ওগস্ত ৭তা কোবিদ পোজিতিবকী তেস্ত তৌখিবা হোকীগী শান্নরোই মঙা ফীভম ফনা লৈরি। মখোয়শিং অসি সাইগী ইন-হাউস দোক্তরশিংগা লোয়ন-লোয়ননা সাইনা হায়জরুবদা মফমদুদা থবক শিন্নখিবা রাজ্য সরকারগী দোক্তর অমনসু য়েংশিল্লি।  মসিদা নত্তনা সাইদা শান্নরোইশিং অদুবুসু য়েংশিনখিবা মনিপাল হোসপিতালদগী য়াম্না অহৈবা দোক্তরশিং য়ৌরকখ্রে। রাজ্য সরকারনা থবক শিন্নখিবা অমসুং শান্নরোইশিং অসি য়েংদুনা অনাবগী লাইওং লেপ্পা দা.অভিনাশ ঐচ.আর.না হায়খি, "শান্নরোইশিং অসিগী হকচাংগা মরি লৈনবা তেম্পরেচর, ওক্সিজেনগী থাক্নচিংবশিং অসি নিংথিনা য়েংশিনখ্রে অমদি শাবন্নরোই মঙামক সিম্পতোমেতিক কেস অসি খজিক্তং লৈ হায়বা ফংখ্রে। অমখক নত্তনা শান্নরোই মরীদি লাইহৌ হৌখিদে। মখোয়শিং অদু ফীভম ফনা লৈরি অমসুং ঐখোয়না মখোয়গী ইম্যুনিতী হেনগৎহন্দুনা অতৈ ফগৎনবা হিদাকশিং পীখ্রে।" প্রোতোকোলগী মতুং ইন্না দোক্তরশিংনা মখোয়গী হকচাংগী ফীভম অসি অমুক হন্না চাং চানা লৈত্রিবফাওবা মতম নাইনা ইনভেস্তিগেসনশিং তৌখি। 

শান্নরোই মঙা অদুগী মনাক্তা কেম্পস অদুদা সাইগী ওথোরিতীশিংনা পুং ২৪গী ওইনা লৈবা-লৈতবা য়েংশিন্নবা অখন্নবা মওংদা মীৎয়েং থম্নবা অমসুং মখোয়না মথৌ তাবশিং অদু ফংহন্নবা সাই ওথোরিতী ২ থমখ্রে। বেঙ্গলুরুদগী ৱা ঙাংলদুনা ভারতকী নুপাগী হোকী তীমগী চীফ কোচ গ্রাহম রৈদনা হায়খি, “ঐহাক শান্নরোই মঙামকসিগা লেপ্তনা পাও ফাওনরি অমসুং মখোয় লোইনা ফীভম ফনা লৈরি। মখোয়শিং অদু খ্বাইদগী ফবা মওংদা চেকশিন্না থম্নবা সাইনা থৌরাং খুদিংমক তৌখ্রে। চেফশিংনা মখোয়গী অপাম্বগী মতুং ইন্না মেনুদা য়াওদবা অখন্নবা মথেলশিং থোংলি অমসুং শান্নরোইশিংনা মদুদা য়াম্না হরাওই।”

******