প্রধান মন্ত্রী শ্রী নরেন্দ্র মোদীনা ঙসি ভারতকী মাঙজিল থাবা ইকনমিস্তশিংগা কোবিদ মতুংগী শেন্মিৎলোনগী মায়ওন চুম্নবগীদমক নিতি আয়োগনা শিন্দুনা ৱারী ৱাতায় শানখ্রে‍।

শরুক য়াখিবা পুম্নমক্না ফ্রিক্বেন্সী ৱাংবা ইন্দিকেতরশিংনা পানরমবা মতমদগী ঙনখৎনা শেন্মিৎলোন মপাঙ্গল কন্না ফীভম ফগৎলকপগী খুদমশিং উৎলি হায়বা ৱাফম য়ানখি‍। শরুক য়াখিবশিংনা মথং চহীদা নিংথিনা চাউখৎলক্কনি হায়বা ৱাফমদা চাউরাক্না য়ানদুনা অমদি ভারতকী খুন্নাই-শেন্মিৎলোন্দা অহোংবা পুরক্নবগীদমক হায়রিবা খোঙজেল অসি কায়হন্দনা থম্নবা ৱাফমশিং ফোঙদোক্নখি‍। খন্ন-নৈনবা অদুদা য়াওখিবশিংনা হৌখিবা চহী খরসিদা পায়খৎখিবা অওনবা পুরকপগী থৌওংশিং পল্লদুনা মখোয়না কমদৌনা আত্মনিরভর ভারত পুরকপদা মতেং ওইগদগে হায়বা ৱাফমশিং খন্নখি‍। তুংদা অওনবা পুরকপা মথৌ তাবা হীরমশিংগী মতাংদসু শরুক য়াখিবশিংনা ৱাফম কয়া ফোঙদোক্নখি‍। ইন্ফ্রাস্ত্রকচরদা লৈঙাক্না শেল থাদবদগী শেন্মিৎলোন্দা মশক থোক্না কান্নবা পীরিবা অদুগী য়েংলগা শরুক য়াখিবা কয়ানা লাক্কদৌরিবা চহীশিংদা লৈঙাক্না ইন্ফ্রাস্ত্রকচরদা শেল থাদবনা চাউখৎপা পুরক্নবগী পাম্বৈ ওইগনি হায়বা ৱাফমশিং থম্নখি‍। মোবাইল মেনুফেকচরিংদা প্রদক্সন লিঙ্ক ইন্সেন্তিব (পি.এল.আই.) স্কিম হৌদোকপদা ভারতনা মায় পাকখিবা য়েংলগা লেবর ইন্তেন্সিব মেনুফেকচরিংদা মায় ওনশিন্নবগী ৱাফমশিংসু শরুক য়ারিবশিংনা হৌদোক্নরকখি‍।

শরুক য়াখিবশিং অদুনা শেন্মিৎলোনগী ফীভম ফগৎহন্নবা মখা তানা পায়খৎপা য়াবা থৌরাংশিংগী মতাঙদসু হৌদোক্লদুনা ফিস্কেল কন্সোলিদেসনগী পরিং অমা শেমহন্নিংবগী অপাম্বশিং ফোঙদোক্নখি‍। মখোয়না শেও থুমগী সেক্তরদা অহোংবা পুরক্নবা ৱাফমশিংসু খন্নখি‍। শরুক য়াখিবশিংনা মতম শাংনা ইন্ফ্রাস্ত্রকচর প্রোজেক্তশিংদা শেল থাদনবা হাউসহোল্দ সেভিংগী কান্নবা লৌবগী তঙাই ফদবা ৱাফমশিং থম্নখি‍। হ্যুমেন কেপিতেল অসি মরুওইনা শেন্মিৎলোন্না মাঙদা চঙশিনবদা চাউখৎপা পুরক্কদবা মরুওইবা ইনোৎ অমা ওইবা মরম্না মীয়ামগী হকশেল অমসুং মহৈ মশিংদা শেল থাদবগী মরুওইবা ৱাফমশিংসু শরুক য়াখিবশিংনা ফোঙদোক্নখি‍।

প্রধান মন্ত্রীনা শরুক য়াখিবশিংনা পুথোক্নরকখিবা ৱাফমশিংগীদমক থাগৎপা ফোঙদোক্লদুনা লৈবাক্কী চাউখৎপগী ৱাফমদা অসুম্না খন্ন-নৈনবগী মরুওইবশিং পনখি‍। কোবিদ-১৯ লাইচৎ অসিনা অমদি মতুং তারকপা শিন লাংবগী থৌদাংশিং অসিনা মসিদা থৌদাং লৌরিবশিংগী মফমদা অনৌবা শিংনবা কয়া পীরকখিবা ৱাফম প্রধান মন্ত্রীনা পনখি‍। ফিস্কেল স্তিমুলস অমগা লোয়ননা লৈঙাক অসিনা বেজ স্তিমুলসতা অহোংপা পুরক্নবা হোৎনখি অমদু হায়রিবশিং অসি লৌউ-শিংউ, লল্লোন ইতিক্কী ওইনা কোইলা পেকপা অমদি লেবর লোনচিংবা হীরমশিংদা পুৱারী ওইগদবা মওংদা অহোংবা পুরকখিবশিংদা মমি তারি‍ হায়বা ৱাফম মহাক্না থমখি‍। মমাঙদা উখিদ্রিবা মওংদা ভারতকী কম্পেনীশিংনা মালেমগী সপ্লাই চেনদা পুনশিন্নবগী ফীভম পুরকখিবা আত্মনিরভর ভারতকী মতাঙদা মহাক্কী মঙলান প্রধান মন্ত্রীনা শন্দোক্না তাকখি‍। মালেমগী ওইনা শেন্মিৎলোন্দা মনিং হনবা ফীভম লৈজরবসু এপ্রিলদগী ওক্তোবর ফাওবগী মনুংদা ফোরেন দাইরেক্ত ইনভেস্তমেন্ত চাদা ১১ হেনগৎলকপগা লোয়ননা মপান লৈবাক্কী ইনভেস্তরশিংনা ভারতকী চাউখৎ ৱারীদা থাজবা উৎলিবা ৱাফম মহাক্না থমখি‍।ভারতকী খ্বাইদগী মনুং হঞ্জিনবা মফম খরদা ইন্তরনেত কনেক্তিভিতী ফংহল্লিবা নেসনেল ওপ্তিকেল ফাইবর নেতৱর্কনা শেন্মিৎলোনগী মতিংদা অনৌবা ইনোৎ অমা পীরিবা অসিগী মতাংদা পি.এম.না মখা তানা পনখি‍। ইনফ্রাস্ত্রকচরগী মতাঙদা প্রধান মন্ত্রীনা মালেমগী থাক্কী ইনফ্রাস্ত্রকচর শেমগৎনবা লৈঙাক্কী ফিরেপ অমা ওইরিবা নেসনেল ইনফ্রাস্ত্রকচর পাইপলাইনগী ৱাফম পনখি‍। ঐখোয়গী পান্দম ফংননবা খোঙবু ওইনা চৎমিন্নবগী মরুওইবা অমদি অসিগুম্না খন্ন-নৈনবা অসিনা শেন্মিৎলোনগী হেন্না পাকথোক চাউথোকপা পান্দম থম্বদা লৌরিবা মরুওইবা থৌদাংগী মতাঙদা হায়রদুনা প্রধান মন্ত্রীনা ৱারী ৱাতায় অদু লোইশিনখি‍।

প্রধান মন্ত্রীখক্তা নত্তনা শেলথুম মন্ত্রী অমদি রাজ্য মন্ত্রী (শেলথুম) থৌরমদুদা শরুক ‍য়াখি‍। নিতি আয়োগ ভাই-চেয়রমেন, রাজ্য মন্ত্রী (প্লান্নিং), নিতি আয়োগকী মেম্বরশিং, প্রিন্সিপাল সেক্রেতরী তু পি.এম., প্রিন্সিপাল এদভাইজর তু পি.এম., কেবিনেত সেক্রেতরী অমসুং নিতি আয়োগকী চীফ একজেক্যুতিব ওফিসরসু মীফমদুদা শরুক য়াখি‍। শেলথুম মন্ত্রালয়দগী শেলথুমগী সেক্রেতরী, চীফ ইকনমিক এদভাইজর অমসুং প্রিন্সিপাল ইকনমিক এদভাইজরসু থৌরমদুদা য়াওখি‍।

খন্ন-নৈনবা অদুদা শরুক য়াখিবা মাঙজিল থাবা ইকনমিস্তশিংদি:

অর্বিন্দ পনাগরিয়া, অর্বিন্স বির্মানি, অভয় পেথে, অশোক লাহিরি, অভীক বরুৱা, ইলা পত্নাইক, কে.ভি. কমথ, মোনিকা হলন, রাজিব মন্ত্রী, রাকেশ মোহন, রবিন্দ্র ধোলকিয়া, সৌম্য কান্তি ঘোশ, সঙ্কর অচার্য়া, শেখর সাহ, সোনাল ভর্মা, সুনিল জৈন‍।

*****