হকশেল অমসুং য়াইফ-য়ুম্বালগী কেন্দ্রগী মন্ত্রী দা. হর্শ বর্ধন্না ঙসি ভিদিও কনফরেন্সকী খুত্থাংদা কনফেদরেসন ওফ ইন্দিয়ন ইন্দস্ত্রীস (সি.আই.আই.)গী নেস্নেল কাউন্সিলদা ৱা ঙাংখ্রে।

মালেমগী ওইনা মীশিং খ্বাইদগী য়াম্বা ওইরিবা অসিগী য়াইফনবা ভারত সরকারনা লাইচৎ অসিগী মতাংদা তোইনা দাইলোগ তৌবা অমসুং খন্ন-নৈনবা ফংহন্নবা শিল-লাংবা অমসুং মখল কয়াগী প্লেৎফোর্মশিং পুনশিনহনবা অসিগীদমক সি.আই.আই.বু থাগৎলদুনা দা. হর্শ বর্ধন্না হায়খি, “ভারতকী হেল্থকিয়র ইন্দস্ত্রী অসি রিবেন্যু অমসুং থবক পীবগী প্রোবিজন্দা য়েংলবদি ভারতকী খ্বাইদগী চাউবা সেক্তর অমা ওইরি অমসুং মসিগী মার্কেৎ অসি ২০২২ ফাওবদা শরুক অহুম হেনগৎতুনা লুপা ত্রিলিয়ন ৮.৬ য়ৌনবা প্রোজেক্ত তৌবগা লোইননা ইন্দস্ত্রী মনুংদা স্তেকহোল্দরশিং পুনশিনহনবা য়ানবা খোঙথাংশিং লৌখৎপা তঙাই ফদে। কোবিদনা ঐখোয়গী অপুনবা সিস্তেমদা অকাইবশিং পীবা অসিনা মরম ওইরগা হান্নদগী হেন্না হৌজিক্না ফংহনবা অমসুং শেল চংদবা হেল্থকিয়র ফংহন্নবা মথৌ তারে।”

মীয়ামদা শেল চংদবা হেল্থকিয়র ফংহন্নবা অচুম্বা মাইকৈদা চংশিল্লিবা খোঙথাং অমা ওইনা আয়ুশমান ভারতকী মখাদা প্রধান মন্ত্রী জন আরোগ্যা য়োজনা (পি.এম.জে.এ.ৱাই.) হৌদোক্নবা সরকার অসিনা হোৎনখিবশিং অদু ফোঙদোক্লদুনা মহাক্না হায়খি, “ভারতকী হেল্থকিয়রগী ফীভম অসিনা সহর-খুঙ্গংগী মফমশিংগী মনুংদা লৈরিবা খেৎনবা অসিগা লোইননা খেৎনরিবা ফীভমশিংগী মতাংদা স্পেক্ত্রম অমা পীরি। খেৎনবা অসি মেনশিনবা মথৌ তাই অমদি শ্রী নরেন্দ্র মোদীগী মখাদা সরকার অসিনা মসি মেনশিন্নবা কন্না হোৎনরি। হিরম অসিদা এন.সি.দি.শিং অমসুং সেন্দরগীদমক্তা পি.এম.জে.এ.ৱাই অমসুং ঐচ.দবল্যু.সি.গা লোইননা আয়ুশমান ভারত নেৎৱার্ক তৌবা অসি শীংথানিংঙাই ওইবা খোঙথাং অমনি।” হিরম অসিগী মতাংদা মহাক্না হায়খি, “পব্লিক-প্রাইবেৎ-পার্তনরশিপ (পি.পি.পি.শিং) অসি লম্বী অমনি মরমদি মসিনা কান্নবা অমসুং ইন্নোবেসন হেনগৎহনবা, কান্নবা হেনগৎহনবা, সহর-খুঙ্গংগী খেৎনবা হন্থহনবা, একসেস তৌবা হেনগৎহনবা অমসুং ঐখোয় ইশাদগী হকশেলগী ওইবা চাদিং তৌবা হন্থহনবদা মতেং পাংলি।”

মসিদা ইনফোর্মেসন তেক্নোলোজী শীজিন্নদুনা কোবিদ লান্থেংনবা খক্তা নত্তনা নন-কোবিদকী তঙাই ফদবা হেল্থকিয়র পীবদা হকশেল মন্ত্রালয়না শীংথানিংঙাই ওইনা মাই পাকখিবা অসিগী মতাংদা ৱা ঙাংলদুনা মন্ত্রীনা হায়, “ঐখোয়না তেক্নোলোজীনা ঐখোয়দা ফংহল্লিবা অসিগী পোতেন্সিএল হেনগৎহনবা অমসুং মসিনা মীপুম খুদিংমক্তা হেল্থকিয়রগী ঐখোয়না লান্থেংনরিবা অসিদা শীজিন্নবা মথৌ তাই। তেলিমেদিসিন অসিনা মাংজিল থারি অমসুং মীপুম খুদিংদা য়ৌহন্নবা সোলুসন অমগা লোইননা ফংহনখি। ঙসি ইসঞ্জীবনি তেলিকন্সল্তেসন সর্ভিস অসিনা তেলিকন্সল্তেসন লাখ ৮ শুখ্রে।”

পোলিয়োগী মায়োক্তা মহাক্কী কেম্পেনদা মহাক মশাগী খঙহৈজবা অদু শীজিন্নদুনা মহাক্না মীপুম খুদিংমক্তা সি.আই.আই., দিল্লী চেম্বর ওফ কম্মর্স, রোতরী ক্লবগুম্বা লনাই ওর্গনাইজেসন্না থোরক্তুনা চাদিংশিং তৌরি অমসুং চাউনা মাই পাকপা অমা ওইখি। মহাক্না মখা তারদুনা হায়খি, “ঐখোয়না ওর্গনাইজেসনশিং অমসুং ইন্দস্ত্রীশিংনা অচৌবা হেল্থকিয়র ইকোসিস্তেম অমগী তশেংনা মরু ওইবা অদু খঙহনবদা মতেং পাংনবা মাইকৈদা চংশিনবা মথৌ তাই। মসি ওর্গানিক গ্রোথকী থৌরাংশিং অমসুং অতোপ্পা নন-ত্রেদিস্নেল হেল্থকিয়র মোদেলশিং অনিমক কুপ্না য়েংশিল্লগা তৌবা তাই।”

হর্শ বর্ধন্না ভারতনা কোবিদকা লান্থেংনবা অসি পব্লিক অমসুং প্রাইবেৎ সেক্তরগী মরক্তা খুৎশম্নবগী খুদম অমনি হায়নসু ফোঙদোকখি। “ঐখোয়গী লৈবাক অসিনা হৌজিক্তি পর্সনেল প্রোতেক্তিব ইক্বিপমেন্ত কিৎশিংগী খ্বাইদগী চাউবা মেন্যুফেকচরর অমা ওইবা ঙম্লে। চহি খরগী মমাংদা ঐখোয়না সি.দি.সি. এতলান্তাদা সেম্পলশিং তেস্ত তৌনবা থারম্মী অদুবু হৌজিক্তি ঐখোয়গী লনাই তেস্তিং লেবশিং লৈদুনা লৈবাক অসিগী অপুনবা তেস্তিং কেপাসিতীদা শরুক তম্লি।” মহাক্না কোবিদ ৱারিয়রশিং মরু ওইনা মখোয়গী মমাশিংনা মখোয়গী মচাশিংনা মথৌ তৌবদা থোরকপা য়াবা হকশেলগী ওইবা খুদোংথিবা অদু খঙলবসু মথৌ তৌবদা অথিংবা পীদ্রিবা অসিবু থাগৎখি।

দা. হর্শ বর্ধন্না তিল্লীবা মীওইদা কোবিদ বেক্সিন মতম চানা ফংগনি হায়না থাজবা পীখি। হিরম অসিদা মহাক্না হায়, সরকার অসিনা মিসন ইন্দ্রধানুশকী মখাদা লাইনা ১২দগী অঙাংশিং ইম্ম্যুনাইজ তৌনবা অফবা কোল্দ স্তোরেজ চেন অমগা লোইননা ইম্ম্যুনাইজেসন কেপাসিতী হেনগৎহনখ্রে। “অপুনবা ইবিন প্লেৎফোর্ম অসি কোবিন নেৎৱার্ক ওইনা অমুক হন্না শীজিন্নখি। স্তোক্কী মুভমেন্ত পুম্নমক দিজিতেল ওইনা ত্রেক তৌখি অমসুং বেক্সিনশিং শীজিন্নরিবশিংসু করিগুম্বা বেক্সিন অসিগী শোৎ অনি মথৌ তারবদি চয়োল অনি নত্ত্রগা অহুমগী মতুংদা ত্রেস তৌবা য়াই। মসিনা মীপুম খুদিংমক্তা বেক্সিন ফংহনবা ঙমগনি,” হায়না মহাক্না ফোঙদোকখি।

****