আয়ুশকী রাজ্যগী মন্ত্রী দাঃ মুঞ্জপরা মহেন্দ্রভাইনা হায় মদুদি আয়ুশকী হিদাক লাংথকশিং অসিশু কোবিদ মতুংগী মরী লৈনবা হিরমশিংদা কান্নবগী খুদম ফংলি। মহাক্না মখা তানা হায় মদুদি কোরোনা লায়চৎ অসি হৌজিকশু লৈরি অমসুং মীপুম খুদিংমক মিকুপ-নাহুম শিংনা লৈবা মথৌ তারি অমদি কোবিদকী প্রোতোকোল ইনবা তাই।

আয়ুশ মিনিস্ত্রীগী মখাদা ওল ইন্দিয়া ইন্সতিত্যুৎ ওফ আয়ুর্বেদানা শিনবা ৱেবিনার অমদা মিনিস্তরনা নিংথৌকাবা নুমিৎতা কোবিদ-১৯ শিল লাংবদা আয়ুশ সিস্তেমগী থৌদাংগী মরমদা ৱা ঙাংখি। থৌরম অসি ‘অজাদী কা অমৃত মহোৎসব’ মখাদা চয়োলগী ওইবা থৌরম পরিংদা শিনবা মথং চহিদা পাংথোক্কদবা ভারতকী নিং-তম্বগী চহি ৭৫শুবা নিংশিং থৌরম পাংথোক্নবা অমনি।

শ্রী মুঞ্জপরানা হায় মদুদি আয়ুশ মিনিস্ত্রীনা কোবিদ-১৯ লান্থেংননবা মতম-মতমগী ওইবা হিরমশিং মতম চানা পীরি অমসুং  মীয়াম্না গীলোইগুম্বা হিদাক্তগী কান্নবা ফংলি। “আয়ুশ প্রাক্তিসতা ক্লিনিকেল ওইবা থিজিনবা কয়া অমা লৈরমগনি অমসুং সেক্তর অসিদা থিজিনবগী মথৌ তারি। আয়ুশতা থি-হুম্বা পাম্বা মীওইশিং আয়ুশ মিনিস্ত্রীনা তরাম্বা ওক্লি” হায়না আয়ুশ মিনিস্ত্রীনা হায়রি।  

ৱেবিনার অসিদা ৱা ঙাংলদুনা, আয়ুশ মিনিস্ত্রীগী জোইন্ত সেক্রেতরী দি. সেন্থিল পন্দিয়ন্না হায় মদুদি লৈবাক অসিনা কোবিদ-১৯ লায়চৎকী অহুমশুবা ৱেব লান্থেংননবা হোৎনরিঙৈদৈ, আয়ুশ মিনিস্ত্রীনা ব্লুপ্রিন্ত অমা শেম শারি। মহাক্না মখা তানা হায়খি মদুদি আয়ুশ সেক্তরগী ইনফ্রাস্ত্রকচরনা লৈবাক অসিদা লৈরিবা মীয়ামদা আয়ুশ সিস্তেমগী কান্নবা ফংনবা হোৎনরি।

অয়ুর্বেদাগী কান্নবশিং অমসুং কোবিদ-১৯ কেসশিংগী য়াম্ন কন্দবা অমসুং ময়ায় ওইরপ তৌবা আয়ুশকী অতৈ মশাশিং শন্দোক্না তাক্লদুনা ওল ইন্দিয়া ইন্সতিত্যুৎ ওফ আয়ুর্বেদাগী দাইরেক্তর, দাঃ তনুজা নেসরীনা হায় মদুদি ইন্সতিত্যুৎ অসিদা লিংখৎলিবা কোবিদ সেন্তরশিং অসিদা অনাবা ফগৎলকপগী চাং চাদা ৯৯ ওইরি। “কোবিদ সেন্তর অসিদা অনাবা ফগৎখিবা নত্তনা লায়েংলিবা মনুংদা থবক তৌরিবা দোক্তর, নর্সিং স্তাফ অমসুং অমসুং হোস্পিতালগী স্তাফ মনুং য়াওনা পুন্সি মাংখিবা লৈখিদ্রি। মসিগী চাউরবা মরমদি অয়ুশকী প্রোতোকোলননি। ঐ ইশামক আয়ুশকী হিদাক চাজৈ অমসুং চহি অনিদগী হকচাং নুঙাইনা লৈরক্লি,” হায়না মহাক্না হায়খি।  

এম.দি.এন.আই.ৱাই.গী দাইরেক্তর দাঃ ইশ্বর বসাবরাদ্দি, এন.সি.ঐচ.কী চেয়রমেন দাঃ অনিল খুরানা, সি.সি.আই.এস.এম.গী চেয়রমেন বাইদা জয়ান্ত দেব পুজারী, সি.সি.আই.এস.এম.গী দাইরেক্তর জেনেরেল এন. শ্রীকান্ত অমসুং ভাইস চাঞ্চেলর কয়ানা ৱেবিনার অসিদা শরুক য়াখি।

***

(Release ID: 1750960) Visitor Counter : 169