ਭਾਰਤ ਨੇ ਬੀਤੀ ਸ਼ਾਮ ਹੋਈ ਉੱਚ ਪੱਧਰੀ ਮੰਤਰੀ ਮੀਟਿੰਗ ਵਿੱਚ ਅੰਟਾਰਕਟਿਕਾ ਵਾਤਾਵਰਣ ਦੀ ਸੁਰੱਖਿਆ ਅਤੇ ਪੂਰਬੀ ਅੰਟਾਰਕਟਿਕਾ ਅਤੇ ਵੈਡਲ ਸਾਗਰ ਨੂੰ ਸਮੁੰਦਰੀ ਸੁਰੱਖਿਆ ਖੇਤਰਾਂ (ਐੱਮਪੀਏ) ਦੇ ਰੂਪ ਵਿੱਚ ਨਾਮਜ਼ਦ ਕਰਨ ਦੇ ਯੂਰਪੀ ਯੂਨੀਅਨ ਦੇ ਪ੍ਰਸਤਾਵ ਨੂੰ ਸਹਿ-ਪ੍ਰਯੋਜਿਤ ਕਰਨ ਲਈ ਸਮਰਥਨ ਦਿੱਤਾ ਹੈ।

ਕੇਂਦਰੀ ਵਿਗਿਆਨ ਅਤੇ ਤਕਨਾਲੋਜੀ ; ਪ੍ਰਿਥਵੀ ਵਿਗਿਆਨ; ਪੀਐੱਮਓ, ਪਰਸੋਨਲ, ਲੋਕ ਸ਼ਿਕਾਇਤਾਂ, ਪੈਨਸ਼ਨਾਂ, ਪਰਮਾਣੂ ਊਰਜਾ ਅਤੇ ਪੁਲਾੜ ਮੰਤਰੀ ਡਾ. ਜਿਤੇਂਦਰ ਸਿੰਘ ਨੇ ਇਸ ਦੀ ਪੁਸ਼ਟੀ ਯੂਰਪੀ ਯੂਨੀਅਨ ਦੇ ਵੱਖ -ਵੱਖ ਦੇਸ਼ਾਂ ਦੇ ਸੰਬੰਧਤ ਮੰਤਰੀਆਂ ਦੀ ਵਰਚੁਅਲ ਮੀਟਿੰਗ ਵਿੱਚ ਸੰਬੋਧਨ ਕਰਦੇ ਹੋਏ ਕੀਤੀ।

ਡਾਕਟਰ ਜਿਤੇਂਦਰ ਸਿੰਘ ਨੇ ਕਿਹਾ, "ਭਾਰਤ ਅੰਟਾਰਕਟਿਕਾ ਵਾਤਾਵਰਣ ਦੀ ਸੁਰੱਖਿਆ ਵਿੱਚ ਸਥਿਰਤਾ ਦਾ ਸਮਰਥਨ ਕਰਦਾ ਹੈ।" ਉਨ੍ਹਾਂ ਨੇ ਕਿਹਾ ਕਿ ਗੈਰ ਪ੍ਰਸਤਾਵਿਤ ਅਤੇ ਅਨਿਯਮਤ ਮੱਛੀਆਂ ਫੜਨ ਨੂੰ ਨਿਯਮਤ ਕਰਨ ਲਈ ਦੋ ਪ੍ਰਸਤਾਵਿਤ ਐੱਮਪੀਏ ਜ਼ਰੂਰੀ ਹਨ। ਉਨ੍ਹਾਂ ਨੇ ਅੰਟਾਰਕਟਿਕ ਸਮੁੰਦਰੀ ਜੀਵਣ ਸਰੋਤਾਂ (ਸੀਸੀਏਐੱਐੱਲਆਰ) ਦੇ ਮੈਂਬਰ ਦੇਸ਼ਾਂ ਵਲੋਂ ਸੰਭਾਲ ਲਈ ਕਮਿਸ਼ਨ ਨੂੰ ਅਪੀਲ ਕੀਤੀ ਕਿ ਉਹ ਇਹ ਸੁਨਿਸ਼ਚਿਤ ਕਰੇ ਕਿ ਭਾਰਤ ਭਵਿੱਖ ਵਿੱਚ ਇਨ੍ਹਾਂ ਐੱਮਪੀਏ ਦੇ ਨਿਰਮਾਣ, ਅਨੁਕੂਲਤਾ ਅਤੇ ਲਾਗੂ ਕਰਨ ਦੇ ਢੰਗਾਂ ਨਾਲ ਜੁੜਿਆ ਰਹੇ।

ਡਾਕਟਰ ਜਿਤੇਂਦਰ ਸਿੰਘ ਨੇ ਕਿਹਾ, ਪੂਰਬੀ ਅੰਟਾਰਕਟਿਕਾ ਅਤੇ ਵੇਡਲ ਸਾਗਰ ਨੂੰ ਐੱਮਪੀਏ ਵਜੋਂ ਨਾਮਜ਼ਦ ਕਰਨ ਦੇ ਪ੍ਰਸਤਾਵ ਨੂੰ ਪਹਿਲੀ ਵਾਰ 2020 ਵਿੱਚ ਸੀਸੀਏਐੱਮਐੱਲਆਰ ਦੇ ਸਾਹਮਣੇ ਰੱਖਿਆ ਗਿਆ ਸੀ, ਪਰ ਉਸ ਸਮੇਂ ਸਹਿਮਤੀ ਨਹੀਂ ਬਣ ਸਕੀ। ਉਨ੍ਹਾਂ ਕਿਹਾ, ਉਦੋਂ ਤੋਂ, ਆਸਟਰੇਲੀਆ, ਨਾਰਵੇ, ਉਰੂਗਵੇ ਅਤੇ ਯੂਨਾਈਟਿਡ ਕਿੰਗਡਮ ਪ੍ਰਸਤਾਵ ਦੇ ਸਹਿ-ਪ੍ਰਯੋਜਨ ਲਈ ਸਹਿਮਤ ਹੋਣ ਦੇ ਨਾਲ ਮਹੱਤਵਪੂਰਨ ਤਰੱਕੀ ਹੋਈ ਹੈ। ਮੰਤਰੀ ਨੇ ਅੱਗੇ ਕਿਹਾ ਕਿ ਅਕਤੂਬਰ 2021 ਦੇ ਅੰਤ ਤੱਕ, ਭਾਰਤ ਐੱਮਪੀਏ ਪ੍ਰਸਤਾਵਾਂ ਦੇ ਸਹਿ-ਪ੍ਰਯੋਜਨ ਵਿੱਚ ਇਨ੍ਹਾਂ ਦੇਸ਼ਾਂ ਨਾਲ ਸ਼ਾਮਲ ਹੋ ਜਾਵੇਗਾ।

ਡਾਕਟਰ ਜਿਤੇਂਦਰ ਸਿੰਘ ਨੇ ਯੂਰਪੀ ਯੂਨੀਅਨ ਦੇ ਡੈਲੀਗੇਟਾਂ ਨੂੰ ਦੱਸਿਆ ਕਿ ਭਾਰਤ ਨੇ ਦੱਖਣੀ ਹਿੰਦ ਮਹਾਸਾਗਰ ਖੇਤਰ ਰਾਹੀਂ 1981 ਵਿੱਚ ਅੰਟਾਰਕਟਿਕਾ ਮੁਹਿੰਮ ਸ਼ੁਰੂ ਕੀਤੀ ਸੀ ਅਤੇ ਉਦੋਂ ਤੋਂ ਹੁਣ ਤੱਕ ਕੋਈ ਪਿੱਛੇ ਨਹੀਂ ਹਟਿਆ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਤੱਕ, ਭਾਰਤ ਨੇ 2021-22 ਵਿੱਚ 41ਵੀਂ ਮੁਹਿੰਮ ਦੀ ਯੋਜਨਾਬੰਦੀ ਦੇ ਨਾਲ 40 ਮੁਹਿੰਮਾਂ ਪੂਰੀਆਂ ਕੀਤੀਆਂ ਹਨ ਅਤੇ ਅੱਗੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੇ ਅਧੀਨ ਭਾਰਤ ਨੇ ਆਪਣੇ ਅੰਟਾਰਕਟਿਕਾ ਦੇ ਦ੍ਰਿਸ਼ਟੀਕੋਣ ਨੂੰ ਕਾਇਮ ਰੱਖਣ ਵਿੱਚ ਆਪਣੇ ਹਿੱਤਾਂ ਨੂੰ ਮਜ਼ਬੂਤ ਕੀਤਾ ਹੈ।

ਜਿਤੇਂਦਰ ਸਿੰਘ ਨੇ ਕਿਹਾ, ਇਹ ਪਹਿਲਾ ਮੌਕਾ ਹੈ ਜਦੋਂ ਭਾਰਤ ਸੀਸੀਏਐੱਮਐੱਲਆਰ ਵਿੱਚ ਐੱਮਪੀਏ ਦੇ ਪ੍ਰਸਤਾਵ ਨੂੰ ਸਹਿ-ਪ੍ਰਯੋਜਿਤ ਕਰਨ ਅਤੇ ਅਰਜਨਟੀਨਾ, ਬ੍ਰਾਜ਼ੀਲ, ਚਿੱਲੀ, ਕੋਰੀਆ, ਨਿਊਜ਼ੀਲੈਂਡ, ਦੱਖਣੀ ਅਫਰੀਕਾ ਅਤੇ ਯੂਐੱਸਏ ਵਰਗੇ ਦੇਸ਼ਾਂ ਨਾਲ ਜੁੜਣ ਬਾਰੇ ਵਿਚਾਰ ਕਰ ਰਿਹਾ ਹੈ, ਜੋ ਕਿ ਸਰਗਰਮੀ ਨਾਲ ਐੱਮਪੀਏ ਪ੍ਰਸਤਾਵਾਂ ਦਾ ਸਮਰਥਨ ਕਰਨ ਬਾਰੇ ਵਿਚਾਰ ਕਰ ਰਹੇ ਹਨ। ਮੰਤਰੀ ਨੇ ਕਿਹਾ, ਐੱਮਪੀਏ ਪ੍ਰਸਤਾਵਾਂ ਨੂੰ ਸਮਰਥਨ ਦੇਣ ਅਤੇ ਸਹਿ-ਪ੍ਰਯੋਜਿਤ ਕਰਨ ਬਾਰੇ ਵਿਚਾਰ ਕਰਨ ਦਾ ਭਾਰਤ ਦਾ ਫੈਸਲਾ ਸੁਰੱਖਿਆ ਅਤੇ ਟਿਕਾਊ ਉਪਯੋਗਤਾ ਦੇ ਸਿਧਾਂਤਾਂ ਅਤੇ ਵਿਸ਼ਵਵਿਆਪੀ ਸਹਿਯੋਗ ਦੇ ਢਾਂਚਿਆਂ (ਜਿਵੇਂ ਕਿ ਟਿਕਾਊ ਵਿਕਾਸ ਦੇ ਟੀਚਿਆਂ, ਸੰਯੁਕਤ ਰਾਸ਼ਟਰ ਦੇ ਦਹਾਕਿਆਂ, ਜੀਵ-ਵਿਭਿੰਨਤਾ ਬਾਰੇ ਸੰਮੇਲਨ) ਦੀ ਪਾਲਣਾ ਦੁਆਰਾ ਚਲਾਇਆ ਜਾਂਦਾ ਹੈ, ਜਿਸ ਦੇ ਲਈ ਭਾਰਤ ਇੱਕ ਹਸਤਾਖ਼ਰ ਕਰਨ ਵਾਲਾ ਹੈ।

ਇਹ ਉੱਚ ਪੱਧਰੀ ਮੀਟਿੰਗ ਵਾਤਾਵਰਣ, ਸਮੁੰਦਰ ਅਤੇ ਮੱਛੀ ਪਾਲਣ ਬਾਰੇ ਯੂਰਪੀ ਯੂਨੀਅਨ ਦੇ ਕਮਿਸ਼ਨਰ ਵਰਜੀਨੀਜਸ ਸਿੰਕੇਵੀਨੀਅਸ ਵਲੋਂ ਵਰਚੂਅਲੀ ਆਯੋਜਿਤ ਕੀਤੀ ਗਈ ਸੀ।ਇਸ ਵਿੱਚ ਲਗਭਗ 18 ਦੇਸ਼ਾਂ ਦੇ ਮੰਤਰੀਆਂ, ਰਾਜਦੂਤਾਂ ਅਤੇ ਦੇਸ਼ ਦੇ ਕਮਿਸ਼ਨਰਾਂ ਨੇ ਹਿੱਸਾ ਲਿਆ। ਮੀਟਿੰਗ ਦਾ ਉਦੇਸ਼ ਐੱਮਪੀਏ ਪ੍ਰਸਤਾਵਾਂ ਦੇ ਸਹਿ-ਪ੍ਰਾਯੋਜਕਾਂ ਦੀ ਸੰਖਿਆ ਨੂੰ ਵਧਾਉਣਾ ਅਤੇ ਸੀਸੀਏਐੱਮਐੱਲਆਰ ਵਲੋਂ ਤੇਜ਼ੀ ਨਾਲ ਅਪਣਾਉਣ ਲਈ ਇੱਕ ਸਾਂਝੀ ਰਣਨੀਤੀ ਅਤੇ ਭਵਿੱਖ ਦੀਆਂ ਕਾਰਵਾਈਆਂ 'ਤੇ ਵਿਚਾਰ ਕਰਨਾ ਹੈ।

ਸੀਸੀਏਐੱਮਐੱਲਆਰ ਅੰਟਾਰਕਟਿਕਾ ਮੱਛੀ ਪਾਲਣ ਦਾ ਪ੍ਰਬੰਧਨ ਕਰਨ ਲਈ ਇੱਕ ਅੰਤਰਰਾਸ਼ਟਰੀ ਸੰਧੀ ਹੈ ਜੋ ਸਮੁੱਚੇ ਅੰਟਾਰਕਟਿਕਾ ਸਮੁੰਦਰੀ ਵਾਤਾਵਰਣ ਪ੍ਰਣਾਲੀ ਦੀ ਪ੍ਰਜਾਤੀਆਂ ਦੀ ਵਿਭਿੰਨਤਾ ਅਤੇ ਸਥਿਰਤਾ ਨੂੰ ਸੁਰੱਖਿਅਤ ਰੱਖਦੀ ਹੈ। ਸੀਸੀਏਐੱਮਐੱਲਆਰ ਅਪ੍ਰੈਲ 1982 ਵਿੱਚ ਲਾਗੂ ਹੋਇਆ ਸੀ। ਭਾਰਤ 1986 ਤੋਂ ਸੀਸੀਏਐੱਮਐੱਲਆਰ ਦਾ ਸਥਾਈ ਮੈਂਬਰ ਰਿਹਾ ਹੈ। ਸੀਸੀਏਐੱਮਐੱਲਆਰ ਨਾਲ ਸਬੰਧਤ ਕੰਮ ਭਾਰਤ ਵਿੱਚ ਪ੍ਰਿਥਵੀ ਵਿਗਿਆਨ ਮੰਤਰਾਲੇ ਵਲੋਂ ਇਸਦੇ ਸਬੰਧਤ ਦਫਤਰ, ਸੈਂਟਰ ਫਾਰ ਮਰੀਨ ਲਿਵਿੰਗ ਰਿਸੋਰਸਜ਼ ਐਂਡ ਈਕੋਲੋਜੀ (ਸੀਐੱਮਐੱਲਆਰਈ) ਕੋਚੀ, ਕੇਰਲ ਦੁਆਰਾ ਤਾਲਮੇਲ ਕੀਤਾ ਗਿਆ ਹੈ।

ਐੱਮਪੀਏ ਇੱਕ ਸਮੁੰਦਰੀ ਸੁਰੱਖਿਅਤ ਖੇਤਰ ਹੈ, ਜੋ ਇਸਦੇ ਸਾਰੇ ਜਾਂ ਇਸਦੇ ਕੁਦਰਤੀ ਸਰੋਤਾਂ ਦੇ ਕੁਝ ਹਿੱਸਿਆਂ ਦੀ ਸੁਰੱਖਿਆ ਪ੍ਰਦਾਨ ਕਰਦਾ ਹੈ। ਐੱਮਪੀਏ ਦੇ ਅੰਦਰ ਕੁਝ ਗਤੀਵਿਧੀਆਂ ਖਾਸ ਸੁਰੱਖਿਆ, ਨਿਵਾਸ ਸੁਰੱਖਿਆ, ਵਾਤਾਵਰਣ ਪ੍ਰਣਾਲੀ ਦੀ ਨਿਗਰਾਨੀ, ਜਾਂ ਮੱਛੀ ਪਾਲਣ ਪ੍ਰਬੰਧਨ ਦੇ ਉਦੇਸ਼ਾਂ ਨੂੰ ਪੂਰਾ ਕਰਨ ਲਈ ਸੀਮਤ ਜਾਂ ਵਰਜਿਤ ਹਨ। 2009 ਤੋਂ, ਸੀਸੀਏਐੱਮਐੱਲਆਰ ਦੇ ਮੈਂਬਰਾਂ ਨੇ ਦੱਖਣੀ ਮਹਾਸਾਗਰ ਦੇ ਵੱਖ ਵੱਖ ਖੇਤਰਾਂ ਲਈ ਐੱਮਪੀਏ ਲਈ ਪ੍ਰਸਤਾਵ ਤਿਆਰ ਕੀਤੇ ਹਨ। ਸੀਸੀਏਐੱਮਐੱਲਆਰ ਦੀ ਵਿਗਿਆਨਕ ਕਮੇਟੀ ਇਨ੍ਹਾਂ ਪ੍ਰਸਤਾਵਾਂ ਦੀ ਜਾਂਚ ਕਰਦੀ ਹੈ। ਸੀਸੀਏਐੱਮਐੱਲਆਰ ਦੇ ਮੈਂਬਰਾਂ ਦੇ ਉਨ੍ਹਾਂ ਦੇ ਸਹਿਮਤ ਹੋਣ ਤੋਂ ਬਾਅਦ, ਸੀਸੀਏਐੱਮਐੱਲਆਰ ਦੁਆਰਾ ਵਿਸਤ੍ਰਿਤ ਸੁਰੱਖਿਆ ਉਪਾਅ ਨਿਰਧਾਰਤ ਕੀਤੇ ਗਏ ਹਨ।

<> <> <> <> <>

ਐੱਸਐੱਨਸੀ/ਆਰਆਰ