কোবিদ-১৯ শন্দোকপা য়েংশিন্ননবা কেরলা অমসুং মহারাস্ত্র রাজ্য সরকারশিংনা লৌখৎলিবা খোঙথাংশিং অদু য়েংশিন্ননবা ঙসি মফম অসিদা পাংথোকখিবা মীফম অমদা কেন্দ্রগী গৃহ সেক্রেতরীনা ভিদিও কনফরেন্সিংগী খুৎথাংদা থৌবুরেল ওইনা শরুক য়াখি৷

মীফম অদুদা, কেরলা অমসুং মহারাস্ত্রদা ওইরিবা কোবিদ-১৯গী ফিভম লান্থেংনরিবা অদুগী মতাংদা খন্ন-নৈনখি৷ লাইচৎ অসি লাকশিনবা ঙম্ননবা রাজ্য সরকারশিংনা লৌখৎলিবা খোঙথাংশিং অদু কেন্দ্রগী গৃহ সেক্রেতরীনা য়েংশিনখি অমসুং লাইচৎ শন্দোক্লিবগী চাং হেনগৎলক্লিবা অসি লাকশিন্নবা হোৎনবদা ঐখোয়না হেন্না-হেন্না হোৎনবা দরকার ওই হায়না খনখি৷ লাইচৎ অসি লাকশিন্নবা হোৎনবদা তোঙান তোঙানবা খোঙথাংশিং খুদম ওইনা হায়রবদা কন্ত্রেক ত্রেসিং, ভেক্সিনেসন দ্রাইব অমসুং কোবিদ এপ্রোপ্রিয়েত বিহেবিয়র ইন্দুনা লাইচৎ শন্দোকপগী চাং কা হেন্না ৱাংলিবা মফমশিং মতিক চানা য়েংশিনবা দরকার ওই৷ পোজিতিব ওইবগী চাং ৱাংলিবা মফমশিংদা নুমিদাং কার্ফ্যু থম্বা য়াব্রা হায়বা অদুসু রাজ্য সরকারশিংনা খঙদোক্কদবনি হায়না মহাক্না ফোংদোকখি৷

রাজ্য সরকারশিংনা মখোয় মখোয়গী ভেক্সিনেসন প্রোগ্রামশিং অদু মখা চত্থগদবনি হায়না খঙহনখ্রে অমসুং করিগুম্বা মতমদা, মখোয়না অহেনবা ভেক্সিনশিং দরকার ওইরকপা মতমদা ভেক্সিনশিং অদু অঙম্বা থাক্তা ফংহল্লগনি৷ অদুমওইনমক, ফংলিবা ভেক্সিন দোজশিং অসি মাংহন্দনা শিজিন্ননবা হোৎনগদবনি৷ ভেক্সিনেসন তৌবগা লোইননা কোবিদ এপ্রোপ্রিয়েত বিহেবিয়র ইনহন্নবা লেপ্পা লৈতনা পুক্নিং থৌগৎকদবনি অমসুং হরাউ কুহ্মৈগী মতমদা মী য়াম্না য়াম্না পুনবা য়াবা থৌরমশিং অসি পাংথোক্লোইদবনি৷ পোজিতিব ওইবগী চাং য়াম্না ৱাংনা লৈরিবা রাজ্য অনি অসিগী মফমশিংদা তেস্ত তৌবগী চাং শোইদনা হেনগৎকদবনি হায়না খঙহনখি৷ লাইচৎ শন্দোকপগী চেন অসি হেন্না ইফেক্তিব ওইনা কন্ত্রোল তৌবা ঙম্নবগীদমক ভাইরস শন্দোকপগী লেবেলশিং অদু নমথনবা লাক্কদৌরিবা থা খরা অসিদা হেন্না মীৎয়েং চংগদবনি৷

নিতি আয়োগকী মেম্বর(হেল্থ) দা. ভি.কে. পোল; হকশেল অমসুং য়াইফ য়ুম্বাল মন্ত্রালয়গী সেক্রেতরী, জি.ও.এল.; নেস্নেল সেন্তর ফোর কম্ম্যুনিকেবল দিজিজ(এন.সি.দি.সি.)কী দাইরেক্তর অমসুং কেরলা অমসুং মহারাস্ত্রগী দাইরেক্তর জেনেরেল ওফ পুলিস অমসুং চীফ সেক্রেতরীশিংনা থৌরম অসিদা শরুক য়াখি৷

******