نئی دہلی،  6/اپریل2021 ۔ خوراک اور عوامی نظام تقسیم و صارفین امور، ریلویز اور صنعت و تجارت کے مرکزی وزیر جناب پیوش گوئل نے آج سینٹرل ویئر ہاؤس کارپوریشن کی جدید کاری منصوبے کا جائزہ لیا۔ اس جائزہ میٹنگ کے دوران جناب گوئل نے کہا کہ سی ڈبلیو سی کو 2023 کے آخر تک ذخیرے کی اپنی صلاحیت دوگنی کرنی چاہئے اور مالی سال 2024-25 تک 10 ہزار کروڑ روپئے کا ٹرن اوور حاصل کرنا چاہئے۔ فی الحال سی ڈبلیو سی کے ذخیرے کی صلاحیت 125 ایل ایم ٹی ہے۔

اس جائزہ میٹنگ میں جناب گوئل نے کہا کہ ویئر ہاؤسز کے ٹیرف کو معقول بنانے اور ویئر ہاؤسز کے قیام کا کام نوکر شاہی کی مداخلت کے بغیر سی ڈبلیو سی کے ذریعے آزادانہ طریقے سے کیا جانا چاہئے۔ انھوں نے آگے کہا کہ آپریشنز سے متعلق فیصلے کرنے کا زیادہ سے زیادہ اختیار سی ڈبلیو سی کو سونپ دیا جانا چاہئے۔ وزیر موصوف نے سی ڈبلیو سی کو ترجیح کی بنیاد پر ملک میں کولڈ چین اسٹوریج کی تعمیر پر بھی توجہ دینے کے لئے کہا۔ اس کے علاوہ انھوں نے سی ڈبلیو سی کو ہدایت دی کہ وہ اپنے سبھی گوداموں میں مستقل طور پر آگ، زلزلہ اور حادثات کے لئے سیفٹی آڈٹ کریں۔

جناب گوئل نے مزید کہا کہ سی ڈبلیو سی کو پورے ملک میں گیہوں اور چاول کے ذخیرے کے لئے سائیلوس کی تعمیر کرنی چاہئے، جس سے ملک میں زیادہ سے زیادہ اناجوں کا زیادہ سے زیادہ وقت تک کے لئے ذخیرہ کیا جاسکے۔

جناب گوئل نے کہا کہ سی ڈبلیو سی کو نیفیڈ کے ساتھ مل کر پیاز، آلو اور ٹماٹر کے ذخیرے کے لئے زیادہ کولڈ چین اسٹوریج کی تعمیر کرنی چاہئے۔ وزیر موصوف نے مشورہ دیا کہ سی ڈبلیو سی کو اپنے سبھی 423 ویئر ہاؤسز کے لئے ایک ماسٹر پلان تیار کرنا چاہئے۔ دوسری طرف سی ڈبلیو سی کو زرعی پیداوار کے لئے ویئر ہاؤس / اسٹوریج کے درمیان خلا کا جائزہ لینا چاہئے، اور اس کے مطابق آرکیٹکٹ اور ماہرین کی مدد سے منصوبہ سازی کرنی چاہئے۔

وزیر موصوف نے مزید کہا کہ سی ڈبلیو سی کو سبھی حصص داروں یعنی ملازمین، خریداروں، اسٹاف اور ٹرک ڈرائیوروں کی دیکھ بھال کے لئے مشن موڈ میں کام کرنا چاہئے۔

انھوں نے کہا کہ سبھی سی ڈبلیو سی ویئر ہاؤسز میں صاف ستھرے ماحول میں جدید اور آسانی سے قابل رسائی سہولتیں جیسے مرد و خواتین ورکروں، خریداروں، ڈرائیوروں اور دویانگوں  کے لئے بیت الخلاء، معقول طریقے کا ویٹنگ روم/ ریسٹ روم، ورکر شیڈ، پینے کے پانی کی سہولت اور دیگر بنیادی سہولتیں ضرور دستیاب  ہونی چاہئے۔

******

ش ح۔ م م۔ م ر

U-NO. 3614

11.04.2021