লাইরিক তম্বগী হৌরগা লৈবাক ঙাকপা ফাওবা য়াওনা তোঙান-তোঙানবা হিরমশিংদা মমালোন শীজিন্নদুনা ভারতকী তোঙান-তোঙানবা লোনশিং ঙাক-শেন্নবা অমসুং য়োকখৎনবা ভারতকী উপ-রাস্ত্রপতি এম. ভেনকিয়া নাইদুনা হায়রি।

লৌশিং লৈহনবা : ইমালোন” হায়বা হিরমদা হায়দ্রবাদ য়ুনিভর্সিতি অমসুং তেলুগু একাদেমিনা শীনবা ওনলাইন ৱেবিনার অমা হাংদোকপা থৌরমদা উপ-রাস্ত্রপতিনা হায়খি রাজ্য সরকারনা মখোয়গী ওফিসিএল লোনশিংদা অখন্নবা মিৎয়েং চঙবা দরকার ওইরে।

মহাক্না হায়খি লোন অসি সভেত্য অমগী হিংনবা লম্বীনি, লোন অমনা মীয়ামগী শক্তম, কলচর অমসুং চৎনবীশিং মশক তাকই। ঈশৈ, জগোয়, চৎনবীশিং,কুম্মৈশিং , অরিবা লৌশিং অমসুং হেরিতেচ ঙাক্তুনা থম্বদা লোন্না মরুওইবা থৌদাং অমা লৌরি।

প্রাইমারি থাক ফাওবা মমা লোন্দা শোইদনা লাইরিক তম্নবা তকশিল্লদুনা উপ-রাস্ত্রপতিনা হায়খি, পাক-শন্না ঙাংনবা মতম খক্তদা লোন অমা মমিং চৎকনি। করিগুম্বা ইংলিস খক্তদা লাইরিক তম্লবদি অফবা ওইগনি হায়না খনবা অসি অরানবনি। মখোয়গী মমালোন ফজনা খঙলবা মীওইশিংনা অতোপ্পা লোনশিং য়াম্না লাইনা খঙবা ঙম্মি হায়বা থিজিনবদগী খঙলে।

মহাক্না হায়খি ২০১৭ ফাওবগী মনুংদা নোবেল প্রাইজ (নোবেল পিছ প্রাইজ য়াওদনা) ফংখিবশিংগী চাদা ৯০ মখোয়গী মমালোনশিংদা লাইরিক তম্বা লোইশিনখি। অতোপ্পা থিজিনবা অমদা, মমালোনশিং মরুওইনা লৌবা লৈবাকশিং মালেমগী মকোক থোংবা লৈবাক ৫০গী মনুংদা য়াওরি হায়বা খঙলে।

মহাক্না হায়খি করিগুম্বা ইংলিস ফজনা হৈরবা মতমদা রিছর্স তৌবা ঙমগনি হায়না খনবা অসি অচুম্বা নত্তে। গ্লোবেল ইন্নোবেসন ইন্দেক্সতা য়াওরিবা লৈবাক ৪০-৫০গী চাদা ৯০ মখোয়গী মমলোনশিংদা লাইরিক তম্বীরি।

উপ-রাস্ত্রপতিনা হায়খি মখোয় ইংলিস খঙলবসু, ভারতকী শক্নাইরবা মীওইশিংগা উনবা মতমদা মপানদগী লাকপা ভি.আই.পিশিং মখোয়গী মমালোনশিংদা ৱা ঙাংখি। মখোয় মশানা মশাবু ইকায়খুম্নবা উৎলি হায়বা মখোয়না পাউজেল অমা পীরে। সাইন্স অমসুং তেক্নিকেলগী তার্মশিং ভারতকী লোনশিংদা অরাইবা মওংদা ওন্থোক্কদবনি।

ভারতকী লোনশিংগী মতাংদা থিজিনবা হেনগৎহন্নবগী মতাংদা উপ-রাস্ত্রপতিনা হায়খি থিজিল্লিবা মীওইশিংনা মুৎখিগদৌরবা ৱাহৈশিং থিদোক্তুনা নুমিৎ খুদিংগী ৱারি শানবদা শীজিন্নহনগদবনি অমসুং শিথরক্লবা লোনশিং এসেশিং অমসুং তম্নবা লাইরিকশিংদা য়াওহনগদবনি। য়ুম অমসুং মফম খুদিংদা ওজাশিং অমসুং মমা-মপাশিংনা মখোয়গী অঙাংশিং মমালোন ঙাংনবা পুক্নিং থৌগৎকদবনি। মমালোন্না অতোপ্পা কাংলুপকা ফাওনবা য়াবা লোন ওইগদবনি অমসুং লাইরিক তম্বা, শেন-থুম, খুন্নাই অমসুং অতোপ্পা থবকশিংদা শীজিন্নগদবনি। লমদম অসিগী লোনশিং পাক-শন্না শীজিন্ননবা মেদিয়ানা থবক পায়খৎকদবনি।

ওনলাইন ৱেবিনার অদুদা হায়দ্রবাদ য়ুনিভর্সিতিগী ভি.সি পি.অপ্পা রাও, দি.আর.দি.ওগী চেয়রমেন দোক্তর সতিস রেদ্দি, হায়দ্রবাদ য়ুনিভর্সিতিগী তেলুগু দিপার্তমেন্তগী মকোক প্রোফেসার অরুনা কুমারি, সান্তা বাইওতেককী চেয়রমেন কে.এল বারাপ্রসাদ রেদ্দি, তেলুগু একাদেমগী দিরেক্তর এ সত্যনারায়ানা রেদ্দি অমসুং তেলাঙ্গানা স্তেৎ ওফিসিএল লেঙ্গোইজ কমিসনগী চেয়রমেন দেবুলাপালি প্রাভাকার শরুক য়াখি।

*****