কেন্দ্রগী এজুকেসন মন্ত্রীনা ঙসি নই দিল্লীদা রাস্ত্রিয়া উচ্চতর শিক্ষা অভিয়ান (রুসা)গী য়েংশিন মীফম অমদা ময়াই তাংবল লৌখ্রে। মীফম অসিদা মন্ত্রালয়গী মকোক থোংবা ওফিসিএলশিংগা লোইননা হায়র এজুকেসনগী সেক্রেতরী শ্রী অমিৎ খারেনা শরুক য়াখ্রে।

মীফম অসিদা শ্রী পোখ্রিয়লনা ওফিসিএলশিংদা রুসা স্কীম মপাঙ্গল কনখৎহন্নবা অমসুং ২০৩৫ ফাওবদা জি.ই.আর. ৫০%দা হেনগৎহন্নবা অহেনবা মহৈরোই করোর ৩.৫ মহৈ তমহন্নবা থৌরাংশিং পাইখৎনবা খঙহনখ্রে। ঐখোয়গী কোলেজশিং অমসুং য়ুনিভর্সিতীশিংদগী মফম অসিগী লৈরিবা ফীভমশিংদা চুন্নবা থবক ফংনবা স্কিলশিংগা লোইননা পুন্না মহৈরোই করোর ৭ পাস তৌহনগদবনি হায়না মহাক্না মখা তাখ্রে।

মহাক্না মখা তারদুনা হায় লাস্ত মাইলগী মহৈরোইশিং য়ৌহন্নবা লৈবাক অসিদা ওনলাইন দিস্তেন্স লর্নিং অমসুং ইনফ্রাস্ত্রকচর দিবেলপমেন্ত তৌনবা থৌগৎকদবনি। মন্ত্রীনা হায় এজুকেসন্না লমদম অসিদা থবক ফংহনবা ঙমগদবনি। দিগ্রী কোলেজগী এজুকেসন অসি “ৱন দিস্ত্রিক্ত ৱন প্রদক্ত” প্লানগী মখাদা ফংহনগদবনি।

শ্রী পোখ্রিয়লনা হায় য়ুনিভর্সিতী গ্রান্তস কম্মিসন্না রুসা স্কীমগী মখাদা ফন্দিং ফংখিবা ইন্সতিত্যুসনশিংনা পাইখৎলিবা থবক্কী খোঙজেল য়েংশিনগনি। মন্ত্রীনা থা অহুম খুদিংগী রুসা স্কীম য়েংশিনগনি।

*****