এসিয়াগী খ্বাইদগী চাওবা এরোস্পেস অমসুং দিফেন্স এগজিবিসন ওইরিবা এরো ইন্দিয়া ২০২১ হৌদোকপগী থৌরম ২০২১গী ফেব্রুৱারী ০৩-০৫ ফাওবা বেঙ্গলুরুগী য়েলহনকাদা লৈরিবা এয়র ফোর্স স্তেসনদা পাংথোক্লগনি৷ হন্দক চহী অসিগী এরো ইন্দিয়া ২০২১ অসিদা মীওই খ্বাইদগী য়াম্না শরুক য়াবা হেনগৎনবা কনকুরেন্ত ভর্চুয়েল এগজিবিসনগা লোইননা হাইব্রিদ মোদ অমদা শিনখ্রে৷ থৌরম অদু হৌদোক্তুনা (দিফেন্স প্রদক্সনগী) সেক্রেতরী শ্রী রাজ কুমারনা তিল্লিবা মীয়াম অদুবু তরাম্না ওকখ্রে অমসুং ভারতনা মপুং ফাবা কোবিদ কমপ্লাইন্ত এরো অমা অমসুং দিফেন্স এগজিবিসন শিন্নবা খোঙথাং অমা লৌখৎখ্রে হায়না মহাক্না ফোংদোকখ্রে৷ থৌরম অসিদা লৈবাক ৫৫ হেনবদগী লাক্লিবা এম্বাসেদরশিং অমসুং দেলিগেৎশিং থৌরম অসিদা শরুক য়াবিবগীদমক মহাক্না অপেনবা ফেংদোকখ্রে৷ এরো ইন্দিয়া ২০২১ অসিদা মীওই কা হেন্না শরুক য়াবা অসিনা মালেম অসিদা লৈরিবা মীওইশিং অসিগী পোজিতিব ওইবা ৱাখল্লোন অদু মসিদা মমী তাই হায়না শ্রী রাজ কুমারনা ফোংদোকখ্রে৷ এরো ইন্দিয়া ২০২১ অসিনা এরোস্পেস অমসুং দিফেন্স সেক্তরশিং অসিদা ৱাখল্লোনশিং একচেঞ্জ তৌননবা অমসুং পার্তনরশিপশিং শেম্ননবা প্লেতফোর্ম অমা ফংহল্লগনি হায়না মহাক্না ফোংদোকখ্রে৷ এরো ইন্দিয়া ২০২১গী মতমদা শিনগদবা থৌরমশিং খুদম ওইনা এয়র স্তাফত চীফশিংগী কনক্লেব, বনধনগী থৌরম অমসুং ইন্দিয়ন পেবিলিয়ন অসিগী মতাংদা শম্লক্না মহাক্না ফোংদোকখ্রে৷

মতুং তারকপদা লাইত কোম্বেৎ এয়রক্রাফত তেজাস পুথোক্নবা কন্ত্রেক দোকুমেন্তশিং অদু দিফেন্স মন্ত্রালয়না হিন্দুস্তান এরোনোতিক্স লিমিতেদ(হাল)দা খুৎশিন্নখ্রে৷ হালগী চিয়রমেন অমসুং মেনেজিং দাইরেক্তর শ্রী আর. মধবননা লাইত কোম্বেৎ এয়রক্রাফত(এল.সি.এ.) তেজাস্কী মোদেল অমা রক্সা মন্ত্রী শ্রী রাজনাথ সিংহদা পুথোক্তুনা উৎখ্রে৷ মসিগী মতুং তারকপদা এয়রক্রাফত অসিগী খোঙচৎ অসিগী মতাংদা নম্বা অতেনবা ফিল্ম অমা উৎখ্রে৷

২০২১গী এরো ইন্দিয়া অসিদা মালেম অসিগী দেলিগেৎশিংনা শরুক য়ারিবা অসিগীদমক রক্সা মন্ত্রী শ্রী রাজনাথ সিংহনা নুংঙাইবা ফোংদোকখ্রে৷ সিঙ্গল ৱিন্দো ক্লিয়রেন্স মেকানিজম অমসুং লাইথোকহল্লবা প্রোসিদ্যোরশিং অসিগা লোইননা শেল থাদবা কিদবা সরকার, ইঞ্জিনিয়রিং ফর্মশিং অমসুং এরোস্পেস অসিনা চহী কয়া অমা চংনা শেমগৎলক্লিবা হৌজিক লৈরিবা সপ্লাই চেন অসিনা কর্নতকা রাজ্য অসি ইন্দস্ত্রীগী য়াম্না পুক্নিং চিংশিন্নিংঙাই ওইরবা পন্থুংফম অমা ওইহল্লে হায়না মহাক্না ফোংদোকখ্রে৷ এরো ইন্দিয়া ২০২১ অসি শিনবদা মপুং ফানা মতেং পাংলকখিবা অসিগীদমক কর্নতকাগী মুখ্য মন্ত্রী শ্রী বি.এস. য়েদিয়ুরপ্পাবু মহাক্না থাগৎপগা লোইননা অপেনবা নুংঙাইবা ফোংদোকখ্রে৷

এরো ইন্দিয়া ২০২১ অসিদা ৱা ঙাংলদুনা শ্রী রাজনাথ সিংহনা অসুম্না ফোংদোকখ্রে, ঐখোয়গী লৈবাক অসিনা দিফেন্স অমসুং এরোস্পেস সেক্তরদা পীরিবা তোঙান তোঙানবা খুদোংচাবশিং অমসুং তৌবা ঙম্বশিং অদু এগজিবিসন অসিনা উৎলগনি৷ থৌরম অসিদা মপান লমগী লৈবাকশিং অসিগী কম্পেনী ৮০ অমসুং লৈবাক ৫৫ হেনবগী দিফেন্স মন্ত্রীশিং, দেলিগেৎশিং, সর্ভিস চীফশিং অমসুং ওফিসিয়েলশিং য়াওনা এগজিবিতর ৫৪০ হেনবনা শরুক য়াখিবা অসিদা রক্সা মন্ত্রীনা নুংঙাইবা ফোংদোকখ্রে৷

লাক্কদৌরিবা চহী তরেৎ অসিদা মিলিতরী মোদর্নাইজেসনগীদমক সরকার অসিনা দোলর বিলিয়ন ১৩০ থাদনবা প্লান তৌরি হায়না শ্রী রাজনাথ সিংহনা ফোংদোকখ্রে৷ লৈবাক অসিনা দরকার ওইরিবা পোৎশিং লৈবাক অসিদা শাজদুনা অমসুং কমপ্লেক্স দিফেন্স প্লেতপোর্মশিং অত্মনির্ভর পোলিসীগী মীৎয়েংফম ওইদুনা লৈবাক অসিগী সেক্যুরিতী এপারেতস অসি হেন্না ফহন্নবা খোঙথাংশিং লৌখৎখ্রে হায়না মহাক্না ফোংদোকখ্রে৷ ৱাল্দ বেঙ্ককী ইজ ওফ দুইং ব্যুজিনেস্তা রেঙ্কিংশিংদা ভারতনা ২০১৯দা ৭৭শুবা মফম কল্লম্নবা অদু হন্দক্কী চহী অসিদা ৬৩শুবা মফমদা কাখৎলকপা ঙমখ্রে৷ হৌজিক্তি কম্পেনী ৫০০ হেনবনা দিফেন্স লাইসেন্সশিং লৌখ্রে অমসুং হায়রিবা মশিং অসি হৌখিবা চহী ৬ অসিদগী শরুক অনি হেনগৎলি৷

ঙসি ফাওবদা “মেক ইন ইন্দিয়া”গী খ্বাইদগী চাওরবা দিফেন্স কন্ত্রেক ওইরিবা লুপা কোতি ৪৮,০০০ হেনবগী শেনফম থাদদুনা ইন্দিয়ন এয়র ফোর্সকীদমক অনৌবা লৈবাক অসিদা শাজবা এল.সি.এ.-তেজাস এম.কে.১এ ৮৩ শানবগী ওর্দর হালনা ফংখিবা অসিদা রক্সা মন্ত্রীনা নুংঙাইবা ফোংদোকখ্রে৷ এক্তিব য়ুনিত ৫০০০ হেন্না লৈরিবা অফবা অমসুং দাইভর্সিফাইদ ওইরবা মাইক্রো, স্মোল, মেদিয়ম এন্তরপ্রাইজ সেক্তর অসিগা লোইননা ভারতনা মহাক্কী মরুপ মপাং লৈবাক কয়া অমদা দিফেন্স ইক্যুইপমেন্ত মরাং কাইনা পীবা ঙম্নবগী তৌবা ঙম্বা অদু ভারততা লৈ হায়না মহাক্না ফোংদোকখ্রে৷

বেঙ্গলুরুদা অমুক্কা হন্না এরো ইন্দিয়া মফম অসিদা শিনবা ফংবগী খুদোংচাবা ফংলিবা অসি কর্নতকা অমসুং বেঙ্গলুরুদা লৈরিবা মীয়ামশিংগী য়াম্না চাওথোকচনিংঙাই ওই হায়না কর্নতকাগী মু্খ্য মন্ত্রী শ্রী বি.এস.য়েদিয়ুরপ্পানা ফোংদোকখ্রে৷ হন্দক্কী চহী অসিদা এরো ইন্দিয়া পাংথোকপা অসি কোবিদ-১৯ লাইনা-লাইচৎ অসি থেংনবদা রাজ্য অসিনা পাংথোক্লিবা তৌবা ঙম্বা অদু উৎথোক্লে হায়না মহাক্না ফোংদোকখ্রে অমসুং থৌরম অসিদা শরুক য়ারিবা মীওইশিং দেলিগেৎশিং অসিগী চেকশিন থৌরাংগীদমক তঙাই ফদবা খোঙথাংশিং মহাক্কী সরকার অসিনা লৌখৎখ্রে হায়না ফোংদোরকখ্রে৷

হৌদোকপগী থৌরম অসিদা (দিফেন্স প্রদক্সন) এদিস্নেল সেক্রেতরী শ্রী সঞ্জে জাজুনা বোত ওফ থেঙ্কস পীখি৷ কেমিকেল্স অমসুং ফর্তিলাইজর্স মন্ত্রী শ্রী দি.ভি. সদানন্দ গৌদা, দিফেন্স স্তাফকী চীফ জেনেরেল বিপিন রৱত, এয়র স্তাফকী চীফ এয়র মার্শেল রাকেশ কুমার সিংহ ভাদৌরিয়, আর্মী স্তাফকী চীফ জেনেরেল এম.এম. নরবেনি, নেভেল স্তাফকী চীফ এদমাইরেল করম্বির সিংহ, দিফেন্স সেক্রেতরী দা. অজে কুমার, দিফেন্স আর অমসুং দি দিপার্তমেন্তগী সেক্রেতরী অমসুং দি.আর.দি.ও.গী চিয়রমেন দা. জি. শাথীশ রেদ্দী, সিভিল এভিয়েসনগী সেক্রেতরী শ্রী প্রদীপ সিংহ খারোলা অমসুং তোঙান তোঙানবা লৈবাকশিংগী দিফেন্স মন্ত্রীশিং, সর্ভিস চীফশিং অমসুং এম্বাসেদরশিংনা থৌরম অসি শরুক য়াখি৷ থৌরম অসি ভারতকী মচু অহুমগী ফিরাল পাইহন্দুনা লৈবাক্কী মরৈবাক নিংবা ইশৈ থাদুনা লোইশিনখি৷

                                                                               *******