নহা ওইরিবা মীরোলদা ইথিল পীনবা কৎথোকপা, মরৈবাক নিংবা অমসুং থৌনা ফরবা লৈবাক্কী লুচিংবশিং অমসুং নিংতম লান্মীশিংগী ৱারিশিং স্কুলগী লাইরিকশিংদা মরাংকাইনা হাপ্নবা উপ-রাস্ত্রপতি শ্রী এম ভেনকিয়ান নাইদুনা ঙসি ফোংদোকখ্রে।  

অচৌবা নিংতম লান্মীশিং হায়বদি বাল গঙ্গাধর তিলক অমসুং চন্দ্র সেখর অজাদকী মপোক নুমিৎশিংগা মরী লৈন্না ঙসি ফেসবুক্কী পোস্ত অমদা উপ-রাস্ত্রপতিনা মখোয়গী মফমদা ইকায়খুম্নবা উৎখি অমসুং মসিগী অচৌবা লৈবাক অসিগীদমক মখোয়না মঙলম্বা মঙলানশিং মঙফাওন্নবা থবক পাংথোক্নবা মীয়ামদা তকশিনখি।

মপোক নুমিৎ থৌরমশিং চম্না পাউ ফোংবগী মহুৎতা নিংতম লান্মীশিং অমসুং লৈবাক্কী লুচিংবশিংগী ৱারিশিংনা চাংনাইনা ফোংনবা মহাক্না মেদিয়াদা তকশিনখি।

বাল গঙ্গাধর তিলক অমসুং চন্দ্র সেখর অজাদনা পাংথোকখিবা থবকশিং পল্লদুনা মহাক্না হায়খি নিংতম্নবা ভারতকী ইহৌদা লুচিংবা অনিনা মাংজিল থাখি অমসুং ইথিল পীখি।

মহাক্না হায়খি হৌজিক মতমগী নহারোলশিংনা মখোয়গী পুন্সিগী মরমদা অমসুং নিংতম ইহৌদা মখোয়না পাংথোকখিবা থবকশিংগী মতাংদা পাগদবনি। লোয়লম লৈঙাক্কী লান্মীশিংনা বাল গঙ্গাধর তিলক অসি ‘ভারতকী ইহৌগী মপা’ হায়না খঙনখি অমসুং ‘শ্বারাজ’ পুরক্নবা অহানবা ওইনা লাউখিবশিংগী মরক্তা মহাক য়াওখি। মহাক স্কোলার অমনি, অঙ্কগী মীওই অমনি, ফিলোসোফর , পাউমী , খুন্নাইগী অওনবা পুরকপা অমসুং মরৈবাক নিংবা অমনি। মমিং চৎখিবা মহাক্কী ৱারোল “নিংতম্বা অসি ঐগী পোকপদগী য়াওরক্লবা হকনি অমসুং ঐনা মসি ফংগনি” অসিনা তুংদা লাকপা ভারত নিংতম ইহৌগী য়াওল্লোইশিংদা অকনবা ইথিল অমা পীখি।

য়ুমগী কুম্মৈশিং হায়বদি ভাগবান গনেস লাৎপা অসি মীয়ামগী অচৌবা থৌরমশিং হায়বদি সরভাজনিক গনেসউৎসব ওই্হন্দুনা লাইরিক-লাইশু হৈরিবা কাংবুশিংদা লৈবাক্কী ৱাখল্লোন চেনহন্নবা হোৎনখিবগীদমক উপ-রাস্ত্রপতিনা লোকমান্য তিলক থাগৎখি।

মীয়ামদা রাজনিতিগী ৱাখল্লোন লৈহন্নবদা লোকমান্য তিলক্না পুথোকপা অমসুং ইদিতর ওইখিবা চয়োলগী পাউচে অনি হায়বদি কেসারি অমসুং মহারাত্তাগী থৌদাং মহাক্না পনখি।

শ্রী নাইদুনা হায়খি ১৮৮৪দা দেক্কান ইজুকেসন সোসাইতি লিংখৎখিবশিংগী মনুংদা লোকমান্যসু য়াওখি। মীয়ামদা গনতন্ত্র অমসুং নিংতম্বগী ৱাখল্লোল শন্দোকপদা লাইরিক-লাইশু তম্বা অসি অচৌবা শক্তি অমনি হায়বা মহাক্না খঙখি। মীয়াম পাকশন্না লাইরিক হৈহনবদা অচেৎপা থাজবা থমখিবা মীওই অমনি।

চন্দ্র সেখর অজাদকী কৎথোকপা অমসুং থৌনা নিংশিংলদুনা মহাক্না হায়খি মহাক চহি য়াম্না নৌরিঙৈদগী ভারতকী নিংতম ইহৌদা শরুক য়ারকখি।

হিন্দুস্তান সোসিএলিস্ত রিপব্লিকান এসোসিএসন মপাঙ্গল কনখৎহন্নবা মহাক্না লৌখিবা লুচিংবগী থৌদাংশিং অদু শ্রী নাইদুনা থাগৎখি।

মহাক্না হায়খি অজাদ লুচিংবা, ফিলোসোফর অমসুং ভাগত সিংহ য়াওনা নহারোল কয়া নিংতম লান্মী ওইহনখিবা লমজিংবা অমনি। মশাগী চহি ২৫শুবা মতমদা মহাক নিংতম ইহৌগী মমিং চৎপা নহারোল লুচিংবশিংগী মরক্তা অমা ওইখি।

************