କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ହର୍ଷ ବର୍ଦ୍ଧନ ଆଜି ଓଡ଼ିଶା ସମେତ ଆଠଟି ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶର ସ୍ବାସ୍ଥ୍ୟ ମନ୍ତ୍ରୀ, ପ୍ରମୁଖ ଶାସନ ସଚିବ/ଅତିରିକ୍ତ ମୁଖ୍ୟ ସଚିବମାନଙ୍କ ସହିତ ଆଲୋଚନା କରିଛନ୍ତି। ଏହି ଅବସରରେ କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଅଶ୍ବିନୀ କୁମାର ଚୌବେ ଉପସ୍ଥିତ ଥିଲେ। ଏହି ରାଜ୍ୟ/କେନ୍ଦ୍ରଶାସିତ ପ୍ରଦେଶଗୁଡ଼ିକରେ ଦୈନିକ ସଂକ୍ରମଣ, ଅଧିକ ମୃତ୍ୟୁହାର ରହିଥିବା ବେଳେ ପଜିଟିଭିଟି ହାର ମଧ୍ୟ ବୃଦ୍ଧି ପାଇବା ସହିତ ଅଧିକ ରହୁଛି।

ଏସବୁ ରାଜ୍ୟ ରାଜ୍ୟଗୁଡ଼ିକ ହେଲେ ଓଡ଼ିଶା, ଉତ୍ତରାଖଣ୍ଡ, ହରିୟାଣା, ପଞ୍ଜାବ, ବିହାର, ଝାଡ଼ଖଣ୍ଡ, ଓଡ଼ିଶା ଓ ତେଲଙ୍ଗାନା ସହିତ ଜମ୍ମୁ ଓ କଶ୍ମୀର କେନ୍ଦ୍ର ଶାସିତ ପ୍ରଦେଶ। ବୈଠକରେ ଓଡ଼ିଶାର ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସ, ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ତିରଥ ସିଂ ରାଓ୍ବତ, ହରିୟାଣା ସ୍ବାସ୍ଥ୍ୟ ମନ୍ତ୍ରୀ ଅନିଲ ଭିଜ, ପଞ୍ଜାବ ସ୍ବାସ୍ଥ୍ୟ ମନ୍ତ୍ରୀ ବଲବିର ସିଂ ସିଦ୍ଧୁ, ଝାଡ଼ଖଣ୍ଡ ସ୍ବାସ୍ଥ୍ୟ ମନ୍ତ୍ରୀ ବନ୍ନା ଗୁପ୍ତା, ବିହାର ସ୍ବାସ୍ଥ୍ୟ ମନ୍ତ୍ରୀ ମଙ୍ଗଲ ପାଣ୍ଡେ ଭର୍ଚୁଆଲ ମାଧ୍ୟମରେ ଅଂଶଗ୍ରହଣ କରିଥିଲେ।

କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଏହିସବୁ ରାଜ୍ୟ/କେନ୍ଦ୍ରଶାସିତ ପ୍ରଦେଶରେ କୋଭିଡ ସଂକ୍ରମଣ ବୃଦ୍ଧି ପାଇବା ସମ୍ପର୍କରେ ଆଲୋକପାତ କରିବା ସହିତ ଚିକିତ୍ସା ଭିତ୍ତିଭୂମି ଉପରେ ପଡ଼ୁଥିବା ଚାପ ଉପରେ ଧ୍ୟାନ ଆକର୍ଷଣ କରିଥିଲେ। ତେବେ ମହାମାରୀ ମୁକାବିଲା ସହିତ ଜନସାଧାରଣଙ୍କ କଲ୍ୟାଣ ସୁନିଶ୍ଚିତ କରୁଥିବାରୁ ସେ ରାଜ୍ୟ ପ୍ରଶାସନର ସମର୍ପଣ ଓ ଧୈର୍ଯ୍ୟର ପ୍ରଶଂସା କରିଥିଲେ। ସେ କହିଥିଲେ ଯଦିଓ ଗତ 24 ଘଣ୍ଟା ମଧ୍ୟରେ 3.48 ଲକ୍ଷ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି, ତଥାପି ମୋଟ ସକ୍ରିୟ ସଂକ୍ରମିତଙ୍କ ସଂଖ୍ୟାରୁ 11,122 ସଂଖ୍ୟକ ସଂକ୍ରମିତ ହ୍ରାସ ପାଇଛନ୍ତି। ଲଗାତାର ଦ୍ବିତୀୟ ଦିନ ପାଇଁ ସକ୍ରିୟ ସଂକ୍ରମିତଙ୍କ ସଂଖ୍ୟାରେ ହ୍ରାସ ଦେଖିବାକୁ ମିଳିଛି। ସେ କୋଭିଡ ଉପଯୁକ୍ତ ବ୍ୟବହାର ଏବଂ ବର୍ତ୍ତମାନର ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି କଠୋରତାର ସହିତ କଣ୍ଟେନମେଣ୍ଟ ଲାଗୁ କରିବା ଉପରେ ଗୁରୁତ୍ବାରୋପ କରିଥିଲେ।

ଟିକାକରଣ ଅଭିଯାନର ଗୁରୁତ୍ବ ଉପରେ ଆଲୋକପାତ କରି ମନ୍ତ୍ରୀ କହିଥିଲେ, କୋଭିଡ-19 ବିରୋଧରେ ଟିକାକରଣ ହେଉଛି ଆମର ସବୁଠୁ ବଡ଼ ଅସ୍ତ୍ର। 114 ଦିନ ମଧ୍ୟରେ 17 କୋଟି ଟିକା ପ୍ରଦାନ କରି ଭାରତର ବିଶ୍ବର ଦ୍ରୁତତମ ରାଷ୍ଟ୍ର ହୋଇପାରିଛି ବୋଲି ସେ ଉଲ୍ଲେଖ କରିଥିଲେ। ସେ ଏହି ଅବସରରେ କହିଥିଲେ ଯେ 13.66 କୋଟି ଲୋକ ପ୍ରଥମ ଡୋଜ, 3.86 କୋଟି ଲୋକଙ୍କୁ ଦ୍ବିତୀୟ ଡୋଜ୍ ଦିଆଯାଇସାରିଛି। ତେବେ ଆମେ ଦ୍ବିତୀୟ ଡୋଜ ଟିକାକରଣ ଉପରେ ଜୋର ଦେବା ଗୁରୁତ୍ବପୂର୍ଣ୍ଣ। ରାଜ୍ୟଗୁଡ଼ିକ ଦ୍ବିତୀୟ ଡୋଜ ଟିକା ଦେବା ଲାଗି 70% ଟିକା ଉପଯୋଗ କରିବା ସହିତ 30% ପ୍ରଥମ ଡୋଜ ପାଇଁ ସଂରକ୍ଷିତ କରିବା ଉପରେ ସେ ଜୋର ଦେଇଥିଲେ।

ସ୍ବାସ୍ଥ୍ୟମନ୍ତ୍ରୀ କହିଥିଲେ ଯେ ଟିକା ଉତ୍ପାଦନକାରୀଙ୍କ ଦ୍ବାରା ରାଜ୍ୟ ସରକାର ଓ ଘରୋଇ ଡାକ୍ତରଖାନା ପାଇଁ ପ୍ରତି ମାସରେ 50% ଟିକା ଡୋଜ ଉପଲବ୍ଧ କରାଯାଉଛି। ଭାରତ ସରକାର ନିଜର ଅଂଶ ଭାବେ 50% ଟିକା କ୍ରୟ ଜାରି ରଖିଛନ୍ତି। ଏହି ଟିକା ପୂର୍ବ ପରି ରାଜ୍ୟଗୁଡ଼ିକୁ ନିଃଶୁଳ୍କ ଉପଲବ୍ଧ କରାଯିବ।

ଦେଶରେ ଟିକା ଉତ୍ପାଦନ ବୃଦ୍ଧି କରିବା ନିମନ୍ତେ ବ୍ୟାପକ ପଦକ୍ଷେପ ଗ୍ରହଣ କରାଯାଉଥିବା ଡ. ହର୍ଷ ବର୍ଦ୍ଧନ ସୂଚନା ଦେଇଥିଲେ। ବିଦେଶରେ ବିକଶିତ ଓ ଉତ୍ପାଦିତ ହେଉଥିବା ଟିକା ଯେଉଁଗୁଡ଼ିକ ୟୁଏସଏଫଡିଏ, ଇଏମଏ, ୟୁକେ ଏମଏଚଆରଏ, ପିଏମଡିଏ ଜାପାନ ଦ୍ବାରା ସୀମିତ ଉପଯୋଗ ନିମନ୍ତେ ଜରୁରିକାଳୀନ ମଞ୍ଜୁରି ମିଳିଛି କିମ୍ବା ଡବ୍ଲୁଏଚଓ ଦ୍ବାରା ଜରୁରିକାଳୀନ ଉପଯୋଗ ତାଲିକାରେ ସାମିଲ କରାଯାଇଛି ସେଗୁଡ଼ିକୁ ଭାରତରେ ଜରୁରିକାଳୀନ ଉପଯୋଗ ନିମନ୍ତେ ମଞ୍ଜୁରି ମିଳିପାରେ ବୋଲି ଡ. ହର୍ଷବର୍ଦ୍ଧନ କହିଥିଲେ। ଟିକା ଉତ୍ପାଦନକାରୀମାନଙ୍କର ଉତ୍ପାଦନ କ୍ଷମତା ବୃଦ୍ଧି କରାଯାଉଛି ଏହା 2021 ମେ ସୁଦ୍ଧା 8କୋଟି ଡୋଜ ଏବଂ ଜୁନ ସୁଦ୍ଧା 9 କୋଟି ଡୋଜରେ ପହଞ୍ଚିବ ।

ଏନସିଡିସି ନିର୍ଦ୍ଦେଶକ ଡ. ସୁଜିତ କେ ସିଂ ରାଜ୍ୟଗୁଡ଼ିକରେ କୋଭିଡ ବୃଦ୍ଧି ଦରର ଏକ ବିଶ୍ଳେଷଣ ଉପସ୍ଥାପନ କରିଥିଲେ। ଉପସହରାଞ୍ଚଳ ଏବଂ ଗ୍ରାମାଞ୍ଚଳ କ୍ଷେତ୍ରରେ ଟେଷ୍ଟିଂ ଓ ଟିକାକରଣ ଉପରେ ସେ ଜୋର ଦେଇଥିଲେ। ସେ କହିଥିଲେ ଯେ କୋଭିଡର ଯେକୌଣସି ଭାରିଆଣ୍ଟ ହେଉ ପଛେ ପ୍ରସ୍ତୁତି ପଦକ୍ଷେପ ଏବଂ ସୁରକ୍ଷା ସମାନ ରହିଛି। ଟେଷ୍ଟିଂ ଓ ଟିକାକରଣ ନିମନ୍ତେ ଚିକିତ୍ସା ଭିତ୍ତିଭୂମି ବଢ଼ାଇବା ଲାଗି ସେ ରାଜ୍ୟଗୁଡ଼ିକୁ ନିବେଦନ କରିଥିଲେ।

ଏନଏଚଏମର ଏଏସ ଆଣ୍ଡ ଏମଡି ବନ୍ଦନା ଗୁର୍ଣ୍ଣାନୀ, ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳର ଅତିରିକ୍ତ ସଚିବ (ସ୍ବାସ୍ଥ୍ୟ) ଆରତୀ ଆହୁଜାଙ୍କ ସମେତ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶର ପ୍ରମୁଖ ସଚିବ (ସ୍ବାସ୍ଥ୍ୟ), ଅତିରିକ୍ତ ମୁଖ୍ୟ ଶାସନ ସଚିବ (ସ୍ବାସ୍ଥ୍ୟ) ଓ ସମ୍ପୃକ୍ତ ରାଜ୍ୟ/କେନ୍ଦ୍ରଶାସିତ ପ୍ରଦେଶର ନିରୀକ୍ଷଣ ଅଧିକାରୀମାନେ ବୈଠକରେ ଅଂଶଗ୍ରହଣ କରିଥିଲେ।

********

P.S