ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

অসমগী মীয়াম্না পাম্নরবা মুখ্য মন্ত্রী শ্রী সর্বানন্দ সোনোৱালজী, কেন্দ্রগী মন্ত্রীমন্দলদা ঐগী খোংলোই ওইবীরিবা শ্রী রামেশ্বর তেলীজী, অসম সরকারদা মন্ত্রী ওইবীরিবা শ্রীমান হেম্নত বিস্বা সরমাজী, শ্রী অতুল বোরাজী, শ্রী কেশব মহন্তজী, শ্রী রঞ্জীৎ দত্তাজী, বোদোলেন্দ তেরিতোরিএল রীজনগী চীফ শ্রী প্রমোদ বোরাজী, অতৈ এম.পি.শিং, এম.এল.এ.শিং অমসুং ঐগী নুংশিরবা ইচিল-ইনাওশিং।

ইচিল-ইনাওশিং কমদৌবীরিবগে? নুংঙাইবীরমগনি হায়না থাজৈ। হৌখিবা থাদা ঐনা অসমদা লাকচদুনা লাইরবা, শোৎথরবা তুহৎপীরবা খুন্নাইগী মীয়াম্বু লমগী পতা য়েন্থোকপগী থৌরমদা শরুক য়াবগী লাইবক ফবা অদু ঐহাক ফংজখি। মতম অদুদা ঐনা হায়খি মদুদি অসমগী মীয়ামগী মীনুংশি অমসুং অদোমগী মীনুংশি অদু অদুক্কী মতিক চেৎখি মদুদি মদুনা ঐহাকপু হন্না হন্না অসমদা পুরি। হৌজিক অমুক্কা হন্না ঐ অদোম পুম্নমক্তা খুরুমজবা লাকচরি। অদোম ময়াম্বু উনজনবগীদমক্তা লাকচরি। ঐনা ঙরাং সোশিএল মীদিয়াদা উখি, অদুগা ঐনা ত্বীৎসু তৌখি মদুদি ধেক্যাজুলী অসি কয়াদা নীংথিজনা লৈতেংলবনো। অদোম ময়াম্না থাওমৈ কয়া থানখি। অসিগুম্বা ইশাগী ওইবা ৱাখল অসিগীদমক অসমগী মীয়ামগী খুয়া খাদা খুরুমজরি। ঐ অসমগী মুখ্যমন্ত্রী সর্বানন্দজী, হেমন্তজী, রঞ্জীৎ দত্তাজী, সরকারদা অমসুং বি.জে.পি. ওর্গনাইজেসন্দা লৈবীরিবা, পুম্নমকপু থাগৎচরি। মখোয়না অদুক্কী মতিক খোংজেল য়াংনা অসমগী চাউখৎ-থৌরাংদা, অসমগী সেবাদা শরুক য়ারি মদুদি ঐহাক লেপ্তনা মফম অসিদা চাউখৎপগী থৌরমশিংদা লাকচবগী তাঞ্জা ফংলি। ঙসিগী নুমিৎ অসি ঐগীদমক্তদি অতোপ্পা মরম অমদা য়াম্না মরুওইবা ওইরি! ঙসি সোনিতপুর – ধেক্যাজুলীগী শেংলবা লমদম অসিবু খুরুমজবগী তাঞ্জা ফংজরে। মসি অদুগুম্বা লমদম অদুনি মফম অসিদনি রুদ্রপদ মন্দিরগী মনাক্তা অসমগী চহি-চা কয়া লিরবা পুৱারী ঐখোয়গী মাংদা থোকখিবা অদু। মসি লমদম অদুনি মফম অসিদা অসমগী মীয়াম্না লান্দারকপশিংবু মায়থিবা পীখি, মখোয়গী অপুনবা, মখোয়গী পাঙ্গল, মখোয়গী মতিক অদু মশক তাকখি। ১৯৪২দা লমদম অসিদা অসমগী নীংতম লান্মীশিংনা লৈবাক অসিগী নীং খা তম্বগীদমক্তা, মচু অহুমগী ইকাই খুম্নবগীদমক্তা কৎথোকখি। ঐখোয়গী অদুগুম্বা অথৌবশিংগী থৌনা অদুদা ভুপেন হজারিকাজীনা হায়বীখি -

ভারত হিংহহ আজি জাগ্রত হয়।

প্রতি রক্ত বিন্দুতে,

হহস্র শ্বহীদর

হাহত প্রতিজ্ঞাও উজ্জল হয়।

হায়বদি, ঙসি ভারতকী নোংশা হৌগৎলে। অথৌবশিংগী ঈরিক অমমম্না, মখোয়গী থৌনানা ঐখোয়গী ৱাশক অসি চেৎশিলহল্লি। মরম অসিনা, অথৌবশিংগী মথৌনা খুদম ওইরবা সোনিতপুরগী লমদম অসিনা, অসমগী হৌখ্রবা মতম অদুনা, হন্না হন্না ঐগী পুক্নীংবু চাউথোকচবা পোকহল্লি।

মরূপশা,

ঐখোয় পুম্নমক মহৌশাদগী মসি তাদুনা লাক্লি, উদুনা লাক্লি মদুদি লৈবাক অসিগী অহানবা অয়ুক অৱাং নোংপোক্তগী থোকই। অদুবু মসিসু অচুম্বনি মদুদি অৱাং নোংপোক অমসুং অসমদা চাউখৎ-থৌরাংগী অয়ুক অসি য়াম্না কুইনা ঙাইখি। হিংসা, অৱাৎপা, চরাংনবা, খেন্নবা, ইরাং, পুম্নমক অসি তুংওইনরমদুনা হৌজিক অৱাং নোংপোক অপুনবা অসি চাউখৎ-থৌরাংগী মায়কৈদা চংশিল্লি। অমসুং অসমনা মসিদা মরুওইবা থৌদাং লৌরি। পুৱারী ওইরবা বোদো পীস এগ্রীমেন্তকী মতুংদা হন্দক্তা পাংথোকখিবা বোদোলেন্দ তেরিতোরিএল কাউন্সিলগী মীখলনা মফম অসিদা চাউখৎ-থৌরাং অমসুং থাজবগী অনৌবা তাঙ্কক ইরে। ঙসিগী নুমিৎ অসিসু অসমগী লাইবক অমসুং অসমগী তুংলমচৎতা অচৌবা অহোংবগী শাখি ওইরি। ঙসি অতোপ্পা অমরোমদা বিস্বনাথ অমসুং চরইদেবদা মেদিকেল কোলেজ অনিগী খুদোল অসমনা ফংগদৌরি, অদুনা ‘অসম মালা’ অসিগী থোংদা ইনফ্রাস্ত্রকচরগী য়ুম্বীসু থোল্লি।

ঙসি অসি অসমগী চাউখৎ-থৌরাংগী খোংচৎতা অচৌবা নুমিৎ অমনি। অখন্নবা নুমিৎ অসিদা, ঐনা অসমগী মীয়ামদা থমোই শেংনা য়াইফ-পাউজেল পীজরি। 

মরূপশা,

অমত্তা ওইনা হোৎনবনা, অমত্তা ওইনা ৱারেপ লৌবনা করম্বা ফল পুরকপগে, অসম মসিগী অচৌবা খুদম অমনি। অদোম চহি মঙা মমাঙগী মতম অদু নীংশিংবীরমগনি, মতম অদুদা অনম্বা অরাপ্পা মফমশিংদা অফবা হোস্পিতাল লৈবা হায়বসি শুপ্নগী মঙলান অমা ওইরম্মি। অফবা হোস্পিতাল, অফবা লায়েঙগী ৱাহন্থোক পুং কয়াগী খোংচৎ, পুং কয়া ঙাইবা অমসুং লেপ্তনা মশিং থিঙমদ্রবা অৱাবশিং অসিনা ওইরম্মি! ঐঙোন্দা অসমগী মীয়াম্না তমখি মদুদি, মখোয় মতম পুম্নমক্তা অৱাবা অসি মায়োক্নদুনতা লৈখি মদুদি মেদিকেল ইমর্জেন্সী অমত্তা লাকপীদবা! অদুবু অৱাবশিং অসি হৌজিক্তি খোংজেল য়াংনা পাম্বৈগী মায়কৈদা চংশিল্লি। অদোম্না খেন্নবা অসি য়াম্না লায়না উবা ফংবীগনি, ফাওবা ঙম্বীগনি। নীং খা তম্লবা মতুংদগী চহি তরাগী খুজিং ৭তা, হায়বদি ২০১৬ ফাওবদা অসমদা শুপ্নগী মেদিকেল কোলেজ ৬ খক্তমক লৈরম্মি। অদুবু চহি ৫ অসিমক্তদা অসমদা মেদিকেল ৬ অমগা শাবগী থবক হৌখ্রে। ঙসি অৱাং থংবা অসম অমসুং অপ্পর অসমগী তঙাইফদবশিং অদুদা মিৎয়েং থম্লদুনা বিস্বনাথ অমসুং চরইদেবদা মেদিকেল কোলেজ অনি অমগী উরেপ-উয়ুং তমখ্রে। মেদিকেল কোলেজ অসি মশানা অনৌবা হেল্থ সর্বিসশিংগী সেন্তর ওইজবগা লোইননা মথংগী চহি খরদা মফম অসিদগী ঐগী নহা লিশিং কয়ানা দোক্তর ওইদুনা থোরক্লগনি। অদোম য়েংবীয়ু, ২০১৬ ফাওবদা অসমদা পুন্না এম.বি.বি.এস.কী সীৎ চাউরাক্না ৭২৫ খক্তমক লৈরম্মি। অদুবু অনৌবা মেদিকেল কোলেজশিং অসি হেক হৌবগা, অসমনা চহি খুদিংগী অনৌবা এম.বি.বি.এস. দোক্তর ১৬০০ ফংবা হৌরগনি। অদুগী ঐগীদি অতোপ্পা মঙলান অমনি। য়াম্না থৌনা লৈবা মঙলান্নি খল্লমগনি অদুবু ঐগী লৈবাক্কী খুঙ্গংদা, ঐগী লৈবাক্কী লাইরবগী য়ুমদা তেলেন্তকী অৱাৎপা অমত্তা লৈতে। মখোয় তাঞ্জা ফংজদে। নীং খা তম্লবা ভারত হৌজিক চহি ৭৫দা খোং থাংজিল্লক্লি। অদুনা ঐগী মঙলান অমা লৈরি। রাজ্য খুদিংমক্তা য়ামদ্রবদা মেদিকেল অমা লৈবা, য়ামদ্রবদা তেক্নিকেল কোলেজ অমা লৈবা, মদুদা ইমা লোন্দা তম্বা হৌগদবনি। অসমিয়া লোন্দা তমদুনা কনানা অফবা দোক্তর অমা ওইবা ঙম্লোইদ্রা? নীং খা তম্বা চহি ৭৫ শুরক্কদৌরে অমসুং মরম অসিনা মীখলগী মতুংদা অসমদা অনৌবা সরকার লাকপা মতমদা, ঐনা মসিদা অসমগী মীয়ামগী মায়কৈদগী অদোমদা ৱাশক্লি। মদুদি অসমদসু মেদিকেল কোলেজ অমা লমদম অসিগী লোন্দা ঐখোয় হৌদোক্কনি। অমসুং তপ্না তপ্না মসি হেনগৎহনগনি। কনানসু মসি থিংবা ঙম্লোই। দোক্তরশিং অদুনা অসমগী তোঙান তোঙানবা মফমশিংদা, অরাপ্পা মনুং হঞ্জিনবা মফমশিংদা সেবা তৌগনি। মসিদগীসু লায়েংবদা খুদোংচাবা ওইরগনি, মীয়াম্নসু লায়েংনবা য়াম্না লাপ্না চৎনররোই।   

মরূপশা,

ঙসি গুৱাহাতীদা এম্স অমগী থবকসু খোংজেল য়াংনা পায়খৎলি। মসিগী থবক অসি মথংগী চহি অমা অনি অসিদা লোইশিল্লগনি। এম্সকী হৌজিক্কী কেম্পস অসিদা হন্দক্কী সেসন অসিগী এম.বি.বি.এস.কী অহানবা বেচসু হৌখ্রে। চহি খরগী মতুংদা মসিগী অনৌবা কেম্পস হেক শাবগা, গুৱাহাতী অসি অনৌবা হেল্থ সর্বিসশিংগী সেন্তর ওইনা শাফোংলকপা অদোম্না উবীগনি। এম্স গুৱাহাতী শুপ্নগী অসম খক্তা নত্তনা, অৱাং নোংপোক অপুনবগী পুন্সিদা অচৌবা অহোংবা অমা পুরক্কদৌরি।

মরূপশা,

অসমগী নুংঙাই-য়াইফবা, মফম অসিগী চাউখৎপগী অচৌবা সেন্তর অমদি অসমগী চা বাগান অসিসু ওইরি। সোনিতপুরগী লাল চায় (অঙাংবা চা)দি তোঙানবা ফ্লেবর অমগীদমক মমিং চৎলিবনি। সোনিতপুর অমসুং অসমগী চাগী মহাও কয়াদা থোইদোক হেন্দোকপগে হায়বদু ঐঙোন্দগী হেন্না কনানা খঙগনি? মরম অসিনা ঐ মতম পুম্নমক্তা চা ৱর্করশিংগী চাউখৎপা অসি অসম অপুনবগী চাউখৎপগা পুন্না য়েংই। ঐহাক নুংঙাইবা পোকই মদুদি মায়কৈ অসোমদা অসম সরকারনা চুম্না হোৎনরি। হৌজিক ঙরাংদা অসম চাহ বগীচা ধন পুরস্কার মেলা স্কীমগী মখাদা অসমগী তী গার্দেন ৱর্কর লাখ তরেৎ মখায়গী বেঙ্ক একাউন্ততা লুপা করোর কয়া হকথেংননা ত্রান্সফর তৌখ্রে। তী গার্দেনশিংদা থবক তৌরিবী মীরোনবী নুপীশিংবু অখন্নবা স্কিম অমগী থোংদা হকথেংননা মতেং পীরি, তী ৱর্কর অমসুং মখোয়গী ইমুং-মনুংগী হকশেলগীদমক, চেক-অপ অমসুং লায়েংগীদমক্তা তী গার্দেনশিং মক্তদা মোবাইল মেদিকেল য়ুনিৎসু থারি, লেম্না হিদাক-লাংথকশিংগীসু থৌরাং তৌরি। অসম সরকারগী হোৎনরিবশিং অসিগা লোইননা হন্দক লৈবাক অসিগী বজেত্তসু চা বগান্দা থবক তৌরিবা ঐখোয়গী ইচিল-ইনাওশিংগীদমক্তা লুপা করোর লিশিং অমগী অখন্নবা স্কিম লাওথোক্লে। তী ৱর্করগীদমক্তা লুপা করোর লিশিং অমা। পৈশা অসিনা অদোম্না ফংগদৌরিবা খুদোংচাবশিং অদু হেনগৎহনগনি, ঐখোয়গী তী ৱর্করশিংগী পুন্সি হেন্না লাইথোকহনগনি।

মরূপশা,

ঙসি ঐনা অসমগী তী ৱর্করশিংগী ৱাফম পল্লকপদা, ঐনা মতম অদুদা লৈবাক্কী মায়োক্তা চৎথখিবা শরৌগী ৱাফমসু পনবা পামজৈ। ঙসি লৈবাক অসিবু মিংচৎ থিহন্নবা শারৌ শিল্লিবশিং থাক অসি ফাওবা য়ৌখ্রে মদুদি, ভারতকী চা ফাওবা খাক্ত্রে। অদোম্না পাউ তাবীরম্লগনি, শারৌ শিল্লিবশিংনা হায়রি মদুদি ভারতকী চাগী মশক অসি মিংচৎ থিহনগদবনি। চে-চাং কয়া মাংদা থোরক্লি মদুদা ফোংদোক্লি মদুদি মীরমদা ফম্লিবা পাৱর খরনা, চাগা লোইনরিবা ভারতকী শক্তাক অসিদা লান্দানবা থৌরাং তৌরি। অদোম লান্দা অসিবু য়ানীংবরা? লান্দা অসিগী মতুংদা তুমিন্না লৈবশিং অদু ওইবা অদোম য়ানীংবরা? পুম্নমক্তা পাউখুম পীগদবনি। মখোয়না হিন্দুস্তানগী চাবু মিংচৎ থিহন্নবা থবক তৌরি। অমসুং মদুগীদমক্তা মফম অসিদা তুমিন্না ফমদুনা লৈরিবা, রাজনীতিগী দলশিংদা চা বগান খুদিংমক্না পাউখুম তানগনি।    

মরূপশা,

ঙসি অসমদা লম খুদিংমক্তা থবক কয়া পায়খৎলিবা অসিদা, থাক খুদিং অমসুং লম খুদিংদা চাউখৎলিবা অসিদা, অসমগী মতিক মঙম হেনগৎহনবা অসিসু মথৌ তাই। অসমগী মতিক মঙম হেনগৎহনবদা মফম অসিগী অনৌবা সরকশিং অমসুং ইনফ্রাস্ত্রকচরগী চাউরবা থৌদাং য়াওরি। মসিদা মিৎয়েং থম্লদুনা ঙসি ‘ভারত মালা প্রোজেক্ত’কী পেতর্ন্দা অসমগীদমক্তা ‘অসম মালা’ হৌদোক্লে। মথংগী চহি ১৫ রোমদা অসমদা অপাকপা হাইৱেজগী নেতৱর্ক লৈনবা, মফম অসিগী খুঙ্গং পুম্নমক মরুওইবা সরকশিংগা শম্ননবা, মফম অসিগী সরকশিং লৈবাক্কী অচৌবা শহরশিংগুম্না অনৌবা ওইহন্নবা, অসম মালা প্রোজেক্তনা অদোমগী মঙলানশিং অদু মপুং ফাহনগনি, অদোমগী মতিক মঙম হেনগৎহনগনি। হৌখিবা চহি খরা অসিমক্তদা অসমদা কি.মি. লিশিং কয়াগী সরক শাখ্রে, অনৌ অনৌবা থোং শাখ্রে। ঙসি ভুপেন হজারিকা ব্রিজ অমসুং সরায়ঘাত ব্রিজ অসি অসমগী অনৌবা শক্তাক্কী শরুক অমা ওইররি। লাক্কদৌরিবা নুমিৎ খরনিদা থবক অসি অমুক্কা হেন্না খোংজেল য়াংশিনগদৌরি। 

মরূপশা,

অসমগী অফাওবা কবি রুপকুঁৱর জ্যোতি প্রসাদ অগ্রৱালগী পরেংনি -

ঐগী অনৌবা ভারতকী,

অনৌবা শক্তম,

মিৎকপ থোক্লো,

মিৎকপ থোক্লো,

ঙসি পরেংশিং অসিবু মপুং ফাহন্দুনা ঐখোয় অনৌবা ভারতপু মিৎকপ থোকহল্লসি। অনৌবা ভারত অসি আত্মনির্ভর ভারত ওইগনি, অনৌবা ভারত অসিনা, অসমবু চাউখৎপগী অনৌবা মতোল অদুদা পুখৎকনি। য়াইফ-পাউজেল অসিগা লোইননা, অদোম ময়াম্বু হন্না হন্না থাগৎচরি! হন্না হন্না য়াইফ-পাউজেল পীজরি। ঐগা লোইননা খুত্তুম তাশিন্দুনা য়াম্না হৌনা লাওবীয়ু, ভারত ইমানা – য়াইফরে। ভারত ইমানা – য়াইফরে। ভারত ইমানা – য়াইফরে। ভারত ইমানা – য়াইফরে। হন্না হন্না থাগৎচরি।

***