মখল অসিগী অহানবা ওইরবা কাত্রা(জে অমসুং কে)-দিল্লী এক্সপ্রেস রোদ কোরিদোর থবক হৌরে, ২০২৩দা লোইশিনগনি অমসুং লম্বী অসি শীজিন্নবা হৌবা মতমদা কাত্রাদগী দিল্লী ফাওবা চৎপগী মতম পুং ৬.৩০ অমসুং জম্মুদগী দিল্লী ফাওবা চৎপদা শুপ্নগী পুং ৬ খক চঙগনি।

ঙসি নিউ দিল্লীদা য়ুনিয়ন মিনিস্তর দোক্তর জিতেন্দ্র সিংহনা হায়খি মসিগী এক্সপ্রেস রোদ কোরিদোর অসি শীজিন্নবা য়াবা মতমদা মীয়াম্না দিল্লী ফাওবা ত্রেন নৎত্রগা এয়রদা চৎপগী মহুৎতা লম্বীদা চৎপনা হেন্না পাম্লগনি। লম্বী অসিগী তোখাইবা মশক অমা ওইনা মসিনা শেংলবা সহর কাত্রা অমসুং অমৃতশর শম্নগনি অমসুং সহর অনি অসিগী মরক্তা লৈরিবা অতোপ্পা মরুওইবা লাইশঙশিংসু য়ৌনবগী খুদোংচাবা পীরগনি।

দোক্তর জিতেন্দ্রনা হায়খি এম/এস ফিদবেক কন্সলতেন্তস লিমিতেদনা সর্ভে লোইশিল্লবা মতুংদা লম লৌশিনবগী থবক লোইশিল্লক্লে অমসুং লম্বী শেম্বগী থবক হৌরে। লম্বী অসি শেম্বদা লুপা করোর ৩৫,০০০ হেন্না চঙগনি হায়না পানরি অমসুং এক্সপ্রেসৱে কোরিদোর অসিনা জে অমসুং কেদা জম্মু অমসুং কাথুৱা, পঞ্জাবতা জলান্ধর, অমৃতশর, কাপুরথালা অমসুং লুধিয়ানা ফাওগনি।

মহাক্না মখা তানা হায়খি থবক অসিগা ইরোইন্না পাথানকোত অমসুং জম্মুগী মরক্তা লৈবা নেসনেল হাইৱেজগী লেন ৪ অসি লেন ৬তা ওন্থোকপগী থবক পায়খৎলে,মসিনা মীয়াম্না জম্মু, কাথুৱা অমসুং পাথানকোতকী মরক্তা চৎথোক-চৎশিনদা খুদোংচাবা হেনগৎহল্লগনি। লম্বী অসি চহি অহুমগী মনুংদা শেম্বা লোইশিনগনি। লমদম অসিদা ইন্দিস্ত্রি অমসুং শেন থাদবা হেনগৎহনবদা রোদ কোরিদোর অসিনা অচৌবা অওনবা অমা পুরক্লগনি। মসিনা কাথুৱা অমসুং জম্মুদা শেন-থুমগী থবকশিং হেনগৎহন্নবা লম্বী য়াৎলগনি।

পনবা য়াবদি, কাত্রা ভাইসনো দেবগী মীহুৎ ওইনা লোক সভাগী মেম্বর অমা ওইরিবা দোক্তর জিতেন্দ্রনা ২০১৫দগী মসিগী প্রোজেক অসি তকশিন্দুনা লাকপনি অমসুং ঙসিদগী চহি অহুম মখাইগী মমাংদা কাত্রাদা পাংথোকপা থৌরম অমদা লম্বী অসিগী মহাক্না পীশিনখিবা প্রোপোজেল অমা রোদ ত্রান্সপোর্ত অমসুং হাইৱেজ মিনিস্তর নিতিন গাদকরিনা য়ারে হায়না লাউথোকখি অদুবু মসি থবক ওইনা পাংথোক্নবা হোৎনবদা মতম লৌখিবনি।

হৌখিবা চহি ৬ অসিদা লমদম অসিদা অনৌবা লম্বীশিং অমসুং থোঙশিং শানবা কেন্দ্রনা ফন্দ মরাংকাইনা কাইথোকপগীদমক মহাক্না প্রধান মন্ত্রী নরেন্দ্র মোদী থাগৎখি। প্রধান মন্ত্রী নরেন্দ্র মোদীনা শঙ্গাখিবা চেনানি-নাশ্রী তন্নেল অমসুং অহানবা ওইনা দোক্তর শ্যামা প্রসাদ মুখর্জিগী মমিং থোনখিবা অদু দোক্তর জিতেন্দ্রনা অমুক হন্না নিংশিংখি।

*******