প্রধান মন্ত্রী শ্রী নরেন্দ্র মোদীনা লৈবাক অসিনা ‘প্রোজেক্ত তাইগর’ অমসুং ‘প্রোজেক্ত ইলিফেন্ত’ মায় পাকখ্রবা মতুংদা ‘প্রোজেক্ত লাইয়ন’ অমসুং ‘প্রোজেক্ত দোলফিন’গুম্বা কত্থোক্লবা প্রোজেক্তশিংগী খুত্থাঙদা খুদোংথিনিংঙাই ওইরবা থৱায় পানবশিং য়োকখৎনবা থৌরাং লৌখৎলি‍ হায়না ফোঙদোকখ্রে‍। ৱাইল্দলাইফ চয়োলগী থৌরমদা অইবা পাউজেল অমদা, শ্রী মোদীনা হায়রিবা প্রোজেক্তশিং অসিদা তোঙান তোঙানবা লমশিংদা লৈরিবা মীওইশিংনা থৌদাং লৌরক্নবা ৱাফম থমখি‍।

ইং-চিকপা অমসুং অহিংসাগী য়ুম্বী ওইরিবা মহাত্মা গান্ধীগী মপোক কুমওনগা ফাংজিন্নরিবা ‘ৱাইল্দলাইফ চয়োল’ পাঙথোক্লিবা অসি লমলক্কী শা-উচেকশিং য়োকখৎনবা অমদি থৱায় পানবা পুম্নমক ইংনা-চিক্না হিংমিন্ননগীদমক লেপ্লিবা খোঙফম অমুক হন্না চেৎশিনহন্নবগী মরম চাবা থৌরম্নি‍, হায়না প্রধান মন্ত্রীনা হায়খি‍।

ঙসিসু প্রোতেক্তেদ এরিয়াগী পাক চাউরবা নেতৱর্ক অমগা লোয়ননা লমলক্কী শা-উচেকশিং ঙাকথোক্নবগী খোঙফম অসি হান্নগুম চেৎনা লেপ্লি হায়না মহাক্না হায়খি‍। ইকো সেন্সিতিব জোনশিংনা অকোয়বগী ঙাক্লৌ পীরি অমদি নেসনেল পার্ক অমসুং সেংচুএরীশিংগী অকোয়বদা বফ্ফর অমা ওইনা থবক তৌরি হায়না হায়রদুনা, শ্রী মোদীনা হায়খিবদা লমলক্কী শা-উচেকশিংগী ফংলিবা মফম হেনগৎহন্ননবা অসিগুম্বা মফম কয়ামরুম লাউথোকখ্রে‍। লৈবাকসিনা এসিয়াতিক নোংশাগী লেমহৌরিবা লমলক্কী শা মশিংশিং য়োক্লি হায়না পল্লদুনা কৈ মশিং শরুক অনি হেনগৎহন্নবা ফিরেপ অদুসু মাঙজৌননা ফংবা ঙম্লে হায়না মহাক্না হায়খি‍।

প্লাস্তিক্কী অমোৎ অকায় লোইশিনবগী মতাঙদা ভারতনা পীরিবা অখন্নবা মীৎয়েঙগী মতাঙদা, অফবা বাইওদাইভর্সিতী অমগা লোয়ননা তুং কোইগদবা চাওখৎ মায়কৈদা চঙশিন্নবগীদমক সিঙ্গল-য়ুজ প্লাস্তিক অমসুং মাইক্রো-প্লাস্তিক পোলুসন হন্থহন্নবগী ভারতনা খোঙফম চেৎনা লেপ্লি হায়না প্রধান মন্ত্রীনা হায়খি‍। ভারত অসি মাইগ্রেতরী উচেক মখল কয়াগী ময়ুম ওইবনা লৈবাক অসিনা মাইগ্রেতরী উচেকশিং অমসুং শা মখলশিং য়োকখৎনবা অহেনবা মীৎয়েঙ থম্লি হায়না শ্রী মোদীনা হায়খি‍।

ভারত্তা মালেমগী অপুনবা কংফালগী শরুক্কী চাদা ২.৪গী লমসিদা মালেমগী অপুনবা মীশিংগী চাদা ১৭ লৈরি অমদি লৈবাক অসি চাওখৎহনবা হায়বসি খ্বাইদগী মরুওইবনি, অদুম ওইনমক লমলক্কী শা-উচেকশিং অমসুং বাইওদাইভর্সিতী য়োকখৎপা হায়বসিসু চপ মান্ননা মথৌ তাই হায়না শ্রী মোদীনা হায়খি‍।

*****