ভারত সরকারগী ফুদ অমসুং পব্লিক দিস্ত্রিব্যুসনগী সেক্রেতরী, শ্রী সুধান্সু পান্দেনা ফুদ কোর্পোরেসনগী চেয়রমেন অমসুং মেনেজিং দাইরেক্তর, শ্রী সঞ্জিব কুমারগা লোয়ননা উত্তর প্রদেশকী মুখ্য মন্ত্রী, শ্রী য়োগী অদিত্যনাথকা জনুৱারি ২৯, ২০২১দা ৱারী শাখ্রে। শ্রী পান্দেনা খোঙথাং কয়া অমগী মনুংদা মথৌ লেপ্লুরবা চিনিগী মিলশিংবু অমুক হিংগৎহনবা অমসুং চেংবু হেন্না গফগৎহনবগী থৌওংগুম্বা সরকারনা পায়খৎলিবা খোঙথাংশিংগী মরমদা মুখ্য মন্ত্রীদা পাউদমখ্রে। মহাক্না মুখ্য মন্ত্রীগা লোয়ননা উত্তর প্রদেশকী ওইনা পোত্থোক লৈশিনবা অমসুং হৱাই-চেংৱাই থমফমগী হীরমশিং য়াওবা মরু ওইবা ৱাফম কয়া অমা খন্ন-নৈনখি।

উত্তর প্রদেশকী মুখ্য মন্ত্রীনা রাজ্য সরকারগী থৌমীশিং অমসুং এফ.সি.আই.না অফবা থবক কয়া পাংথোকখিবা অমসুং মদুগী মরম ওইদুনা কে.এম.এস. ২০২০-২১গী মনুংদা হান্নদগী হেনবা ফৌ লৈশিনখিবা অমসুং কোবিদ-১৯গী মনুংদা গেহু লৈশিনখিবা ঙমখিবদগীদমক্তা থাগৎপা ফোংদোকখি। লৌউবশিংদগী পোত্থোকশিংবু হেন্না অমসুং নীংথিজনা লৈনবগীদমক্তা, উত্তর প্রদেশতা হায়রিবা লৈগদৌরিবা পোত্থোকশিং অসিবু থম্নবা মফমশিংবু হেনগৎপীনবসু হায়জখি। মুখ্য মন্ত্রীনা মহাক্কী ওফিসিএলশিংদা রাজ্য সরকারগে মন্দীশিংদগী অহেনবা মফম শিন্নবা অমসুং অতোপ্পা ইনফ্রাস্ত্রকচর কয়া অমসু শেমগত্তুনা য়ারিবমখৈ অথুবা মতমগী ম,নুংদা চাউরাকপা মেত্রিক তোন লাখ ৫০মুক্কী পোত্থোক থম্বা য়াবা মফম শেম্নবা খঙহনখ্রে।

দি.এফ.পি.দি.গী সেক্রেতরীনসু লখনৌদা লৈবা ফুদ কোর্পোরেসন ওফ ইন্দিয়াগী রিজনেল ওফিস্তা চত্তুনা মফমদুগী য়ু.পি.গী রাজ্য সরকার, এফ.সি.আই., পোত্থোক লৈশিনবগী এজেন্সী, কেন্দ্রগী ৱেয়রহাউজিং কোর্পোরেসন অমসুং য়ু.পি. স্তেৎ ৱেয়রহাউজিং কোর্পোরেসন ওফিসরশিংগা উত্তর প্রদেশকী মনুংদা পোত্থোক লৈশিনবা অমসুং য়েন্থোকপগী হীরমগা মরী লৈনবা ৱাফম কয়াগী মতাংদা ৱারী শাখি। মীফম অদুদা এফ.সি.আই.গী চেয়রমেন অমসুং মেনেজিং দাইরেক্তর, শ্রী সঞ্জিব কুমার; উত্তর প্রদেশ সরকারগী ফুদ অমসুং সিভিল সপ্লাইগী প্রিন্সিপল সেক্রেতরী, শ্রীমতি বীনা কুমারি অমদি অতোপ্পা মীওইশিংনা শরুক য়াখি।

দি.এফ.পি.দি.গী সেক্রেতরীনা য়ু.পি.গী রাজ্য সরকার অমসুং য়ু.পি.গী এফ.সি.আই.না রাজ্য অসিগী পাক-চাউরবা থবকশিংবু শেন্নবগী অমসুং মদুনা মরম ওইদুনা কোবিদ-১৯গী মনুংদা ফংফম থোকপা বেনেফিশরীশিংদা হৱাই-চেংৱাই নীংথিজনা ফংহনবা ঙম্নবা হোৎনখিবগীদমক্তা থাগৎপা ফোংদোকখি।  হৌজিক চত্থরিবা খরিফ মারকেত্তিং সিজন ২০২০-২১গী মনুং অসিদা চেং অমসুং ফৌ লৈবগী থবকশিংসু মহাক্না য়েংশিনখি। রাজ্য অসিগী লৌমী লাখ ১২দগী ফৌগী মেত্রিক তোন লাখ ৬৩ হেনবগী চাংদা হান্না তৌখিদ্রিবা মওংদা লৈবা ঙমখিবগীদমক্তা অমসুং চেং লৈবা অমসুং বিল্লিং তৌবগী পথাপ্পু দিজিতেল ওন্থোকপগীদমক্তা রাজ্য সরকার অমসুং এফ.সি.আই.গী থৌমীশিংবু মহাক্না থাগৎপা ফোংদোকখি অমসুং থৌওং অসিনা মরম ওইদুনা পোত্থোক লৈবগী এজেন্সী খুদিংমক্তা শেল তুংশিনবা অমসুং শেল লাকপসু হেনগৎহনখি।

লৌমীশিংদগী পোত্থোক লৈশিনবা অমসুং পি.দি.এস.কী মখাদা পোত্থোক য়েন্থোকপগী সপ্লাই চেন অপুনবা অসিদা তেক্নোলোজী হেন্না শিজিন্নবগী মতাংদা মহাক্না মিৎয়েং চঙখি। শ্রী পান্দেনা এন.এফ.এস.এ., আই.সি.দি.এস. অমসুং মে.দি.এম. স্কিমশিংগী মখাদা মরু ওইনা নুপী অমসুং অঙাংশিংদা মচি ওইবা পোৎলম হেন্না ফংহনবা ঙম্লিবা হেন্না ফগৎহল্লবা চেং পীবগী থৌওংগী মতাংদসু খন্ন-নৈনখি। চন্দাউলী জিলাদা হায়রিবা চেং পীবগী থৌওং অসি হান্ননা হৌখ্রে অমসুং চেংশিং অসি রেসনগী দুকানগী খুত্থাংদগী য়েন্থোক্লি হায়নসু মহাক্কী মফমদা পাউদমখি। মহাক্না রাজ্য অসিদা লৈরিবা অরিবা মিলশিংবু মতমগা চান্নহনবগী মতাংদা মিৎয়েং চঙখি। মসিগী থৌওং অসিনা চেংগী মগুন ফগৎহনগনি অমসুং রাইস ব্রান ওইল পুথোক্তুনা মিল চলায়রিবা মীওইশিংগী চাগাসু হেনগৎপা ঙমহনগনি।

দি.এফ.পি.দি.গী সেক্রেতরীনা উত্তর প্রদেশকী মনুংদা হৱাই অমসুং থাউ থোকপা মরুগী পোত্থোক হেনগৎহনবা অমসুং মসিনা লৌরোক্কী মখলদা তোঙানলহন্দুনা লৌমীশিংগী শেন্থোকসু হেনগৎপা ঙমহনগনি হায়বগী মিৎয়েং চঙখি। মহাক্না লৈবাক অসিদা চুজাক্কী পোত্থোক হেন্না পুথোকপগে তঙাই ফদবা লৈবগী মতাংদসু হায়খি। চুজাক হেন্না পুথোকহন্দুনা অহেনবা চাংদা লৈশিনবা অসিনা লৈবাক অসিদা ইথানোলগী অপাম্বা লৈরিবা অসিদা য়াম্না তেংবাংগনি অমসুং ইথানোল অসিনা ইনর্জী য়োকশিনবদা য়াম্না তেংবাংগনি হায়না মহাক্না পাউদমখি। মহাক্না রাজ্য সরকারগী ওফিসরশিংদা রাজ্য অসিগী লৌমীশিংবু উত্তর প্রদেশতা চুজাক হেন্না পুথোকহন্নবা পুক্নিং থৌগৎপীয়ু হায়নসু হায়খি।

মহাক্না রাজ্য সরকারদা হৱাই-চেংৱাইশিং অসিবু থম্নবা মতমগা চানবা সাইলো শাবগী স্কিম অমা তুংদা শেম্লকপা য়ানবা রাজ্য অসিদা লৈরিবা মন্দিশিংদা মফম পীননবসু মখা তানা হায়জখি। দি.এফ.পি.দি.গী সেক্রেতরীনা য়ু.পিডা লৈবাক অমা, রেসন কার্দ অমগী স্কিম অসিবু থবক ওইনা পাংথোকপগী ফিভমশিংসু য়েংশিনখি। স্কিম অসিগী মখাদা ফেয়র প্রাইস শোপশিংদা ই.পি.ও.এস.কী খুৎলাই থমদুনা আই.তি.গী পথাপ্না তেংবাংবা লৈবাক শিনবা থুংনা শিজিন্নবা য়াবা রেসন কার্দকী খুত্থাংদা হৱাই-চেংৱাইবু মমল য়াম্না তাথনা ফংহনবনি। এন.এফ.এস.এ.গী মখাদা লৈরিবা বেনিফিশরীশিংগী আধারগা মরী লৈনহনবগী রাজ্য সরকারনা পাংথোক্লিবা থবকশিংগী হৌজিক্কী ওইরিবা ফিভম অসিগীদমক্তসু থাগৎপা ফোংদোকখি।

 

****

(Release ID: 1693594)