প্রধান মন্ত্রী, শ্রী নরেন্দ্র মোদীনা হায় মদুদি, লায়চৎ অসি লৈজরবসু, হদক্কী চহিগী অন্তরজাতি য়োগ নুমিৎকী থীম “য়োগ ফোর ৱেলনেস”না মীয়ামগী ৱাখলদা থাজবা হেনগৎলক্লি অমসুং মহাক্না লৈবাক খুদিং, সমাজ অমসুং মীপুম খুদিংগী হকচাং ফনা লৈনবা লৈরসনু হায়না নিজখ্রে অমসুং ঐখোয় অমগা অমগা পুনশিনবা অমসুং শক্তি হেনগৎহল্লগনি হায়না আসা তৌই। মহাক্না ঙসি ৭শুবা অন্তরজাতিগী য়োগ নুমিৎকী থৌরমদা ৱা ঙাংখি।   

প্রধান মন্ত্রীনা লায়চৎ মনুংদা য়োগনা লৌরিবা থৌদাংশিংগী মরমদা হায়খি। য়োগনা মসিগী অৱাবা তারবা পুংফম অসিদা মীয়ামদা শক্তি অমসুং ফিরেপগী লাকফম অমনি হায়না হায়খি। য়োগ নুমিৎ অসি লায়চৎ মনুং অসিদা লৈবাক অসিদা মশাগী চৎনবিদা য়াওদবগুম্না ইরায় লাইনা কাওথোকপা য়াই অদুবু মালেমগী ওইনা য়োগদা থৱায় য়াওবদি হেনগৎলক্লি হায়না মহাক্না হায়খি। য়োগনা মালেম অসিদা লায়চৎ অসিবু লান্থেংনবদা মীয়ামদা থাজবা অমসুং থৌনা পুনশিনবগী মতেং পীগনি। প্রধান মন্ত্রীনা মতৌ করম্না ফ্রন্তলাইন কোরোনা লান্মীশিংনা য়োগবু ঙাক্লৌ ওইনা শিজিন্নবা অমসুং মখোয়বু য়োগগী মতেংনা মশা কন্না লৈবা অমসুং মতৌ করম্না মীয়াম্না, দোক্তরশিং, নর্সশিংনা ভাইরস অসিদগী ঙাকথোক্নবা য়োগগী মতেং লৌরিবা অসি অমুক হন্না পনখি। এক্সপার্তশিংনা প্রানায়ামা অমসুং অনুলোম-ভিলোমনচিংবা অসিনা ঐখোয়গী রেস্পিরেতরী সিস্তেমদা মপাঙ্গল কনহল্লদুনা শ্বর হোনবগী শাজেলদা মরুওইবা পীরি হায়না মহাক্না হায়খি।

থিরুভাল্লুবারগী শক্নাইরবা তামিলগী মুনি পল্লদুনা প্রধান মন্ত্রীনা হায় মদুদি য়োগ অসি লায়নাশিং মরু ফংনা মুৎথৎনবা খুলায় অমনি। মালেম পুম্বনা য়োগগী লায়েং অসিদা থিজিন হুমজিনবা চৎথরিবা অসিদা মহাক্না অপেন্বা ফোংদোকখি। য়োগনা ইন্দ্রী ফগৎহনবা অসিদা নৈনরিবা অমসুং ওনলাইন ক্লাস মনুংদা অঙাংশিংনা য়োগ চৎথরিবা অসি মহাক্না পনখি। মসি অঙাংশিংনা কোরোনা লান্থেংননবা শেম-শারিবনি হায়না মহাক্না হায়খি।প্রধান মন্ত্রীনা য়োগগী মপুং ওইবা মওং মতৌগী মরুওইবা পীখি অমসুং মসি হকচাংগীখক্তা নত্তনা ৱাখলশু ফহল্লি হায়খি। য়োগনা ঐখোয়গী নুংগী ওইবা শক্তিবু খঙহন্দুনা ফত্তবা ৱাখল কয়াদগী ঙাকথোকই। য়োগগী অফবা মায়কৈদা মরুওইবা পীদুনা প্রধান মন্ত্রীনা হায়খি, “তোখাই তাবদগী পুনশিন্নবগী লম্বীদি য়োগনি‍। অমত্তা ওইবগী পান্দম ফংনবগী চুম্লে খঙলবা লম্বীদি য়োগনি”‍। হিরম অসিদা মহাক্না গুরুদেব রাবিন্দ্রনাথ তেগোর পল্লদুনা হায়খি “ঐখোয় ইশা কনানো হায়বগী পাউখুম অসি লাই অমসুং অতৈদগী তোখাই তাদুনা লৈবনা ফংবা ঙম্লোই, য়োগ অমসুং পুনশিনবগী মরমদা লেপ্পা নাইদনা খঙলবা মতমদা খঙগনি”। 

প্রধান মন্ত্রীনা হায় মদুদি ভারতনা মতম কয়াদগী চৎনরক্লিবা মন্ত্র ‘বাসুধাইবকুতুমবকম’ অসি মালেমনা য়াবা অমা ওইরে। ঐখোয় পুম্বনা অমগা-অমগা নুঙাই-য়াইফনবা থৌনিরি, করিগুম্বা মীওইবা জাতিদা শিংনরক্লবা য়োগনা তৎতনা মপুং ফাবা হকচাং ফবা পীগনি। “য়োগনা পুন্সিদা হেন্না নুঙাই-য়াইফবা পীগনি। ঐহাক্না থাজৈ, মীপুম খুদিংগী হকশেলগী চেকশিন থৌরাংদা য়োগনা ঙাকথোকপা লোয়ননা অফবা থৌদাং অমা পীদুনা লৈগনি” হায়না প্রধান মন্ত্রী মোদীনা হায়খি।

ভারত অমসুং দবল্যু.ঐচ.ও.না য়াম্না মরুওইবা খোঙথাং অমা ঙসি লৌখৎলে হায়না প্রধান মন্ত্রীনা লাওতোকখি। মালেম পুম্বনা এম.-য়োগ এপ ফংহন্দুনা লোল কয়া অমদা চপ মান্নবা য়োগ প্রোতোকোলদা য়ুম্ফম ওইবা য়োগ ত্রেনিংগী ভিদিও কয়া অমা ফংহল্লগনি। হায়রিবা অসি মতমগা চুনরবা তেক্নোলোজী অমসুং মমাংঙৈগী সাইন্সকী পুনশিনবগী য়াম্না চাওবা খুদম অমা ওইনা পীদুনা, প্রধান মন্ত্রীনা আসা তৌরি হায়না ফোংদোক্লি মদুদি এম.-য়োগ এপনা য়োগবু মালেম পুম্বদা শন্দোক্কনি অমসুং ‘ৱান ৱার্লদ ৱান হেলথ’ অসিগী হোৎনরিবা অসদা মতেং পীগনি।

গীতাগী ৱাহৈশিং পল্লদুনা প্রধান মন্ত্রীনা হায় মদুদি য়োগ অসিনা মীপুম খুদিংগী অমত্তা ওইরবা পাম্বৈনি হায়না য়োগগীদমক ঐখোয় পুন্না চৎমিন্নবা মথৌ তারে হায়খি। হৌরকফম অমসুং মনুং হকচিন্না লৌদ্রিঙৈদা য়োগ অসি মীপুম খুদিংদা য়ৌহনবা অসি মরু ওইরি। য়োগ অসি মীপুম খুদিংমক্তা য়ৌহন্নবা য়োগগী অচার্য়া অমসুং ঐখোয় পুম্বনা থবক অসিদা থৌদাং লৌগদবনি, হায়না প্রধান মন্ত্রীনা হায়খি।    

*****