হকশেল অমসুং য়াইফ-য়ুম্বালগী কেন্দ্রগী মন্ত্রী দা. হর্শ বর্ধন্না ছত্তিসগরগী হেল্থ অমসুং মেদিকেল এজুকেসন মন্ত্রী শ্রী ত্রিভুবনেশ্বর সরন সিংহ দেও অমদি ছত্তিসগরগী তোঙান তোঙানবা জিলাশিংগী দিস্ত্রিক্ত মেজিস্ত্রেৎশিং অমসুং ম্যুনিসিপাল কম্মিস্নরশিং য়াওদুনা ঙসি ৱারী শাখ্রে।

লাক্কদৌরিবা নীংথমথা অমসুং মতম শাংনা চত্থগদবা হরাও-কুমহৈ অসিনা কোবিদ-১৯দগী ফীভম ফগৎলকখিবশিং অসিদা অচৌবা খুদোংথিবা অমা থোকহল্লকপা য়াবা অসিদা মহাক্না নুংনাংবা পোক্লদুনা দা. হর্শ বর্ধন্না হায়খি, “লাক্কদৌরিবা থা অহুম অসিদা ঐখোয় পুম্নমক্না হেন্না চেকশিনবা মথৌ তাই। মাস্ক উপ্নবা, ফিজিকেল দিস্তেন্স থম্নবা অমসুং খুৎশা তোয়না হাম্নবা ইকাই খুম্নরবা প্রধান মন্ত্রীগী পাউজেল অসি প্রজা খুদিংদা য়ৌহনগদবনি।”

ছত্তিসগরগা কোবিদকী ত্রেজেক্তরী অসিগা লৈবাক্কী ত্রেজেক্তরীগা চাংদম্নরদুনা দা. হর্শ বর্ধন্না হায়খি, “ছত্তিসগরগী নাবা ফগৎলকপগী চাং অসি লৈবাক্কী ওইরিবা চাং ৯২% অসিগা য়েংনবদা ৮৭% ওইরি। লৈবাক পুম্বগী ওইরিবা ১.৪৯% অসিগা চাংদম্নবদা রাজ্য অসিনা সি.এফ.আর. ১.১৯% ওইদুনা হেন্না তারি।” রাজ্য অসিনা রাজনান্দগাও, দুর্গ, রাইপুর, বিলাসপুর, রাইগর অমসুং বলোদা-বজারগী জিলাশিংদা পোজিতিবিতী ৱাংবা অমরোমদা ত্রাইবেলগী মফমশিংদা কেস হেনগৎলক্লিবা অসিদা মহাক্না নুংনাংবা ফোঙদোকখি। পুং ২৪গী মনুংদা অমসুং হোস্পিতেলাইজ তৌরকপগী পুং ৭২গী মনুংদা শীখিবগী পর্সন্তেজ অসি মথং শিৎনা ৩৪.৮% অমসুং ৪৬.২% ওইখি, মসিনা কেসশিং অসি ফীভম লুশিনদ্রিঙৈ মমাংদা খঙদোকহৌদ্রে হায়বা তাক্লি। মসি মীৎয়ে চংগদবা হিরম অমনি অমসুং রাজ্যগী ওথোরিতীশিংনা য়েংশিনবা মথৌ তাই হায়না মহাক্না ফোঙদোকখি।

রাজ্য অসিগী আত.তি.-পি.সি.আর.গা আর.এ.তি.গী রেসিয়ো অসি হৌজিক চাদা ২০:৮০ ওইরিবা অসি কেন্দ্রগী হকশেল মন্ত্রীনা য়েংশিনখি। আর.এ.তি. অসিনা ঙন্না খঙদোকপা ঙম্বগী কান্নবশিং লৈজরবসু আর.তি.-পি.সি.আর. অসিনা খ্বাইদগী ফবা তেস্তনি অমসুং রাজ্য অসিনা মসিগী প্রপোসন অসি হেনগৎহনবা তঙাই ফদে হায়না মহাক্না মখা তাখি ।

দা. হর্শ বর্ধন্না থমখিবা মীৎয়েং চংবা তঙাই ফদবা অহুম শুবা লম অদুদি হন্দক নুমিৎ খরনি অসিদা নোংমগী শীবগী মশিং হেনগৎলক্তুনা ৫০ য়ৌরকপা অসিনি।

নেস্নেল সেন্তর ফোর দিজিজ কন্ত্রোল (এন.সি.দি.সি.)গী দিরেক্তর সা. সুজীৎ সিংহনা ছত্তিসগরগী তোঙান তোঙানবা জিলাশিংগী লৈরিবা কোবিদকী ত্রেজেক্তরী অসিগী মতাংদা মীপুম খুদিংদা খঙহনখি।

শ্রী দেওনা হায়খি রাজ্য অসিগী এদমিনিস্ত্রেসন অসিনা মুম্বাই-কোলকতা ত্রান্সপোর্ত কোরিদোর য়াওনা সেন্ত্রেল রিজনশিংগীদা মশিং য়াম্না শন্দোরকপা অসি উবা ফংলে। মহাক্না মখা তারদুনা হায়খি শীবগী মশিংদা হন্দক হেনগৎলকপা অসিগী মরমদি হান্নগী ওইবা অনবা লৈবননি; হন্দক্কী রিপোর্তশিং অসিদা ‘শীবগী মরম’ পীখি অমসুং মসিগা পুনশিল্লগা মশিং হেনগৎহনবনি। মহাক্না ৱাখল্লোন ফোঙদোকখি মদুদি হান্নগী লৈরম্লিবা ফীভম অসি য়েংশিল্লবা মতুংদা নোংমদা শীবগী মশিং অসি হন্থহনবা ঙম্লে। মহাক্না মফম খুদিংদা বেক্সিন ফংহন্নবা অমসুং কোবিদকা মরী লৈনবা মেদিকেলগী পোৎলমশিং মশিং য়াম্না লৈশিন্নবা শেম-শাবা অসিগুম্বা এদমিনিস্ত্রেসনগী খ্বাইদগী ফবা খোঙথাংশিংগী মতাংদসু ফোঙদোকখি।

দা. হর্শ বর্ধন্না রাইপুর, দুর্গ, বিলাসপুর অমসুং বলোদা-বজারগুম্বা কেসশিং ৱাংনা রিপোর্ত তৌরক্লিবা জিলাশিংগী দি.এম.শিংগা লোয়ননা ৱারী শাখি। দি.এম.শিং অদুনা মখোয়না অৱা-নুংঙাই অমসুং মেদিকেল ইনফ্রাস্ত্রকচর মপাঙ্গল কনখৎনবা খ্বাইদগী ফবা খোংথাংশিং, কোবিদকা চুনবা চৎন-লোনচৎশিং ঙাক্না চৎনবা থৌরাংশিং, তেস্ত তৌবা হেনগৎহনবা অমসুং প্রিবলেন্স সর্ভেশিং পাঙথোকপা অসিগী মতাংদা ফোঙদোকখি।

কেন্দ্রগী হকশেলগী সেক্রেতরী শ্রী রাজেশ ভুশন্না তেস্ত তৌবা হেনগৎনবা; কৈথেলশিং অমসুং বস তর্মিনসশিং অসিগুম্বা থুনা য়াংনা শন্দোক্কনবা মফমসিংদা তার্গেতেদ তেস্তিং তৌবা য়ানবা শিনবা; অহানবা পুং ৭২গী মনুংদা কন্তেক্ত ত্রেসিং মপুং ফানা তৌবা; কো-মোর্বিদ ওইবা মীওই অমসুং চহি য়াংখৈগী মথক্তা লৈবা মীওইগী মোনিতর তৌনবা দেতাবেজ অমা শেম্বা অসিদা মীৎয়েং চংনবা ছত্তিসগরগী এদমিনিস্ত্রেসন্দা খঙহনখি। মহাক্না মখা তারদুনা হায়খি কোবিদকা চুনবা চৎন-লোনচৎ মীয়াম্না ঙাক্না চৎনবা থৌগৎপদা চৎন-লোনচৎ হোংনবা পাউ ফাওনবা অসি মরু ওই। পঞ্চয়ৎকী মীহুৎশিং, য়ু.এল.বি.গী মীহুৎশিং, এম.এল.এ.শিং, কেবিনেৎ মন্ত্রীশিং অমসুং রাজ্য অদুগী অতোপ্পা মশক নাইবা মীওইশিংনা হায়রিবা কোবিদকা চুনবা চৎন-লোনচৎশিং ঙাক্না চৎনবা মহাক্না অপীল তৌখি।

মীফম অদুদা ছত্তিসগরগী হেল্থ অমসুং মেদিকেল এজুকেসনগী এদিস্নেল চীফ সেক্রেতরী মিস রেনু জি. পিলেসু শরুক য়াখি। জোইন্ত সেক্রেতরী (হেল্থ) শ্রী লব অগর্ৱাল অমসুং মন্ত্রালয় অসিগী অতোপ্পা মকোক থোংবা ওফিসিএলশিংসু মীফম অসিদা শরুক য়াখি।

****