ঙসি ফুদ প্রোসেসিং ইন্দস্ত্রি, এগ্রিকলচর অমসুং ফার্মরস ৱেলিফিয়ার, রুরেল দিবলপমেন্ত অমসুং পঞ্চায়াতি রাজগী মিনিস্ত্রিগী য়ুনিয়ন মিনিস্তর নরেন্দ্র সিংহ তোমারনা পঞ্জাবগী কাপুরথালা জিলাগী ফাগৱারাদা ভর্চুএল ওইনা মেগা ফুদ পার্ক শঙ্গাখ্রে। শ্রী তোমারনা হায়খি ভারতকী লৌউ-শিংউগী থবক চাউখৎহনবদা পঞ্জাব অমসুং হরিয়াননা মরুওইবা থৌদাং লৌরি। হায়রিবা রাজ্য অনি অসিগী লৌমীশিংনা চোকথবা নাইদনা হোৎনবদগী,ভারতনা মশাগী ওক্নবা চীঞ্জাক পুথোকপা খক নত্তনা অহেনবা চীঞ্জাক পুথোকপা ঙম্লে। ফৌ অমসুং গেহু পুথোকপদা পঞ্জাবনা মাঙজিল থারি অদুবু লৈনুংগী ঈশিংগী চাং হন্থরকপদগী তোঙান-তোঙানবা মখলগী মহৈ-মরোংশিং থাবা দরকার ওইরে অমসুং পঞ্জাবকী লৌমীশিংনা খোঙথাং কয়া পায়খৎলে। লৌমীশিং চুনবা মমলদা য়োনবা ফংনবা অমসুং মরী লৈনবা সেক্তরশিং কান্নবা ফংনবা চীঞ্জাক শেম-শাবগী থবকশিংদা মিৎয়েং চঙগদবনি।

মেগা ফুদ পার্ক অসি লুপা করোর ১০৭.৮৩ চঙনা শাবনি অমসুং মসিগী পাক-চাউবনা লম একার ৫৫ হেল্লি। পার্ক অসিনা লৌমী ২৫০০০ কান্নবা পীগনি অমসুং মীওই ৫০০০ থবক ফংহনগনি হায়বগী থাজবা থম্লি। পার্ক অসিদা রো মেতরিয়েল/শাবা লোইরবা পোৎথোকশিং থমফমশিং(ইসক্বার মিতর ৩৯৪৪), সিলোশিং(মেত্রিক তন ২০০০০), কোল্দ স্তোরেজ(মেত্রিক তন ৩০০০), আই.ক্বিউ.এফ অমসুং দিপ ফ্রিজর(আই.ক্বিউ.এফ:পুং১দা এম.তি ২+দিপ ফ্রিজর: ২০০০ এম.তি) অমসুং অতোপ্পা চীঞ্জাক পুথোক্নবা খুদোংচাবশিং লৈরে।

শ্রী তোমারনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা লৌমীশিংগী য়াইফনবা সরকারনা লেপ্তনা থবক পায়খৎলি। মহৈ-মরোংশিংগী এম.এস.পি হেনগৎলে অমসুং অনৌবা এফ.পি.ও ১০,০০০ শেম্নবা স্কিম অমা সরকারনা হৌদোক্লে। লৌমীশিংদা সবসিদি পীরে অমসুং অপীকপা লৌমীশিংগী য়াইফনবা সরকারনা মিৎয়েং চঙলে। লৌমীশিং কান্নবা ফংনবা অমসুং থবক ফংনবগী খুদোংচাবশিং পীনবা চীঞ্জাক পুথোকপগী থবকশিং চাউখৎহন্নবা অত্মানির্ভর ভারতকী মখাদা লুপা করোর ১০,০০০গী ফন্দ লৈরে। হৌজিক ফাওবদা, মেগা ফুদ পার্ক ৩৭ অয়াবা পীখ্রে অমসুং পার্ক ২০ থবক হৌখ্রে।

শ্রী তোমারনা হায়খি লৌউ-শিংউগী থবক্তা থিজিনবগী অচৌবা থৌদাং লৈরি অমসুং লৈবাক অসিগী কান্নবা পুরক্নবা আই.সি.এ.আরনা পাক-চাউনা থিজিনবগী থবকশিং পায়খৎলি। থিজিনবগী মরী লৈনবা থবকশিংগী প্রোপোজেলশিং থারক্নবা মহাক্না পঞ্জাব সরকারদা খঙহনখি অমসুং হায়রিবা প্রোপোজেলশিং অদু কেন্দ্র সরকারনা থৱায় য়াওনা খন্নগনি হায়না থাজবা পীখি। মহাক্না হায়খি চীঞ্জাক পুথোকপগী থবকশিং চাউখৎহনবদা সুখজিৎ মেগা ফুদ পার্ক অসি মাইপাকপা অমগী খুদম ওইরগনি।

ফুদ প্রোসেসিং ইন্দস্ত্রিগী রাজ্য মন্ত্রী শ্রী রামেশ্বর তেলিনা হায়খি খ্বাইদগী নৌবা তেক্নোলোজিশিং অমসুং চীঞ্জাক পুথোক্নবগী খুদোংচাবশিংনা চানবা চীঞ্জাকশিং পৎতুনা মাঙবদগী হন্থহনবা ঙমগনি অমসুং লৌমীশিংনা চুনবা মমলদা য়োনবা য়াগনি।

*****