জল শক্তি মন্ত্রালয়গী থক্নবা ঈশিং অমসুং লুবা নানবা দিপার্তমেন্তকী মল্তি-দিসিপ্লিনরী তেক্নিকেল কমিতীনা অনৌবা তেক্নোলোজী মঙা মরুওইনা থক্নবা ঈশিংগীদমক্তা তেক্নোলোজী অহুম অমসুং লুবা নানবগীদমক্তা তেক্নোলোজী অহুমগী ৱাফম পুখৎখ্রে। মসি কমিতীনা পুখৎখিবা তেক্নোলোজী ১০গী মনুংদা য়াওবনি অমসুং হৌজিক মসি দিপার্তমেন্তকী পোর্তেলদা মমিং চল্লগনি। কমিতী অসিনা পুখৎলকপা ৱাফম অসি রাজ্য অমসুং য়ু.তি.শিংগীদমক্তা মতেং ওইরগনি। মসিদগী মখোয়গী মথৌ তাবশিং অমসুং মতিক চাবা মতুং ইন্না রাজ্য অমসুং য়ু.তি.শিংনা তেক্নোলোজীশিং অসি শিজিন্নগনি। তেক্নোলোজীশিং অসি তেক্নিকেল কমিতীনা অয়াবা পীদ্রিঙৈগী মমাংদা তোঙান তোঙানবা থাক্তা অয়াবা অমদি থাগৎপা ফংখ্রবনি।

জল শক্তি মন্ত্রালয়না পান্দম থম্লিবা প্রোজেক্ত জল জীবন মিশনগী পান্দম অসি মপুং ফাহন্নবা অসিগুম্বা ইনোবেতিব তেক্নোনোলোজীগী থৌরাংশিংদা মরুওইবা ওইনা লৌদুনা লাক্লি মরমদি কুমজা ২০২৪ ফাওবগী মনুংদা খুঙ্গংগী য়ুমথোং খুদিংদা কোঞ্জিন্দগী ঈশিং ফংহন্নবা পান্দম অদু ফংবা ঙম্নবনি। মসিগা লোইননা স্কিমশিং থবক্তা ওন্থোকপা মতমদা লাক্কদবা শিংনবশিংগা মায়োক্নদুনা প্রোজেক্তশিং অসিবু খোংজেল য়াংনা মপুং ফাহনবা ঙম্নবনি। রাজ্য অমসুং য়ু.তি.শিংগী মতেংগীদমক্তা জল জীবন মিশনগী মনুংদা ইনোবেসনগী ৱাফম অসি কৌখিবনি, মরমদি খুঙ্গংগী লমদমদা কাংলুপকী থাক্তা মতিক চাবা মওংদা মগুন লৈবা থক্নবা ঈশিং ফংহনবা ঙম্নবনি। মিশন অসি থবক্তা ওন্থোকপদা তোঙান তোঙানবা মখলগী শিংনবশিং মায়োক্নবা তারি মদুগী মনুংদা লৈরিবা মফম অদুগী ঈশিংগী হৌরকফম, থবক তৌবগী থাক, ঈশিংগী মগুনগী শিংনবশিং, লুবা-নানবগা মরী লৈনবা অমসুং ফত্তবা ঈশিং অমসুং অমোৎ-অকাইনচিংবা শিংনবশিং থোরক্লি।

শিংনবশিং অসিবু মায়োক্ননবা অমসুং মকোক্তগী হৌনা মিশন অসি থবক্তগী হৌনবা ইনোবেতিবকী মতুং ইন্না তেক্নিকেল কমিতী অমা শেমখ্রে। ভারত সরকারগী প্রিন্সিপাল সাইন্তিফিক এদভাইজরগী লুচিং মখাদা তেক্নিকেল কমিতী অসিদা নীতি আয়োগ, সাইন্স অমসুং তেক্নোলোজী দিপার্তমেন্ত, বাইও-তেক্নোলোজী দিপার্তমেন্ত, সি.এস.আই.আর., দি.আর.দি.ও., আই.আই.তি., নেস্নেল ইন্সতিত্যুৎ ওফ ওসিন তেক্নোলোজী, রাজ্যশিং অসিনচিংবগী মীহুৎশিং য়াওরি। কমিতী অসিনা মকোক্তগী হৌরগা পাম্বৈশিং পুথোক্নবা সাইন্স অমসুং তেক্নোলোজীদা মিৎয়েং থমগনি মদু রাজ্য অমসুং য়ু.তি.শিংদা স্কিম অসি থবক্তা ওন্থোকপদা এজেন্সীশিংগী মতেং পাংগনি।

পুখৎলক্লিবা তেক্নোলোজী ৫ অদু মখাদা পীরিঃ

অ) Grundfos AQpure, অল্ত্রাফিল্ত্রেসন্দা য়ুম্ফম ওইবা সোলর ইনর্জীনা চলাইবা ৱাতর ত্রিৎমেন্ত প্লান্ত

আ) জনাজল ৱাতর ওন হ্বিল, য়ুমথোং খুদিংদা অফবা ঈশিং ফংহন্নবা জি.পি.এস. হাপ্পা আই.ও.তি.বেজ ইলেক্তিক ভেহিকল

ই) প্রেস্তো ওনলাইন ক্লোরিনেতর, ঈশিংদা য়াওবা মহিক-মতাইশিং হাৎনবা নন-ইলেক্ত্রিক্না চলাইবা ওনলাইন ক্লোরিনেতর

ঈ) জোহকাসৌ তেক্নোলোজী – লৈনুংদা ফুম্বা য়াবা ৱাতর ত্রীৎমেন্ত সিস্তেম, অমোৎপা অমসুং শেংদবা ঈশিং, চাকখুম অমসুং ইরুজফমদগী থোরকপা ঈশিং শেংদোকপা ঙম্বা

উ) FBTec®, মসি ফিক্স ফিল্তর মীদিয়া শিজিন্নবা মফমদা এসেম্বল তৌবা য়াবা সেৱেজ ত্রীৎমেন্ত সিস্তেম অমনি। কমিতী অসিনা অতোপ্পা এপ্লিকেসন মঙাদা মখোয়বু অমুক হন্না খন্নবা য়ানবা এক্রিদেসন/প্রোসেস/পাইলোৎ/শিয়র ফিল্দ দেতা পুথোক্নবা হায়জখি।

****