ঙাকশেল মন্ত্রী শ্রী রাজনাথ সিংহ নেসনেল হায়ৱে ১৩০গী কি:মি: ০.০০দগী কি:মি: ১৯.৩৫০ ফাওবগী কি:মি: ১৯.৮৫৯ শাংবা অতোপ্পা পরিং অমা লৈবাক্কী মফমদা কত্থোক্নবগীদমক সিক্কিমদা লাকখি‍। হান্না লৈরমবা পরিং অসি লৈবাক নমথখিবা অমদি অতৈ মহৌশাগী অমাঙ অতাশিংনা মরম ওইরগা শাথিনা অমাঙ অতা থোকখিবনা মরম ওইরগা মথৌ তারকখিবা লম্বী অসি মরুওইনা নাথুলা সেক্তরদা অমদি চাওয়েং য়েংবদনা নোংপোক সিক্কিমদা ঙাকশেলগী শেম শারিবা থৌরাং অসি হেন্না চেৎশিনহন্নবা মরুওইবা মরী অমা ওইরি‍। থৌরম অদু ঈশিং নুংশিৎকী ফীভম ফত্তবনা মরম ওইরগা সুখনাদা লৈবা ৩৩ কোর ঐচ.ক্যু.দগী ভিদিও কন্ফরেন্সিংগী খুত্থাঙদা ওইনা পাঙথোকখি‍। থৌরমদুদা ৱা ঙাঙলদুনা ঙাকশেল মন্ত্রীনা তেল্লবা মতমদা অমদি শেল ইচঙ চঙদনা মতিং লৈবা মচাক মথুম শেমগৎপগী মায়কৈদা খোঙফম চেৎনা লেপখিবগীদমক বোর্দর রোদ ওর্গনাইজেসন (বি.আর.ও.)বু থাগৎখি‍।

ঙাকশেল মন্ত্রীনা হায়খিবদা মনুং হঞ্জিনবা মফমশিংদা মচাক মথুম শেমগৎপগী খোঙজেল য়াঙখৎহন্নবগী লৈঙাক্কী থৌরাং অসিনা ঙাকশেলগী শেম শারিবা থৌরাংবু হেনগৎহনবতা নত্তনা লমদমদুদা খুন্নাই-শেন্মিৎলোন চাওখৎপসু পুরকহনগনি‍। প্রধান মন্ত্রীগী এক্ত নোর্থ ইস্ত পোলিসীগা চুননা মচাক মথুম শেমগৎপা খোঙজেল লৈহন্নবা কেন্দ্রগী খোঙফম অদুবু হন্না নীংশিংলদুনা মন্ত্রীনা ইং ২০০৯দগী পায়খৎলক্লিবা অতোপ্পা লম্বী পরিং অমা শেমবগী থবক অসি হৌখিবা চহি অনিসিদা কমদৌনা খোঙজেল য়াঙখৎলকখিবগে হায়বা ৱাফম ফোঙদোকখি‍। সিক্কিমগী চীফ মিনিস্তর শ্রী প্রেম সিংহ তমাংনা তুরিজমদা ইনোৎ পীগদবা অমদি স্তেত অদুগী খুন্নাই-শেন্মিৎলোন চাওখৎপদা অতোপ্পা লম্বী পরিং অদুনা পীগদবা কান্নরবা ইনোৎশিং পুথোরকখি‍। চীফ মিনিস্তরনা লম্বী অদু খোঙলৈ থুনা লোইশিনবগীদমক বি.আর.ও. অমসুং কেন্দ্র লৈঙাকপু থাগৎপা ফোঙদোকখি‍।

বি.আর.ও.না হৌখিবা চহি খরসিদা মখোয়গী তৌবা ঙমবা মতিং মচাক, খুৎশু খুৎলায় অমদি শেমগৎ শাগৎপগী থৌওংশিংদা তেক্নোলোজী থাজিন্দুনা হান্না পানরমদবা চাংদা পাকথোক চাউথোকহল্লে‍। অতল তনেল, দি.এস.-দি.বি.ও. লম্বী, নেসনেল হায়ৱে ১৩০গী অনৌবা লম্বী পরিং হায়রিবশিং অসি স্ত্রেতেজিক অমসুং ওপরেসনেলগী শেম শাবগী মায়কৈদা বি.আর.ও.না অৱাংবা থাক্কী খোঙলৈ থুনা পীবা মহৈগী খুদমশিংনি‍। ঙাকশেল মন্ত্রীনা বি.আর.ও.না তুংদা পায়খৎলক্কদবা থবকশিংগী মরমদা পল্লদুনা লাক্কদৌরিবা চহিশিংদা মরোমদোম লেপচবা ভারতকী পান্দম অসি খোঙজেল য়াঙনা চৎলক্কনি হায়না থাজবা ফোঙদোকখি‍।

*****