প্রধান মন্ত্রী শ্রী নরেন্দ্র মোদীগী লুচিং মখাদা হন্দক্তা লাউথোকখিবা থৌরাংশিং অদুদা লৈবাক অমা-কৈথেল অমা শেমগৎনবা খুজিল থৌরাংদা অহোংবা পুরকপা, লৌমী মচাশিং অমদি লম লৈজদবা লৌমীশিং ঙাকথোক্নবা মতিক চাবা থৌরাংশিংগা লোয়ননা কন্ত্রেক্ত লৌউ-শিংউ পুরকপা, অমদি লুপা করোর লাখ অমগী এগ্রি ইন্ফ্রা ফন্দশিং য়াওরি হায়না লৌউ-শিংউ অমসুং লৌমীশিংগী য়াইফ-থৌরাং, খুঙ্গঙ চাউখৎ থৌরাং, পঞ্চায়তি রাজ অমসুং ফুদ প্রোসেসিং ইন্দস্ত্রীজকী কেন্দ্র মন্ত্রী শ্রী নরেন্দ্র সিংহ তোমারনা ঙসি হায়খ্রে‍। ওনলাইন কৈথেলশিং অমসুং স্মার্ত ওইবা লৌউ-শিংউগী ফীভম ফংহন্নবা মরুওইবা পাম্বৈ অমা ওইনা দিজিতেল এগ্রি-স্তেক অমা ভারতনা শেমগৎলি‍। লৌউ-শিংউ সেক্তর অসিবু শেন থাদবগী খুদোংচাবা লৈবা সেক্তর অমা ওন্থোক্নবগীদমক লৈঙাক অসিনা লেপ্লি‍।

ইন্দো-কনাদিয়ন বুজিনেস চেম্বর (আই.সি.বি.সি.)না কনফিদরেসন ওফ ইন্দিয়ন ইন্দস্ত্রী (সি.আই.আই.) অমসুং ভারতকী মপান থৌরম মন্ত্রালয়গা খুৎশম্নরগা পাঙথোকপা নুমিৎ নিনিগী ইন্দিয়া-কনাদা এগ্রি-তেক ভর্চুএল সেমিনার হৌদোকপগী মহাক্কী ৱারোলদা শ্রী তোমারনা হায়খিবদা, মালেমগী লাইচৎ মনুংগী হৌখিবা থা তরুকসিদা ভারতনা অখন্ননা লৌউ-শিংউগী লমদা খুমাঙ চাউশিনবা মওংদা অহোংবা পুরকখ্রে‍। মসিদা লৈবাক অমা-কৈথেল অমা শেমগৎনবা খুজিল থৌরাংদা অহোংবা পুরকপা, লৌমী মচাশিং অমদি লম লৈজদবা লৌমীশিং ঙাকথোক্নবা মতিক চাবা থৌরাংশিং য়াওরি‍। ভারত্তা এগ্রি-তেক সেক্তরদা স্তার্ত-অপ ৪৫০ হেন্না লৈ অমদি মসিনা তাক্লিবদি মালেমগী ৯শুবা স্তার্ত-অপ খুদিংমক ভারতকীনি হায়বসিনি‍। লম অসিদা শেন থাদবা হেনগৎলকপা মরম্না পব্লিক-প্রাইভেত পার্ত্নরসিপসু হেনগৎলক্লি‍।

ভারত অমসুং কনাদাগী মরক্তা লৌউ-শিংউগী লল্লোন ইতিক্কী ফীভম খোঙজেল য়াঙনা চাওখৎলকপা অসিগী মতাঙদা শ্রী তোমারনা ভারত অসি কনাদিয়ন মনা মশিং অমসুং লৌউ-শিংউগী মচাক মথুমশিং খ্বাইদগী চাউনা পুশিল্লকপা লৈবাকশিংগী মনুংদা মঙাশুবনি অমদি ‘ভেজিতরিয়ন প্রোতিন’ কৌবা লেগুমিনস মনা মশিংশিং পুশিল্লকপদনা তরেৎশুবনি‍ হায়না হায়খি‍। ইন্দো-কনাদিয়ন এগ্রি-বিজিনেস অসি হেন্না চাউখৎলকপগী অচৌবা ওইথোকপা লৈ হায়না মহাক্না হায়খি‍।ভারত অসি অয়ুর্বেদকী ইনাক খুল্লবা চৎনবী অমসুং য়োগ লায়েংগী থৌওংগী য়ুম্ফম ওইরিবা মচি লৈবা মরু-মরাংশিং, ওর্গানিক, মনা মশিংনচিংবশিং য়াওনা হকচাঙ ফগদবা চীঞ্জাকশিং পুথোক্নবগী ফরবা মফম অমনি‍। ইংহং ২০০৯দা এম.ও.য়ু. খুৎয়েক পীনখ্রবা মতুংদা, ইন্দো-কনাদিয়নগী মতেং পাংনবগী মরী অসি লৌউ-শিংউগী লমদা মহৌশাগী ওইবা মতিংশিং ফুদোকহন্নবগীদমক হেন্না খোঙজেল য়াংশিনহনবা পাম্মী হায়না শ্রী তোমারনা হায়খি‍।

থৌরম অদুদা, কনাদা লৈঙাক্কী লৌউ-শিংউ অমসুং লৌউ-শিংউগী চীঞ্জাক্কী মন্ত্রী মিস মেরী-ক্লোদ বিব্যুনা কনাদা অমসুং ভারত অনিগী দোলর বিলিয়ন ১.৫গী চাং ওইগদবা লৌউ-শিংউ অমসুং চীঞ্জাক্কী মশক থোকপা লল্লোন ইতিক্কী মরীগা লোয়ননা মপাঙ্গল কল্লপা নাকল অনিগী লল্লোন ইতিক অমসুং লৌউ-শিংউগী লমদা খুৎশম্ননা চৎমিন্নবগী চাউথোকচনিংঙাই ওইরবা পুৱারী লৈ হায়বা ৱাফম থমখি‍। ভারত্তা খুৎলৈ থুনা শেন্মিৎলোনদা চাওখৎপা পুরকপনা অনৌবা কঞ্জুমর দিমান্দ অমসুং অপামবা থোকহল্লক্লি, অমদি কনাদানা অদুগুম্লবা দিমান্দশিং অদু ফংহনবা ঙমহন্নবগীদমক ভারতপু ফুদ প্রোসেসিং, ফুদ সেফতী অমসুং পুথোক পুশিনগী মচাক মথুমশিংগী মতাঙদা সাইন্তিফিক অমসুং তেক্নোলোজিগী হৈ-শিংবগী খুত্থাঙদা মতেং পাংবা য়াগনি হায়না মহাক্না মখা তানা ফোঙদোকখি‍। ঐখোয়না তুংগী পুন্সিদা য়েংবা মতমদা কনাদা অমসুং ভারতকী মরক্তা লল্লোন ইতিক অমসুং শেন থাদবগী খুদোংচাবশিং চাওথোকহনবা অমদি তোঙান তোঙানবা লমদা য়াহনবনা লাইচৎ মতুংদা শেন্মিৎলোন অমুক হিঙ্গৎহনবদসু মতেং ওইগনা হায়বা ৱাফমসি হায়রগা মন্ত্রী বিব্যুনা মহাক্কী ৱারোল লোইশিনখি‍।

আই.সি.বি.সি.গী সু.ই.ও. মিস নদিরানা হায়খিবদা লৌউ-শিংউ অমসুং এগ্রি-তেক্কী মতাঙদা ভারত অমসুং কনাদাগী মরক্তা লৈরিবা লল্লোন ইতিক্কী খুদোংচাবশিং নীংথিনা য়াওরবা ৱাইত পেপর অমা অথুবদা আই.সি.বি.সি.না ফোঙদোক্লগনি‍। কনাদিয়ন হায় কমিস্নর তু ইন্দিয়া মিস্তর নদির পতেল, ইন্দিয়ন হায় কমিস্নর তু কনাদা মিস্তর অজয় বিসারিয়া, লৌউ-শিংউ অমসুং লৌমীশিংগী য়াইফ-থৌরাং মন্ত্রালয়গী এদিসনেল সেক্রেতরী দোক্তর অল্‌কা ভর্গব, মপান থৌরম মন্ত্রালয়গী এদিসনেল সেক্রেতরী মিস্তর পি.হরিশ, ইন্দো-কনাদিয়ন বিজিনেস চেম্বরগী সি.ই.ও. মিস নদিরা হমিদ, সি.আই.আই. নেসনেল কাউন্সিল মেম্বর মিস্তর সালিল সিংহাল অমসুং অতৈ মীওইশিংসু থৌরমদুদা শরুক য়াখি‍।

*****