দেবেলপমেন্ত ওফ নোর্থ ইস্তর্ন রিজনগী মন্ত্রালয় (দোনর)না মতেং পাংলিবা আই.আই.এম. শিল্লোংদা লৈবা এ.পি.জে. অবদুল কলাম স্তদী সেন্তরদা অখন্ননা অৱাং নোংপোক্কী ওইনা ন্যু নেস্নেল এজুকেসন পোলিসী (এন.ই.পি.) ইমপ্লিমেন্ত তৌবদা মতেং পাংগনি অমসুং মসি কয়াম মাই পাক্না পাঙথোকপা য়াগদগে হায়বা খঙনবা স্তদী অমসু লৌখৎলবা য়াই।

হায়রিবা অসি ঙসি আই.আই.এম. শিল্লোংগী মেনেজমেন্তগী মীহুৎ ওইখিবা চিয়রমেন শিশির বজোরিয়া, মেম্বর বোর্দ ওফ গভর্নরস অতুল চান্দ্রকান্ত কুলকরি অমসুং অতোপ্পশিংগা লোইননা মীফম অমদা কুপ্না খন্নরবা মতুংদা দেবেলপমেন্ত ওফ নোর্থ ইস্তর্ন রিজন (দোনর), এম.ও.এস. পি.এম.ও., পর্সনেল পব্লিক গ্রীভান্সেস, পেন্সনস, এতোমিক ইনর্জী অমসুং স্পেসকী কেন্দ্রগী রাজ্য মন্ত্রী (ইন্দিপেন্দেন্ত চার্জ) দা. জিতেন্দ্র সিংহনা ফোঙদোকখিবনি।

প্রধান মন্ত্রী নরেন্দ্র মোদীগী মীৎয়েংগা লোইননা কেন্দ্রগী এজুকেসন মন্ত্রালয়না পুরকখিবা নেস্নেল এজুকেসন পোলিসীবু থাগৎলদুনা মসি নীংখা-তম্লবা মতুং ভারত্তা খ্বাইদগী অনৌবা মখলগী রিফোর্ম ওইখি হায়না ফোঙদোক্লদুনা দা. জিতেন্দ্র সিংহনা হায় অনৌবা পোলিসী অসি কান্নবা অমসুং তুংলমচৎপু মীৎয়েং শান্না উবা ঙম্বা খক্তা নত্তনা ২১শুবা চহিচাগী ভারতকী তঙাই ফদবশিং অমসুং মথৌ তাবশিং অদু থুংহনবসু ঙমগনি। মহাক্না হায় মসিনা নহা ওইরিবা স্কোলরশিং অমসুং মহৈরোইশিংদা মখোয়গী এপ্তিচ্যুদ অমসুং মতম মতমগী মতুং ইন্না মখোয় মশাগী ফীভমগী মখা পোনবা ওপ্সনশিং খঞ্জনবা তাঞ্জাসু ফংহল্লি।

দা. জিতেন্দ্র সিংহনা হায় অৱাং নোংপোক্কী লম অসিগী অপুনবদগী মহৈরোই মশিং কয়ানা মখোয়না পাম্বা স্ত্রীমশিং অদু অৱাং নোংপোক্কী রাজ্যশিংদা মরাং কাইনা লৈতবনা লৈবাক অসিগী তোঙান তোঙানবা শরুকশিংদা হায়র এজুকেসন মখা চত্থনবা লমদম অসি থাদোক্তুনা চৎখিবগী খুদোংচাদবা থেংনরি। মহাক্না হায় মরম অসিনা লমদম অসিগী ময়ামগা মান্নদবা অপনবশিং অসি লান্থোক্তুনা নেস্নেল এজুকেসন পোলিসীদা খ্বাইদগী ফবা খোঙথাংশিং ইনকোর্পরেৎ তৌদুনা অৱাং নোংপোক্কী মহৈরোইশিংদা কান্নবা পীনবা অৱাং নোংপোক লমদমগী এজুকেসনিস্তশিংনা পুম্নমক শুনা য়াওবা অমসুং কান্নগদবা প্লান শেম্বা মথৌ তাই।

দা. আই.আই.এম. শিল্লোংদা লৈবা এ.পি.জে. অবদুল কলাম স্তদী সেন্তরনা লমদম অসিগী মহৈরোইশিংনা মখোয়না অপাম্বা সবজেক্তশিং খন্নবগী খুদোংচাবা লৌনবা অমসুং মখোয়না হান্নবা পাম্বা সবজেক্তশিং অদু লৌনবা অনৌবা নেস্নেল এজুকেসন পোলিসীদা য়াওবা অসিগী মতুং ইন্না অৱাং নোংপোক্তা সেন্ত্রেল ইন্সতিত্যুসনশিংদা লৈরিবা তোঙান তোঙানবা স্ত্রীমশিং অমসুং সবজেক্তশিং করম্নবা ফংহনগনি হায়বগী মতাংদা খঙবা ঙম্নবা স্তদী পাইখৎপা য়াই হায়না জিতেন্দ্র সিংহনা ফোঙদোকখ্রে।

এ.পি.জে. অবদুল কলাম স্তদী সেন্তর অসিনা কেন্দ্রনা লৌখৎপা একাদেমিক প্রোগ্রামশিং পাইখৎপদা রাজ্যনা চল্লাইবা কোলেজশিং অমসুং ইন্সতিত্যুসনশিংনা য়াওনবা লম্বীশিং লমজিংবিবা য়াগনি হায়না দা. জিতেন্দ্রনা সিংহনা ফোঙদোকখ্রে। মসিনা মহৈরোই পুম্নমক্তা ন্যু নেস্নেল এজুকেসন পোলিসীগী কান্নবশিং ফংহনবা ঙম্নবা অমরোমদা কেন্দ্র অমসুং রাজ্য সরকারগী মরক্তা অমসুং নাকল অমদনা রাজ্যশিংগী তোঙান তোঙানবা এজুকেসন ইন্সতিত্যুসনশিংগী মরক্তা রিসোর্স সেন্তর লোইননা কোওর্দিনেতরগী থৌদাংসু লৌবা য়াগনি।

****