ਹਰ ਭਾਰਤੀ ਪੂਰੇ ਜੋਸ਼ ਅਤੇ ਉਤਸ਼ਾਹ ਨਾਲ ਅੰਮ੍ਰਿਤ ਮਹੋਤਸਵ ਮਨਾਉਣ ਦੀ ਤਿਆਰੀ ਕਰ ਰਿਹਾ ਹੈ। ਪੂਰੇ ਦੇਸ਼ ਨੇ ਰਾਸ਼ਟਰੀ ਗਾਨ ਗਾ ਕੇ 'ਆਜ਼ਾਦੀ ਕਾ ਅਮ੍ਰਿਤ ਮਹੋਤਸਵ' ਵਿੱਚ ਖੁਸ਼ੀ ਨਾਲ ਭਾਗ ਲੈਣ ਦਾ ਐਲਾਨ ਕੀਤਾ ਹੈ। ਭਾਰਤ ਅਤੇ ਦੁਨੀਆ ਭਰ ਦੇ 1.5  ਕਰੋੜ ਤੋਂ ਵੱਧ ਭਾਰਤੀਆਂ ਨੇ ਇਸ ਵਿਸ਼ੇਸ਼ ਮੌਕੇ 'ਤੇ ਪਹਿਲਾਂ ਕਦੇ ਨਾ ਕੀਤੇ ਗਏ ਰਿਕਾਰਡ ਨੂੰ ਪ੍ਰਾਪਤ ਕਰਨ ਲਈ ਆਪਣੇ ਵਿਡੀਓਜ਼ ਨੂੰ ਰਿਕਾਰਡ ਅਤੇ ਅਪਲੋਡ ਕੀਤਾ ਹੈ। ਇਹ ਭਾਰਤ ਦੀ ਅੰਦਰੂਨੀ ਏਕਤਾ, ਤਾਕਤ ਅਤੇ ਸਦਭਾਵਨਾ ਦਾ ਪ੍ਰਮਾਣ ਹੈ।

25 ਜੁਲਾਈ ਨੂੰ, ਮਾਣਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਨੇ ਭਾਰਤ ਦੇ ਲੋਕਾਂ ਨੂੰ 'ਮਨ ਕੀ ਬਾਤ' ਵਿੱਚ ਇਕੱਠੇ ਰਾਸ਼ਟਰੀ ਗਾਨ ਗਾਉਣ ਦਾ ਸੱਦਾ ਦਿੱਤਾ ਸੀ। ਇੱਕ ਮੰਤਰ ਦੀ ਤਰ੍ਹਾਂ, ਇਹ ਸੱਦਾ ਪੱਤਰ ਭਾਰਤ ਦੇ ਲੋਕਾਂ ਦੇ ਦਿਲਾਂ ਅਤੇ ਦਿਮਾਗਾਂ ਵਿੱਚ ਫੈਲ ਗਿਆ,  ਜਿਨ੍ਹਾਂ ਨੇ ਮਿਲ ਕੇ ਹੁਣ ਇਤਿਹਾਸ ਅਤੇ ਇੱਕ ਅਜੇਤੂ ਰਿਕਾਰਡ ਬਣਾਇਆ ਹੈ।

ਭਾਰਤ ਸਰਕਾਰ ਦੇ ਸੱਭਿਆਚਾਰ ਮੰਤਰਾਲੇ ਨੇ 15 ਅਗਸਤ ਤੱਕ ਲੋਕਾਂ ਨੂੰ ਰਾਸ਼ਟਰੀ ਗਾਨ ਗਾਉਣ ਅਤੇ ਵੈਬਸਾਈਟ 'ਤੇ ਅਪਲੋਡ ਕਰਨ ਦੇ ਯੋਗ ਬਣਾਉਣ ਲਈ ਇੱਕ ਪ੍ਰੋਗਰਾਮ ਬਣਾਇਆ ਹੈ। ਜਿਵੇਂ ਕਿ ਰਿਕਾਰਡ ਤੋੜ ਸੰਖਿਆ ਤੋਂ ਸਪੱਸ਼ਟ ਹੈ, ਦੇਸ਼ ਦੇ ਸਾਰੇ  ਹਿੱਸਿਆਂ ਤੋਂ, ਸਾਰੇ ਵਰਗਾਂ ਦੇ ਲੋਕਾਂ ਨੇ ਇਸ ਵਿਲੱਖਣ ਪਹਿਲਕਦਮੀ ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ ਹੈ। ਬੱਚੇ, ਬਜ਼ੁਰਗ ਨਾਗਰਿਕ, ਨੌਜਵਾਨ, ਔਰਤ ਅਤੇ ਕੋਈ ਵੀ ਭਾਈਚਾਰਾ ਸਾਂਝੇ ਮਾਣ ਦੀ ਇਸ ਭਾਵਨਾ ਤੋਂ ਪਿੱਛੇ ਨਹੀਂ ਰਹਿਣਾ ਚਾਹੁੰਦਾ ਸੀ।

ਉੱਘੇ ਕਲਾਕਾਰ, ਮਸ਼ਹੂਰ ਵਿਦਵਾਨ, ਚੋਟੀ ਦੇ ਨੇਤਾ, ਸੀਨੀਅਰ ਅਧਿਕਾਰੀ, ਬਹਾਦਰ ਸਿਪਾਹੀ, ਮਸ਼ਹੂਰ ਖਿਡਾਰੀ,  ਕਿਸਾਨ,  ਮਜ਼ਦੂਰ, ਵਿਸ਼ੇਸ਼ ਲੋੜਾਂ ਵਾਲੇ ਲੋਕ, ਹਰ ਕੋਈ ਇਕੱਠੇ ਹੋਏ ਅਤੇ ਇੱਕ ਆਵਾਜ਼ ਵਿੱਚ ਰਾਸ਼ਟਰੀ ਗਾਨ ਗਾਇਆ। ਕਸ਼ਮੀਰ ਤੋਂ  ਕੰਨਿਆਕੁਮਾਰੀ, ਅਰੁਣਾਚਲ ਪ੍ਰਦੇਸ਼ ਤੋਂ ਕੱਛ ਤੱਕ, ਜਨ ਗਣ ਮਨ ਗਾਉਣ ਵਾਲੀਆਂ ਆਵਾਜ਼ਾਂ ਹਰ ਦਿਸ਼ਾ ਤੋਂ ਗੂੰਜ ਰਹੀਆਂ ਸਨ।

ਭਾਰਤ ਤੋਂ ਬਾਹਰ ਰਹਿ ਰਹੇ ਸਾਡੇ ਦੇਸ਼ਵਾਸੀਆਂ ਨੇ ਵੀ ਪੂਰੇ ਜੋਸ਼ ਅਤੇ ਉਤਸ਼ਾਹ ਨਾਲ ਹਿੱਸਾ ਲਿਆ ਅਤੇ ਇੱਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਉਨ੍ਹਾਂ ਦਾ ਦਿਲ ਹਮੇਸ਼ਾ ਭਾਰਤ ਦੀ ਇਸ ਧਰਤੀ ਵਿੱਚ ਵਸਿਆ ਹੋਇਆ ਹੈ। ਜਦੋਂ ਹਜ਼ਾਰਾਂ ਮੀਲ ਦੂਰ ਇੱਕ ਕੋਨੇ ਵਿੱਚ ਬੈਠੇ ਭਾਰਤੀਆਂ ਨੇ ਪ੍ਰਾਈਵੇਟ ਰੂਪ ਵਿੱਚ ਰਾਸ਼ਟਰੀ ਗੀਤ ਗਾਇਆ, ਉਨ੍ਹਾਂ ਦੀ ਅਵਾਜ਼ਾਂ ਨੇ ਭਾਰਤ ਦੇ ਇੱਕ ਸੌ ਛੱਤੀ ਕਰੋੜ ਨਾਗਰਿਕਾਂ ਦੇ ਮਾਣ ਨੂੰ ਰੂਪਮਾਨ ਕੀਤਾ। ਇਹ ਤੱਥ ਕਿ ਸਿਰਫ 21 ਦਿਨਾਂ ਵਿੱਚ 15 ਮਿਲੀਅਨ ਤੋਂ ਵੱਧ ਐਂਟਰੀਆਂ ਪ੍ਰਾਪਤ ਕੀਤੀਆਂ ਗਈਆਂ ਹਨ, ਜੋ ਆਪਣੇ ਆਪ ਵਿੱਚ ਜੀਉਂਦਾ ਜਾਗਦਾ ਸਬੂਤ ਹੈ ਕਿ ਜਦੋਂ ਭਾਰਤ ਦੇ ਲੋਕ ਕਿਸੇ ਚੀਜ਼ ਲਈ ਆਪਣਾ ਦਿਲ ਲਗਾਉਂਦੇ ਹਨ, ਤਾਂ ਕੋਈ ਵੀ ਟੀਚਾ ਮੁਸ਼ਕਲ ਜਾਂ ਪਹੁੰਚ ਤੋਂ ਬਾਹਰ ਨਹੀਂ ਹੁੰਦਾ ਹੈ।

ਰਾਸ਼ਟਰੀ ਗਾਨ ਸਾਡੇ ਮਾਣ ਦਾ ਪ੍ਰਤੀਕ ਹੈ। ਰਾਸ਼ਟਰੀ ਗਾਨ ਗਾਉਣ ਦੇ ਇਸ ਪ੍ਰੋਗਰਾਮ ਨੇ ਨਾ ਸਿਰਫ ਸਾਰਿਆਂ ਵਿੱਚ ਉਤਸ਼ਾਹ ਪੈਦਾ ਕੀਤਾ ਹੈ, ਬਲਕਿ ਪੂਰੇ ਵਿਸ਼ਵ ਨੂੰ ਭਾਰਤ ਦੀ ਮਜ਼ਬੂਤ ਏਕਤਾ ਦਾ ਸੁਨੇਹਾ ਵੀ ਮਿਲਿਆ ਹੈ। 

*****

ਐੱਨਬੀ/ਓਏ/ਯੂਡੀ