জনুৱারি ৩০,২০২১দা রাস্ত্রপতি ভাবন্দা ভারতকী রাস্ত্রপতি শ্রী রাম নাথ কোবিন্দনা চহি ৫গী মখাদা লৈবা অঙাংশিংদা পোলিও পীথক্তুনা ২০২১গী জাতিগী পোলিও তিকা পীথকপগী খোঙজং হৌদোকখ্রে।

ঙসি অসি ‘পোলিও পরিবার’ হায়না খঙনবা জাতিগী পোলিও পীথকপা নুমিৎনি। ঙসি অহানবা ফংবা পাউশিংগী মতুংইন্না লৈবাক শীনবা থুংনা চহি ৫গী মখাদা লৈবা অঙাং লাখ ৮৯ রোমদা পোলিও পীথকখ্রে। ভেক্সিনেতর লাখ ১২ অমসুং সুপরভাইজর লাখ ১.৮ রোম্না শরুক য়াদুনা বুথ লাখ ৭তা তিকা পীথকখ্রে।

বুথশিংদা তিকা পীথকখ্রবা মতুংদা মথং নুমিৎ ২-৫দা য়ুমথোঙ খুদিংদা চঙদুনা বুথশিংদা লাকখিদবা অঙাংশিং মশক খঙদোক্কনি অমসুং তিকা পীথক্কনি। অঙাং অমতা তিকা চিৎথহৌদনবা লম্বীদা চৎলিবা অঙাংশিং তিকা পীথক্নবা বস থাফমশিং, রেলেজ স্তেসনশিং, এয়রপোর্তশিং অমসুং ফেরিশিংদা তিকা পীথক্কদবা কাংবু থমখি।

কোবিদ-১৯গা চুনবা থবকশিং হায়বদি বুথশিং মী চিনবা হন্থহন্দুনা, মিতর ২ থাপ্না লৈহন্দুনা, মাক্স উপতুনা অমসুং খুৎ-শা হামদুনা লাইচৎ মনুং অসিদা অশোয়-অঙাম থোক্তনবা চেকশিন-থৌরাংশিং লৌখৎখি অমসুং নুংশিৎ-নুংশা মরাংকাইনা চঙবা মফমশিংদা তিকা পীথকখি।

জাতিগী পোলিও পীথকপা নুমিৎ মাঙওইন্না পাংথোকপা থৌরম অমদা ৱা ঙাংবদা হকশেল অমসুং য়াইফ-য়ুম্বালগী কেন্দ্র মন্ত্রী দোক্তর হর্স ভর্ধন্না হায়খি চহি ১০ পোলিও লৈতবা ফিবম অমদা থম্বা ঙম্বা অসি ভারতকী মীয়ামগী হকশেলগী পুৱারিদা অচৌবা মাইপাকপা অমনি। অঙাং অমতা তিকা থারগা ঙাকথোকপা ঙম্বা লায়নাশিংদগী ঙাকথোক্নবা চাংনাইনা তিকা থাবগী থবকশিং কনখৎহন্নবা সরকারনা থবক পায়খৎলে।

জনুৱারি ১৩,২০১১দা ইকোন কোনবা ওইনা ৱাইল্দ পোলিওভাইরস থেংনদুনা চহি ১০ ভারত পোলিও লৈতবা লৈবাক অমা ওইরে। পোলিওভাইরস লৈরিবা য়ুম্লোন্নবা লৈবাকশিং হায়বদি অফগানিস্থান অমসুং পাকিস্থানদগী লৈবাক অসিদা পোলিওভাইরস অমুক হন্না চঙলকপা ঙাকথোক্নবা লৈবাক অসি মখা তানা মিকুপ-নাহুম শিংনা লৈরি।

লৈবাক অসিগী অপুনবা মীশিং পোলিও ভাইরসতগী ঙাকথোক্নবা অমসুং লৈবাক অসি পোলিও লৈতবা লৈবাক অমা ওইহন্নবা ভারতনা চহি খুদিংগী লৈবাক শীনবা থুংনা জাতিগী পোলিও পীথকপা নুমিৎ অমসুং সব-নেসনেল ইম্মুনাইজেসন দে অনি পাংথোক্লি।

*****