ইন্সতিতুৎ ওফ দিরেক্তরসনা স্তিল সেক্তরদা ২০২০গী ওইনা স্তিল ওথোরিতি ওফ ইন্দিয়াদা লেমজনিঙাই ওইরবা গোল্দন পিকোক ইনভাইরোনমেন্ত মেনেজমেন্ত এৱার্দ ২০২০ পীরে।

কম্পেনি অসিগী থবকশিং থাগৎলদুনা স্তিল ওথোরিতি ওফ ইন্দিয়াগী চিয়রমেন, শ্রী অনিল কুমার চৌধুরিনা হায়খি স্তিল ওথোরিতি ওফ ইন্দিয়ানা মসিগী মনা অসি চহি অনি থংন-থংন্না ফংলে অমসুং কম্পেনি অসিনা অকোয়বগী ফিবম কায়হন্দনা স্তিল পুথোকপগী পায়খৎলিবা থবকশিং অদু মসিনা উৎলে। কাংলুপ অসিগী ওইনা মনা অসি খ্বাইদগী লেমজনিঙাই ওইবা অমনি। মালেম অসি শাবা হেনগৎলকপা অমসুং অইং-অশাগী খল হোঙলকপা য়াওনা তোঙান-তোঙানবা অকোয়বগী ফিবমগী ৱাফমশিং য়াওনা, কোর্পোরেতশিং মখোয়গী অকোয়বগী ফিবম ঙাক্নবগী থবক ফগৎহন্নবা অমসুং অতোপ্পা কম্পেনিশিংগা চাংদম্নবা হেনগৎহন্নবা মনা অসিনা পুক্নিং থৌগৎলি।

স্তিল ওথোরিতি ওফ ইন্দিয়ানা অকোয়বগী ফিবম ঙাক্নবা মসিগী কোর্পোরেত অমগী লৌফম থোকপা থৌদাং লৌদুনা অকোয়বগী ফিবমগা মরী লৈনবা থবকশিং হায়বদি পোল্লুসন লাকশিন্নবা থবকশিং ফগৎহনবা, য়ুনিতশিংদগী থাদোরকপা ফত্তবা ঈশিং শেংদোকপা অমসুং হন্না শীজিন্নবা, প্লান্তশিং অমসুং য়ুনিতশিংগী অকোয়বা অমসুং মনুংদা উ থাবা হেনগৎহনবা, মপং ওইবা অমোৎপশিং ফজনা লোইশিনবা, উ থাদুনা কার্বোন দাইওক্সাইদ হন্থহনবা, মাইনিং তৌখ্রবা মফমশিং হান্নগী ফিবমদা হঞ্জিনহনবা য়াওনা থবক কয়া পায়খৎলি। স্তিল ওথোরিতি ওফ ইন্দিয়ানা পায়খৎলিবা অফবা থবকশিং অসিনা মরম ওইদুনা অকোয়বগী ফিবম লু-নানবা হেনগৎলে, মৈখু থাদোকপা হন্থরে অমসুং অকোয়গী ফিবম শোকহনবা থবকশিং মশক খঙদোকপদা কম্পেনি অসিগী মতেং পাংলে।

ঙরাং ভর্চুএল ওইনা পাংথোকপা মনা য়েন্থোকপা থৌরম অমদা মনা অসি স্তিল ওথোরিতি ওফ ইন্দিয়াদা পীখি।

*****