ঙসি ভারতকী উপ-রাস্ত্রপতি শ্রী এম. ভেনকিয়া নাইদুনা হায়খি সরকার অমসুং লৌমীশিং অনিমক অমগা অমগা ৱারি শানবগী অপাম্বা লৈবা মরম্না খোঙজং চঙশিল্লিবা লৌমীশিংনা পুখৎলক্লিবা ৱাফমশিংগী মরম চাবা ৱারোইশিন অমা ফংগনি হায়বগী থাজবা লৈ।

হায়দ্রবাদগী মুচিন্তালদা লৈবা শ্বারনা ভারত ত্রস্ততা ‘রাইতু নেস্থাম’ অমসুং মুপ্পাভারাপু ফাউন্দেসন্না পুন্না শীনবা মনা য়েন্থোকপা থৌরমদা ৱা ঙাংবদা উপ-রাস্ত্রপতিনা হায়খি খোঙজং চঙশিল্লিবা লৌমীশিংনা তাল্লিবশিং অমসুং কেন্দ্র সরকারগী মীহুৎশিংগী পাউখুমগী মতাংদা মেদিয়াদা ফোঙলিবা পাউশিংগী মতাংদা পনখি অমসুং য়ানবা অমা পুরক্নবগী ফিবম অমা উরে।

মহাক্না হায়খি অমনা অমগী ফিবম মশক খঙনদুনা নাকল অনিমক য়ানবা পুরক্কনি হায়বগী থাজবা লৈরে। নাকল অনিমক মহৈ য়ানবা অমসুং ৱাহন্থোক লৈবা ৱারি শানগনি হায়বগী থাজবা থম্লি। অথিংবা পীদনা লৌউ-শিংউগী পোৎথোকশিং য়োনবা য়াহন্নবা  মহাক মশামক য়াওনা কয়ারক তকশিন্দুনা লাক্লবনি। মতম কয়াগী মমাঙদগী ‘লৈবাক অমা অমসুং চীঞ্জাক্কী জোন অমা’ লৈনবা তকশিন্দুনা লাক্লি।

লৈবাক চাউখৎপা অসি লৌমীশিং চাউখৎপগা অচেৎপা মরী লৈনৈ হায়বা ৱাফম থম্লদুনা শ্রী নাইদুনা হায়খি লৌমী অমদা লৈরিবা মীনুংশি অসি মমা অমদা লৈরিবা মীনুংশিং অদুগা মান্নৈ অমসুং লৌমীশিং শৌগৎপা অসি মী খুদিংমক্কী থৌদাংনি। লাইচৎ মনুংদা অৱাবা কয়া থেংনরবসু রেকোর্দ ওইনা চানবা মহৈ-মরোংশিং পুথোক্তুনা লৈবাক্কী অচৌবা থবক অমা পাংথোকপগীদমক মহাক্না লৌমীশিং থাগৎখি। লাইচৎ মনুংদা দোক্তরশিং, সেনিতেসনগী শিন্মীশিং, পুলিস অমসুং মেদিয়াগী মীওইশিংনা পাংথোকখিবা থবকশিংসু মহাক্না থাগৎখি।

শ্রী নাইদুনা হায়খি লৌমীশিংগী দরকার ওইবশিং ফংহন্নবা কেন্দ্র অমসুং রাজ্য সরকারশিংনা ‘তিম ইন্দিয়া’ ওইনা থবক পাংথোক্কদবনি। চুনবা মমলশিংদা য়োনবা ফংহনবগী মথক্তা, লৌমীশিংনা মতম চানা অমসুং অহোংবা মমলদা শেন্থং পীগদবনি। কোল্দ স্তোরেজগী খুদোংচাবশিং অমসুং গোদাউনশিং মশিং হেনগৎহনবগী তঙাইফদবা লৈরে। তশেংনবা জিলা খুদিংমক্তা কোল্দ স্তোরেজগী খুদোংচাবা অমা থমগদবনি।

মহাক্না হায়খি মতম পুম্নমক্তা ভারতকী মীয়াম্না লৌউ-শিংউগী থবক অসি অৱাংবা থাক অমদা থম্লি। মরম অদুনা ঐখোয়গী কুহ্মৈশিং অমসুং লাই-তিনগী থৌরমশিং অসি লৌউ-শিংউগা য়াম্না নক্নবা মরী লৈনরিবনি। এফ.এ.ওগী পাউদম অমগী মতুংইন্না তুংদা চীঞ্জাক ফংদবগী অৱাবা ময়োক্নবা য়াই হায়রি। করিগুম্বা ঐখোয়না ঐখোয়গী লৌমীশিং মতেং পাংলবদি, ভারতনা ওক্নবা চীঞ্জাক পুথোকপা খক নত্তনা, মালেম অসি থাকপা ঙমগনি।

লৌমীশিং য়াইফনবা স্কিম কয়া পায়খৎপগীদমক কেন্দ্র সরকার থাগৎলদুনা শ্রী নাইদুনা হায়খি স্কিম কয়া হায়বদি সোইল হেল্থ কার্দ স্কিম, প্রধান মন্ত্রী কৃষি সিনচাই য়োজনা, প্রধান মন্ত্রী ক্রোপ ইন্সুরেন্স স্কিম অমসুং ইলেকত্রোনিক নেসনেল এগ্রিকলচর মার্কেত(ই-নাম)গী খুৎথাংদা ২০২২ ফাওবগী মনুংদা লৌমীশিংগী শেন্থোক শরুক অনিদা হেনগৎহন্নবা প্রধান মন্ত্রী শ্রী নরেন্দ্র মোদীগী লমজিং মখাদা থবক কয়া খুমাঙচাউশিন্না পায়খৎলে।

উপ-রাস্ত্রপতিনা হায়খি লৌউ-শিংউ চাউখৎনবা মীয়াম মরক্তা লৌউ-শিংউদা য়েংলিবা মিৎয়েং হোঙদোক্কদবনি অমসুং লৌউ-শিংউ য়োকখৎনবা পুন্না থবক তৌমিন্ননবা নহারোলশিংদা তকশিনখি।

উপ-রাস্ত্রপতিনা প্রোফেসার সারভারেদ্দি ভেনকুরেদ্দিদা লাইফ তাইম এচিফমেন্ত এৱার্দ অমসুং ব্রিগেদিয়ার পোগুলা গনেসতা কৃষি রত্ন পীখি। লৌমীশিং, এক্সতেন্স ওফিসারশিং,সাইন্তিস্তশিং, লৌউ-শিংউগী পাউমীসিং অমসুং লৌউ-শিংউগী অতেনবা ফিল্মশিং পুথোকপা প্রদু্সরশিংদসু মনাশিং পীখি।

থা খুদিংগী পুথোকপা লৌউ-শিংউগী মেগাজিনগী খুৎথাংদা লৌমীশিং মতেং পাংবগীদমক রাইতু নেস্থামগী ফাউন্দর, পদ্মা শ্রী ফংলবা শ্রী য়াদলাপাল্লি ভেনকতেশ্বারা রাও শ্রী নাইদুনা থাগৎখি। চহি অসিগী অতেনবা ফিল্মশিং চাংদম্নবদা মাইপাক্লবশিং মতেং পাংনবা থোরকপগীদমক, মুপ্পাভারাপু ফাউন্দেসনগী ফাউন্দর, শ্রী হর্সভর্ধনসু মহাক্না থাগৎখি।

মসিগী মমাঙদা , শ্রী ভেনকিয়া নাইদুনা শ্বারনা ভারত ত্রস্ততা ত্রেনিং চৎথরিবা নহারোলশিংগা ত্রস্তকী লম্পাক্তা ৱারি শানখি অমসুং থকশি-খাসি ঙাক্নবা, অফবা চীঞ্জাক চানবা অমসুং মতম পুম্নমক্তা হকচাং ফনা লৈনবা মহাক্না মখোয়দা পাউতাক পীখি। মহাক্না হায়খি ভারতকী নহারোশিং য়াম্না হৈথোই-শিংথোই অমসুং চাংনাইনা ত্রেনিং শরুক য়াদুনা মখোয়গী হৈশিংবা হেনগৎহনগদবনি।

থৌরম অদুদা রাইতু নেস্থামগী ফাউন্দর শ্রী য়াদলাপাল্লি ভেনকতেশ্বারা রাও, মুপ্পাভারাপু ফাউন্দেসনগী ফাউন্দর, শ্রী মুপ্পাভারাপু হর্সভর্ধন, শ্বরনাভারত ত্রস্ত হায়দ্রবাদ চেপ্তরগী প্রসিদেন্ত শ্রী চিগুরুপতি কৃষ্ণপ্রসাদ, মনা ফংলবশিং, ত্রেনিশিং অমসুং অতোপ্পশিং শরুক য়াখি।

*****