসিদা শান্তি লৈবগী মতম লাকহন্নীংবগী অপাম্বা উৎলে হায়না মহাক্না মখা তানা পনখি।

ইং ২০১৫-২০দা অরুনাচল প্রদেশ লেজিলেতিব এসেমব্লীনা চহিদা অমদগী তরুক ফাওবতং ফম্বগী থৌওং পল্লদুনা লৈবাক্কী লেজিসলেচরশিংনা মথৌ তৌবগী মতাংদা নুংনাংবা ফোংদোক্লদুনা, মহাক্না রাজ্যশিংনা অসিগুম্বা এসেমব্লী ফম্বগী মশিং হেনগৎহন্নবা হায়খি। মহাক্না লৈবাক অমসুং মীয়ামগী শিংনবা কয়াগী ৱারোইশিন পুরক্নবা ৱাহন্থোক লৈনা মরৈ য়েৎনবগী থৌওং পাংথোকপগী মথৌ তাই হায়না ফোংদোকখি। মহাক্না লেজিসলেচরশিংনা দি. অহুম – দিবেত, দিসকসন অমসুং দিসিসন্দা মিৎয়েং চঙহন্নীংই হায়না ফোংদোকখি।

লমদম অসিগী লেজিসলেচর ৮হী অপুনবা সিত ৪৯৮গী মনুংদা ৪% খক ওইদুনা শুপ্নগী নুপী এল.এল.এ. ৮খক লৈ হায়না পল্লদুনা, শ্রী নাইদুনা হায়খি, “লমদম অসিগী আইন শেম্বদা নুপী মেম্বর মশিং হেন্না য়াওহনবগী তঙাই ফদ্রবা ৱাফম অমা লৈরে। পার্লিয়ামেন্ত ফাওবদা নুপীশিংনা শুপ্নগী ১১%গী শরুক ওইরি”।

অৱাং-নোংপোক লমদমগী রাজ্য অমসুং রিজনেল পার্তী ১৭কী মনুংদগী ১২না শক্তি পায়বগী ৱাফম পল্লদুনা, শ্রী নাইদুনা হায়খি, “মীয়াম করোর ৫ লৈবা লমদম অসিগী লৈঙাক্তা রাজ্যগী থাক্তা লৈবা পার্তী মশিং য়াম্বনা নেস্নেল পার্তীশিংগা লোয়ননা শরুক য়াবগী থৌওং অসিনা লোকেলগী অপাম্বগা লৈবাক্কী অপাম্বগা মরী লৈনৈ তাকপা ৱাফম্নি। মসিনা লমদম অমসুং লৈবাক্কী অপাম্বদা মিৎয়েং চঙবা অপুনবা মহৈ অমা পুরকফম থোকপনি”।

সংবিধানগী মতুং ইন্না, রাজ্য সরকারনা লোকেল বোদীশিংদা হীরম ২৯ পীথোকপা অমসুং এফ. অহুম – ফঙ্কসন, ফন্দ অমসুং ফংসনরীগী শক্তি পীথোকপগী তঙাই ফদবা লৈবদা মহাক্না মিৎয়েং চঙখি।

উপ রাস্ত্রপতিনা ভারত অসি মতম শাংবদগী হৌনা শান্তি পাম্বা লৈবাক ওইদুনা লাক্লি অমসুং অতোপ্পা লৈবাক অমত্তদা লাদাখিদ্রি হায়না ফোংদোকখি। ভারতনা লম পাকথোক চাউথোক্নীংবগী অপাম্বা কৈদৌনুংদা লৈখিদে। ভারত অসি লৈবাক অমনি অমসুং মসিগী অপুনবা শক্তমগী মাইয়োক্তা য়াশিন্নবা অমত্তা পুরক্লোই। ভারতনা মীরম লৈবাক্না য়েৎলকপদসু তুমিন্না খক লৈবা ঙম্লোই।

অরুনাচল প্রদেশকী সরকার, এম.এল.এ. অমসুং অতোপ্পা স্তেকহোলদর্শিংবু রাজ্য অসি চাউখৎহনবগীদমক্তা থাগৎপা ফোংদোক্লদুনা, শ্রী নাইদুনা ইনফেন্ত মোর্তেলিতী রেত, মহৈরোইশিংনা সেকন্দরী থাক্তা মহৈ তম্বা তোকপা, সেক্স রেসিও, লিতরেসী অমসুং লম্বী-শোরোক্কী নেৎৱর্ক্কা মরী লৈনবা শিংনবশিংদা মিৎয়েং চঙবগী তঙাই ফদবা লৈ হায়না ফোংদোকখি। মহাক্না মীয়ামদা লাইরবা লৈতবা, লাইরিক হৈতবা মীওই লৈতবা, শেঞ্জা থুমজা লৈতবা অমসুং অতোপ্পবু মীচান-মীরায় খায়বা লৈতবা ভারত অমা ওইহন্নবা থবক পাংথোকমিন্নসি হায়বা ৱাফম থমখি।

শ্রী নাইদুনা অরুনাচল প্রদেশ লেজিস্লেতিব এসেমব্লী লাইব্রেরী, পেপর রিসাইক্লিং য়ুনিৎ অমসুং দোর্জী খান্দু ওদিতোরিয়ম শঙ্গাখি। “মখোয়শিং অসি নীংথিরবা এসেমব্লী বিলদিং অসিদা হাপচিনবা মগুন লৈরবা পোৎলমশিংনি”, হায়না মহাক্না হায়খি।

উপ রাস্ত্রপ্তিনা অরুনাচল প্রদেশ লেজিস্লেতিব এসেমব্লীবু ই-বিধান সীস্তেম শিজিন্নবা হৌবা অৱাং-নোংপোক লমদমগী অহানবা অমসুং লৈবাক্কী অহুমশুবা ওইবগীদমক্তা থাগৎপা ফোংদোকখি।

অরুনাচল প্রদেশকী মপাঙ্গল য়াম্না লৈ হায়না ফোংদোক্লদুনা, উপ রাস্ত্রপ্তিনা লৈবাক পুম্নমক্না রাজ্য অসিদা মসিগী মতিক লৈবা অমসুং মীয়ামগী মাই-পাকপা অসিগীদমক্তা অনৌবা অপাম্বা অমগা লোয়ননা য়েংলি হায়না পাউদমখি। রাজ্যসিনা মহৌশাগী পোত্থোক কয়া লৈবা মরম্না ভারতকী উহৈগী খাউ ওইবা ঙম্বগী মতিক লৈ। মসিগী পুক্নিং হুনীংঙাই ওইরবা লম্মিৎ-তুম্মিৎকী ফিভম লৈবনা মালেমগী লমকোইবা লাকফম ওইবা ঙম্বগী মতিকসু লৈ।

 

অরুনাচল প্রদেশকী রাজ্যপাল, ব্রিগ (দাঃ) বি.দি. মিশ্রা (রিতাইয়র্দ); মুখ্য মন্ত্রী, শ্রী পেমা খন্দু; অরুনাচল লেজিস্লেতিব এসেমব্লীগী স্পীকর, শ্রী পসাং দোর্জী সোনা; মন্ত্রী অমসুং লেজিস্লেচরশিংনা থৌরম অসিদা শরুক য়াখি।

মহাক্কী ম্পুং ফাবা ৱারোল মখাদা পীরিঃ

অরুনাচল প্রদেশকী নীংথিজরবা লমদম, গনতন্ত্রগী লাইশঙ অসিদা অদোমগা উন্নবগী খুদোংচাবা অমা ঐহাক্না ঙসি ফংলে।

ঐহাক্কী ওইনা ঙসিগী থৌরম অসি য়াম্না মগুন লৈ। ঐহাকপু ইকায় খুম্নবীবগীদমক্তা ইকায় খুম্নরবা মুখ্য মন্ত্রী অমসুং অদোম খুদিংবু ঐহাক্না থাগৎচরি।

মসিগী ফজরবা বিলদিং অসি হৌখিবা চহি খরদা অদোমগী রাজ্যনা চাউখৎপগী মহৈনি। অসিগুম্বা লমদম অসিদা ইনফ্রাস্ত্রকচরগা লোয়ননা অতোপ্পা প্রোজেক্ত কয়া অমসু লোইশিনবা ঙম্লে। অতোপ্পা প্রোজেক্ত খরদসু য়াম্না কন্না থবক চত্থরি। মসিনা মরম ওইদুনা মফম অসিগী শেন্মিৎলোন্দা য়াম্না চাউখৎপা পুরক্লগনি। মসিমক ঐহাক্কী য়াম্না নুংঙাইনীংঙাই ওইরবা ৱাফম্নি।

ঐহাক্না রাজ্যসিদা মমাংদা লাক্লম্বা মতমদা, ঐহাক্না ইতানগরদা শোরোক্তা চৎখি অদুগা ঙসিনা হেলিকোপ্তর্দা ওইনা চৎলি। মথং চহিগী ওগস্ত ফাওবগী মনুংদা গ্রীন ফিল্দ হোলোঙ্গি এয়র্পোর্ত শাবা লোইদুনা মথৌ পাংথোকপা হৌরগনি হায়না ঐহাক্কী ইফমদা পাউদম্বীরে। রাজ্য অমসুং মীয়াম্না চাউখৎপগী মশা অনৌবা অমা ফংলগনি। অসিগুম্বা মখলগী অহোংবা লাক্লিবসি, অদোমগী রাজ্য অমসুং অৱাং-নোংপোক লমদম অসি চাউখৎলক্লে হায়বা তাকপনি।

মরম অদুনা, ঐহাক্কী ৱারোলশিং অসি “এন.ই. লমদমদা রিসর্জেন্সকী অনৌবা য়ুগ” হায়রিবা “এন.ই.আর.দা এন.ই.আর.” হায়বা ৱাফম অসিগী মতাংদা ঙাংজগে। রিসর্জেন্স হায়বদি নৌনা হিঙ্গৎহনবা, অমুক্কা হন্না পুক্নিং থৌগৎপা হায়বনি। লমদম অসিদা অহোংবা পুরক্নবগীদমক্তা, চাউখৎহন্নবগীদমক্তা পান্থোক্লিবা থবকশিং অসিদা থৱাই য়াওবগী শক্তম অমা ময়েক শেংনা উবা ফংলে।

অরুনাচল প্রদেশকী নীংথিরবা লমদম অমসুং গনতন্ত্রগী কোনুং অসিদা অদোমগা উন্নদুনা করিগুম্বা ৱাফম খরা থমজবা অসিদা ঐহাক্না তসেংনা নুংঙাইবা ফাওই। ঐহাক্না অসিগুম্বা তাংনা ফংবা তাঞ্জাসিদা মুখ্য মন্ত্রী অমসুং মেম্বর খুদিংবু থাগৎচরি।

ঐহাক্নানা অরুনাচল প্রদেশ লেজিস্লেতিব এসেমব্লী লাইব্রেরী, পেপর রিসাইক্লিং য়ুনিৎ অমসুং দোর্জী খান্দু ওদিতোরিয়ম শঙ্গাবসিদা য়াম্না নুংঙাইবা ফাওই। মখোয়শিং অসি নীংথিরবা এসেমব্লী বিলদিং অসিদা হাপচিনবা মগুন লৈরবা পোৎলমশিংনি।

ঐহাক্না পুঙফম অসিবু মতম পুম্বদা নীংশিংলগা লৈরগনি।

নুমিৎ থোকফম লমদম অমা ওইরিবা রাজ্যসিদা লাকপা অসি মতম পুম্বদা চাউথোকচনীংঙাই ওই অমসুং তোঙানবা জাতীগী মীওই কয়ানা চহি চা কয়াদগী নুংশি-চান্ননা লৈমিন্নরক্লিবা অসিনা ঐখোয়গী লৈবাক্কী মোত্তো “তোঙানবা মরক্তা অমত্তা ওইবা” অসিবুসু অশেংবা ৱাহন্থোক পী।

অরুনাচল প্রদেশকী মপাঙ্গল য়াম্না লৈ। লৈবাক পুম্নমক্না রাজ্য অসিদা মসিগী মতিক লৈবা অমসুং মীয়ামগী মাই-পাকপা অসিগীদমক্তা অনৌবা অপাম্বা অমগা লোয়ননা য়েংলি হায়না।

অদোমগী নুংগী হৈ-শিংবগা লোয়ননা অদোম্না থৱাই য়াওনা অমসুং থম্মোই শেংনা চাউখৎপা পুরক্নবগীদমক্তা পাংথোক্লিবা থৌওংশিংবু ঐহাক্না তসেংনা থাগৎলি।

অতোপ্পা রাজ্যনা ঙমদবা মওংদা অদোম্না লৈবাক শেমগৎপদা তেংবাংবা ঙমগনি। রাজ্যসিনা মহৌশাগী পোত্থোক কয়া লৈবা মরম্না ভারতকী উহৈগী খাউ ওইবা ঙম্বগী মতিক লৈ।

মসিগী পুক্নিং হুনীংঙাই ওইরবা লম্মিৎ-তুম্মিৎকী ফিভম লৈবনা মালেমগী লমকোইবা লাকফম ওইবা ঙম্বগী মতিকসু লৈ।

করিগুম্বা মসিগী মেগা ৱাৎ ৫৮০০০গী হাইদ্রো পাৱর নীংথিনা শিজিন্নরবদি, রাজ্যসিনা লৈবাক্কী সস্তেনেবল পাৱরহাউস ওইবা ঙম্বগী মতিক লৈ।

চহি কয়া অসিদা নীংথিনা ঙাক শেন্দুনা য়োকখৎলিবা অদোমগী মফমদা মতম কুইনদগী চৎনদুনা লাক্লবা নাৎকী চৎনবী কয়াগী পুক্নিং হুরবা মোজেক অমা লৈ।

অদোমগী নাক্তা নুমিৎ মঙানিগী মনুংদা মাউন্ত ইভরেস্তপু অনিরক মতোন লোমখিবী মালেমগী অহানবা নুপী চিংকারোই অনশু জমশেনপাগুম্বা শক্নাইরবা শান্নরই লৈরি। অদোমগী তীম্না নেস্নেল কবদ্দি চেম্পিয়ন্সু ওইরে হায়না ঐহাক্না পাও-চেদা পাবা ফংলে। মসিদি য়াম্না নুংঙাইবা মাই পাকপনি। রাজ্য সরকারনসু ইনফ্রাস্ত্রকচর কয়া শেমদুনা  শান্ন-খোৎন্নববু খুমাং চাউশিলহন্নবা অমসুং নহাশিংদা শান্ন-খোৎনবদা মীথোয় মীহেনবা ওইনবা শোইদনা লেপ্তনা হোৎনগনি হায়না ঐহাক্না থাজবা থম্মি।

মসিগী বিলদিং অসিনা রাজ্য অসিনা মমাংগী চহি খরদা পায়খৎলিবা খোঙথাংশিংগী খুদম অমা ওইরি। মরু ওইরবা ঙমখৈগী রাজ্যসিনা প্রোজেক্ত অমসুং ইনফ্রাস্ত্রকচর কয়া অমা লোইশিন্দুনা, কয়া অমনা হৌজিক নীংথনা পয়খত্তুনা সোসিও-ইকোনোমিক দিভেলপমেন্ত পুরক্নবা খোঙথাং কয়া পায়খৎপসিদা ঐহাক্না নুংঙাইবসু ফাওই।

অসিগুম্বা অহোংবা লাক্লিবা অসি মরু ওইরবা ঙমখৈগী রাজ্য অমসুং অৱাং-নোংপোক লমদম অপুনবগী ওইনা রিসর্জেন্স লাক্লে হায়বা ময়েক শেংনা তাক্লি।

চাউখৎপগী অনৌবা মাইকৈ, থবক থৌওংশিংদা লেপ্তনা খুমাং চাউশিনবা হায়না ঐহাক্না অপুনবা  থৌওং অসিবু ‘অৱাং-নোংপোক লমদমগী রিসর্জেন্সকী অনৌবা য়ুগ’ হায়বদি ‘এন.ই.আর. ইন এন.ই.আর.’ হায়না হায়জনীংই।

পার্লিয়ামেন্তকী এক্তকী মখাদা ইং ১৯৭১দা নোর্থ ইস্তর্ন কাউন্সিল লিংখৎখিবসিনা লদম অসিদা চাউখৎপা পুরক্নবা হান্না পাংথোক্লম্বা থৌওংশিংদগী তোঙানবা অমা ওইরি। মসিদগী মফমসিদা কান্নবা কয়াদা লাকপা উখি অদুবু লমদম অসিগী অমসুং মীয়ামগী তৌবা ঙম্বগী মতিক মপুং ফানা শিজিন্নবগীদি কোন্নবা ওইদ্রি।

মনাগগী চহি চাগী ৯০গী মতমদা, ‘লুক ইস্ত পোলিসী’ লাউথোকখিবদগী য়ুম্লোন্নবা লৈবাকশিংগগী মরক্তা কন্নেক্তিবিতী লৈহন্দুনা শেন্মিৎলোন্দা অপুনবা চাউখৎপা পুরকপগী লম্বী য়াৎপা হৌখি।

হন্দক্কী চহি-চাগী অহৌবদা পোলিসী অসিদা অহেনবা শাফু পীখি। অদুবু, অপাম্বা লৈরিবা অমসুং থবক ওইনা পাংথোক্লিবশিংগী মরক্তা লৈনবা খেন্নবা য়েংলুরবা মতুংদা মমাংগী চহি খরসিদা অনৌবা অপাম্বা অমসুং ইথিলগা লোয়ননা ‘এক্ত ইস্ত পোলিসী’ অমুক হৌদোকখি।

প্রধান মন্ত্রী, শ্রী নরেন্দ্র মোদীনা ইং ২০১৪দা এক্ত ইস্ত পোলিসী লাউথোকপগী মনুংদা, অৱাং-নোংপোক লমদনা মসিগী ফলক্রম ওইদুনা লমদম অসিনা কান্নবা কয়া ফংমিন্ননবগীদমক্তা মতিক চাবা গ্রোথ ইঞ্জিন অমা ওইহল্লক্কনি হায়না ফোংদোকখি। মহাক্না কলচর, কম্মর্স, কন্নেক্তিবিতী অমসুং কেপাসিতী বিলদিংনা পোলিসী অসিবু মাং থানা চৎহনবা ঙমগনি হায়বা ৱাফমদা মীয়ামগী পুক্নিং চিংশিনখি।

হৌখিবা মতমশিংদা, ইনফ্রাস্ত্রকচর মতিক চাদবা অমসুং লালহৌবগী ইরাংনা লমদম অসিদা প্রাইভেৎ ইনভেস্তমেন্ত চঙহল্লকখিদে। মসিনা চাউখৎপবু হেন্না থিনথহনখি।

মতিক চাদবা অমসুং চাউখৎপদা চাং নাইদবগী ফিভম্না চৎনবী তোঙানবা মীওইনা পাক-শন্না লৈবা মফম অসিগী মীয়ামগী মরক্তা লৈবা পেন্দবশিং হেনগৎহনখি।

তুং কোইনা চাউখৎপা হায়বসি মীয়ামদা অমসুং অকোয়বগী ফিভমদা মিৎয়েং চঙবা মতমদতা পুরকপা ঙমগনি। গনতন্ত্রনা মীয়াম্না মশাগী পুন্সি য়াৎচনবগীদমক্তা পথাপ অসিদা থৱাই য়াওনা শরুক য়াগদবনি হায়না হান্নদগী হায়দুনা লৈরবনি।

থৌশিল-থৌরাং অমসুং প্রোজেক্ত কয়া শেম্বদা খুন্নাই খুদিংনা তেংবাংবা হায়বসি য়াম্না মরু ওইবনি।

মীয়ামগা নীংথিনা পাউ ফাওনবা হোৎনবা হায়বসি য়াম্না মরু ওই অমসুং রাজ্যগী এসেমব্লীনা অসিগুম্বা থৌওং পাংথোকপগী খ্বাইদগী ফবা ফম্বাক অমা পীরিবনি।

ইকায় খুম্নরবা মেম্বরশিং,

অৱাং-নোংপোক লমদম্না চাউখৎপগী অনৌবা ৱারী অমা ইদুনা তুংলমচৎপু মাইকৈ অসিদা পুবা ঙম্নবগীদমক্তা অসিগুম্বা তুংগী মতমদগী নাথোক্নবা ৱারেপ লৌরে হায়বসিদা ঐহাক্না য়াম্না নুংঙাইবা ফাওই। ইনফ্রাস্ত্রকচর প্রোজেক্ত কয়া অমা লোইশিনবা ঙম্লিবা অমসুং হৌজিক পায়খৎলিবা অমসুং সোসিও ইকোনোমিক্কী ফিভমদা চাউখৎপা উরিবা অসিনা ৱাফম অসিবু ময়েক শেংনা তাকপনি

ঐহাক্না অরুনাচল প্রদেশকী সরকার, এম.এল.এ. অমসুং অতোপ্পা স্তেকহোলদর্শিংনা নীংতম্বগী মতুংদগী হৌনা রাজ্য অসি চাউখৎহনবগীদমক্তা থাগৎপা ফোংদোক্লদুনা।

ভারতনা চাউখৎপগী লম্বীদা য়াঙনা খোংদারি অমসুং অৱাং-নোংপোক লমদমসু অদুমক হোৎনরি। ইং ২০১৩দা ফোঙখিবা ইন্দিয়ন চেম্বর ওফ কম্মর্সকী রীপোর্ত অমনা লৌউ-শিংউবা অমসুং সর্ভিস সেক্তরদা কা হেন্না মখা পোনবা অৱাং-নোংপোক লমদম্না সোসিও-ইকোনোমিক ইন্দিকেতরগী মতাংদা ভারতকী অতোপ্পা মফমশিংদগী চাং য়াম্না তানা লৈরি। অদুবু হৌজিক্তি মসিদা খেন্নবা কয়া লৈরে।

সিক্কিম অমসুং অরুনাচল প্রদেশকী পর কেপিতা নেৎ স্তেত দোমেস্তিক প্রদক্ত, চাউখৎপগী চাং ওন্নবা পথাপ, অসিনা চহি ৭কী মমাংদা পর কেপিতা নেত নেস্নেল ইনকমদগী হেল্লম্মি। অদুবু, রিজর্ব বেঙ্ক ওফ ইন্দিয়ানা ফোঙবা ইং ২০১৮-১৮ অমসুং ২০১৯-২০গী দেতাগী মতুং ইন্না মিজোরম, অরুনাচল প্রদেশ অমসুং সিক্কিমগী পর কেপিতা নেৎ স্তেত দোমেস্তিক প্রদক্তনা ভারতকী মশিংদগী হেনখি অমসুং নাগালেন্দ অমসুং ত্রিপুরাগী মশিংনা নেস্নেল এভরেজকা নক্ননা লৈখি।

ভারতকী নেত নেস্নেল ইনকম্না ২০১৩-১৪গী চাংদগী ৬০% হেন্না হেনগৎলবসু, রাজ্য ৮গী মনুংদগী ৬কী পর কেপিতা এন.এস.দি.পি.দা হেনগৎপগী চাংনা নেস্নেল এভরেজতগী হেনখি।

হ্যুমেন দিভেলপমেন্ত ইন্দেক্স (ঐচ.দি.আই.)তা মখা পোল্লগা ওনবা সোসিএল দিভেলপমেন্তকী মতুং ইন্না লমদমসিগী রাজ্য ৮গী মনুংদগী ৭না ইং ২০১৯গী ঐচ.দি.আই.গী রীপোর্তকী মতুং ইন্না লৈবাক্কী ইন্দেক্সতগী হেনখি। অসম খক্তনা ০.৬১৩গী স্কোরগা লোয়ননা ০.৬৪৫ ওইবা নেস্নেল এভরেজতগী নেমখি।

লিতরেসী রেত ৭৮.৫০% লৈদুনা এন.ই.আর.না লৈবাক্কী ৭৪%দগী হেনখি।

লমদম অসিগী সোসিও-ইকোনোমিক চাউখৎপগী ফিভমদা অহোংবা পুরক্নবগীদমক্তা, কেন্দ্র সরকারনা মমাংগী চহি ৭তগী খোঙথাং কয়া অমা পায়খৎপা হৌরে হায়না ঐহাক্না নুংঙাইবা ৱাফম অমা তম্নীংই। ইং ২০১৪-১৫দা লুপা করোর ৩৬,০০০গী গ্রোস বদজেত্তরী শপ্পোর্তকা চাংদম্নবদা, ইং ২০২১-২২গী ওইনা শেনফম অসি ৯০%গী চাংদা হেনগত্তুনা লুপা করোর ৬০,০০০ ওইখ্রে।

 

থবক পীবগী চাং হেনগৎহন্নবগীদমক্তা, লমদম অসিগীদমক্তা পীদুনা প্রধান মন্ত্রী মুদ্র য়োজনাগী মখাদা লোন একাউন্ত করোর ১.০৭কী অয়াবা পীদুনা লুপা করোর ৪৮,৮৬৮সু কায়থখি।

প্রধান মন্ত্রীগী ইমপ্লোয়মেন্ত জেনেরেসন ফন্দগী মখাদা, ইং ২০১৭-২০গী মনুংদা লমদম অসিদা য়ুনিৎ ২৪,৪৫৫ লিংখত্তুনা মীওই লাখ ২দা থবক পীখি। স্তার্ত-অপ ইন্দিয়া স্কিমগী মখাদা, এস.সি. অমসুং এস.তি. নুপী বেনিফিশরী ৩৪৪৯দা লুপা করোর ৭১৫ কায়থখি। ক্রেদিৎ গেরেন্তী ত্রস্ত ফন্দগী মখাদা মাইক্রোফাইনান্স ইন্দস্ত্রী অমসুং স্মোল ইন্তর্প্রাইস ৯৮,৫৬৯দা লুপা করোর ৪৬৮৫ কায়থখি।

য়ু.দি.এ.এন. (উরে দেশ কি আম নাগ্রিক) স্কিমগী মখাদা, তুরিজম রুত য়াওনা লমদম অসিগী রুত ১০৮কী অয়াবা পীখি অমসুং মসিগী মনুংদগী রুত ৪৪দি থবক তৌবা হৌরে। লমদম অসিগীদমক্তা, সেন্ত্রেল রোদ এন্দ ইনফ্রাস্ত্রকচর ফন্দগী মখাদা রোদ প্রোজেক্ত ১৯০ হেনবগী অয়াবা পীখ্রে অমসুং মসিগী মনুংদা অরুনাচল প্রদেশকী ৫০ য়াওরি।

স্পেসিএল এসেলরেতেদ রোদ দিভেলপমেন্ত প্রোগ্রামগী মখাদা লমদম অসিগী নেস্নেল হাইৱে অমসুং অতোপ্পা শোরোকশিং শাবগী পান্দম অসি ইং ২০১৪-১৫দা কিলোমীতর ৪৬৬ ওইরম্বদগী ইং ২০১৮-১৯দা কিলোমীতর ১০২৯দা হেনগৎখি। লমদমসিদা লুপা করোর ৪৪৮০৫ চঙনা কিলোমীতর ৪০১৭ কোনগদবা রোদ প্রোজেক্ত ১৬৪দি হৌজিক থবক পায়খৎলি।

কেন্দ্র সরকারনা কন্না হোৎনবদগী লমদমসিদা অমুক্কা হন্না শান্তি লৈরক্লি অমসুং ইং ২০১৩গা চাংদম্নবদা লালহৌবগা মরী লৈনবা ইরাংনা ৭০%, মীচম শিবগী চাংনা ৮০% অমসুং ইং ২০১৯দা সেক্যুরিতী ফোর্স্তা অশোক-অপন নঙবগী চাংনা ৭৮%গী চাংদা হন্থরক্লে। বোরো অমসুং কার্বি আংলোং এগ্রীমেন্ত অমা হন্দক্তা খুৎয়েক পীনখিবনা লমদম অসিদা শান্তি লৈবগী মতম লাকহন্নীংবগী অপাম্বা উৎলে।

খেন্নবা ৱাৎলে হায়না শকখঙলবা হীরমশিংদা মিৎয়েং চঙবা হেনগৎহন্নবগীদমক্তা নিতি আয়োগনা লমফমসিগী মফম ১০৩ গীদমক্তা নোর্থ-ইস্তর্ন রিজনেল সস্তেনেবল দিভেলপমেন্ত গোল ইন্দেক্স এন্দ দেশবোর্দ ২০২১-২২ পুথোকখ্রে। লাইফ ওন দি আর্থ অমসুং ক্লিন ৱাতর অমসুং সেনিতেসনগুম্বা পান্দম খরদা লমদম অসিনা থবক কয়া নীংথিনা পাংথোক্লি অদুবু ‘ইন্দস্ত্রী, ইন্নোভেসন অমসুং ইনফ্রাস্ত্রকচর’ অমসুং ‘ক্বালিতী এজুকেসন’গুম্বা পান্দম খরদা অহেনা মিৎয়েং চঙফম থোক্লি।

 

ইকায় খুম্নরবা মেম্বরশিং,

ঐহাক্না লমদমসিদা চাউখৎপা পুরকপদা থেংনবা শিংনবশিং অমসুং মসিগী রিসর্জেন্সকী খ্বাইদগী নৌবা ইন্দিকেতর কয়া ঐহাক্না ইকায়খুম্নরবা হাউস অসিদা কুপ্না তাকপগী মরমদি অরুনাচল প্রদেশ অমসুং মসিগী মীয়ামগী তুং লমচৎ অসি অৱাং-নোংপোক লমদমগী মনুং চনবা অমসুং মরী লৈনবননি। ঐহাক্না মুখ্য মন্ত্রী, হাউস অসিগী মেম্বরশিং অমসুং রাজ্য অসিগী চাউখৎপা থুহন্নবগীদমক্তা হোৎনরিবা মীওই খুদিংবু থাগৎপা ফোংদোক্লি।

অতোপ্পা ৱাফম অমদা ঐহাক্না সরকার অমসুং মেম্বরশিংগী মাংদা মিৎয়েং চঙনীংঙাই ওইবা ৱাফম্ন খরসু থমজগে। ইনফেন্ত মোর্তেলিতী রেত, মহৈরোইশিংনা সেকন্দরী থাক্তা মহৈ তম্বা তোকপা, সেক্স রেসিও, লিতরেসী অমসুং লম্বী-শোরোক্কী নেৎৱর্ক্কা মরী লৈনবা শিংনবশিংদা ঐখোয়না মিৎয়েং চঙবগী তঙাই ফদবা লৈ। অরুনাচল প্রদেশনা শোত্থনা লৈরিবা পনখ্রবা হীরম অমসুং অতোপ্পা হীরমশিংদা অহেনবা মিৎয়েং চঙগনি হায়বগী থাজবা থম্লি।

ইকায় খুম্নরবা মেম্বরশিং,

রাজ্য সভাগী চেয়র্মেন ওইনা, ঐহাক্না এসেমব্লী অসিগী ফ্লোর্দা লৈবাক্কী পার্লিয়ামেন্তরী ইন্সতিত্যুসনগী মথৌ তৌবগী মতাংদা ৱাফম খরা ফোংদোকপা অসি মহৌশানা তাবনি। গনতন্ত্র অসি হৌজিক্কী মতমগী মালেমগী মরু ওইবা য়ুম্বীশিংগী মনুংদা অমনি অমসুং মসিগী মরমদি মসিনা পুম্নমক্না শরুক য়ামিন্নবা য়াবা লৈঙাক্কী মওং অমা ওইবসিননি।

ঐখোয়না নীংতম্বা ভারত্তা চাউখৎপগী চহি ৭৫গী হরাওবা ফোংদোকপগী অজাদীগী অমৃত মহোৎশব অসিদা ঐখোয়না লৈবাক্কী গনতন্ত্রগী চৎনবীবু হেন্না মপাঙ্গল লৈহন্নবগীদমক্তা মহা সঙ্কল্প অমগী ৱারেপ লৌগদবনি।

ঐখোয় খুদিংনা পাম্লিবা অনৌবা ভারত অমা শেম্বদা তেংবাংবা ঙম্বা খ্বাইদগী ফবা খুৎলায়দি ঐখোয়গী স্তেত এসেমব্লী অমসুং পার্লিয়ামেন্ত ওইহনগদবনি। ঐখোয়গী গনতন্ত্রা অসি মালেমগী খ্বাইদগী লিবা অমসুং অচৌবনি। মসিবু ঐখোয়না খ্বাইদগী ফবা ওইহনসি।

ঐখোয়না মীফম মশিং য়াম্না ফমগদবনি অমসুং সেসন খুদিংদা কান্নবা খ্বাখল্লোন কয়াদা তাথোক-তাশিন তৌগদবনি। ঐহাক্কী মফমদা ফংবা পাউগী মতুং ইন্না, অরুনাচল প্রদেশনা চহিদা চাংচত্তা ৮কুম ফম্মি খঙলে। মসি হোংদোক্তুনা মীফম ফম্বগী মশিং য়ামখৎহন্নীংই অদুগা মীয়ামগী অপাম্বশিংগী মতাংদা খরা হেন্না শাংনা অমসুং কুপথনা খন্ন-নৈনহন্নীংই।

ঐহাক্না হায়নিংবা অতোপ্পা ৱাফম অমনা, ঐখোয়গী লৈবাক্কী লেজিস্লেচরশিংদা লৈরিবা নুপীগী ফমগী মশিংনি।

হাউস অসিদা নুপী ৪খক লৈ। লমদম অসিগী লেজিসলেচর ৮হী অপুনবা সিত ৪৯৮গী মনুংদা ৪% খক ওইদুনা শুপ্নগী নুপী মেম্বর ২০খক লৈ। আইন শেম্বগী থৌওংদা লমদম অসিগীতা নত্তনা অতোপ্পা লেজিস্লেচর অমসুং পার্লিয়ামেন্ততা  নুপী মেম্বর মশিং হেন্না য়াওহনবগী তঙাই ফদ্রবা ৱাফম অমা লৈরে।

অৱাং-নোংপোক লমদমদা তোঙানবা-তোঙানবা জাতী কয়া লৈবসিনা মরম ওইরগা, লৈঙাক্কী থৌওংদা মীয়াম খুদিংমক শরু য়াহন্নবগীদমক্তা ওতোনোমস কাউন্সিল লৈহনবগী সংবিধানগী অখন্নবা কাংলোন লৈরিবনি। মখোয়না নীংথিনা থবক তৌবনা মীয়ামগী অপাম্বা থুংহনবা ঙমগনি।

সংবিধানগী কাংলোন ইন্দুনা, রাজ্য সরকারবনা পঞ্চায়তী রাজ বোদীশিংদা শেল, মথৌ অমসুং থৌমী কয়া অমা পীনবা ৱারেপ লৌরে তাবদা ঐহাক্না য়াম্না নুংঙাইবা ফাওই। খোঙথাং অসি অচুম্বা মাইকৈদা ঙশিনবগী অচুম্বা থৌওংনি।

সরকার অমসুং মীয়ামগী মরক্তা লৈবা অহাঙববু মেনশিন্নবা পান্দম থম্বা ‘সরকার আপকে দ্বার’ হায়বা খোঙথাং অমা অদোমগী সরকারনা হীরম অসিগা মরী লৈননা লৌখৎলে তাবদা য়াম্না নুংঙাইবা ফাওই।

ইকায় খুম্নরবা মেম্বরশিং,

ঐখোয়গী লৈবাক্না খোঙজং কয়া চঙশিল্লবা মতুংদা নীংতম্বা ফংদুনা ঙসিদি অমৃত মহোৎসব পাংথোক্লি। মথংগী চহি ২৫দা ঐখোয়গী লৈবাক্না খুন্নাই চাউখৎপগী হীরমদা অনৌবা থাক অকদা কারগনি। মসিগী থাক অসিনা ঐখোয়গী লৈবাক্কী অনৌবা শক্তাক ওইরগনি। তুংলমচৎকী অচেৎপা য়ুম্বী অমা শেম্নবা হন্দক্কী দিকেদ অসি য়াম্না মরু ওইবনি।

অৱাং-নোংপোক লমদমগী ওইনদি, দিকেদ অসি হেন্না মরু ওইবা ওইগনি। মসিগী মরমদি, অদোম্না মমাংগী থৌদোকশিংদগী নান্থোক্তুনা শিংনবা কয়াবু খুদোংচাবদা ওনথোক্কদবনি।

মমাংগী পুৱারীবু নীংশিংলদুনা, ঐহাক্না ঙসি মেম্বরশিংগী মাংদা লমদম অসিগী মাংজিল থাবগী পাম্বৈ খরা থমজরিঃ

  1. মান্নদবা জাতীগী মীওইশিংগী মরক্তা তুংলমচৎকী মান্নবা ৱাখল্লোন শাগৎপা
  2. ইনফ্রাস্ত্রকচর অমসুং কন্নেক্তিবিতীগী অ ৱাৎপা লৈববু অথুবা মতমদা কোকহনবা
  3. রাজ্যশিংগী ঙমখৈগী উংখৎনবশিংবু ৱারী শাদুনা লোইশিনবা
  4. লম খোপচিনবগী ৱারী লৈহৌবা অমসুং খৎন-চৈনবশিংবু মরু ফংনা মুত্থৎপা
  5. অকোয়বা অমসুং মহৌশাগী পোত্থোকশিংগী ইন্দস্ত্রীদা প্রাইভেৎ ইনভেস্তমেন্ত চঙহনবা
  6. তুরিজমগী মতিকপু মপুং ফানা শিজিন্নবা
  7. ওন্তোপ্রিনর্শিপ পুক্নিং থৌগৎপা
  8. স্কিল ত্রেনিং তৌবদা পুক্নিং থৌগৎপা
  9. কেন্দ্র সরকারগী মখা পোনবা হন্থহন্নবা অহেনবা শেন্থোক লৈগদবা থবক অমসুং প্রোজেক্ত কয়া পায়খৎপা
  10. সস্তেনেবল দিভেলপমেন্ত লৈহনবা
  11. অরৈবা রিসোর্সশিং নীংথিনা শিজিন্নবা ঙম্নবগীদমক্তা নুং-পান ফাওনা উবা অমসুং থাজবা য়াবা লৈঙাক লৈহনবা। শেঞ্জা থুমজা মরু ফংনা মুত্থৎপা।
  12. পোলিসী, স্কিম অমসুং প্রোজেক্ত শেম্বদা খুন্নাই শরুক য়াহনবগী থৌওংশিং পুক্নিং থৌগৎপা
  13. লমদমশিংগী মরক্তা মান্নদাব মিৎয়েং য়েংবগী থৌওং লৈহন্দনবা হোৎনবা
  14. জেন্দর ইক্বেলিতী লৈহনবা
  15. চাউখৎপা অমসুং গনতন্ত্রবু মতম অমতদা মপাঙ্গল লৈহনবা

ঐখোয়না মাইকৈ অসিদা হান্নদগী চৎলি, অদুবু মতম্না পাম্বগী মতুং ইন্না, ঐখোয়না খোঙজেল য়াঙনা চঙশিনবগী মথৌ তারে। লমদম অসি চাউখত্তনা ভারতকী চাউখৎপা মপুং ফাবা ঙম্লোই। মরম অদুনা, অরুনাচল প্রদেশ অসুং অৱাং-নোংপোক লমদম্না থম্মোই শেংবা অমসুং থৱাই য়াওবগা লোয়ননা চাউখৎপগী অনৌবা তাঙ্কক অমা হৌগদবনি।

ঐখোয়গী নীংতম্বগী ৭৫শুবা চহি অসিদা, লমদম অসিগী শক্নাইরবা নীংতম লান্মী, রানী গাইন্দিনল্যু, মোজে রিবা, কনকলতা বরুৱা, বির তিকেদ্রজিৎ সিংহ, তিরোত সিংহ সাইম্লিয়ে, পো তোগন সাংমানচিংবা মীরম মচাগী মাইয়োক্তা লেপখিবা অতোপ্পা অথৌবা অমসুং অথৌবীশিংগী মফমদা ইকায় খুম্নবা উৎচরি।

নুংশিরবা মেম্বরশিং,

ঐখোয়না নীংতম্বগী চহি ৭৫দা ফংখিবা মাই-পাকপশিং নিংশিংলি, অদুবু লাক্কফৌরিবা চাউখৎপগী খোঙচত্তা শাংলবা লম্বী অমা চৎকদবা ৱাৎলি হায়বসি ঐখোয়না কাওরোইসি।

ঐখোয়না অপুনবা পাঙ্গল অমা শেমগৎ-শাগৎকদবনি। অরুনাচল প্রদেশ সরকারনা কেন্দ্র সরকারগা খুৎশম্নদুনা লাইরবা, মীয়ামগী মরক্তা খেন্নবা মিৎয়েং য়েঙবা, জেন্দর ইক্বেলিতী লৈহনবা অমসুং মীয়ামগী পুন্সিদা সোসিও-ইকোনোমিক্কী ওইবা অহোংবা পুরক্নবগীদমক্তা শোইদনা হোৎনগদবনি।

ঐখোয়না ঐখোয়গী নহাশিংগী স্কিল ফগৎহনবা, মহৈ-মশিংগী মগুন হেনগৎহনবা অমসুং হকশেল শেন্নবগী পথাপ ফগৎহন্নবা মিৎয়েং য়েঙদুনা মীয়ামগী তৌবা ঙম্বগী মতিক হেনগৎহন্নবা লেপ্তনা হোৎনফম থোক্লবনি।

রাজ্যসিগী মীয়াম্না ইরিবা অরুনাচল প্রদেশকী অনৌবা পুৱারীগী তাঙ্কক অসিদা অদোম খুদিংনা লুচিংবা অমা ওইনা অইবা ওইহৌবগী নীংথিরবা খুদোংচাবা অমা মাংদা লৈরে।

অদোম্না অরুনাচল প্রদেশকী চাউখৎপগী খোঙচৎ অসিবু মথংগী অৱাংবা থাক্তা পুখৎপা ঙম্নবা তঙাই ফদবা মিৎয়েং অমসুং মাইকৈ তাক্কনি হায়না ঐহাক্না থাজবা থম্মি।

থবক-থৌরম অসিদা মাই পাকপা ওইসনু হায়না ঐহাক্না য়াইফ পাউজেল পীজরি।

ঐহাক্না অরুনাচল প্রদেশকী বিধান সভাগী ইকায় খুম্নরবা স্পীকর, মুখ্য মন্ত্রী অমসুং মেম্বরশিংগী মফমদা ঐহাকপু ঙসিগী য়াইফরবা হাউস অসিদা তরাম্না ওকপীদুনা ৱাফম খরা থমজবগী অয়াবা পীবিবগীদমক্তা থাগৎচবগা লোয়ননা য়াইফ পাউজেলসু পীজরি।

থাগৎচরি।

জয় হিন্দ”

*****



(Release ID: 1762780) Visitor Counter : 59