ক্লাইমেত এক্সনগী মতাংদা মিনিস্তরশিংগী ৪সুবা ভর্চুএল মীফমদা লৈবাকশিংনা অইং-অশাগী খল কাইহন্দনবা কমদৌনা মখা তানা থবক পায়খৎনবা পেরিস এগ্রিমেন্তনা য়াবা শেন-থুমগী থবকশিং অমুক হন্না পায়খৎকদগে হায়বগী মতাংদা খন্নখ্রে। য়ুনাইতেদ নেসন্স ফ্রেমৱার্ক কনভেন্সন ওন ক্লাইমেত চেঞ্জগী মখাদা পেরিস এগ্রিমেন্ত থবক ওইনা পাংথোক্নবা অমসুং মালেমগী ওইনা রাজনিতিগী থাজবা পীখিবশিং থবক ওইনা পাংথোক্নবা ৱা খন্ননবা পাংথোকখিবা মীফম অদু য়ুরোপিয়ান য়ুনিয়ন, চাইনা অমসুং কানাদানা পুন্না লুচিংখি।

ভারতকী মহুৎশীনখিবা য়ুনিয়ন ইনভাইরোনমেন্ত মিনিস্তর প্রকাস জাবারেকরনা হায়খি অইং-অশাগী খল কাইহন্দনবা ঐখোয়গী লৈবাক্না শিংথাংনিংঙাই ওইরবা থবকশিং পায়খৎলে অমসুং মসি তুংদসু মখা তানা পায়খৎখিগনি। য়ু.এন.এফ.সি.সি.সি অমসুং পেরিস এগ্রিমেন্তগী মখাদা শেন-থুম অমসুং তেক্নোলোজিগী মতেং পাংনবা থাজবা পীখিবশিং চাউখৎলবা লৈবাকশিংনা থবক ওইনা পাংথোক্কদবনি। ২০২০দা য়ু এস দোল্লর ত্রিলিয়ন ১ পীগনি হায়খিবা অদু হৌজিক ফাওবা পীদ্রি অমসুং চাউখৎলক্লিবা লৈবাকশিংনা অইং-অশাগী খল কাইরকপা ঙাকথোক্নবা থবক পায়খৎপা ঙম্নবা ২০২০গী লেমহৌরিবা থা ৫ অসিগী মনুংদা পীগনি হায়খিবা শেনফম অদু পীরক্কনি হায়বগী থাজবা মহাক্না থম্লি।

য়ুনিয়ন মিনিস্তরনা হায়খি ২০০৫ অমসুং ২০১৪গী মরক্তা ভারতনা মৈখু থাদোকপা চাদা ২১ হন্থহনবা ঙমখি অমসুং লৈবাক অসিনা মশানা য়ানা থমখিবা পান্দম অদু ২০২০গী মমাংদা ফংখ্রে। হৌখিবা চহি ৫দা ভারতকী রিনিউয়েবল ইনর্জি পুথোকপা ঙম্বা চাদা ২২৬ হেনগৎলে অমসুং হৌজিক গিগাৱাত ৮৭ হেন্না পুথোক্লে। অপুনবা মৈ পুথোক্লিবা অসিদা নন-ফোসিল সোর্সশিংদগী পুথোকপা ২০১৫গী মার্চতা চাদা ৩০.৫ ওইরম্বদগী ২০২০গী মেদা চাদা ৩৭.৭দা হেনগৎলে। ঐখোয়গী রিনিউয়েবল ইনর্জি অসি গিগাৱাত ৪৫০ ফাওবা পুথোক্নবা ঐখোয়গী প্রধান মন্ত্রীনা পান্দম থম্লি।

মিনিস্তরনা মখা তানা হায়খি ঐখোয়না খুঙ্গংগী লমশিংদা এল.পি.জি কন্নেক্সন মিল্লিয়ন ৮০ পীখ্রে। লৈবাক অসিগী অপুনবা লমগী পাক-চাউবগী চাদা ২৪.৫৬ ওইদুনা ভারতকী অপুনবা উমং অমসুং উ হৌবা শরুক অসি ইসক্বার কিলোমিতর ৮,০৭,২৭৬নি। উজৱালা স্কিমগী মখাদা এল.ই.দি ব্লব মিল্লিয়ন ৩৬০ হেন্না য়েনথোকপগী চহি অদমা ইলেকত্রিসিতি য়ুনিত বিল্লিয়ন ৪৭ কনবা ঙম্লে অমসুং চহি অমদা কার্বোনদাইওক্সাইদ তন মিল্লিয়ন ৩৮ হন্থহনবা ঙম্লে।

শ্রী জাবারেকরনা হায়খি ২০২০গী এপ্রিল ১দগী ভারতনা মৈখু থাদোকপগী মতাংদা ভারত স্তেজ-৬ চৎনবা হৌরে। মসি ২০২৪দগী চৎনবা হৌনবা মমাংদা ৱারেপ লৌখিবনি। স্মার্দ সিতি মিসনগী মখাদা অহানবা ওইনা ভারতকী সহরশিংনা অইং-অশাগী খল কাইরকপা থেংনবা ঙম্নবা ক্লাইমেত স্মার্দ সিতি এসেসমেন্ত ফ্রেমৱার্ক ২০১৯ হৌদোক্লে।

মরিসুবা মীফম অদুদা লৈবাক ৩০ রোমগী মীহুৎশিং অমসুং মিনিস্তরশিং শরুক য়াখি অমসুং হৌজিক থেংনরিবা লাইচৎ অসিনা মরম ওইদুনা অহানবা ওইনা ভর্চুএল ওইনা মীফম পাংথোকখি। মীফম অসিগী পান্দমদি অইং-অশাগী খল কাইরকপা থেংনবা ঙম্নবা পায়খৎলিবা থবকশিং খুমাংচাউশিনহনবনি।

***