ত্রাইবেল এফিয়র্স মন্ত্রালয়গী ত্রাইফেদনা অৱাং-নোংপোক্কী রাজ্য অনি, সিক্কিম অমসুং অরুনাচল প্রদেশকী রাজ্যগী তীম অমসুং ভি.দি.ভি.কে.শিংগা লোয়ননা ৱারী শাখ্রে। ৱারী শাখিবা অসি বন ধনগী খোঙথাংগী থবকশিং য়েংশিন্নবা পাংথোকপা রাজ্যগী থাক্কী ৱেবিনারগী শরুক অমনি। সিক্কিম অমসুং অরুনাচল প্রদেশনা খোঙথাং অসিদা খ্বাইদগী নৌনা য়াওরকপা অৱাং-নোংপোক্কী রাজ্যনি। রাজ্য অনিগী মীহুৎশিং (এস.আই.এ., এস.এন.এ. অমসুং ভি.দি.ভি.কে.সি.)না সিক্কিমগী ভি.দি.ভি.কে. ক্লস্তর ৮০ অমসুং অরুনাচল প্রদেশকী ভি.দি.ভি.কে. ক্লস্তর ৮৫দা মথংশিৎনা পুন্সিনগদবা ভি.দি.ভি.কে. ১২৫০ অমসুং ১৩৩০ লোঞ্চ তৌনবা শেম-শাবা লোইখ্রে।

ত্রাইফেদকী এম.দি., শ্রী প্রবির কৃষ্ণনা লাইচৎ মনুং অসিদা ত্রাইবেল মীয়ামগী তেক্ত-কায়দনবা থবক পায়খৎপগী ৱাফম্বু খন্নরবা মতুংদা মখোয়দা থবক পীবা অমসুং শেন্থোক লৈহনবদা তেংবাংগদবা এম.এফ.পি. স্কিম, বন ধন য়োজনাদা অমসুং অতোপ্পা পুন্সিনবা প্রোজেক্তশিংদা এম.এস.পি. চৎনহনবগী মথৌ তাবা অমসুং মরু ওইবগী ৱাফম কয়া নৌহৌননা পল্লদুনা ৱেবিনার অসি হৌদোকখি।

রাজ্য অনি অসিগী মীহুৎশিংনা মখোয়গী রাজ্যশিংদা এম.এফ.পি. স্কিম অমসুং বন ধন য়োজনাদা এম.এস.পি. চৎহনহনবগী মতাংদা অথুবা মতমদা মায় পাকপা কয়া ফংখিবগী হৌজিক ওইরিবা ফীভমগী মতাংদা পাউদমদুনা ৱেবিনার মখা চত্থখি। অরুনাচল প্রদেশতা ভি.দি.ভি.কে.সি. ৮৫ শকখঙলে অমসুং মখোয়বু অথুবা মতমদা অয়াবা পীনবগীদমক্তা পায়খৎকদবা থবক-থৌরমশিং শেম-শাদুনা লৈরে।

বন ধন য়োজনাগীদমক্তা সিক্কিমগী ওইনা লুপা লাখ ১২০০দি হান্ননা কায়থখ্রবনি। অপুনবা ভি.দি.ভি.কে.সি. ৮০বুসু খ্বাইদগী অথুবা মতমদা থবক হৌহন্নবা কন্না হোৎনরি। পান্দম অসি ফংনবগীদমক্তা মখা তানা পায়খৎপা খোঙথাং ওইনা, রাজ্য অনিগী স্তেৎ এজেন্সীশিংনা এম.এস.পি.দা পোৎ লৈনবা অমসুং ইনফ্রাস্ত্রকচর শেমগৎনবা শেম-শাবা হৌবা হায়না ৱারেপ লৌনখ্রে। ভি.দি.ভি.কে.সি. খুদিংগী খোংথাং ৫গী থৌরাং অমসু শেম্লগনি। অহানবা খোঙথাংদা ভি.দি.ভি.কে.সি. খুদিংগী ওইনা এম.এফ.পি.এস.তা লৈগদবা পোৎলমশিং মশক খঙদোকপগা লোয়ননা পোৎ লৈফম অমসুং থমফম য়াওনা তঙাই ফদবা ইনফ্রাস্ত্রকচরশিং শেমগৎনবা থৌরাং য়াত্তুনা মপাঙ্গল লৈহনবগী থৌওং য়াওরি। অনিশুবা খোংথাংনা লোকেল এন.জি.ও. নত্ত্রগা এন.আর.এল.এম. ওফিসরশিংবু, মমাংদা পীখ্রবা কাংলোনগী মতুং ইন্না মেন্তর ওইনা খন্দুনা ক্লস্তর একাউন্ত খুদিংদা ক্লাস্তর অমমমদা লুপা লাখ ১০গী শেনফম পীথোকপগী ৱারোল পল্লি। খোঙথাং অহুমদা বেঙ্ক একাউন্ত হাংদোকপা, ভি.দি.ভি.কে. ক্লস্তর অমসুং ভি.দি.ভি.কে. মশক তাক্নবা সাইনেজ অমসুং বোর্দ খিনবা য়াওনা ভেল্যু এদিসন অমসুং অতোপ্পা থবকশিং পায়খৎনবা ক্লস্তর খুদিংগী ব্যুজিনেস প্লান শেম্বগী মথৌ তাগনি। খোঙথাং ৪না ক্লস্তর খুদিংবু প্রদক্সন, প্লান্নিং, ব্রান্দিং, পেকেজিং অমসুং মখোয়গী খনগৎলকপা পোত্থোকশিংবু ব্যুজিনেস প্লানগী মতুং ইন্না য়োনবগী থৌরাং য়াৎপা অমসুং থবক ওইনা পাংথোকপগী থৌওং ওইগনি। অদুগা, খোঙথাং ৫দনা ই.এস.দি.পি., এস.এফ.য়ু.আর.তি.আই. অমসুং তি.আর.আই.এফ.ও.ও.দি. স্কিমশিং অসিবু প্রোগ্রাম অসিগী পাক চাউবা হেনগৎহন্নবগীদমক্তা মরী লৈনবা ক্লস্তরশিংদা তপ্না-তপ্না পুন্সিল্লক্কনি।

ৱেবিনার অসিগী মখা তারকপদা রাজ্যশিংগী তীম নত্ত্রগা বন ধন কেন্দ্রা নত্ত্রগা ক্লস্তরশিংগী মীহুৎশিংগী মাইকৈদগী হীরম অসিগা মরী লৈনবা থৌওংশিংদা খঙদবা য়াওবশিংগী মতাংদা নৈনবদা মিৎয়েং চঙখি। ৱেবিনার অসিদা য়ুনিসেফকী মীহুৎশিংসু ভি.দি.ভি.কে.গী মেম্বরশিংদা কোবিদ মনুংদা তেক্ত-কায়দনা থবক পাংথোকপগী মতাংদা পাউতাক পীনবা শরু য়াখি। মসিনা মফমশিং অসিদা লৈরিবা মীওইগী স্কিল সেৎ অমসুং লোকেল এসেৎ বেজতা য়ুম্ফম ওইরগা শাহৌ লৌনবগীদমক্তা রাজ্যশিং অসিগী এস্পিরেস্নেল অমসুং মনুং-হঞ্জিনবা মফমশিংদা মতিক চাবা গেপ ফন্দিং তৌবা ওইনা মথক্তা পনখ্রিবা থবক খুদিংগী গ্রান্ততা মখা পোল্লিবা অহেনবা ত্রাইবেল ইমুংশিংদা তুং কোইনা য়াইফনা লৈবগী খুদোংচাবা পীগনি।

মে ২৮, ২০২১ ফাওবদা লাক্কদৌরিবা চয়োল অনি অসিদা লেমহৌরিবা পার্ত্নর স্তেৎশিংগী তোপ ওফিসিএলশিংগীদমক্তা লৈবাক শিনবা থুংবগী ওইনা ৱেবিনার কয়া অমা পাংথোক্নবা থৌরাং য়াত্তুনা লৈরে।

মেকানিজম ফোর মার্কেতিং ওফ মাইনর ফোরেস্ত প্রোদ্যুস (এম.এফ.পি.) অমসুং মসিগী কম্পোনেন্ত ওইরিবা, বন ধন ত্রাইবেল স্তার্ত-অপ অসি ত্রাইবেল মীয়ামগী পুন্সি মহিং অমসুং শেন্দান লম্বী শেম্নবগীদমক্তা ত্রাইবেল এফিয়র্স মন্ত্রালয়গী ত্রাইফেদনা পায়খৎপা খোঙথাং অমনি। ইং ২০০৫গী ফোরেস্ত রাইৎ এক্তনা মথৌ হাপ্পা ত্রাইবেল এফিয়র্স মন্ত্রালয়গী ফ্লেগশিপ স্কিম ওইরিবা এম.এস.পি. নত্ত্রগা এম.এফ.এস.পি. স্কিম অসিনা উমংগী পোত্থোকশিংবু ত্রাইবেল গেদররশিংদা মখোয়না মরক্তা লৈবা মীওইদা য়োনবদা ফংবা মমলদগী শরুক অহুমগী চাং হেন্না শেন্দোং ফংহন্নবা পান্দম থম্লি।

বন ধন ত্রাইবেল স্তার্ত-অপ অসি উমংদা মখা পোনবা ত্রাইবেল মীওইশিংগী তুং কোইনা চৎপা পুন্সি মহিং অমা লৈহন্নবগীদমক্তা বন ধন কেন্দ্রা কয়া লিংখত্তুনা মাইনর ফোরেস্ত প্রোদ্যুসশিংবু ভেল্যু এদিসন, ব্রান্দিং তৌবা অমসুং য়োনবগী প্রোগ্রাম অমনি। অচম্বা বন ধন বিকাস কেন্দ্রা অমদা ত্রাইবেল মেম্বর ২০ লৈগনি। অসিগুম্বা বন ধন বিকাস কেন্দ্রা ১৫না বন ধন বিকাস ক্লস্তর অমা শেম্মি। বন ধন বিকাস ক্লস্তর (ভি.দি.ভি.কে.সি.)না বন ধন কেন্দ্রশিংদা ওন্তোপ্রিনর্শিপ ওইবগী খুদোংচাবগা লোয়ননা পাকথোক-চাউথোকপা য়াবা শেন্মিৎলোন, পুন্সি মহিং অমসুং কৈথেলগা মরী লৈনবগী কান্নবা কয়া পী।

স্কিমশিং অসিনা ত্রাইবেলশিংদা মখোয়গী শেন্থোক অমসুং থবক তৌবগী ফীভম ফগৎহন্নবা চাউরবা খুদোংচাবা কয়া পীরি। মসিনা থবক ওইনা পাংথোকপদগী ফংলিবা কান্নবশিং অসি মখা তাহন্দুনা অমসুং মথংগী থাক্তা পুনবগীদমক্তা, বন ধন য়োজনাবু এম.এফ.পি.গী এম.এস.পি.গা পুন্সিনবগী থৌরাংসু য়াত্তুনা লৈরে। মসি পাংথোকপগী পাম্বৈ অমদি বন ধন য়োজনাবু ইন্তর্প্রাইস মোদেলগা পুন্সিন্নবগী খুত্থাংদনিঃ  প্রোসেসিংদগী এস.এফ.য়ু.আর.তি.আই. (স্কিম ওফ ফন্দ ফোর রিজেনেরেসন ওফ ত্রেদিস্নেল ইন্দস্ত্রীজ) অমসুং তি.আর.আই.এফ.ও.ও.দি.গী মখাদা ক্লস্তর দিভেলপমেন্ত তৌবা।

হন্দক্কী থা অসিদা পাংথোক্লিবা ৱেবিনারশিং অসি স্তেৎ ইমপ্লিমেন্তিং এজেন্সীশিং অমসুং অতোপ্পা স্তেকহোলদরশিংগা নক্নহন্নবা, য়েংশিন্নবা অমসুং মশাগী থবকশিং চুম্থোকচনবা খুদোংচাবা অমনি অমসুং স্কিমশিং অসিবু নীংথিজনা পাংথোকপদা ফংগদবা কান্নবশিং অসি ত্রাইবেল মীয়াম্না লৌবা য়াগনি।

থৌরাং য়াৎলিবশিং অসিবু নীংথিজনা থবক্তা মায়-পাক্না ওন্থোকপগা লোয়ননা ত্রাইফেদনা ত্রাইবেল ইকোসীস্তেম অসিবু শেমদোক্নবা অমসুং লৈবাক শিনবা থুংবগী ত্রাইবেলশিংগী মফমদা অমুলগুম্বা ইহৌ অমা পুরক্নবা কন্না হোৎনরি।

******

(Release ID: 1719058) Visitor Counter : 169