দিল্লী-এন.সি.আর. রিজন্দা থংন-থংননা য়ুহা হাখ্রবা মতুংদা, সাইন্স অমসুং তেক্নোলোজী বিভাগকী মখাদা লৈবা ওতোনোমস ইন্সতিত্যুৎ, ৱাদিয়া ইন্সতিত্যুৎ ওব হিমালয়ান জিওলোজীনা হায়রি মদুদি অসিগুম্বা নীকপসি দিল্লী-এস.সি.আর. রিজন্দা মমাংদা থোক্তবা নত্তে, অদুবু মসিনা স্ত্রেন ইনর্জীদি মফম অসিদা শেমগৎলে হায়বসি উৎলে।

মখোয়না হায়খ্রে মদুদি, সিজমিক নেৎৱার্ক অসি অদুমক ফনা লৈবনা, হৌজিক দিল্লী-এস.সি.আর.দা অমসুং অকোইবদা থোক্লিবা মাইক্রোদগীনা মাইনর ওইবা য়ুহা হাবশিং অসি রেকোর্দ তৌবা য়াই।

অদুবু য়ুহা হাবা অমনা করম্বা মতমদা, কদাইদা অমসুং শাফু কয়াম কন্না নীক্কনি (নত্ত্রগা মেগনিত্যুদ) হায়বগী মতাংদদি ঐখোয়না ময়াক শেংনা খঙবা ঙমদে, অদুমওইনমক, মমাঙগী সিজমিসিতী, স্ত্রেন বদজেৎ হোৎখিবা, এক্তিব ফোল্তশিংগী মেপ্পিংনচিংবদগী ঐখোয়না মফম অমদা থোকপা য়াবা খুদোংথীবগী চাংদি খঙবা ঙমগনি। দিল্লী-এস.সি.আর. অসি খ্বাইদগী ৱাংবা সিজমিক হজার্দ জোন (জোন ৪) অনীশুবনি হায়না লাউথোকখ্রে। মরক-মরক্তা খুদোংথীবা থোকপা য়াবা মফম অমা হায়বসি তুমিন্না লৈবা য়াই, অকনবা য়ূহা অমা লাক্কনি তাক্তবা মেগ্নিত্যুদ পীকপা য়ুহা হাবা য়াই, নত্ত্রগা ইখঙ-খঙহৌদনা অচৌবা য়ূহা অমা হাবনা খঙনিক নীক্লকপা য়াই। দিল্লী-এস.সি.আর.দা হাখিবা মেগ্নিত্যুদ পীকপা য়ুহাশিংগী মরক্তগী মে ২৯দা রোতক্তা হাখিবা য়ুহা অদু মেগ্নিত্যুদ ৪.৬ ওইখি।

হন্দক থোক্লিবা থৌদোকশিং অসি "ফোর্সোক"নি হায়না লৌবদি য়ারোই। করিগুম্বা মফম অমদা অচৌবা য়ুহা হাবা তারবদি, মদুগী হেক মমাংদা থোকখিবা অপীকপা থৌদোকশিং অদু ফোর্সোকশিংনি হায়না লৌগনি। মরম অসিনা, সাইন্তিফিক ওইনা য়েংবদা, দিল্লী-এস.সি.আর.দা নীকখিবশিং অসি মীকুপ কান্নদনা অচৌবা য়ুহা অমা হারবা মতমদতা ফোর্সোকনি হায়না লৌগনি। অদুম ওইনমক মীয়ামদা অমসুং পোৎচৈশিং মাঙ তাকহনবা য়াবা অকনবা য়ুহা অমা লাকপদি তম্বা ঙমদে। হৌজিক ফাওবদা য়ুহা হাবা হায়বসি করিগুম্বা মেকানিজম অমত্তনা মাঙজৌননা খঙদোকপা ঙদবনা, নীক্লিবা অসি অচৌবা থৌদোক অমা লাকপা য়াবগী খুদম্নি হায়বদি য়ারোই।

দিল্লী-এস.সি.আর.দা থোকখিবা মমাংগী থৌদোকশিং:

মমাংদা থোকখিবা য়ুহা হাবগী কেতালোগশিংদা উৎলে মদুদি দিল্লী-এস.সি.আর.দা ১৭২০দা দিল্লীদা মেগিনিত্যুদ ৬.৫ য়ৌনা কন্না য়ুহা হাখি; ১৮০৩দা মথুরাদা ৬.৮ হাখি, মথুরাগা নক্না ১৮৪২দা ৫.৫ হাখি; বুলান্দশাহরদা ১৯৫৬তা ৬.৭ হাখি; ফরিদবাদতা ১৯৬০দা ৬.০ হাখি; মোরাদবাদকী মনাক্তা ১৯৬৬তা ৫.৮ হাখি।

দিল্লী-এস.সি.আর.দা করিগীদমক য়ুহা হারিবনো?

দিল্লী-এন.সি.আর. রিজন্দা থোক্লিবা য়ুহা হাবশিং অসি ইন্দিয়ন প্লেৎনা অৱাংলোমদা চৎপা অমসুং য়ুরাজিয়ান প্লেৎকা শোইবা নত্ত্রগা অশোনবা জোন্দা থেংজিন্নবগী মরম্না তুংশিল্লকপা স্ত্রেন ইনর্জী থাদোক্লকপা অমসুং মরম্ননি। দিল্লী-এন.সি.আর.দা অশোনবা জোন অমসুং ফোল্ত মশীং থীঙমদনা লৈঃ দিল্লী-হরিদ্বার রিদজ, মহেন্দ্রগর-দেহরাদুন সবঅর্বান ফোল্ত, মোরাদবাদ ফোল্ত, সোনা ফোল্ত, গ্রেৎ বাউন্দরী ফোল্ত, দিল্লী-সর্গোধা রিদজ, য়মুনা রিবর লিনেয়ামেন্ত, গঙ্গা রিবর লিনিয়ামেন্তনচিংবনি। ঐখোয়না ইন্দিয়ন প্লেৎনা য়ুরাজিয়ান প্লেৎকা থেংগাইনরিবা হিমালয়ান সিজমিক বেল্ত অমসুং হিমালয়ান ৱেদজগী মখাদা অকনবা শাফু পীরিবা, চপখাইদুনা নুঙশিংবু মওং মরিল শোয়হল্লিবা প্লেৎ অমনা অমগগী মরক্তা থেংগাইনদুনা চৎলিবা খোংচৎ অসি মুন্না খঙবা মথৌ তাই। মসিগী ইনর্জী অসি অশোনবা জোনশিং অমসুং ফোল্তশিংদা মাইক্রো (<৩.০), মাইনর (৩.০-৩.৯), লাইৎ (৪.০-৪.৯), মোদরেৎ (৫.০-৫.৯), স্ত্রোং (৬.০-৬.৯), মেজর (৭.০-৭.৯) নত্ত্রগনা গ্রেৎ (> ৮.০) ফাওবদা ওইবা য়ুহাশিংগী মওংদা মখোয়গী ইনর্জীগী চাং য়েংদুনা মমিং পীদুনা থাদোরকপা য়াই। মেগ্নিত্যুদ পীকপা য়ুহাশিংদি তোয়না হাই, অদুবু মেগ্নিত্যুদ ৱাংবা য়ুহাদি য়াম্না তোয়না হাদে অমসুং তাঙনা থোকই। য়ূমকৈ অমসুং শম্পতিদা শোকহল্লিবশিংসিদি অকনবা য়ুহাশিংনি।

হিমালয়দগী দিল্লী-এস.সি.আর. ফাওবদা হাবা য়ুহাগী শাফুঃ

হিমালয়গী আর্ককী ১৯০৫দা কংগ্রা (৭.৮), ১৯৩৪দা বিহার-নেপাল (৮.০), ১৯৫০দা অসম (৮.৬), ২০০৫ মুজাফরবাদ (৬.৭), অমসুং ২০১৫দা নেপাল (৭.৮)কী আইসোসিজমেলশিংসি অৱাংদনা মেন সেন্ত্রেল থ্রস্ত (এম.তি.সি.)না অমসুং খাদনা হিমালয়ান ফ্রন্তেল থ্রস্ত (ঐচ.এফ.তি.)না কোল্লি। মসিগী য়ুহাশিং অসি দিকোলিমেন্ত সর্ফেস হায়বদি মখাদা লৈবা ইন্দিয়ন প্লেৎ অমসুং খা থংবা মাইকৈদা কিলোমিতর ১৬-২৭ লুনা এম.সি.তি.গী মখাদগী মথক্তনা ঐচ.এফ.তি.না এম.সি.তি.দগী কিলোমিতর ৫০-১০০ফাওবদা লৈরিবা হিমালয়ান ৱেদজগগী মরক্তা মখাদা থোকপা থেংগাইনবদা নান্থবদগী ওইরকপনি।

অকনবা য়ুহা হাখিবদগী ফিবম শোকপনা হিমালয়ান আর্ক্তা মমাঙদা মতম কুইনা অকনবা য়ুহাশিং হাখিদ্রবা অহোবশিং ঊই, অমসুং হায়রিবশিং অসি তুংদা অকনবা য়ুহা হারকপা য়াবা মফমশিংনি হায়না লৌনৈ। হিমালয়দা মরুওইবা সিজমিক গেপ অহুম থেংনরেঃ ১৯৫০গী অসমগী য়ুহা হাবা অমসুং ১৯৩৪গী বিহার-নেপাল য়ুহা হাবগী মরক্তা লৈবা অসম গেপ; ১৯০৫ কংগ্রা য়ুহা হাবা অমসুং ১৯৭৫গী কিনৌর য়ুহা হাবগী মরক্তা লৈবা কাশ্মির গেপ; অমসুং ১৯০৫ কংগ্রাগী য়ুহা হাবা অমসুং ১৯৩৪গী বিহার-নেপালগী য়ুহা হাবগী মরক্তা লৈবা ~ কিলোমিতর ৭০০ শাংবা সেন্ত্রেল গেপনি। অপুনবা অৱাং নোংপোক- অৱাং নোংচুপ হিমালয়ান বেল্ত অসি মেজরদগীনা গ্রেৎ ওইবা য়ুহা হাবা থোকপা য়াবা খ্বাইদগী ৱাংবা সিজমিক পোতেন্সিএল জোন ৫ অমসুং ৪দা লৈ।

থংনরিবা ফোল্ত অমসুং রিদজশিং

হিমালয়গী আর্ক্তা ফোল্ত, রিদজ অমসুং লিনিয়ামেন্তশিং শন্দোক্তুনা মশীং থীঙমদনা লৈ, দিল্লী-এস.সি.আর.গী অৱাং থংবদা গঙ্গাগী এলুবিয়ম প্লেনশিংদা লৈবা অচৌবা সেদিমেন্তশিংগী অথাবনি। দিল্লী-এস.সি.আর. অসি হিমালয়ান আর্ক্তগী কিলোমিতর ২০০ লাপ্না লৈরিবনি। মরম অসিনা, হিমালয়াগী সিজমিক বেল্ততা থোকপা মেজর ওইবা য়ুহা হাবসি দিল্লী-এস.সি.আর.দদি খুদোংথীবা পোক্নিংঙাই ওই। সেন্ত্রেল সিজমিক গেপ অমসুং অৱাং থংবা দিল্লী-এস.সি.আর.দা লৈবা গরৱাল হিমালয়দা ১৯৯১গী উত্তরকাশিগী য়ুহা হাবা (৬.৮), ১৯৯৯গী চামোলিগী য়ুহা হাবা (৬.৬), অমসুং ২০১৭গী রুদ্রপ্রয়াগকী য়ুহা হাবা (৫.৭) থোকখ্রে, অমসুং হৌজিকসু মেজর ওইবা য়ুহা হাবা অমা থোক্কদবগী ঙাইদুনা লৈরি। অসিগুম্বা ফিবম অসিনা অৱাং থংবা ভারত মসুং দিল্লী-এস.সি.আর.দা শাফু পীরকপা য়াই।

চেকশিনগদবাঃ

ফোল্ত অমসুং রিদজশিং অসিগী সবসর্ফেস স্ত্রকচরশিং, জিওমেত্রী, অমসুং দিস্পোজিসন অসি জিও-সাইন্তিফিক স্তদীশিং শীজিন্নদুনা দিল্লী অমসুং এস.সি.আর. অকোইবদা মুন্না থিজিলহৌবা তঙাইফদে। স্ত্রকচরশিং অসিগী ফাউন্দেসনশিং অসি অথোৎপা লৈপাক লৈহাউশিংনা ঙাক্তবনা য়ুহা হাবা য়াবা মফমশিংদা লৈবা বেদরোক নত্ত্রগা মরা চেৎপা লৈপাক লৈহাউশিং অসি কয়া অকাইবা পীদে। অশুম্না, সোইল লিক্বিফেক্সন স্তদীজশিং অসি লৈপাক লৈহাউগী অথাবা খঙননবা নৈনৈ। এক্তিব ফোল্তশিংবুনা দিলিনিয়েৎ তৌই, অমসুং লাইফ্লাইন স্ত্রকচর নত্ত্রগা অতোপপা ইনফ্রাস্ত্রকচরশিংবুনা নক্নবা ফোল্তশিংদগী লৌথোকপা তাই, অমসুং ব্যুরো ওব ইন্দিয়ন স্তেন্দার্দকী চৎন-পথাপকী মতুং ইন্না শেমগৎপা তাই। আই.এম.দি.না হন্দক্তা নৌনা পাঙথোকখিবা দিল্লী-এস.সি.আর.গী জিরো মাইক্রো জোনেসন স্তদীজ অসি মরুওইবা শেমগৎ শাগৎপশিংদা ইনগদবনি।

মীচম মীয়ামদা পীবা পাউজেলঃ

য়ুহা হাবা হায়বসি মাঙজৌননা খঙদোকপা ঙমদে অদুবু হিমালয়গী অমসুং দিল্লী-এস.সি.আর.গী মফমশিংদা তাবা খ্বাইদগী ৱাংবা সিজমিক পোতেসিএল জোন ৫ অমসুং ৪দা মেগ্নিত্যুদ ৬ অমসুং মসিদগী হেনবা লার্জ অমসুং গ্রেৎ ওইবা য়ুহাদি হারবা য়াই। মী শিবা অমসুং পোৎচৈ মাঙ তাকপা হন্থনবগী অমত্তা ঙাইরবা উপাইদি য়ুহা হাদ্রিঙৈদা মাঙজৌননা শেম শাদুনা লৈবনি। য়ুহা তোইনা হাগনবা লৈবাক জপানগুম্বা লৈবাকশিংনা অমাঙ-অতাসি হন্থহনবা য়াই হায়বসি খুদম-চাংদম পীদুনা উৎখ্রে। মফমশিং অসিদা চহীগী ওইনা মোক দ্রিল তৌবসি চাং নাইনা পাঙথোকপা থবক্নি। মীয়াম শরুক য়াবা, মতেং পাংনবা অমসুং ৱাখল লৌশিং শন্দোকপনা মসিবু মায় পাকহন্নবগী মরু ওইবা মচাক্নি। তৌবা য়াবা চেকশিন থৌরাং অমসুং শেম-শাবশিং মখাদা পীরিঃ

ক) য়ুহা হাদ্রিঙৈ মমাংদা।

১. য়ুহা হাবগী মোক দ্রিল/বিল্দিং/ য়ুম শাবদা

• চহী খুদিংগী য়ুহা হাবগী মোক দ্রিল পাঙথোকপা
• য়ুহা হাবদগী ঙাকথোকপা ঙমগদবা মওংদা অনৌবা বিল্দিং শাবা অমসুং হৌজিক লৈরিবা স্ত্রকচরশিং শেমজিনবা

২. মীওই অমনা শেম শাগদবশিগ্ন (ইমুং-মনুংদা নত্ত্রগা সোসাইতীদা)

• পুন্না ফম্মিন্নবা অমসুং য়ুম্থংনবগী, সোসাইতীগী/কোলোনী, নক্নবা অমসুং নুংশিবশিংগী, ইমর্জেন্সী নম্বরচচিংবশিং ইশিনবা
• চানবা পোৎলম (বিস্কিৎ পেকেৎনচিংবা), ঈশিং, হিদাক লাংথক অমসুং ফার্স্ত এদ সপ্লাই, ফ্লাস লাইৎ, তঙাইফদবা ফিরোল অমসুং ইশাগী চঙগদবা পোৎচৈ য়াওবা বেক অপ সপ্লাই কিৎ অমা থম্বা।
• ফার্স্ত এদ কিৎ চাং নাইনা শিনবা।
• ইমুং মনুংশিংনা ইরাই লাইনা উন্নবা য়াবা মফম অনীগুম্বা থম্বা
• সোসাইতী/কোলোনী/স্ত্রীৎতা কমন ওইবা মফম অমা লৈনবা, থোং থাক্নবা অমসুং ফার্স্ত এদকীদমক থম্বা

খ) য়ুহা হারিঙৈ মতমদা

• লৈমায় নীকপসি মিনিৎ অমা ফানা নীক্কন্দবনা পুক্নিং ফাথনা লৈবীয়ু
• য়ূম মনুংদাঃ য়ুম মনুংদা লৈবীয়ু- "পাকথবা", "খনবা" অমসুং "য়ানবা"। নশা অদু মখোং চেৎনা লৈবা ফর্নিচরগী মখাদা লৈবীয়ু, কোক অমসুং হকচাংগী মথক থংবশিং ঙম্লিবা মখৈ খুন্দুনা থমগদবনি। ফর্নিচরদা য়ানগদবনি। মখোং চেৎপা ফর্নিচর অমত্তা লৈত্রবদি, ফক্লাং নত্ত্রগা থোংজিন্দা চঙশিন্দুনা ফক্লাংদা নঙ্গলনা ঙাথদুনা লৈগদবনি, খুউদু থবাক্তা পুশিনগদবনি অমসুং কোক খুমজিনগদবনি।
• মিংশেল অমসুং থোংনাও ময়াদগী লাপ্না লৈগদবনি।
• বিল্দিংদগী নীক্লিঙৈদা থোরক্লোইদবনি।
• মপান্দা লৈবা মতমদাঃ বিল্দিংগুম্বা, থোং অমসুং মথক্তা তিংবা মৈগী তরাগী মখাদগী লাপ্না থৈদোক্তুনা থুনা অহাংবা মফমদা লৈগদবনি।
• গারী থৌরিঙৈ মতমদাঃ লম্বী নাকন্দা মরুওইনা থোং, ওবর পাস, তন্নেল অমসুং মথক্তা পুবা মৈগী তরা লৈতবা অহাংবা মফম অমদা খুদক্তা খামগদবনি। গারী মনুংদা ঙম্লিবমখৈ নেম্না লৈগদবনি।
• করিগুবা অতেক-অকাই মরক্তা লৈবা তারবদিঃ
• মৈখেৎ/লাইতর খেৎলোইদবনি
• তঙাই ফদ্রবদি হকচাং নীক্লোইদবনি অমসুং উফুল তৈথোক্লোইদবনি, মরমদি মদুনা নিংশা হোনবদা অকাইবা পীবা য়াই।
• য়ারবদি রুমাল নত্ত্রগা ফিনা মায় খুমজিনগদবনি
• পাইপ/ফক্লাংদা য়ৈদুনা কনবা লাকপা কাংবুনা তানবা হোৎনগদবনি।
• মরম চাদনা লাউরোইদবনি মরমদি মসিনা নহাক্কী হকচাং চোকথহল্লক্কনি অমসুং অমোৎপা উফুলশিং নিংশা হোনবদা চঙখিবা য়াই।

গ. য়ুহা হাখ্রবা মতুংদাঃ

• পুক্নিং তপথনা লৈগনি।
• চেকশিন্না চত্তুনা নহাক্কী অকোইবদা মখোং চেত্তবা অমসুং কাইগনবা পোৎচৈ লৈব্রা য়েংউ।
• নহাক্কী অকোইবদা লৈবশিংদা ফার্স্ত এদ পীদুনা মতেং পাংউ
• গ্যা, ঈশিং, অমসুং ইলেক্ত্রিক লাইনশিং য়েংশিল্লু। করিগুম্বা য়ুবা য়াওরবদি নত্ত্রগা য়ুরম্বা য়াই হায়বগী চিংনবা লৈরবদি মেনদা থিংজিনগনিঃ করিগুম্বা গ্যাস মনম নত্ত্রগা চৎপগী মখোল তারবদি অমসুং থিংজিনবা য়াদ্রবদি খুদক্তা মফমদু থাদোক্কনি। মরী লৈনবা কাঙবুদা হোরিবদুগী মতাংদা পাউ পীগনি।
• অতেকপা বিল্দিংশিংগী মনাক্তগী লাপ্না লৈগনি।
• রেদিও/তি.ভি.দা খুদক্কী ওইবা পাউশিং অমসুং অহেনবা চেকশিন থৌরাংগী পাউ তাগনি।

ঘ. শীজিন্ননবা পোৎচৈ পৈশিনবাঃ

• য়ুমদা নুমিৎ তরেৎনিরোম কোন্নগদবা মওংদা পোৎচৈ পৈশিন্দুনা থমগনি।
• মফমদু থাদোকপা মতমদা দিজাস্তর সপ্লাই কিৎগী পোৎচৈশিং শেমজিনগনি। হায়রিবশিংসি চেৎনা, লাইনা পুবা য়াবা বেকপেক, দফল বেগ নত্ত্রগা মখুম য়াওবা ত্রাস কন্তেনরদা থমজিনগনি।

অতোপ্পা কান্নবশিং অমসুং খঙজিনগদবা হীরমশিং

• পুম্লোইদবা নুমিৎ তরেৎনিরোম চৎকদবা ঈশিং অমসুং চানবা।
• মী অমগী হোংনবা ফি অমা অমসুং ব্লাঙ্কেৎ অমা নত্ত্রগা স্লীপীং বেহ অমা
• ইমুংগী শীজিন্ননবা হিদাক য়াওবা ফার্স্ত এদ কিৎ অমা
• বেতরীনা চলাইবা রেদিও, ফ্লাস লাইৎ অমসুং অহেনবা বেতরী মশীং হেন্না য়াওবা ইমর্জেন্সী তুল কিৎশিং।
• অঙাং, অহল নত্ত্রগা নাম্ম-শোইরবা ইমুংগী মীওইশিংগী তঙাইফদবা পোৎলমশিং
• থোঙগী মথক্তা অরূম্বা পোৎশক থম্লোইদবনি।
• কোক্তু বল্ব/লাইৎ/লেম্পকী মখাদা তুম্লোইদবনি।

[দা. কলাচান্দ সৈন, দিরেক্তর ৱাদিয়া ইন্সতিত্যুৎ ওব হিমালয়ান জিওলোজী, দেহরাদুননা দিল্লী-এস.সি.আর. রিজন্দা থোকপা য়ুহা হাবশিংগা মরী লৈনবা ৱাহংশিংগী পাউখুম পীরি।

ইমেলঃ kalachandsain7[at]gmail[dot]com

*****