প্রধানমন্ত্রীগী লোইশঙ

প্রধান মন্ত্রীনা ৱেস্তর্ন দেদিকেতেদ ফ্রৈৎ কোরিদোরগী রেৱারী – মদার সেক্সনবু লৈবাক মীয়ামদা শিন্নখ্রে

ভারতনা দবল স্তেক কন্তেনর ত্রেন লমথাদুনা মালেমগী খনগৎলবা লৈবাকশিংগী মনুং চনবা ঙমখ্রে

Posted On: 07 JAN 2021 1:21PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি কিলোমীতর ৩০৬ শাংবা ৱেস্তর্ন দেদিকেতেদ ফ্রৈৎ কোরিদোরগী রেৱারী – মদার সেক্সনবু ভিদিও কনফরেন্সিংগী খুত্থাংদা লৈবাক মীয়ামদা শিন্নখ্রে। মহাক্না লম্বী অসিদা দবল স্তেক লোং হোল কন্তেনর ত্রেনসু লমথাখি। রাজস্থান অমসুং হরিয়ানাগী রাজ্যপাল অমসুং মুখ্য মন্ত্রীশিং অমসুং কেন্দ্রগী মন্ত্রী শ্রী পিয়ুশ গোয়ল, শ্রী গজেন্দ্র সিংহ শেখাৱৎ, শ্রী অর্জুন রাম মেঘ্বাল, শ্রী কাইলাশ চৌধরী, শ্রী রাও ইন্দর্জিৎ সিংহ, শ্রী রতন লাল খতারিয়া, শ্রী কিশন পাল গুর্জারসু থৌরম অদুদা শরুক য়াখি।

থৌরম অদুদা ৱা ঙাংবদা, প্রধান মন্ত্রীনা লৈবাক্কী ইনফ্রাস্ত্রকচর অসিবু মতমগা চান্নহন্নবা মহা য়াগ্না পাংথোকপা অসিনা ঙসিদগী হৌনা অনৌবা শাফু অমা ফংলে হায়খি। লৈবাক্কী ইনফ্রাস্ত্রকচর অসিবু মতমগা চান্নহন্নবা হৌখিবা নুমিৎ ১২নিদা পাংথোকখিবা লৌউবশিংদা দি.বি.তি. পীবা, এয়র্পোর্ত এক্সপ্রেস লাইন্দা নেস্নেল মোবিলিতী কার্দ লোঞ্চ তৌবা, রাজকোৎকী এমস, সম্বলপুরগী আই.আই.এম. শঙ্গাবা, শহর ৬তা লাইৎ হাউস প্রোজেক্ত শঙ্গাবা, নেস্নেল এতোমিক তাইমস্কেল অমসুং ভারতিয় নির্দেশক দ্রভ্যা, নেস্নেল ইনভাইরনমেন্তেল স্তেন্দর্দ লেবোরেতরী, কোচি-মেঙ্গালোর গ্যাস পাইপলাইন, ১০০শুবা কিসান রেল, ইস্তর্ন দেদিকেতেদ ফ্রৈৎ কোরিদোরগী সেক্সন অমনচিংবা সরকারগী খোঙথাং কয়াগী মতাংদসু মহাক্না ৱাফম কয়া পনখি। লৈবাক অসিবু মতমগা চান্নহন্নবা কোরোনাগী মরক অসিদসু থবক-থৌরম কয়া অমা হৌদোকখি হায়না মহাক্না মখা তানা হায়খি।

প্রধান মন্ত্রীনা হায়খিবদা নুমিৎ খরনিগী মমাংদা অয়াবা পীখ্রবা ভারত্তা শাবা কোরোনাগী ভেক্সিন অসিনা মীয়ামদা থাজবগী অনৌবা ৱাখল্লোন অমা লৈহল্লে হায়খি। ২১শুবা চহি চা অসিদা দেদিকেতেদ ফ্রৈৎ কোরিদোর অসি ভারতকী অনৌবা অহোংবা লৈহনগদবা প্রোজেক্ত অমনি হায়না উনরি হায়না মহাক্না হায়খি। ন্যু ভৌপুর – ন্যু খুর্জা সেক্সন হেক হৌখিবদগী সেক্সন অসিদা ফ্রৈৎ ত্রেন্সিংনা চেল্লিবা চাংচৎকী ওইবা খোঙজেল অসি শরুক অহুম থোক্না হেনগৎখ্রে হায়না মহাক্না হায়খি। হরিয়ানাগী ন্যু অতেলিদগী রাজস্থানগী ন্যু কিশানগর্হ ফাওবগী মনুংদা দবল স্তেক কন্তেনর ত্রেন লমথাদুনা ভারতনা মালেমগী খনগৎলবা লৈবাকশিংগী মনুং চনবা ঙমখ্রে হায়না মহাক্না হায়খি। মসিগী মশক থোকপা মাই পাকপা অসিগীদমক্তা মহাক্না ইঞ্জিন্যার অমসুং মখোয়বু তীমশিংবু থাগৎপা ফোংদোকখি। মসিগী দেদিকেতেদ ফ্রৈৎ কোরিদোর অসিনা মীয়ামদা, মরু ওইনা লৌউবশিং, রাজস্থানগী ওন্তোপ্রিনর অমসুং মর্চেন্তশিংদা অনৌবা খুদোংচাবা অমসুং ৱাখল্লোন পীরগনি হায়না মহাক্না হায়খি। মসিগী ফ্রৈৎ কোরিদোর অসিনা মোদর্ন ফ্রৈৎ ত্রেনগী লম্বী ওইবতা নত্তনা লৈবাক অসিবু অথুবা মতমদা চাউখৎহন্নবা লম্বী অমসু ওইরগনি হায়না মহাক্না হায়খি। মসিগী কোরিদোরশিং অসিনা অনৌবা চাউখৎফমগী য়ুম্ফম ওইদুনা লৈবাক অসিগী তোঙান-তোঙানবা শহরশিংগী চাউখৎপদা তেংবাংগদবা মফম অমা ওইরগনি হায়নসু মহাক্না মখা তানা হায়খি।

প্রধান মন্ত্রীনা ইস্তর্ন ফ্রৈৎ কোরিদোর অসিনা মখোয়না মতৌ করম্না লৈবাক অসিগী মফম কয়া অমগী মপাঙ্গল হেনগৎহনবগে হায়বসু উৎপা হৌরে হায়না মহাক্না হায়খি। ৱেস্তর্ন ফ্রৈৎ কোরিদোর অসিনা হরিয়ানা অমসুং রাজস্থানগী লৌউ-শিংউবা অমসুং মসিগা মরী লৈনবা কারবারশিংদা লাইহনবতা নত্তনা মসিনা মহেন্দ্রগর্হ, জয়পুর, অজমের অমসুং সিকারনচিংবা শহরশিংদসু অনৌবা পাঙ্গল হাপ্লগনি হায়না হায়খি। মসিগী রাজ্যশিং অসিগী মেন্যুফেকচরিং য়ুনিৎ অমসুং ওন্তোপ্রিনর্শিংদা অহোঙবা মমলদা লৈবাক্কী অমসুং মালেমগী কৈথেলশিংদা থুনা য়ৌবা ঙম্বগী খুদোংচাবা হাংদোক্লে। গুজরাত অমসুং মহারাস্ত্রাগী হিথাংফমশিংদা থুনা য়ৌহনবা ঙমহনবা অসিনা মফম অসিদা শেল থাদবগী অনৌবা খুদোংচাবা কয়া অমসু খুমাং চাউশিনহল্লগনি।

মতমগা চান্নবা ইনফ্রাস্ত্রকচর লৈহনবা অসিনা পুন্সি অমসুং কারবারগী অনৌবা পথাপ অমা লৈহনবগা লোয়ননা মসিগা মরী লৈনবা থবক-থৌরম কয়া অমগী খোঙজেলসু য়াঙখৎহল্লগনি অমসুং মসিনা শেন্মিৎলোনগী তোঙান-তোঙানবা ইঞ্জিন কয়া অমদসু পুন্সি হাপ্লগনি হায়না প্রধান মন্ত্রীনা হায়খি। কোরিদোর অসিনা কন্সত্রক্সন সেক্তরদা থবক লৈহনবতা নত্তনা সীমেন্ত, স্তীল অমসুং ত্রান্সপোর্ত সেক্তরদসু থবক কয়া অমা লৈহনগনি হায়না মহাক্না মখা তানা হায়খি। দেদিকেতেদ ফ্রৈৎ কোরিদোরগী কান্নবা কয়াগী মতাংদা কুপ্না তাক্লদুনা, প্রধান মন্ত্রীনা মসিনা রাজ্য ৯গী রেলৱে স্তেসন ১৩৩ কোনগনি হায়খি। মসিগী স্তেসন শিং অসিদা মলতি মোদেল লোজিস্তিক পার্ক, ফ্রৈৎ তর্মিনেল, কন্তেনর দীপো, কন্তেনর তর্মিনেল, পার্সেল হবশিংসু লৈগনি। মসিগী খুদোংচাবা কয়া অসিনা লৌউবশিং, অপিকপা ইন্দস্ত্রী, কোত্তেজ ইন্দস্ত্রী অমসুং পোত্থোক পুথোকপা অচৌবা কাংবুশিংদসু কান্নবা ফংহনগনি।

রেলৱেগী ত্রেক্তা খুদম ওইনা পীরদুনা, প্রধান মন্ত্রীনা ঙসিদি ভারতকী ইনফ্রাস্ত্রকচরগী থবকশিং অসি ত্রেক অনিদা (মীওই অমগী ওইবা অমসুং লৈবাক্কী শাহৌ লৌবগী ইঞ্জিনগী) মতম অমত্তদা পাংথোক্লি হায়খি। মীওই অমগী থাক্তনা, প্রধান মন্ত্রীনা হায়খিবদা, য়ুম্লৈ-কৈরৈ, সেনিতেসন, ইলেক্ত্রিসিতী, এল.পি.জি., লম্বী শোরোক অমসুং ইন্তর্নেৎ শম্নহনবগী মতাংদা পাংথোক্লিবা শেমদোক্লিবশিংগী মতাংদনি হায়খি।  অসিগুম্বা স্কিম কয়া অসিদগী ভারত মচা করোর কয়া অমনা কান্নবা ফংলি। অতোপ্পা ত্রেক অমদনা, ইন্দস্ত্রী অমসুং ওন্তোপ্রিনরগুম্বা শাহৌ লৌবগী ইঞ্জিনশিং অসিনা হাইৱে, রেলৱে, এয়রৱে, ঈশিংগী লম্বী অমসুং মলতি-মোদেল পোর্ত কন্নেক্তিভিতীগুম্বা থৌওং কয়া খোঙজেল য়াঙনা পায়খৎলক্লিবা অসিদগী কান্নবা কয়া অমা ফংলিবনি। ফ্রৈৎ কোরিদোরগুম্না শেন্মিৎলোনগী কোরিদোর, দিফেন্স কোরিদোর, তেক ক্লস্তর কয়া অমসু ইন্দস্ত্রীশিংদা পীরিবনি। মসিগী মীওই অমগী অমসুং ইন্দস্ত্রীগী ইনফ্রাস্ত্রকচরশিং অসিনা ভারতকী চাউখৎপগী মমি তাহল্লি অমসুং মসিগী মমিনা অমুক হেনগৎলক্লিবা ফোরেন এক্সচেঞ্জকী রীজর্বতা তাবা ফংই হায়না প্রধান মন্ত্রীনা মখা তানা হায়খি।

প্রধান মন্ত্রীনা জাপয়ানগী মীয়ামদা মখয়না প্রোজেক্ত অসিদা তেক্নিকেল অমসুং শেল-থুমগী তেংবাংলকপগীদমক্তা থাগৎপা ফোংদোকখি।

প্রধান মন্ত্রীনা মীওই অমগী, ইন্দস্ত্রী অমসুং ইন্দিয়ন রেলৱেজপু মতমগা চান্নহন্নবা শেল থাদবগী থৌওংশিং অসিনা খন্ন-নৈনদুনা চৎমিন্নবগী মতাংদা অহেনবা মিৎয়েং চঙখি। অঙনবা মতমদা পেসেঞ্জরশিংনা থেংনখিবা অৱাবা কয়া অদু নীংশিংলদুনা, প্রধান মন্ত্রীনা লু-নানবা, মতম নায়বা, অফবা সেবা পীবা, তিকেৎ ককপা, খুদোংচাবা অমসুং তেক্ত-কায়দবগী হীরম কয়াদা মশক থোকপা থবক কয়া পায়খৎখ্রে হায়খি। মহাক্না স্তেসন অমসুং কম্পার্ৎমেন্ত লু-নান্না থম্লিবা, বাইওদিগ্রেদেবল তোইলেৎ, কেতরিং, মতম চান্নবা তিকেৎ ককপগী পথাপ অমসুং তেজাস নত্ত্রগা ভন্দে ভারত এক্সপ্রেস, ভিস্তা-দোম কোচকুম্বা মতমগা চান্নবা ত্রেনশিংবু খুদম ওইনা পনখি। ত্রেকশিংবু ব্রোদ-গেজ ওন্থোক্নবা অমসুং ইলেক্ত্রিক্না চেনবা ত্রেন ওন্থোক্নবা হোৎনবদা হান্নগুম তৌখিদ্রিবা মওংদা শেল থাদরিবা অসিনা রেলৱেগী পাকথোক চাউথোকপা অমসুং খোঙজেল হেনগৎহল্লক্লিবা অসিগী মতাংদা মহাক্না অহেনবা মিৎয়েং চঙখি। মহাক্না সেমি হাই-স্পীদ ত্রেন, ত্রেক শেম্নবা মোদর্ন তেক্নোলোজী শিজিন্নবগী মতাংদা পল্লদুনা অৱাং-নোংপোক্কী রাজ্যশিংগী কোনুংশিংসু অথুবা মতমদা রেলৱেনা শম্নহল্লগনি হায়বগী থাজবা লৈরে হায়না ফোংদোকখি।

প্রধান মন্ত্রীনা রেলৱেনা কোরোনাগী মতম অসিদা নীংহন্নবা লৈতনা তেংবাংলিবা অসিবু শক খঙলদুনা মখোয়না শিন্মীশিংবু ময়ুমদা য়ৌহন্নবা হোৎনবদা লৌখিবা থৌদাংশিংগীদমক্তা থাগৎপা ফোংদোকখি।

*****



(Release ID: 1686769) Visitor Counter : 25