অকোয়বগী ফিবম কনবা মীয়ামগী খোঙজং অমা ওইহন্নবা অমসুং মসিগীদমক মীয়াম , মরুওইনা নহারোলশিংনা মরুওইবা থৌদাং লৌনবা ভারতকী উপ-রাস্ত্রপতি এম.বেনকাইয়া নাইদুনা ফোঙদোকখ্রে।

হিমালয় নুমিৎ থৌরমদা পাংথোকপা ৱেবিনার অমদা ৱা ঙাংবদা উপ-রাস্ত্রপতিনা হায়খি মীওইবা অমসুং মহৌশা পুন্না হিংমিন্ননবা ঐখোয়গী চাউখৎ-থৌরাংগী থবকশিং অমুক হন্না খন্থবা দরকার ওইরে। হিমালয়শিং মমল নাইদ্রবা লনশিংগী তুংনফমনি অমসুং মখোয় ঙাক্নবা অমসুং কন্নবা থবক পায়খৎপা দরকার ওই। মফম অদুগী মহৌশাগী লনশিং, চৎনবী অমসুং মমাংঙৈদগী লৈরক্লবা লৌশিংদা য়ুম্ফম ওইবা হিমালয় শীনবা থুংনা কোনশিনবা চাউখৎ-থৌরাংগী লাল্লোং অমা য়াৎকদবনি।

অকোয়বগী ফিবম শোকচিল্লবা হিমালয়গী ফিবম অসিদা পুক্নিং চিংশিল্লদুনা উপ-রাস্ত্রপতিনা হায়খি অকোয়গী ফিবম মাঙহল্লগা চাউখৎ-থৌরাংগী থবক পায়খৎলোইদবনি। মহৌশাগী ফিবমদা ঐখোয়না থৌশাদবদগী য়াম্না তোইনা মহৌশাগী ওইবা অমাং-অতাশিং থোক্লিবনি। হিমালয় চীংজাউশিং লৈত্রবদি ভারত লৈকংলা অমা ওইগনি।

শ্রী নাইদুনা হায়খি চীংজাউ পরেংশিং অসিনা ঐখোয়গী লৈবাক অসি ময়াই থংবা এসিয়াদগী হুমলকপা অইংবা নুংশিৎ ঙাকথোকপা খক নত্তনা মোন্সুন নুংশিৎকী পন অমা ওইদুনা অৱাং থংবা ভারত্তা নোং চুহল্লিবনি। হায়রিবা চীংজাউশিং অসিদা লৈরিবা গ্লেসিয়র ৫৪,০০০ হেনবা অসিদগী এসিয়াগী অচৌবা তুরেল ১০গী হৌরকফম ওইরি অমসুং মীওইবা খুন্নাইগী তঙ্খাই অমগী হিংনবা লম্বী ওইরি। হিমালয়দা হায়দ্রোপৱার পুথোক্নবা খুদোংচাবা কয়া লৈরি অমসুং মসিনা মৈখু চেন্দবা ইনর্জি পুথোকফম অমা ওইহন্দুনা কার্বোন থাদোকপা হন্থহনবা ঙমগনি।

মালেম অসি শাবা হেনগৎলকপদগী হিমালয়গী উন মপাকশিং শৌদোরকপা হেনগৎলকপদা নুঙনাংবা ফোঙদোকলদুনা উপ-রাস্ত্রপতিনা হায়খি মসিনা থক্নবা, ইথৈ অমসুং ইনর্জিগী ঈশিং লৌনবা হিমায়লগী মখা পোন্না হিংলিবা মীওই বিল্লিয়ন কয়াগী পুন্সিদা শাথিনা শোকহনগনি। অসিগুম্বা মখলগী মহৌশা মীরাইবগী থবক ঐখোয়না মখা তানা চৎথরোইদবনি। করিগুম্বা ঐখোয়না মহৌশা মীরাইরবা নৎত্রগা কা হেন্না শীজিন্নরিবদি, ঐখোয়না ঐখোয়গী তুংগী ফিবম খুদোংথিবা তাহনবনি। অকোয়বগী ফিবম ঙাকপা অসি ঐখোয়গী ‘চৎনবী’ অমনি অমসুং তুংগী য়াইফনবা মহৌশাদা ইকায়খুম্নবা অমসুং মহৌশা কনবগী চৎনবী অসি ঙাক্কদবনি। 

হিমালয়গী অকোয়বগী ফিবম কন্নবা সরকারনা পায়খৎলিবা তোঙান-তোঙানবা থবকশিংগী মতাংদা শ্রী নাইদুনা হায়খি ঐখোয়গী চাউখৎ-থৌরাংগী থবক অসি তুংকোইনা চৎনবা য়াবা ওইগদবনি। শেন-থুম তানবগী থবকশিং অমসুং মফম অদুগী অকোয়বগী ফিবম অনিগী মরক্তা খল কাইহন্দনা থম্নবা চাউখৎ-থৌরাংগী নমুনা অমা শেমগৎকদবনি।

মসি হিমালয়দা লৈরিবা রাজ্যশিংগী খক নত্তনা হিমালয়দগী হৌরকপা তুরেলশিংগী মখা পোন্না হিংলিবা অৱাং ভারতকী রাজ্য খুদিংমক্কী তুংগীনি। অকোয়বগী ফিবম শোক্লবা মফম অমদা ওর্গানিক ওইবা লৌউ-শিংউগী থবক পায়খৎপা অসি খ্বাইদগী ফবা লম্বী ওইগনি। সিক্কিম, মেঘলয় অমসুং উত্তরখান্দ মসিগী মাইকৈদা চঙশিল্লে।

লৌমীশিংনা ওর্গনিক ওইবা লৌউ-শিংউগী থবক পায়খৎপা মতমদা থেংনরিবা খুদোংচাদবশিং কোকহন্নবা পাম্বৈশিং পুথোক্নবা মহাক্না সরকার, সাইন্সতিস্তশিং অমসুং য়ুনিভর্সিতিশিংদা খঙহনখি।

শ্রী নাইদুনা হায়খি হিমালয়দা শেন-থুম চাউখৎহন্নবা তুরিজমনা মরুওইবা লম্বী অমা ওইরি। অকোয়বগী ফিবম শোকহল্লোইদবা তুরিজমগী থবকশিং পায়খৎকদবনি।মহৌশাগী ফজবা য়েংনবা অমসুং লাই খুরুম্বা ওইনা ফজরবা চীংজাউশিং অসিদা লমকোয়বা মীওই কয়া লাক্লি। অৱাংবা হিমালয়গী লমকোয়ফমশিংদা পোল্লুসন অমসুং অমোৎপশিংগী খুদোংচাদবগী মতাংদা মফম অদুগী মীয়াম অমসুং লমকোয়বা লাকপা মীওইশিং ৱাখল তাহন্নবা তকশিল্লদুনা মহাক্না হায়খি করিগুম্বা অকোয়বগী ফিবম শোকচিল্লক্লবদি ,তুরিজমসু শোকচিল্লক্কনি হায়বা মীয়াম্না খঙবা দরকার ওই।

থৌরম অদুদা, ইজুকেসন মিনিস্তর, দোক্তর রামেস পোখ্রিয়াল নিসাননা ইবা “সন্সদ মৈ হিমালয়” কৌবা লাইরিক অমগী কপি অমা ভর্চুএল ওইনা উপ-রাস্ত্রপতিদা খুদোল তমখি। 

লমদম অদুগী মীয়ামগী হিংনবা লম্বী ফংনবা অমসুং অকোয়বগী ফিবম কাইহন্দবা লৌউ-শিংউগী তেক্নোলোজিশিং পুথোক্নবা অনিল প্রকাস জোসি জিগুম্বা গ্রিন এক্তিবিস্তশিংনা পায়খৎলিবা থবকশিং উপ-রাস্ত্রপতিনা থাগৎখি।

ৱেবিনার অদুদা ইজুকেসন মিনিস্তর, দোক্তর রামেস পোখ্রিয়াল নিসান, পর্সোনেল, পব্লিক গ্রিভান্সেস অমসুং পেন্সন্সকী রাজ্য মন্ত্রী(ইন-চার্জ) দোক্তর জিতেন্দ্র সিংহ, য়ুথ এফেয়ার্স অমসুং স্পোর্তসকী রাজ্য মন্ত্রী কিরেন রিজিজু, ফাইনান্স অমসুং কোরপোরেত এফেয়ার্সকী রাজ্য মন্ত্রী অনুরাগ সিংহ থাকুর, নেসনেল সেকুরিতি এদভাইজর অজিৎ দোবাল ,চীফ ওফ দিফেন্স স্তাফ জেনেরেল বিপিন রাৱাত, প্রিন্সিপাল সাইন্তিফিক এদভাইজর বিজয় রাগাবান, নিতি অয়োগকী ভাইস চেয়রমেন রজিব কুমার, হিমালয়ান ইনভাইরোনমেন্তেল স্তদিজ এন্দ কঞ্জরবেসনগী ফাউন্দর দোক্তর অনিল প্রকাস জোসি, দিপার্তমেন্ত ওফ সাইন্সগী সেক্রেতরি অসুতোস শর্মা, বাইও-তেক্নোলোজি দিপার্তমেন্তগী সেক্রেতরি রেনু শ্বারুপ শরুক য়াখি।

*****