'డిపాజిటరీ రిసిప్టు'ల (డీఆర్‌) నమోదు కోసం, 'ఇంటర్నేషనల్‌ ఫైనాన్షియల్‌ సర్వీసెస్‌ సెంటర్స్‌ అథారిటీ' (ఐఎఫ్‌ఎస్‌సీఏ), ఒక నియంత్రణ విధానాన్ని ప్రకటించింది. 'గుజరాత్‌ ఇంటర్నేషనల్‌ ఫైనాన్స్‌ టెక్‌సిటీ ఇంటర్నేషనల్‌ ఫైనాన్స్‌ సర్వీసెస్‌ సెంటర్‌' (గిఫ్ట్‌ ఐఎఫ్‌ఎస్‌సీ)లో ఆర్థిక కార్యకలాపాలు, సేవలను పెంపొందించే లక్ష్యంతో ఈ విధానాన్ని సూచించింది.

    ఎఫ్‌ఏటీఎఫ్‌ పరిధిలో (భారత్‌ సహా) నమోదైన సంస్థల ద్వారా డీఆర్‌లను నమోదుకు ఈ నియంత్రణ విధానం వీలు కల్పిస్తుంది. గిఫ్ట్‌ ఐఎఫ్‌ఎస్‌సీలోని స్టాక్‌ ఎక్సేంజీల ద్వారా డీఆర్‌ల జారీ, నమోదు ద్వారా పెట్టుబడుల సమీకరణకు అర్హత గల సంస్థలను అనుమతిస్తుంది.

    ఎఫ్‌ఏటీఎఫ్‌ పరిధిలోని ఏ స్టాక్‌ ఎక్సేజీలోనైనా నమోదై, డీఆర్‌లను కలిగిన సంస్థలు; మళ్లీ పబ్లిక్‌ ఆఫర్‌కు వెళ్లకుండా గిఫ్ట్‌ ఐఎఫ్‌ఎస్‌సీలోని స్టాక్‌ ఎక్సేంజీలను అదనపు వేదికలుగా ఉపయోగించుకుని ఆ డీఆర్‌ల నమోదు, జారీకి కూడా అనుమతి ఉంటుంది. 

    ఆర్థిక నివేదికలు, సరకు లేదా ధర ప్రభావిత సమాచారం, వాటా పెట్టుబడి పద్ధతి, డిపాజిటరీ మార్పు, కార్పొరేట్‌ చర్యలు వంటి ప్రకటన అవసరాలను ఐఎఫ్‌ఎస్‌సీఏ సూచించినప్పటికీ; నమోదిత సంస్థలు తమ స్వదేశ అధికార పరిధికి అనుగుణంగానే కొనసాగుతాయి. పారిశ్రామిక నిర్వహణ నిబంధనలు, ఇతర ప్రకటన అవసరాలకు అనుగుణంగా, అదనపు నియంత్రణ భారం లేకుండా ఇది ఉంటుంది. ఈ నమోదిత సంస్థలు, స్వదేశ పరిధిలో ఇచ్చిన ప్రకటనలన్నింటినీ గిఫ్ట్‌ ఐఎఫ్‌ఎస్‌సీలోని స్టాక్‌ ఎక్సేంజీలకు కూడా విడుదల చేయవలసి ఉంటుంది.

    డీఆర్‌ల నమోదు విధానంపై మరిన్ని వివరాలను https://ifsca.gov.in/Circular లింక్‌ ద్వారా ఐఎఫ్‌ఎస్‌సీఏ వెబ్‌సైట్‌లో చూడవచ్చు.

***