কেন্দ্রগী রোদ ত্রান্সপোর্ত অমসুং হাইৱে মন্ত্রী শ্রী নিতিন গদকরিনা ঙসি কনফেদেরেসন ওফ ইন্দিয়ন ইন্দস্ত্রীনা শীনবা ইন্দিয়া@৭৫ সম্মিৎঃ মিসন ২০২০দা ৱা ঙংখ্রে। মহাক্না হায়খিবদা লৈবাক অসিগী এস্পিরেস্নেল দিস্ত্রিক্ত ১১৫দা এম.এস.এম.ই. ইন্দস্ত্রী হেন্না চাউখৎহনবগী তঙাই ফদবা লৈ। মখোয়না জি.দি.পি.দা শরুক য়ারিবসি লাইথোক্না লৌবা য়ারোই অমসুং করিগুম্বা মখোয়দা মিৎয়েং চংলবদি মখোয়না অতোপ্পদা থবক পীবগী চাং য়াম্না হেনগৎকনি।

মন্ত্রীনা হায়খিবদা সরকারনা হৌজিক খ্বাইদগী পিকপা য়ুনিৎশিংসু মখোয়গী মাইক্রো ফাইনেন্সিএলগী তঙাই ফদবশিং পীদুনা এম.এস.এম.ই.গী মনুং চলহন্নবা হোৎনরি। এম.এস.এম.ই.না কোনবা হীরমশিং অসি হন্দক্তা পাক চাউথোকখ্রে অমসুং লুপা কোতি ৫০ ফাওবগী মনুংদা শেল থাদবা অমসুং লুপা কোতি ২৫০ ফাওবা চহিগী শেন্থোক লৈবা ইন্দস্ত্রীশিং অসি এম.এস.এম.ই.গী অনৌবা ৱাহন্থোক্কী মনুং চলহনখ্রে। মসিদা নত্তনা এম.এস.এম.ই.গী মখাদা লৈবা মেন্যুফেকচরিং অমসুং সর্বিস সেক্তরশিংসু মান্নবা ৱাহন্থোক অমগী মখাদা অমত্তা ওইহনখ্রে।

শ্রী গদকরিনা সি.আই.আই.গী মীহুৎশিংদা লৈবাক অসিগী শেন্মিৎলোনগী ফিভম ফগৎহন্নবা অনৌবা ৱাখল্লোন অমসুং পাউতাক পীরক্নবা হায়খ্রে। কারবারগী মকোক থোংবা থাক ১০না মীরমদা পোত্থোক থাদোকপগী ৭০% শরুক ওইহল্লিবা চাইনাগী মওংবু মহাক্না খুদম ওইনা পীখি। মহাক্না হায়খিবদা তেক্নোলোজী ফগৎপগা লোয়ননা ভারতসু এম.এস.এম.ই.গী সেক্তরশিংদা এক্সপোর্তকী অনৌবা থৌওং কয়া অমা পুথোক্নবা য়েংশিনবা য়াই হায়খি। মসিনা এন্সিল্লারী য়ুনিৎ মশিং কয়া হেনগৎহনবদা তেংবাংগনি হায়খি।

শ্রী গদকরিনা সি.আই.আই.দা বেঙ্ক গেরেন্তী (বি.জি.) তঙাই ফদবগী থৌওং মুত্থৎনবা লম্বীশিংগী ইন্স্যুরেন্স তৌনবা থৌওং অমা শেম্মু হায়খি। মসিনা লম্বী শেম্বগী প্রোজেক্তশিংদা খোঙজেল য়াঙহল্লগনি অমসুং প্রোজেক্ত থুনা লোয়শিনবগা ঙম্নবা শেল থিবদসু থুগৎহনগনি। মহাক্না হৌজিক হৌদোক্তুনা লৈরবা অনৌবা গ্রীন এক্সপ্রেসৱে প্রোজেক্ত ২২গা লোয়ননা লৈবাক অসিদা অহোঙবা লাক্লিবা লম্বী শোরোক্কী ফিভম মতৌ করম্না ফগৎহনগনি হায়না শন্দোক্না তাকখি।

***