হৌখিবা ফেব্রুৱারি ২৬, ২০২১দা মীখলগী মতম লাউথোকখিবা অসাম, কেরলা, পুদুচেরি, তামিল নাদু অমসুং নোংচুপ বঙ্গালগী বিধান সভাশিংগী মীখলশিংদা মথৌ পাংথোক্কদবা ওবজার্ভরশিংগী ওইবা অতেনবা মীফম অমা ঙসি ইলেক্সন কম্মিসন ওফ ইন্দিয়ানা পাংথোকখ্রে। মীফম অদুদা ওবজার্ভর ১৬৫০ হকথেংন্না শরুক য়াখি অমসুং অথাপ্পা মফমশিংদগী ওবজার্ভর ১২০ হেন্না ভর্চুএল ওইনা শরুক য়াখি। আই.এ.এস, আই.পি.এস, আই.আর.এস অমসুং অতোপ্পা সেন্ত্রেল সর্বিসশিংগী ওফিসারশিং জেনেরেল, পুলিস অমসুং এক্সপেন্দিচর ওবজার্ভরশিং ওইনা শীজিন্নগনি।

ওবজার্ভরশিংদা ৱা ঙাংবদা চীফ ইলেক্সন কম্মিসন্নর শ্রী অরোরানা হায়খি ওবজার্ভরশিং অসি ভারতকী গনতন্ত্রদা মরুওইবা লমজিং মৈরা পায়বশিংগী মনুংদা অমনি। সেপ্তেম্বর ২০১৭দগী হৌনা ই.সি.আইদা মহাক্কী মতম মনুংদা, বিধান সভা মীখল ১৪ অমসুং ২০১৯গী লোক সভা মীখল পাংথোকখ্রে অমসুং মীখলশিং পাংথোকপদা ওবজার্ভরশিংনা মরুওইবা থৌদাং অমা লৌরি। কোবিদ-১৯ লাইচৎ মনুংদা বিহারগী সি.ই.ও অমসুং দি.ই.ওশিংনা পাংথোকখিবা শিংথানিঙাই ওইরবা থবকশিং থাগৎলদুনা শ্রী অরোরানা হায়খি ভারতকী মীখলশিংগী পুৱারিদা বিহার বিধান সভাগী মীখলশিংনা অচৌবা অওনবা অমা পুরকখি। বিহারগী মমাঙগী বিধান সভাগী মীখলশিং অমসুং লোক সভাগী মীখলশিংদগী হেন্না ভোত্তরশিং শরুক য়াখি।

শ্রী অরোরানা হায়খি ফিল্দ ওফিসারশিং অমসুং ই.সি.আইনা পুন্না থবক তৌমিন্নবা মতমদা মীখলশিং মাইপাক্না পাংথোকপা ঙম্মী অমসুং ওবজার্ভরশিং অমসুং স্পিসিএল ওবজার্ভরশিংশু মরুওইবা থৌদাং লৌরি। পাংথোক্কদৌরিবা মীখলশিং অসিদা ফোর্সশিং খন্নবা অমসুং মথৌ পাংথোক্নবা ওবজার্ভরশিংনা অহেনবা থৌদাং লৌগনি। ভারতকী গনতন্ত্রগী মাইপাকপা অসি তশেংনা সরকার শেম্বদা মীচম মীয়াম্না মরুওইবা থৌদাং অমা লৌবগী মখা পোল্লি। ই.সি.আইগী পান্দমদি ভোত্তরশিং শক্তি পীবা, মিকুপ-নাহুম শিংহনবা, ই-পাউ খঙহনবা অমসুং অশোই-অঙাম থোকহন্দবনি। ওবজার্ভরশিংনা মীয়ামগা উনগদবনি অমসুং মখোয়না ভোত্তরশিং অকিবা য়াওদনা ভোৎ থাদবা ঙমহনগদবনি। করিগুম্বা ওবজার্ভরশিংনা মখোয়গী মথৌ পাংথোকপদা চেকশিন্দবা থেংনরবদি ই.সি.আইনা খোঙলৈথুনা থবক লৌখৎকনি। থওইনা থৌশাদবশিং ই.সি.আইনা তুমিন্না লৈথোক্লোই। অহলশিং, হকচাংগী ফিবমদা মীমান্নদ্রবশিং অমসুং নুপী ভোত্তরশিংগী পীরিবা খুদোংচাবশিং য়েংশিন্নবা ওবজার্ভরশিং পোল্লিং বুথশিংদা চৎগদবনি।

ইলেক্সন কম্মিসন্নর শ্রী সুসিল চন্দ্রনা হায়খি লাক্লিবা মীখলশিং অসিদা ভোত্তর কোতি ১৮ হেন্না মখোয়গী ভোৎ থাদবগী হক শীজিন্নগনি। মী অমগা অমগা থাপ্না লৈনবা পোল্লিং স্তেসন ৮০,০০০ হেন্না হাপচিল্লে। সংবিধানগী পান্দমশিং অদু থবক ওইনা পাংথোক্নবা ওবজার্ভরশিংনা ফিল্দ ওফিসারশিংদা অচুম্বা মাইকৈ তাক্কদবনি। ওবজার্ভরশিংনা ফজনা মথৌ পাংথোকপা মতমদা ভোত্তরশিংগী মরক্তা থাজবা লৈহনগনি অমসুং শেনগী শক্তি নত্রগা য়ু অমসুং পোৎ-চৈ কয়া লেম্না পীবগী থবকশিং লাকশিনবা ঙমগনি। হায়রিবা মীখলশিং অসি মপুংফানা নিয়ম চুম্না পাংথোকপদা ওবজার্ভরশিংনা মরুওইবা থৌদাং অমা লৌগদবনি।

ইলেক্সন কম্মিসন্নর শ্রী রজিব কুমারনা হায়খি ওবজার্ভরশিংনা পাংথোকপা থবকশিং মীয়াম, মেদিয়া অমসুং রাজনিতি দলশিংনা কুপ্না শেন্নগনি। ফিবম অমা হেক্তা মীখলগী চুম্বা অমসুং আইনগী ওইবা থবকশিং ঙাক্নবা ওবজার্ভরশিংনা অখন্নবা থবকশিং পাংথোক্কদবনি। থবক ফজনা পাংথোক্নবা ওবজার্ভরশিং লাইনা উনবা য়ানবা অমসুং ইফোং ফোংনবা অমসুং অফবা থবকশিং পাংথোক্নবা হোৎনগদবনি। ওবজার্ভরশিংগী পাউদমশিং অসি ই.সি.আইনা অচুম্বা পুরকপদা য়াম্না মরুওইবা মচাক অমনি। থবক ওইনা ফজনা পাংথোক্নবা আইনগী ওইবা ৱাফমশিং, পাউতাকশিং অমসুং ই.সি.আইগী খ্বাইদগী নৌবা সর্কুলারশিং ওবজার্ভরশিংনা খঙজিনগদবনি।  

মীফম অদুদা ই.সি.আইগী সেক্রেতরি জেনেরেল শ্রী উমেস সিনহানা মীখলগী থৌরাং তৌবা, সেকুরিতিগী অশীন-অরাং অমসুং এস.ভি.ই.ই.পিগী মরমদা ৱা ঙাংখি। তামিল নাদু অমসুং পুদুচেরি রাজ্যশিংগী মীখলশিংগী ইন-চার্জ ওইরিবা শ্রী সিনহানা তামিল নাদু অমসুং পুদুচেরি রাজ্যশিংগী ওফিসারশিংগা ৱা খন্নখি।

সেনিয়র দিপুতি ইলেক্সন কম্মিসন্নর শ্রী ধরমেন্দ্র শর্মনা মীখলদা মথৌ তৌগদবা ওফিসিএলশিংগী ত্রেনিং অমসুং অসামগী মতাংদা(অসামগী ইন-চার্জ ওইনা) ৱা ঙাংখি; দিপুতি ইলেক্সন কম্মিসন্নর শ্রী সুদিপ জেন্না ইলেক্তোরেল রোলগী ৱাফমশিং, আই.তি শীজিন্নবা অমসুং ই.ভি.এম ভি.ভি.পি.তি সিস্তেমগী মতাংদা ৱা ঙাংখি। শ্রী জেন্না কেরলা অমসুং নোংচুপ বঙ্গালগী মীখলশিংগী মতাংদশু ৱা ঙাংখি। আইনগী ওইবা ৱাফমশিং, এম.সি.সি অমসুং চাদিং য়েংশিনবগী মতাংদা দিপুতি ইলেক্সন কম্মিসন্নর শ্রী চন্দ্র ভুসন কুমার অমসুং দিরেক্তর এক্সপেন্দিচর শ্রী পঙ্কজ শ্রীভাস্তাবানা মখোয়গী ওইবা ৱাফমশিং থমখি। ই.সি.আইগী ৱাঙাংলোই, শ্রীমতি সেফালি সারন্না মেদিয়া সর্তিফিকেসন অমসুং মোনিতরিং কমিতিশিং, পেদ নিউজ অমসুং সোসিএল মেদিয়াগী মতাংদা ওফিসারশিংদা ৱা ঙাংখি।

পাংথোক্কদৌরিবা মীখলশিং অসিদা হকচাংগী ফিবমদা মীমান্নদ্রবশিং, চহি ৮০গী মথক্তা লৈবা মীওইশিং, লাউথোক্লবা তঙাইফদবা থবকশিংদা মথৌ পাংথোক্লিবা মীওইশিং, মতিক চারবা ওথোরিতি অমনা শকখঙলবা কোবিদ-১৯ পোজিতিপ ওইরবা /চিংনবা ভোত্তরশিং অমসুং ক্বারেন্তাইনদা লৈরিবা ভোত্তরশিংদা ই.সি.আইনা পোস্তেল বেল্লোদকী খুদোংচাবা পীরে। মীখলগী থবক-থৌরম পুম্নমক্না কোবিদ-১৯ ঙাকথোক্নবা কম্মিসনগী চৎন-পথাপশিং ঙাক্না চৎকনি অমসুং পায়খৎলিবা থবকশিংগী মনুংদা পোল্লিং স্তেসন মশিং হেনগৎহনবা, মী খুদিংমক থর্মেল স্কেন্নিং পাংথোকপা, সেনিতাইজর অমসুং মাক্স শীজিন্নবা, কাউন্তিং তেবলশিংগী হাংনা থানবা অচৌবা হোলশিং শীজিন্নবা, পোল্লিং পর্সোনেলশিং অমসুং সেকুরিতিগী মীওইশিং পুনবা গারি মরাং কাইনা শীজিন্নবা মীখলগী মথৌ পাংথোক্কদবা মীওই খুদিংমক তিকা থাবা য়াওরি।

*****