মৈধ্য প্রদেস রাজ্যদা থক্নবা ঈশিং পীনবা, নোং কাহেন্না চুবদগী ঈশিং চাউবা লাকশিন্নবা অমসুং অমোৎ-অকায় লোইশিন্নবা মচাক-মথুমশিং শেমগৎনবা অমসুং অর্বান লোকেল বোদিশিং(য়ু এল বি) থবক পাংথোকপা হেনগৎহন্নবা ঙসি এসিয়ান দিবলপমেন্ত বেঙ্ক(এ দি বি) অমসুং ভারত সরকার দোল্লর মিল্লিয়ন ২৭০গী লোন অমগী খুৎয়েক পীনখ্রে।

হন্দক পীগদৌরিবা অহেনবা শেনফম অসি ২০১৭দা দোল্লর মিল্লিয়ন ২৭৫গী লোন অমা পীদুনা হৌজিক মৈধ্য প্রদেসকী সহরশিংগী খুদোংচাবশিং ফগৎহন্নবা পায়খৎলিবা প্রোজেকশিংগী পাক-চাউবা হেনগৎহন্নবনি। মখা তানা পীগদৌরিবা শেনফম অসিনা অহেনবা অপীকপা সহর ৬৪গী য়ুমথোং ১৮৫,০০০গী মীওই মিল্লিয়ন ১.৩ রোম কান্নবা ফংহনগনি।

লোনগী য়ানচে অদুদা খুৎয়েক পীনখিবশিং অদুদা ভারতকী ফাইনান্স মিনিস্ত্রিগী ইকোনোমিক এফেয়ার্স দিপার্তমেন্তগী এদিসনেল সেক্রেতরি(ফন্দ বেঙ্ক অমসুং এ দি বি) শ্রী সামির কুমার খারেনা ভারত সরকারগী মাইকৈদগী খুৎয়েক পীখি অমসুং এ.দি.বিগী ইন্দিয়া রেসিদেন্ত মিসনগী কন্ত্রি দিরেক্তর তাকিও কোনিসিনা এ.দি.বিগী মাইকৈদগী খুৎয়েক পীখি।

লোনগী য়ানচে খুৎয়েক পীনরবা মতুংদা, শ্রী খারেনা হায়খি প্রোজেক অসিনা মীয়ামদা অফবা থক্নবা ঈশিং অমসুং সেনিতসনগী থবকশিং ফংহন্দুনা খনগৎলবা সহরশিংদা পুন্সি মহিং ফগৎহনগনি। থৌরাং অসি ২০২৫ ফাওবদা অর্বান লোকেল বোদিশিংদা মী খুদিংমক তোতি ঈশিং ফংহন্নবা সহরগী মচাক-মথুমশিং ফগৎহন্নবা মৈধ্য প্রদেস সরকারগী পান্দমগী শরুক অমনি।

কোনিসিনা হায়খি মসিগী প্রোজেক অসিনা হৌজিক পায়খৎলিবা য়ুমথোংশিং চাদা ১০০ মিতর পানবা, থবক পাংথোকপা অমসুং মখা তানা য়েংশিনবদা চঙখিবা শেনফম কুপখৎপা অমসুং শেন লাক্লোইদবা ঈশিং শীজিন্নবা হন্থহনবা থবকশিংগী ফিবম মখা তানা ফগৎহনগনি। সহরগী লায়রবশিংদা ঈশিং অমসুং সেনিতেসনগী খুদোংচাবশিং ফংহনবা অসিনা স্তেনেবল দিবলপমেন্ত গোল ৬ নৎত্রগা মী খুদিংদা অফবা ঈশিং অমসুং সেনিতেসন ফংহন্নবগী পান্দম ফংবা ঙমগনি।

সহরগী সেনিতেসনগী ৱাখল্লোনশিং অদু সেনিতেসন সবপ্রোজেকশিংগী থৌরাং, দিজাইন, থবক ওইনা পাংথোকপা অমসুং য়েংশিনবদা অমতা ওইনা পুনশিন্নবা প্রোজেক অসি বিল অমসুং মেলিন্দা গেতস ফাউন্দেসনগী মতেং ফংগনি।

মমাংগী লোন অদুগুম্না, প্রোজেক অসিনা মখা তানা সহর শেমগৎপা, য়ুম শাবা অমসুং মৈধ্য প্রদেস অর্বান দিবলপমেন্ত কম্পেনি লিমিতেৎকী থবক-থৌরমশিং মপাঙ্গল কনখৎহন্নবা মতেং পাংগনি। প্রোজেক অসিনা সহরগী লোকেল বোদি অনিগী মচাক-মথুমশিং অমসুং থবকশিং ফগৎহন্নবা অপুনবা সহর শেমগৎনবা থৌরাং অমগী লমজিংগনি। সহরগী হিংবগী থাক হেনগৎহন্নবা অমসুং তজনফম ওইবা নামুনাশিং মশিং য়ামথোকহন্নবা এ.দি.বিনা তেক্নিকেলগী মতেং পাংগনি।

খমথেংনা লায়রবা মুৎথৎনবা বেঙ্ক অসিনা হোৎনরিবা অসিগী শরুক অমা ওইনা নুংঙাই য়াইফবা, খুদিংমক চাউখৎমিন্নবা অমসুং তুংকোইনা চাউখৎপা এসিয়া অমসুং পেসিফিক অমা শেমগৎনবা এ.দি.বিনা থাজবা পীরি। ১৯৬৬দা লিংখৎপা বেঙ্ক অসিদা মেম্বর ৬৮ লৈবগী মনুংদা মেম্বর ৪৯ লমদম অসিদগীনি।