চফু শাবা কাংলুপ্পু মপাঙ্গল কনখৎনবা অমসুং মানবা থাক অমদা লৈনবা অমদি ইন্দিয়াগী “আত্মানির্ভর” ফংনবগী পান্দমদা, য়ুনিয়ন হোম মিনিস্তর শ্রী অমিত শাহনা ইলেক্ত্রিক্কী পোত্তর হ্বীল ১০০, খাদি এন্দ ভিলেজ ইন্দস্ত্রী কম্মিসন (কে.ভি.আই.সি.)গী কুম্হার সশাক্তিকরন য়োজনাগী মখাদা কলাকার ১০০দা য়েন্থোকখ্রে।  শ্রী অমিত শাহনা ভিদিও কনফরেন্সকী খুত্থাংদা নই দিল্লীদা লৈবা মহাক্কী পার্লিয়ামেম্তরী কনস্তিত্যুন্সীদগী ইলেক্ত্রিক্কী পোত্তর হ্বীল য়েন্থোকখি।

কুম্হার সশাক্তিকরন য়োজনাবু থাগৎপা ফোংদোক্তুনা, হোম মিনিস্তরনা হায় মদুদি লৌখৎলিবা খোঙথাং অসিনা চফু শাবা কাংলুপ্পু তেক্নোলোজিগী মতেং লৌদুনা মপাঙ্গল কনখৎহন্দুনা পোত্থোক পুথোকপদা য়াম্না শাংনা কান্নরগনি লোয়ননা নাৎকী চফু শাবগী কলাবুসু য়োকখৎলগনি। মহাক্না কে.ভি.আই.সি.না চফু শাবদা ত্রেন পিরবা চফু শাবা মীওই মঙাগা পাও ফাওনখি অমসুং মখোয়গী তুংদা চাওখৎনবগীদমক ইলেক্ত্রীক্কী পোত্তর হ্বীল অমসুং অতৈ খুলাইশিং য়েন্থোকখি।

 “ঐনা চফু শাবশিংগী পুন্সিদা অহোংবা অমা লাক্তুনা তংদু লৈতাবা উবদা হরাওজৈ।  মোদী সরকারনা সেন্তরদা প্রজাপতি কাংলুপ্পু মখোয়গী হেন্না ফবা পুন্সি মহিংগীদমক্তা মতম লৈবা খিবিক্তা খন্দুনা লৈ। ইলেক্ত্রীক চাক য়েন্থোকপসি ঐখোয়গী প্রধান মন্ত্রীনা গুজরাতকী মীয়ামদা পিবা খুদোল অমনি। মসিনা মখোয়গী পুন্সিবু কোম্না হিংদুনা অমসুং পোত্থোক্কী চাং হেনগৎহলগনি” হায়না শ্রী অমিত শাহনা হায়খি।

 “লৈবাক অসিগী নাৎকি কলাবু য়োকখৎপা হায়বসি প্রধান মন্ত্রী শ্রী নরেন্দ্র মোদী জীগী মংলান্নি মীপুম খুদিংমক্না ইন্দিয়াবু আত্মানির্ভর ওইহনবদা মখোয়গী হৈ-শিংবা পুথোক্তুনা শরুক য়াগদবনি। মোদী সরকারনা মাঙজৌননা থবকশিং অসিবু লোয়শিনবা ফাওবদা চংগদবা থৌদাংশিং লৌদুনা লৈরি। কে.ভি.আই.সি.গী  কুম্হার সশাক্তিকরন য়োজনা অসি য়াম্না মরুওইবা খোঙথাং অমনি” হায়না মহাক্না মখা শমথখি।

হোম মিনিস্তরনা থাজবা পীদুনা হায়খি মদুদি পোৎ য়োনফম মফম চানা শেম্বা, লোয়ননা রেলৱেজগা পুন্সিনবা অমসুং পোৎ য়োনফম পরিং চানা য়াৎপা অসিনি। শ্রী অমিত শাহনা শোন্থরবা কাংলুপ্তা পীরিবা খুদোংচাবশিং অসিগীদমক কে.ভি.আই.সি.গী  হোৎনজম্নবু থাগৎপা ফোংদোক্লি। “কুম্হার সশাক্তিকরন য়োজনাগী মখাদা পীরিবা শোন্থরবা কাংলুপ্তা পীরিবা খুদোংচাবশিং অসিনা চফু শাবা কাংলুপ্পু “আত্মানির্ভর”গী মায়কৈরোমদা খোঙথাং অমা চংশিল্লী। ঐনা য়াম্না চাওনা আশা তৌই মদুদি কে.ভি.আই.সি.না শোৎথহৌরবা কাংলুপসিগী কান্ননবগীদমক থবক কয়া পায়খৎলকখিগনি” মহাক্না মখা তানা হায়খি ।

গান্ধীনগর দিস্ত্রীক্ততা কে.ভি.আই.সি.না খুঙ্গং ১৪দগী চফু শাবা ১০০ ত্রেনিং পিখ্রে অমসুং ইলেক্ত্রিক্কী পোত্তর হ্বীল ১০০গা ব্লনগর মেছিন ১০ অমগসু য়েন্থোকখি। কুম্হার সশাক্তিকরন য়োজনাগী মখাদা লৈরিবা চফু শাবশিং অসিবু চাংচৎতা থাদা লুপা ৩,০০০দগী লুপা ১২,০০০ ফাওবা ফংহল্লী।

**********