نئی دہلی۔ 13 فروری     معروف سنی اداکار اور گورداس پور سے بی جے پی کے ممبر پارلیمنٹ ، سنی دیول نے مرکزی وزیر ڈاکٹر جتیندر سنگھ سے ملاقات کی اور ان سے دریائے راوی پر واقع شاہ پور کانڈی ڈیم پروجیکٹ پر تبادلہ خیال کیا۔ اس ڈیم سے بالترتیب کٹھوعہ اور پٹھان کوٹ اضلاع کے ان سرحدی علاقوں کو فائدہ ہوگا جو  ادھم پور – کٹھوعہ–  ڈوڈا لوک سبھا حلقوں کا ملحقہ حصہ ہیں،  جس کی نمائندگی ڈاکٹر جتیندر سنگھ کرتے ہیں  اور گورداس پور جس کی نمائندگی سنی دیول  کرتے ہیں۔

قابل  ذکر ہے کہ شاہ پور کانڈی ڈیم منصوبہ گذشتہ چار دہائیوں سے تعطل کا شکار تھا اور وزیر اعظم نریندر مودی کی براہ راست مداخلت کے بعد اس کی بحالی ہوئی تھی۔ وزیر اعظم  نے جموں کےاپنے ایک دورے کے دوران اس کے آغاز کا اعلان کیا تھا۔ یہ منصوبہ ، جسے "قومی پروجیکٹ" کے طور پر اعلان کیا گیا ہے ، 2022 میں مکمل ہونے والا ہے اور اس سے ہندوستان کو دریائے راوی کا پانی استعمال کرنے کی اجازت مل جائے گی، جس کا پانی بصورت دیگر پاکستان میں بہہ رہا تھا ،  حالانکہ 1960 کے سندھ آبی معاہدے کے تحت  دریائے راوی کے پانی کا حصہ ہندوستان کے لئے مختص کیا گیا تھا۔

2014 میں ڈاکٹر جتیندر سنگھ کے اس خطے سے ممبر پارلیمنٹ منتخب ہونے کے فورا بعد ہی ، انہوں نے اس منصوبے کی بحالی کی کوششیں شروع کر دی تھی۔ اگرچہ اس پروجیکٹ کی منصوبہ بندی کئی سال پہلے کی گئی تھی ، لیکن ریاست پنجاب اور اس وقت کے ریاست جموں کشمیر کے مابین معاہدہ نہ ہونے کی وجہ سے اس پر عمل درآمد نہیں ہوسکا۔ تاہم ، وزیر اعظم نریندر مودی کی ہدایت پر ، معاہدے کا ایک نیا مسودہ تیار کیا گیا اور اس منصوبے کو 2018 میں دوبارہ زندہ کیا گیا۔

ڈاکٹر جتیندر سنگھ نے کہا کہ 1960 کے سندھ آبی معاہدے کے تحت ، بھارت کو تین مشرقی دریاؤں راوی ، بیاس اور ستلج پر پانی کا پورا پورا حق ہے ، لیکن سابقہ ​​حکومتوں کے غیر مہذب رویے کی وجہ سے ، بھارت کے حصے کا پانی  پاکستان میں بہہ رہا تھا ۔ انہوں نے کہا ، ایک بار جب یہ منصوبہ مکمل ہوجائے گا تو اس سے جموں و کشمیر اور پنجاب سے متصل علاقوں میں کسانوں کی آبپاشی کی صلاحیت بہتر ہوگی۔

سنی دیول نے ڈاکٹر جتیندر سنگھ کے ساتھ اس منصوبے کی جگہ کا مشترکہ دورہ کرنے کی پیش کش کی ۔ جس جگہ پر تعمیری کام شروع ہونے جا رہا ہے وہ  سنی دیول کے پارلیمانی حلقہ میں  واقع ہے۔

اس ملاقات کے دوران ، سنی دیول نے کٹھوعہ اور پٹھان کوٹ کے ملحقہ اضلاع کے لئے باہمی تشویش کے کچھ امور پر بھی تبادلہ خیال کیا ، جو دو متعلقہ لوک سبھا حلقوں کا حصہ ہیں۔ انہوں نے برڈ فلو کی احتیاطی تدابیر کے تناظر میں جاری کردہ رہنما خطوط کی وجہ سے جموں وکشمیر پنجاب بارڈر پر عائد پابندیوں پر بھی تبادلہ خیال کیا۔ دونوں رہنماؤں نے دونوں پڑوسی اضلاع کو متاثرکرنے والے امور کو حل کرنے کے لئے انتظامیہ کے ساتھ مشترکہ اجلاس منعقد کرنے کی پیش کش کی۔  

 

۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔ رض (

U-1532

 

(Release ID: 1697890)