দিবলপমেন্ত ওফ নোর্থ ইস্তর্ন রিজন (দোনর), কলচর অমসুং তুরিজমগী কেন্দ্রগী মন্ত্রী শ্রী জি. কিশন রেদ্দীনা নুমিৎ নিনিগী ওফিসিএল ওইবা খোঙচৎতা মেঘালয় অমসুং আসম চৎখ্রে। মহাক্কী আসম খোঙচৎকী শরুক অমা ওইনা, কেন্দ্রগী মন্ত্রীনা আসমগী গুৱাহাতীদা ‘নেস্নেল মিসন ওন ইদিবল ওইলস -ওইল পাল্ম ব্যুজিনেস সমিত ফোর এন.ই. স্তেত্স (এন.এম.ই.ও.-ও.পি.)’তা পাংথোকপা ব্যুজিনেস সমিত্তা শরুক য়াখ্রে অমসুং ৱা ঙাংখ্রে। এগ্রিকলচর ফার্মরস অমসুং ৱেলফিয়রগী কেন্দ্রগী মন্ত্রী শ্রী নরেন্দ্র সিংহ তোমার, দোনরগী রাজ্যগী মন্ত্রী শ্রী বি. এল. বর্মা, রাজ্যগী মন্ত্রী মিস শোভা কারন্দলাজে, রাজ্যগী মন্ত্রী শ্রী কাইলাশ চৌধুরী, অরুনাচল প্রদেশকী মুখ্য মন্ত্রী শ্রী পেমা খন্দুসু শরুক য়াখি।    

ব্যুজিনেস সমিত অসিদা ৱা ঙাংলদুনা, কেন্দ্রগী মন্ত্রী জি. কিশন রেদ্দীনা হায়খি, “অৱাং নোংপোক্কীদমক এন.এম.ই.ও.-ও.পি.না লৌখৎলিবা খোঙথাংশিংনা ওইল পাল্ম লৌউবশিংদা য়াম্না চাউনা কান্নবা পীরগনি, কেপিতেল ইনভেস্তমেন্ত হেনগৎলগনি অমসুং থবক্কী খুদোংচাবশিং ফংলগনি অমসুং মপাল লমদগী পোৎ পুশিল্লকপদা মীপাল তাংবা হন্থরগনি”। “হন্দক্তা নরেন্দ্র মোদী সরকারগী মন্ত্রীমন্দলনা লৌখিবা ৱারেপ অনি, ওইল পাল্মগীদমক চাননবা থাওদা নেস্নেল মিসন অমসুং নোর্থ ইস্তর্ন রিজনেল এগ্রীকলচরেল মার্কেতিং কোর্পোরেসন (এন.ই.আর.এ.এম.এ.সি.) হিংগৎহনবা অসিনা অৱাং নোংপোক লমদমগী লৌউ-শিংউবগী লমদা মপুং ওইনা চাউখৎপা অমা পীরগনি”।

ব্যুজিনেস সমিত মনুংদা, অৱাং নোংপোক রাজ্যশিংগীদমক ইদিবল ওইলস – ওইল পাল্মদা বেম্বু এফ.পি.ও.এগ্রিমেন্তগীদমক মেমোরেন্দম ওফ আন্দর্স্তেন্দিং অমা সহি তৌনখ্রে। কেন্দ্র সরকারগী হোৎনরিবা অসিদা রেদ্দীনা মরুওইবা পীখি অমসুং হায়খি, “সরকার অসিনা মতম খুদিংদা অৱাং নোংপোক লমদমগী ইচিল ইনাওশিংগীদমক লেপ্লি অমসুং সমিত অসি নরেন্দ্র মোদীনা লৌখৎপা অতোপ্পা প্রো-ফার্মর খোঙথাং অমনি”। “ইদিবল ওইলদা থম্লিবা মিসন অসিগী পান্দমদি লাক্কদৌরিবা চহি ৫ অসিদা ভারত পুম্বদা ওইল পাল্ম থাবা অসি হেক্তর লাখ ৩.৫তগী হেক্তর লাখ ১০দা হেনগৎননবনি। অনৌবা কল্তিবেসন অসিগী ৫০% অমা অৱাং নোংপোক লমদমগীদমক পান্দম থম্লি। পারিবা লুপা কোতি ১১,০৪০গী স্কীম অসিগী মনুংদা চাওরাক্না লুপা কোতি ৬,০০০ লোম হকথেংননা অৱাং নোংপোক রাজ্যগী লৌমীশিংদা কান্নবা পীগনি”।

কেন্দ্রগী মন্ত্রীনা ইনভেস্তরশিং অমসুং স্তেকহোল্দর পুম্বদা অৱাং নোংপোক্তা লাক্তুনা ইনভেস্ত তৌনবা কন্না তকশিল্লি। মহাক্না হায়খি, “অৱাং নোংপোক্কী মফমদা অদোমগী ইনভেস্তমেন্তনা য়াম্না শেন্দোং লৈগনি অমসুং শ্রী নরেন্দ্র মোদীগী লুচিং মখাদা ঐহাক্না অদোম্বু থাজবা পীরি মদুদি, ইনভেস্তর কম্ম্যুনিতী পুম্বা মপুং ফানা মতেং ফংগনি”। মরম অদুনা ঐখোয়না খুদোংচাবা কয়া অমা লৈরিবা অমসুং নহাশিংগীদমক থবক্কী খুদোংচাবা কয়া লৈরিবা লম অৱাং নোংপোক অসিদা পুন্না লক্তুনা চোংথোরক্কদবনি”।  

শ্রী জি. কিশন রেদ্দীগা লোয়ননা এগ্রিকলচরগী কেন্দ্রগী মন্ত্রী শ্রী নরেন্দ্র তোমারনা ইদিবল ওইলস ব্যুজিনেস সমিত্তা নেস্নেল মিসন্দা পাংথোকপা একজিবিসন্দা চৎখি। একজিবিসন অসিনা অৱাং নোংপোক্কী মফমদা লৈরিবা মনা-মশিংগী পাক শনবা উৎকনি। ব্যুজিনেস সমিত অসিগী একজিবিসন অসিদা ওইল পাল্মগী মরুওইবা অমসুং আত্মনির্ভর ভারত অমসুং  আত্মনির্ভর অৱাং-নোংপোক মায়কৈদা খোঙথাং অমা উৎপনি।

*****