কোবিদ-১৯ লাইচৎ লাকপা অসিদা ওনলাইন্দা লাইরিক তম্বদা য়োগ য়াওহন্নবা উপ-রাস্ত্রপতি এম ভেনকিয়া নাইদুনা মহৈলোয়শঙশিংদা তকশিনখ্রে ।

মালেমগী য়োগ নুমিৎ থৌরমদা স্পিক মেকেগী দিজিতেল য়োগ অমসুং মেদিতেসন সিবিরদা উপ-রাস্ত্রপতিনা হায়খি ভারতনা মালেমদা খুদোল পীবা য়োগনা মালেম অসিদা মীওই মিল্লিয়ন কয়াগী পুন্সিদা অহোংবা পুরক্লে । নহাক্না অঙাংশিংদা য়োগ তম্বীগদবনি । অঙাংশিংগী য়োগ পোজ ১৩ য়ুনিসেফ কিদ পৱারদা য়াওরে ।

মহাক্না হায়খি, চহি ৫০০০ সুরবা য়োগগী চৎনবী অসি থিজিনবদা মসি ইচম চম্বা থবক নত্তে । মসি হকচাং, শান্তি অমসুং নুংশিনবদা য়ুমফম ওইবা সাইন্স অমনি । য়োগগী শাজেলশিং, শ্বর হোনবগী শাজেলশিং অমসুং ধ্যান তৌবগী মওংশিংনা মীওইবগী হকচাং অমসুং ৱাখলদা হিরম কয়াদা অফবা অহোংবা পুরকই ।

মহাক্না হায়খি য়োগ চিকিতসা অসি য়াম্না পাম্নরে । মসিগী লায়না কয়া লায়েংবগী ঙম্বগী মতাংদা সাইন্তিফিক ওইবা খুদম কয়া থিজিল্লি । অৱাবা মতম অসি মালেম অসিনা মায়োক্নরি অমসুং লাইচৎ অসিনা ইরাই লাইনা ঐখোয় মাইথিবা পীবা ঙমহল্লোইদবনি । ঐখোয় হকচাং অমসুং ৱাখল ফনা থমগদবনি অমসুং অমতা ওইনা থবক তৌমিন্নগদবনি ।

মহাক্না হায়খি লাইচৎনা ঐখোয়গী পুন্সিদা থোকহল্লিবা লাংতক্নবা অসি য়োগনা কোকহনবা ঙমগনি । য়োগ অসি খুদোংথিনিংঙাই ওইদবা, হকচাংদা কান্নবা য়াম্না পীবা অমনি । লাইচৎ অসিনা হকশেলগী অৱাবা পীবতা নত্তনা মীওই কয়া নুংঙাইনা হিংবদা শিংনরি অমসুং পুন্সি মহিংগা মরী লৈনবা লায়না কয়া হেনগৎলক্লে । ২০১৬দা ভারত্তা শিখিবা মীশিংগী চাদা ৬৩দি লৌনদবা লায়নাশিংনা থোকহনবনি । পুন্সি মহিংগা মরী লৈনবা লায়নাশিং ঙাকথোকপা অমসুং লাকশিনবদা য়োগ অসি য়াম্না কনবা খুৎলায় অমনি ।

মতম অসিনা পীরকপা চৈথেংশিং থেংনবা ঙমদবা অমসুং ৱাখল ৱাবনা মরম ওইদুনা নহারোলশিং মশা মথন্তা শিজবা অসিগী মতাংদা মহাক্না হায়খি অসুম্না শিবা অসি তৌরোইদবনি । ৱাখল ৱাবা, লাংতক্নবা, শাওনিংবা অসি য়োগনা ফহনবা ঙম্মি । ঐখোয়গী নহারোলশিং হকচাং , পুক্নিং-ৱাখল ফনা থম্নবা ঐখোয়না তৌফম থোকপা খ্বাইদগী ফবা থবকশিং তৌগদবনি । শীনফম অমা ওইনা য়োগ শান্নবশিং ভোলুন্তরি সর্তিফিকেসন স্কিম অসিনা য়োগ ওজাশিং সর্তিফাইদ তৌরগনি অমসুং য়োগ শানবা অমসুং শন্দোকপা হেনগৎলক্লগনি ।

উপ-রাস্ত্রপতিনা হায়খি য়োগ অসি মালেম শীনবা থুংনা হকচাং ফনবগী ইহৌ অমা ওইরক্লে অমসুং মসি হিংহনবা হায়বসি ঐখোয় পুম্নমক্কী মখা পোল্লি । ভারতকী থায়নগী চৎনবীদা য়োগদা অপনবা অমতা পীরক্ত্রে অমসুং মমল নাইদ্রবা চৎনবী অসি হিংহনবা অসি ঐখোয় পুম্নমক্তা লৈরে ।

মখা অসি মপুংফাবা ৱারোলনি :

মালেমগী য়োগ নুমিৎ অসিদা ময়ামদা ঐগী য়াইফ-পাউজেল পীজরি ।

৬সুবা মালেমগী য়োগ নুমিৎতা ভর্চুএল ওইনা নখোয়গা শরুক য়াবদা ঐ হরাওই ।

মখোয়গী ভর্চুএল সেরিজ ‘অনুভাব’ মাইপাকপগীদমক ঐনা স্পিক মেকে থাগৎলি ।

স্পিক মেকেনা ভারতকী তোঙান-তোঙানবা অরিবা চৎনবীশিং অমসুং মসিদা য়াওরিবা মমল নাইদ্রবা মীওইবগী গুনশিং অসি নহারোলশিংগী ৱাখলদা লৈহন্দুনা মগুন লৈবা লাইরিক তম্বা ফংবা ঙম্নবা থবক পায়খৎলি ।

স্পিক মেকেনা মখা তানা নহারোলশিংদা ইনাকখুল্লবা ভারতকী কলচর অমসুং মালেমগী কলচর খঙহনগনি হায়বগী থাজবা ঐনা থম্লি । হায়রিবা কলচরশিং অসিদা য়াওরিবা অফবা মগুনশিং অদুনা মখোয় অফবা মী অমা ওইবদা মতেং পাংগনি হায়না থাজবা থম্লি ।

নুংশিরবা মরুপশিং,

২০১৪দা য়ু এন্না মালেমগী য়োগ নুমিৎ অমা চৎনবা হৌখিবা অদুদা মালেমগী লুপ অসিদা য়োগগী মরুওইবশিং প্রধান মন্ত্রী মোদীনা থমখি । য়োগ অসি থায়নগী ভারতকী মমল নাইদ্রবা খুদোল অমনি । প্রধান মন্ত্রীনা হায়খি “ মসি পুক্নিং অমসুং হকচাং , ৱাখল অমসুং থবক, মীওইবা অমসুং মহৌশাগী মরক্তা নুংশিনবা অমসুং হকচাং ফনা লৈনবগী অপুনবা অমনি ।

ভারতনা পুখৎলকপা ৱাফম লৈবাক ১৭৫ অমসুং য়ু এন্না শৌগৎখি অমসুং ২০১৪গী দিশেম্বর ১১দা জুন ২১ অসি মালেমগী য়োগ নুমিৎনি হায়না লাউথোকখি । য়োগনা মালেম শীনবা থুংনা মীওই কয়াগী পুন্সি অওনবা পুরকখ্রে। য়োগ হায়বদি অপুনবা হায়বনি ,মসিনা ৱাখল অমসুং হকচাংগী অপুনবা অমা ফংহল্লি।

চহি ৫০০০ শুরবা য়োগ ইচম চম্বা শাজেল অমা নত্তে। মসি ফিলোসোফি অমনি, থকশি-খাসি অমনি । মসিনা মীওইবগী ৱাখল অমসুং হকচাং অফবা অওনবা পুরকপদা মতেং পাংই। ভাগবান কৃষ্ণনা অর্জুনদা হায়খি “সামাতভম য়োগ উচয়াতে”(য়োগ অসি থোং মান্নৈ )।

ৱাল্দ হেল্থ ওর্গনাইজেসন্না ১৯৮৪দা লৌখিবা ৱারেপ অমদা স্পিরিচুয়েল অসি হকশেলগী শরুক অমনি হায়বা য়াখি । মমাংদা হকশেল অসি ফিজিকেল, মেন্তেল অমসুং সোসিয়েল তার্মশিং খক্তা খঙনরমখি । মদুগী ৱাখল্লোন অদুদগী হৌজিক লাপথোকলে।

মরুপশিং, চহি অসিদা মালেম্না কোবিদ-১৯ লাইচৎকী খ্বাইদগী চাউবা হকশেলগী অৱাবা মায়োক্নরি। ঐখোয়গী হকচাং অমসুং ৱাখল ফনবা থম্নবা ঐখোয় অমতা ওইনা পুন্না থেংমিন্নবা দরকার ওই । লাইচৎ অসিনা ওইহল্লিবা লাংতক্নবা য়োগনা ইরাই লাইনা ফহনবা ঙম্মি।

য়োগ অসি খুদোংথিনিংঙাই ওইদবা, হকচাংদা কান্নবা য়াম্না পীবা অমনি। লাইচৎ অসিনা হকশেলগী অৱাবা পীবতা নত্তনা মীওই কয়া নুংঙাইনা হিংবদা শিংনরি অমসুং পুন্সি মহিংগা মরী লৈনবা লায়না কয়া হেনগৎলক্লে। ২০১৬দা ভারত্তা শিখিবা মীশিংগী চাদা ৬৩দি লৌনদবা লায়নাশিংনা থোকহনবনি। পুন্সি মহিংগা মরী লৈনবা লায়নাশিং ঙাকথোকপা অমসুং লাকশিনবদা য়োগ অসি য়াম্না কনবা খুৎলায় অমনি।

ঙসিদি য়োগ অসি মালেমগী খ্বাইদগী চাউবা হকচাং ফনা লৈনবা ইহৌ অমা ওইরে। মসি হিংহনবা হায়বসি ঐখোয় পুম্নমক্কী মখা পোল্লি। ভারতকী থায়নগী চৎনবীদা য়োগদা অপনবা অমতা পীরক্ত্রে অমসুং মমল নাইদ্রবা চৎনবী অসি হিংহনবা অসি ঐখোয় পুম্নমক্তা লৈরে। ওনলাইন্দা লাইরিক তম্বদা য়োগ য়াওহনগদবনি।

মসিগী সিবির অসি শীনবগীদমক ঐনা অমুক হন্না স্পিক মেকে থাগৎচরি।

ময়াম থাগৎচরি!

জয় হিন্দ!

*****