ঙসি কমর্স অমসুং ইন্দস্ত্রি মিনিস্ত্রিগী কমর্স সেক্রেতরি দোক্তর অনুপ ৱাধাৱান্না হায়খি বজেত ২০২১-২২না হিরম খুদিংমক্তা ভারতকী চাংদম্নবা হেনগৎহন্নবা অমসুং মেনুফেকচরিং হেনগৎনবা থৌরাং কয়া পায়খৎলে অমসুং মিৎয়েং চঙলে, মসিনা ভারতনা মপান্দা থাদোক্নবা মখল কয়াগী পোৎথোক পুথোকপা অমসুং তেক্নোলোজি শীজিন্নবা হেনগৎহনবা ঙম্লগনি। হায়রিবা থবকশিং অসিনা ললোন-ইতিক পাংথোক্নবা অয়াবা পীবগী থবকশিং লাইহনগনি অমসুং ইনভেস্তরশিংগী নুংঙাইবা ফিবম অমা শেমগৎকনি।

বজেত ২০২১-২২গী মতাংদা মেদিয়াদা ৱা ঙাংবদা মহাক্না হায়খি মিৎয়েং চঙলিবা মরুওইবা হিরম অমদি ইনফ্রাস্ত্রকচর অমসুং লোজিস্তিক শেমগৎপা অমসুং মেনুফেকচরিং সেক্তরগী ফিবম অমা শেমগৎপনি। হায়রিবা থবকশিং অসিগী মনুংদা মেগা ইনভেস্তমেন্ত তেক্সতাইল পার্কস(মিত্রা) শেমগৎনবা স্কিম অমা য়াওরি। মসিনা সেক্তর অসিদা মালেমগী চেম্পিয়নশিং শেমগৎপা ঙম্নবা মালেম থাক্কী ইনফ্রাস্ত্রকচরশিং শেমগৎপা ঙমহনগনি। চহি অহুমগী মনুংদা তেক্সতাইল পার্ক ৭ শেমগৎকনি।

মহাক্না মখা তানা হায়খি মরুওইবা ঙা ফাবগী হিথাংফম মঙা হায়বদি কোচি, চেন্নাই, ভিশাখাপতনাম, পারাদিপ অমসুং পেতুয়াঘাত মতমগা চুনবা ঙা ফাবগী হিথাংফমশিং ওইনা শেমগৎনবা শেন থাদগনি অমসুং তামিল নাদুদা সিৱিদ পার্ক অমা লিংখৎলগনি। হায়রিবা থবকশিং অসিনা তেক্সতাইল অমসুং মেরিন সেক্তরদগী মপান্দা পোৎ-চৈ থাদোকপা হেনগৎহনগনি হায়বগী থাজবা থম্লি।

দোক্তর ৱাধাৱান্না হায়খি লৌউ-শিংউগী হিরমদা মপান্দা থাদোকপা হেনগৎহন্নবা ফুদ প্রোসেসিং ইন্দস্ত্রি মিনিস্ত্রিগী “ওপরেসন গ্রিন” স্কিমনা হৌজিক তিলহৌ, অলু অমসুং খামেন অশিনবদা খুদোংচাবা পীরিবা অসি য়াম্না পৎকনবা পোৎলম ২২দা হেনগৎলে। মসিনা ইনফ্রাস্ত্রকচরশিং শেমগৎনবা পুক্নিং থৌগৎকনি অমসুং হোর্তিকলচরগী পোৎথোকশিং মগুন হেনগৎহনগনি। বজেত অসিদা এগ্রিকলচর এক্সপোর্ত পোলিসি(এ ই পি) অমসুং ত্রান্সপোর্ত এন্দ মার্কেত্তিং এসিস্তেন্স(তি এম এ)গী শেনফম হেনগৎলে অমসুং মসিনা রাজ্যশিংদা এ.ই.পি পায়খৎপদা মতেং পাংগনি অমসুং লৌউ-শিংউগী পোৎথোকশিং মপান্দা থাদোকপা হেনগৎহনগনি।

প্লান্তেসন সেক্তরগী মতাংদা মহাক্না হায়খি চাগী শিন্মীশিং মরুওইনা নুপীশিং অমসুং মখোয়গী অঙাংশিংগী য়াইফনবা বজেত অসিদা লুপা কোতি ১,০০০ কাইথোক্লে। মসিনা অসাম অমসুং নোংচুপ বঙ্গালগী অচৌবা চা থাফমশিংদা থবক শুরিবা নুপী শিন্মী লাখ ৬.২৩ য়াওনা চাগী শিন্মী লাখ ১০.৭৫ রোম কান্নবা ফংলগনি। মসিগী মথক্তা, চাউরাক্না অপীকপা চা থাবা মীওই লাখ ১.৪৭শু কান্নবা ফংলবা য়ারি।

দোক্তর ৱাধাৱান্না হায়খি বজেত অসিনা ললোন-ইতিক পাংথোক্নবা থবকশিং লাইহনগনি। মসিনা এ.দি.দি অমসুং সি.ভি.দি লেভিগী থবকশিংদা অহোঙবা পুরক্কনি, পোৎ-চৈ থুংলগদবা নোংমা ৱাৎলিঙৈদা ইন্ত্রি বিল তঙাইফনা মেনশিনবগী থবকশিং অহোংবা পুরক্কনি। এ.দি.দি অমসুং সি.ভি.দিগী থবকশিংদা অহোঙবা পুরকপা অসিনা নমথাক তৌবা ললোন-ইতিক্কী থবকশিং য়েংশিন্দুনা লৈবাক মনুংগী ইন্দস্ত্রিশিং থাক অমদা পুখৎপা ঙমগনি।

কমর্স সেক্রেতরিনা হায়খি পোৎথোকশিং মগুন হেনগৎহন্দুনা মপান্দা থাদোকপা হেনগৎহন্নবা পান্দমদা অনৌবা ইন্দস্ত্রি কন্নবা অমসুং য়াম্না লাইনা অমসুং চাংদম্নবা য়ানবা রোল মেতরিএল ফংহন্নবা কস্তমস দিউতি লৌবগী মওং শেমদোক্নবা ৱাফম বজেত অসিদা য়াওরে। মসিদা মরুওইবা রো মেতরিএলশিং হায়বদি য়োৎ অমসুং স্তিল, কোপ্পর স্ক্রাপ, নাফথা, নাইলোন ফাইবর অমসুং লং অসিনচিংবগী দিউতিশিং হন্থরগনি। সনা অমসুং সিলভরগী দিউতি চাদা ১২.৫তগী চাদা ৭.৫দা হন্থরে অমসুং এগ্রিকলচর ইনফ্রাস্ত্রকচর অমসুং দিবলপমেন্ত সেস চাদা ২.৫ ওইরে।

*****